लहना न्यूज | ने.सं. ११३९ गुंलागा पारु, सापारु (१६ अगष्ट, २०१९), शुक्रवाः

नेपाल कम्यूनिष्ट पार्टी (नेकपा) प्रदेश नं. ५या सचेतक भूमेश्वर ढकालया छेँय् बम मूगु दु ।

 

 

ढकालया सैनामैना नगरपालिका ७य् च्वंगु छेँय् वंगु चान्हय् स्वंगः बम मूगु खः ।

 

 

इलाका प्रहरी ज्याकू, बुटवलया डिएपी भीमलाल भट्टराईं ढकालया छेँय् वगु चान्हय् बम मूगु पुष्टि यानादीगु दु ।

 

 

बम ढकाल, वय्कःया मां अबु द्यनीगु कोथा व उमिसं छ्यला वयाच्वंगु लु १ ज ४५६ ल्याःया कारयात लक्षित यानाः मुइकूगु प्रहरीं न्ह्यथंगु दु । विष्फोटपाखें कारया ल्यूनेया ब्वय् सामान्य क्षति जूसां नं कोथाय् धाःसा छुं नं खति मजुल । कयेकूगु बम विष्फोट मजूगुलिं कोथाय् खति मजूगु धाःगु दु ।

 

 

विष्फोटया इलय् ढकालया बाः मां व जहान छेँय् द्यनाच्वंगु खः । सचेतक ढकाल धाःसा छेँय् मदु । स्वास्थ्यय् समस्या खनेदयेवं वय्कः छुं ई न्ह्यःनिसें यलया मेडिसिटी अस्पतालय् वासः याका च्वनाच्वंगु दु । प्रमुख सचेतक ढकाल प्रदेशसभाया गाडी न्याःगु ज्याय् अनियमितता जूगु प्रकरणय् दुथ्याःम्ह खः ।

 

 

मोटरसाइकल वयावःपिं स्वम्हेस्यां बम कयेकाः बिस्युंवंगु प्रत्यक्षदर्शीतसें धाःगु दु । डिएसपी भट्टराईं घटनायात कयाः थप अनुसन्धान जुयाच्वंगु जानकारी बियादीगु दु ।

नृपेन्द्रलाल श्रेष्ठ | गुंलाथ्व १३ ११३९ (अगष्ट १४ २०१९)

येँ महानगरपालिकाया मेयर विद्यासुन्दर शाक्यं थःगु क्षेत्र दुने दुगु सामूदायिक ब्बनेकुथिया भवनय् छगु हे रंग यायेगु योजना न्ह्यने हयेगु धका धयादिगु दु । येँ महानगरपालिका दुने पदस्थापन जुगु माध्यामिक विद्यालय स्थायी शिक्षकया सपथग्रहण ज्याझवलय् न्ववाना दिसे मेयर शाक्यं थःथे धयादिगु खः । 

 

 

‘जिमिसं येँ महानगरपालिका दुनेया ब्बनेकुथिइ शैक्षिक गुणस्तर जक मखु भौतिक संरचनाय् नं एक रुपता हयेगु प्रयासय् दु धका धयादिसे,’ मेयर शाक्यं, ‘थुकिइया लागि महानगरपालिका दुने दुगु  ९१ गु सामूदायिक ब्बनेकुथिया भवनमा छगु हे खालया रंगरोगन यायेगु तयारी लगे जुयागु दु धका धयादिगु खः ।

 

 

वयकलं थुकिगु दक्को खर्च महानगरपालिकां हे यायेगु जुइ धका जानकारी न बियादिगु दु । ‘जिमिसं सामूदायिक ब्बनेकुथया रंगरोगन यायेगु, खेल मैदान निर्माण यायेगु, हरेक ब्बनेकुथिइ सिमा पिइगु, चःबि व लःया व्यवस्था यायेगु लगायतया शीर्षकय् लागि १० करोड ध्यवा छुटे यानागु दु धयादिस नाप ‘निजी ब्बनेकुथियात ब्बः बिइगु मखु सामूदायिक ब्बनेकुथियात गुणस्तरय् सुधार याना विद्यार्थीपिन्त सामूदायिक पाखे आकर्षित यायेमाः धका न धयादिसे थःथे याःसा निजीविद्यालयय् ब्बना च्वंपि ल्या स्वतः घटे जुइ ।’ 

 

 

उगु ज्याझ्वलय् येँँ महानगरपालिकाया निमित्त शिक्षा अधिकारी तारापती खरेलं सपथ ग्रहणयाका दिसे शिक्षाय् गुणस्तर सुधारय् ध्यान बिइत इनाप न यानादिगु दु ।

 

 

अथेहे ज्याझ्वलय् शिक्षा विभागया अधिकृत मोती भट्टराई न पदस्थापन जुपिं शिक्षकपिन्त महानगरपालिका दुने समग्र शैक्षिक गुणस्तरयात थकायेत व बालागु लिच्वः हयेगु भूमिका म्हितेत इनाप न यानादिगु खः । 

 

लहनान्युज | गुंलाथ्व १४ ११३९ (अगष्ट १४ २०१९)

लुँया भाः थौ बुधवाः तोलाय् न्ह्यसः कुहाः वःगु दु । थौं लुँया भाः छगु तोलाया ७० द्धः व स्वसः धका नेपाल सुनचाँदी व्यवसायी महासंघं धाःगु खः ।

 

 

मंगलवाः तोलाया द्धःछि थहा वना लुँ तोलाया ७१ द्धः थ्यंगु खः । 

 

 

अन्तर्राष्ट्रिय बजारय् लुँ थौं बुधवाः प्रति औँस झीन्यासः डलर थ्यंगुु खः ।

 

 

अन्तर्राष्ट्रिय बजारय् भाः वः कुहा वःगुलि नेपालय् न कुहा वःगु खः । अथेहे, वः छगु तोलाय् न्यातका कुहा वया च्यासः व स्वीतकां थौं कारोबार जुगु दु ।

 

 

 

लहनान्युज | गुंलाथ्व १४ ११३९ (अगष्ट १३ २०१९)

कामपा २२ वडास्थित तेबहाः (राजकीर्ति महाविहार) दुने च्वंगु अक्षोभ्य तथागत (मूगःद्यः) या देगः पुनर्निर्माण सिधःगु लसताय् म्हिगः प्रसाद ग्रहण लिसें पुनर्निर्माण ज्याय् ग्वाहालि याःपिंत हनेगु ज्या जुल । 

 

 

ज्याझ्वलय् येँ महानगरपालिकाया मेयर विद्यासुन्दर शाक्यं तेबहाः दुने आः आगंछेँ व पाःलाःद्यःया देगः नं पुनर्निर्माण याना छ्वयेगु ग्वसाः दुगुलिं याकनं हे थ्व ज्या नं न्ह्याका छ्वयेत इनाप यानादिल ।

 

वय्कलं तेबहाः दुने च्वंगु थीथी सम्पदाया पुनर्निर्माण सिधयेधुंकाः पुनर्निर्माण यायेमाःपिं मेमेगु बहाःबहीयापिंत नं पुनर्निर्माण वा जीर्णोद्धारया बारे जानकारी बियाः ग्वाहालि यायेत नं

इनाप यानादिल । लिसें वय्कलं पुनर्निर्माण लिपा सम्पदास्थल जःखः हरियाली कायम यायेत नं इनाप यानादिल । 

 

 

 

 

श्री संकटा संरक्षण तथा व्यवस्थापन समितिया ग्वसाः व महाविहारया चक्रेश्वर मोतिकाजी वज्राचार्यया सभापतित्वय् जूगु उगु ज्याझ्वलय् समितिया छ्यांज्ये माणिकरत्न स्थापितं देगः पुनर्निर्माणया ज्याय् ६७ लाख चाःचू खर्च जूगु व उकी येँ मनपा लिसें सांसद कोषपाखें ४५ प्रतिशत व सर्वसाधारणपाखें ५५ प्रतिशत ग्वाहालि याःगु जानकारी बियादिल । 

 

 

कामपा शहरी योजना आयोगया उपाध्यक्ष सरोज बस्नेतं नं न्ववानादीगु उगु ज्याझ्वलय् प्रतिनिधिसभाया सांसद कृष्णगोपाल श्रेष्ठ, प्रदेश सभाया सांसद डा. अजयक्रान्ति शाक्य व राजेश शाक्यया नं उपस्थिति दुगु खः ।    

 

लहना न्यूज | ने.सं. ११३९ गुंलाथ्व त्रयोदसि (१३ अगष्ट, २०१९), मंगलवाः

नेपाल विद्युत प्राधिकरणं वंगु आर्थिक दँय् ७गू अर्ब २०गू करोडतका खुद नाफा कमेयाःगु दु ।

 

नेपालय् मतया उत्पादन नापं वितरणय् यकःति अधिकार दुगु प्राधिकरणं थगुनेया तुलनाया १४९गू प्रतिशतं नाफा अप्वः कमेयाःगु खः ।

 

आर्थिक दँ २०७४/७५य् २गू अर्ब ९०गू करोडतका नाफा कमेयाःगु प्राधिकरणं २०७५/०७६य् ७गू अर्ब २०गू करोडतका कमेयाःगु खः । प्राधिकरणया नाफा दच्छिइ हे ४गू अर्ब ३०गू करोडं अप्वःगु खः ।

 

थगुने प्राधिकरणं चुहावट नं म्हो यानागु दावी याःगु दु । प्राधिकरणयाकथं थगुने मुक्क मतया आपूर्तिइ १५गू प्रतिशत जक चुहावट दुगु खः । गुगु थगुने २०गू प्रतिशत दुगु खः ।

 

वंगु स्वदँय् चुहावट १०गू प्रतिशतं म्हो जूगु प्राधिकरणं जानकारी ब्यूगु दु । थगुने प्राधिकरणं सरकारया धुकुतिइ १५गू अर्ब ५९गू करोडतका मुंकाब्यूगु दु । प्राधिकरणं सावां, ब्याज व रोयल्टी यानाः मुक्कं १५गू अर्ब ५९गू करोडतका लःल्हाःगु खः ।

 

थगुने नेपाःया ४५गू लख जनसंख्याय् मतया पहुँच थ्यंगु खः । मतया पहुँच नं १०गू प्रतिशतं अप्वःगु प्राधिकरणं जानकारी ब्यूगु दु ।

 

अथे हे, थगुनेतक नेपालय् मतया उत्पादन ७गू अर्ब ५५गू करोडतका युनिट अर्थात किलोवाट आवर दुगु खः । थुकी प्राधिकरणं ३४गू प्रतिशत, निजी उत्पादकया २९गू प्रतिशत व भारतपाखें आयात याःगु मतया हिस्सा ३७गू प्रतिशत दुगु खः । प्राधिकरणं थगुने ३७गू अर्ब १६गू करोडया मत न्याःगु खः । थुकी भारतपाखें जक २३गू अर्ब ३गू करोडतकया मत न्याःगु खः । ल्यंदुगु नेपाःया हे निजी उत्पादकपाखें न्याःगु खः ।

Pages