Display Style:
Column Style
न्हूसतकय् जिम्न्यास्टिक ब्वज्या
लहनान्युज | अनलाथ्व चर्तुदशी ११३८ ( मे २८ २०१८ )
“सक्रिय जुयाच्वने, स्वस्थ्य जुयाच्वने, स्वतन्त्र जुयाच्वने व ल्याय्म्ह महसूस यानाच्वने” धइगु नारा बियाः ‘जिम्न्यास्टिक फर अल अभिबृद्धि तथा समन्वय क्लब’पाखें जिम्न्यास्टिक फर अल परियोजना अन्तरर्गत येँया न्हूसतकय् जिम्न्यास्टिक ब्वज्या याःगु दु ।
येँया न्हूसतकय् च्वंगु जुद्ध शालिकया पश्चिम व दक्षिण दिशाय् थ्यंमथ्यं नीन्यासःम्ह स्वयां अप्वः विद्यार्थी पिनिगु सहभागिताय् थुगु महोत्सव जूगु खः । थुगु महोत्सवय् नीन्यागू स्वयां अप्वः ब्वनेकुथिया ब्वँमिपिंलिसें येँ व यलया ‘वल्ड एज पिपुल’पाखें नं जिम्न्यास्टिकया ब्वज्या याःगु खः ।
जिम्न्यास्टिक फर अल अभिबृद्धि तथा समन्वय क्लबया नायः ज्ञानकाजी महर्जनया सभाध्यक्षताय् जूगु उगु ज्याझ्वलय् येँ महानगरपालिकाया प्रमुख विद्यासुन्दर शाक्य मूपाहांकथं झायादीगु खःसा नेपाल जिम्न्यास्टिक संघया नायः ध्रुव बहादुर प्रधान, जिएफए जर्मनीया क्रिस्टियन क्लिन्के, जुता कोसर, जाइकाया भोलिन्टर कोअर्डिनेटर तेपेइ तानाका, महानगरीय प्रहरी टेकूया प्रहरी नायव उपरीक्षक मोहन कुमार थापालिसेंया उपस्थिति दुगु खः ।
ज्याझ्वःया कजि प्रकाश श्रेष्ठं लसकुस यानादीगु उगु ज्याझ्वलय् नेपाल जिम्न्यास्टिक संघया नायः ध्रुव बहादुर प्रधानं विदेशी सहभागीपिन्त लुमन्ति चिं लःल्हानादीगु खः ।
जिम्न्यास्टिक फर अल परियोजना राष्ट्रिय खेलकूद परिषदया प्राविधिक ग्वाहाली जर्मनीया रेन्हेस्सिस्चर टर्नरबन्ड जिएफएया विशेषज्ञ पिनिगु उपस्थिति दुगु खः ।
निःशुल्क खैशिविर
लहनान्युज | अनलाथ्व चर्तुदशी ११३८ ( मे २८ २०१८ )
नेपालक्षयरोग निवारण संस्था, ख्वपं थुगुसी ‘गं ल्वगित मालाः वासः याय्गु’ ज्याझ्वःअन्तर्गत ख्वपया ब्यासीइ च्वंगु बासु माध्यामिक विद्यालयया पुलांगु भवनय् निःशुल्क खै शिविर याःगु दु ।
संस्थाया सभापति राम सिख्वःया सभाध्यक्षताय् जूगु उगु शिविरय् मुक्कं ७५म्हेसिगु खै परीक्षण याःगु खःसा निम्हे सिगु ‘पोजिटिभ’ खनेदुगु खः । राष्ट्रिय क्षयरोग केन्द्रया सहकार्यस न्ह्याःगु गंल्वय् नियन्त्रण अभियानय् आःतक याःगु निःशुल्क खै शिविरय् स्वम्हे सिगु पोजिटिभ लूगु संस्थाया निवर्तमान सभापति बाबुकाजी श्रेष्ठं जानकारी बियादीगु दु ।
सभापति सिख्वः नं गंल्वय् नियन्त्रयण याय्गु अभियानय् विद्यालय स्तरीय व समुदायस निःशुल्क खै शिविर न्ह्याकेगु नितिं संस्थाअलग हे पुचःदय्काः ज्या यानाच्वंगु जानकारी बियादिल ।
नेपाल लिपि स्यनेज्याःक्वचाल
लहनान्युज | अनलाथ्व त्रयोदशी ११३८ ( मे २७ २०१८ )
इतुम्बहाः सुधार समिति व येँ महानगरपालि २४ वडा समितिया मंकाः या ग्वसालय् क्वचाःगु नेपाल लिपि स्यनेज्याःय् ताःलापिन्त दसिपौ व मेडल इनेगु ज्या जुल ।
नेपाल लिपि गुथिं न्हयाकूगु नेपाल भाषाः प्रचलित लिपि स्यनेज्याः लच्छियंक न्ह्यागु खः । चैत २० गते सुरु जुगु स्यनेज्याःलय् प्रशिल शाक्य न्हाप, निलिम महर्जन ल्यू व सदिक्षा शाक्य लियांल्यु जुल । न्हाप, ल्यू व लियांल्यु लापिन्त लुँ–वह ज्या पसःपाखेँ ग्वाहालि जुगु वहःया तक्मां पुरस्वृmति यागु दु ।
लिपि स्यनेज्याःय् ताःलापिं फुक्कसित प्रदेश नं ३ या सभासद् राजेश शाक्य, २४ वडाया नायः बालवृmष्ण श्रेष्ठ, नेपाल लिपि गुथिया नायः निरञ्जन ताम्राकारलगायत व्यक्तित्वपाखेँ दसिपौ, तक्मा व लिच्व पौँ देछायादिल ।
उगु ज्याझ्वलय् नेपाल लिपि गुथिया स्यनामि शरद कसाःजुयात इतुंबहाः सुधार समितिया नायः मनोज शाक्यं हनापौ देछाया दिल । अथेहे स्यनेज्याय् ब्वतिकयादिपिं सकल ब्वमिपिनिगु पाखें न स्यनामियात बुद्धया मूर्ति देछायदिगु खः ।
नेपाल लिपि स्यनेज्याय् विशेष ग्वाहालि यानादिपिं नेपाल लिपि गुथिया पुलाम्ह नायः प्रतापमान शाक्य, दुजःपिं पुष्परत्न ताम्राकार, लुमिन ताम्राकार व इतुंबहाः मिसा पुचःया नकीं भुवनहेरा शाक्ययात नं लुमन्ति चिं देछाया सम्मान याय्गु ज्याः जुल ।
इतुंबहाः सुधार समितिया नायः मनोज शाक्यं थ्वहे वइगु १५ गतेनिसेँ लच्छियंक रञ्जना लिपि स्येनज्या न्हयाइगु जानकारी बिया दिल ।
‘बागमती सभ्यता उदभव व विकास’ बिमोचन
नृपेन्द्रलाल श्रेष्ठ | अनलाथ्व द्धादशी ११३८ ( मे २६ २०१८ )
नेपालभाषा एकेदेमिया ग्वसलय् थौं छगु ज्याझ्वः दथुइ संस्कृतिविद् डा.साफल्य अमात्यं च्वयादीगु ‘बागमती सभ्यता उदभव व विकास’ नांया अनुसन्धानात्मक सफू येँ महानगरपालिकाया मेयर बिद्या सुन्दर शाक्य व किपू नगरपालिकाया मेयर रमेश महर्जन मंकाः कथं उलेज्या यानादीगु खः ।
एकेदेमिया सदस्य सचिव मल्ल के सुन्दरं लसकुस यानादीगु उगु ज्याझ्वलय् येँ महानगरपालिकाया मेयर बिद्या सुन्दर शाक्य, किपू नगरपालिकाया मेयर रमेश महर्जन, सताब्दी पुरुष सत्यमोहन जोशी व वरिष्ठ साहित्यकार यज्ञरत्न धाख्वा पिन्स नुगः खँ तयादीगु खः ।
शशिकला मानन्धरं न्ह्याकादीगु उगु ज्याझ्वलय् सफूया बिषयलय् प्रा. प्रेमशान्ति तुलाधर समिक्षा यानादीगु खः ।
स्वम्ह नेवाः मिसा पत्रकार सगरमाथाय्
लहनान्युज | अनलाथ्व नवमी ११३८ ( मे २३ २०१८ )
छवाःया दुने स्वम्ह नेवाः मिसा पत्रकारपिं विश्वया दक्ले तजाःगु च्वापुगुँइ थ्यंगु दु । वय्कःपिं खः गोरखा जिल्लाय् छेँ जुया थौंकन्हय् कारोबार न्हिपौया फोटो पत्रकार पुर्णिमा श्रेष्ठ, यल जिल्लाय् छेँ जुया मेघा टेलिभिजनय् ज्या यानादीम्ह पत्रकार कल्पना महर्जन व येँय् छेँ जुया नेपाल टेलिभिजनया पत्रकार रोजिता बुद्धाचार्य ।
वय्कःपिं मध्ये दक्ले न्हापां पुर्णिमा श्रेष्ठ सगरमाथाय् थ्यंगु खः । सगरमाथाय् दक्ले न्हापां थ्यंम्ह फोटो पत्रकार नं वय्कः हे खः । वंगु शनिवाः श्रेष्ठ सगरमाथाया च्वकाय् थ्यंगु खः ।
वय्कलं अन नेपाःया मां धकाः मिसापिनिगु किपाः ब्वज्या तकं यानादीगु खः । उगु हे कथं कल्पना महर्जन व रोजिता बुद्धाचार्य बुधवाः सुथय् सगथमाथाया च्वकाय् थ्यंगु खः ।
वय्कःपिं सगरमाथाया बेसक्याम्पंनिसें हे नेपाल टेलिभिजनपाखें प्रत्यक्ष प्रशारण यायां हे वानादीगु खः ।
कल्पना व रोजिता नापं वय्कःपिनिगु पुचलय् मुक्कं याना खुम्ह मिसापिं पत्रकारत दुथ्याःगु खः ।
न्यान्हुया दुने स्वम्ह मिसापिं पत्रकारपिं सगरमाथाया च्वकाय् थ्यंगु थ्व छगू कथंया न्हूगु रेकर्ड जुयाबिउगु दु ।
