Display Style:
Column Style
पुनर्निर्माण सम्बन्धि जागरण मंचया अन्तक्र्रिया
लहनान्यूज | सिल्लागा सप्तमि ११३७ (फेब्रुअरी १८ २०१७)
नेवाः जागरण मञ्चं सम्पदा पुनर्निर्माण, एकीकृत बस्ती पुनर्निर्माण अभियान व सतक विस्तारयात कयाः छगू अन्तरक्रिया ज्याझ्वः याःगु दु ।
ज्याझ्वलय् नेवाः न्ह्यलुवाः मल्ल के सुन्दरं तःभुखाय् लिपा नेवाःतयगु नितिं सम्पदा पुनःनिर्माण, एकीकृत बस्ती व सतक विस्तारया सवाल तःधंगु हाथ्या जुयावयाच्वंगु धयादिल । वयकलं नेवाः बस्ती ल्यंकातयेगु अभियानय् सकलसित ब्वति कायेत इनाप यानादिल ।
बरिष्ठ इन्जिनीयर सन्तोष श्रेष्ठं सम्पदा पुनर्निर्माण पुलांगु म्हसीका ल्यंकाः न्हापाया हे स्वरुपय् निर्माण यायेमाःगु खँय् बः बियादि । नापं वयकलं स्वनिगलय् जुयाच्वंगु सतक विस्तार छुकिया नितिं व छाय् धैगु खँय् बांलाक अध्ययन मदुगुलिं हे थुकथंया समस्या ब्वलनाच्वंगु बिचाः तयादिल ।
ज्याझ्वलय् पवित्र बज्राचार्य, मरुसतः पुनर्निर्माण अभियानया कजि विरेन्द्रभक्त श्रेष्ठ, सम्पदा संघर्ष समितिया दुजः गणपतिलाल श्रेष्ठ, उपत्यका सतक विस्तार पीडित संघर्ष समितिया कजि सुमन सायमि लिसें नं थःथःगु नुगः खँ तयादीगु खः ।
ज्याझ्वलय् नेवाः जागरण मञ्चया नायः सुजीब बज्राचार्यं लसकुस यानादीगु खः ।
ग्वाहालि पुचलं रामशेखरयात नापलात
लहनान्यूज | सिल्लागा पंचमी ११३७ (फेब्रअुरी १५ २०१७)
नेवाः जागरण रामशेखर ग्वाहालि पुचःया दुजःपिन्सं नांजाःम्ह निर्देशक, साहित्यकार व कलाकार रामशेखर नकःमियात नापलानाः वयकःया उसाँयया बारे न्यनेकने याःगु दु ।
नेवाः जागरण रामशेखर ग्वाहालि पुचःया सल्लाहकार मल्ल के. सुन्दरया नेतृत्वय् वंगु पुचलं भाजु नकःमिया उपचार यानाच्वंपिं चिकित्सकपिंके वयकःया उसाँय् सम्बन्धय् जानकारी काःगु खः ।
चिकित्सकपिन्सं नकःमिया जव न्हासय् क्यान्सर जूगु व वासः यायेगु नितिं वइगु फागुन ८ गतेनिसें ‘रेडियम’ यायेत्यनागु जानकारी ब्यूगु खः । लिसें चिकित्सकपिन्सं नकःमिं नयेगु इच्छा मयाःगुलिं वासः यायेत समस्या जुयाच्वंगु खँ धाःगु खः ।
नेवाः न्ह्यलुवाः मल्ल के. सुन्दरं रामशेखर नकःमिया छेँजःपिन्त नापलानाः वासः यायेगु नितिं माःगु कथंया आर्थिक ग्वाहालि यायेगु बचं बियादीगु खः । वयकलं कलाकार नकःमिया छेँजःपिन्त छुं नं कथंया आर्थिक च्यूताः मकायेत हःपाः नं बियादीगु खः ।
थौं मतिनाया दिं, भ्यालेन्टाइन डे
लहनान्यूज | सिल्लागा चतुर्थी ११३७ (फेब्रुअरी १४ २०१७)
थौं फेब्रुअरी १४, हलिंन्यंक भ्यालेन्टाइन डे हनाच्वंगु दु ।
मतिनाया दिं कथं काइगु थुगु दिवस विशेष यानाः थौंकन्हय् ल्यायम्ह पुस्ता दथुइ लोकं व्हानाच्वंगु दु । लिपांगु इलय् वयाः पाश्चात्य संस्कृति कथं काइथु थुगु दिवस नेपालय् नं लोकं व्हाना वनाच्वंगु दु ।
थौंया दिनय् थः मतिनामियात मतिनाया चिं कथं उपहार बीगु व यःम्हेसित मतिनाया प्रस्ताव तयेगु नं याइ । विशेष कथं थः मतिनामियात ह्याउँगु स्वां बीगु जूगुलिं थौंया दिनय् स्वांया ब्यापार याइपिनिगु नितिं नं विशेष दिं जुयाच्वनी ।
सन् २६९ई रोमनं भ्यालेन्टाइन डेया शुरुवात जूगु खः । मतिनाया दिंकथं लसतां हनीगु थुगु दिंया इतिहास धाःसा दुःखान्त बाखंलिसे स्वानाच्वंगु दु ।
तत्कालीन रोमन सम्राट क्लाउडियस निम्हम्हं थः सैनिकतयत मतिना अले इहिपा यायेगुलिइ रोक तःगु खः । मतिना व इहिपां यानाः सैनिक कमजोर जुयाः युद्धलिसे सम्बन्धित गोप्य सुचं पिहांवनीगु सम्राट क्लाउडियसया बिचाः जुयाच्वन ।
तर सम्राटया नियमया विरोध यासें रोमनया पादरी सन्त भ्यालेन्टाइनं सैनिकया इहिपा याकाबीगु यात । सम्राटं सन्त भ्यालेन्टाइनयात ज्वनाः मृत्युदण्डया सजायँ न्यंकाः कुनाबिल ।
जेलय् च्वंबलय् जेलरया मिखां मखंम्ह म्ह्यायलिसे सन्त भ्यालेन्टाइनयात मतिना जुल । थःत मृत्युदण्ड बी न्ह्यः भ्यालेन्टाइनं लभ फ्रम योर भ्यालेन्टाइन धकाः च्वयाः थः मतिनामि जेलरया म्ह्याययात मतिनाया पौ ब्यूगु जुयाच्वन ।
थःत मृत्युदण्ड बी न्ह्यः भ्यालेन्टाइनयात थःगु निगलं मिखा थः मतिनामियात बियाथकल । सन्त भ्यालेन्टाइनयात २६९या फेब्रुअरी १४ कुन्हु मृत्युदण्ड ब्यूगु खः ।
सन्त भ्यालेन्टाइनं मतिनाया लागिं ब्यूगु उगु योगदान व त्यागयात हे लुमंकाः हलिंन्यंक दँयदसं १४ फेब्रुअरीइ मतिनाया दिं कथं भ्यालेन्टाइन डे हनेगु याःगु खः ।
रामशेखरया ग्वाहालिया नितिं ग्वाहालि पुचः नीस्वन
लहनान्यूज | सिल्लागा तृतीया ११३७ (फेब्रुअरी १३ २०१७)
क्यान्सर ल्वयया वासः याकाच्वंम्ह नांजाःम्ह साहित्यकार, कलाकारलिसें निर्देशक रामशेखर नःकमियायात ग्वाहालि यायेत नेवाः जागरण मञ्चं ग्वाहालि पुचः नीस्वंगु दु ।
सांसद भिमसेनदास प्रधान, नेवाः न्ह्यलुवाः मल्ल के. सुन्दर, प्रा.डा. चुन्दा बज्राचार्यया उपस्थितिइ जूगु छगू मुँज्यां निरञ्जनरत्न शाक्यया संयोजकत्वय् ग्वाहालि पुचः नीस्वंगु खः । राजेन्द्रमान शाक्य, सुजीव बज्राचार्य, विजयरत्न असंबरे, अमृत ताम्राकार, सुरेन्द्र तुलाधर व शैलेस शाक्य दुजः दुगु ग्वाहालि पुचलय् सल्लाहकार कथं सांसद भिमसेनदास प्रधान, मल्ल के. सुन्दर, प्रा.डा. चुन्दा बज्राचार्य दु ।
उगु हे मुँज्यां कलाकार नकःमियात ग्वाहालि यायेत १ लख तका ग्वाहालि नं म्हःगु दु । अथेहे, रामशेखर नकःमियात नेपाल सरकारपाखें ग्वाहालि कायेगु भाला सांसद भिमसेनदास प्रधान व शैलेस बरेजुयात ब्यूगु दु ।
उकिया लिसें नकःमियात ग्वाहालि मुंकेत वयकलं हे च्वयादीगु ख्यालः प्रदर्शन यायेगु नं क्वःछ्युगु दु । थुकिया नितिं राजेन्द्रमान शाक्य, विजयरत्न असंबरे व सुरेन्द्र तुलाधरयात भाला ब्यूग दु ।
निरन्तर रुपं आर्थिक ग्वाहालि म्हयेगु नितिं संयोजक निरञ्जनरत्न शाक्ययात भाला ब्यूगु दु । नकःमियात आर्थिक ग्वाहालि याये मंदुपिन्सं ९८६०–६६१३८० मोबाइल ल्याखय् स्वापू तयेत ग्वाहालि पुचलं इनाप नं याःगु दु ।
‘सतक विस्तार स्थानीयया सहमतिया आधारय्’
लहनान्यूज | सिल्लागा द्वितीया ११३७ (फेब्रुअरी १२ २०१७)
थौंकन्हय् तिनि हे यलय् जिल्लाय् नियुक्त जुयावःम्ह प्रमुख जिल्ला अधिकारी दिपक काफ्लें सतक बिस्तारया ज्या स्थानीय सहमतिया आधारय् न्ह्याइगु धयादीगु दु ।
ताम्रकार समाजं ग्वसाः ग्वःगु जातीय समाज, टोल सुधार समिति, स्थानीय प्रशासन व प्रहरी प्रशासनया अधिकृततलिसेया अन्तरक्रियाय् नवासें प्रजिअ काफ्लें शान्ति व सुरक्षाया सुनिश्चितताया लागी सुशासन जुइमाःगु धयादिल । अथेहे पूर्व प्रमुख जिल्ला अधिकारी ऋषिराम शर्मां जनताया अपेक्षा व मनंतुना प्रशासनं पूवंकेमाःगु व जातिय समाजलिसे स्वापू क्वात्तुकेफःसा जकः कार्यकाल सफल जुइगु बिचाः प्वंकादिल ।
ज्याझ्वलय् लसकुस यासें समाजया नायः रबिन्द्रराज ताम्रकारं जनमानसय् थ्व इलय् प्रहरी प्रशासनयात स्वयेगु दृष्टिकोणय् ह्यूपा वःगु सकारात्मक पक्ष खःगु धयादिल । थुकियात निरन्तरता बीमाःगु खँय् नायः ताम्रकारं बः बियादिल ।
उगु हे ज्याझ्वलय् वरिष्ठ प्रहरी उपरिक्षक पिताम्बर अधिकारीयात यल जिल्लाय् शान्ति, सुरक्षा, अपराध नियन्त्रणय् विशेष भुमिका निर्वाह याःगु धकाः सम्मान याःगु खः । अधिकारीयात समाजया नायः ताम्रकारं सम्मान यानादीगु खः ।
ज्याझ्वलय् यल जिल्लाया सहायक प्रमुख जिल्ला अधिकारी कृष्णप्रसाद आचार्य, महानगरीय प्रहरी प्रभाग, मंगलबजारया प्रमुख, प्रहरी निरिक्षक प्रकाश थापा, पुल्चोकया प्रमुख, प्रहरी निरिक्षक गोविन्द पन्थी नापं ज्यापु समाज, बौद्घबिहार संघ, राजोपाध्याय समाज, कपाली समाज, राजकर्णिकार समाज, बाराही समाज, जोशी समाज, बाद्यकार समाज, चक्रवर्ति टोल सुधार समिति, तिच्छुगल्ली टोल सुधार समिति, नेवाः पत्रकार राष्ट्रिय दबूया प्रतिनिधिपिंन्स जिज्ञासाया लिसें सल्लाह, सुझाव ब्यूगु खः ।
