Display Style:
Column Style
न्याम्हेसित न्याःगु पत्रकारयात सिरपाः बिइगु निर्णय
लहनान्युज | ञंलाथ्व अष्टमी ११३७ (अगष्ट २९ २०१७)
देय्न्यंकंया नेवाः पत्रकार तयेगु राष्ट्रिय संगठन नेवाः पत्रकार राष्ट्रिय दबूया भदौ १७ शनिबाः सास बैंक्वयेट टेकुइ जुइगु न्याक्वःगु दँमुज्याय् न्याम्ह पत्रकार तयेत सिरपाः लःल्हायेगु निर्णय याःगु दु ।
पत्रकार दबुलिं बिउगु जानकारी कथं वाङमय शताब्दी पुरुष सत्यमोहन जोशी पत्रकारिता सिरपाः बरिष्ठ पत्रकार रमेशकाजी स्थापितयात, भिक्षु कुमार कास्यप स्मृति पत्रकारिता सिरपा क्रियाशिल युवा पत्रकार राजेन्द्र मानन्धरयात बिइगु निर्णय याःगु दु ।
अथेहे उगु ज्याझ्वलय् ज्ञानदेवी स्थापित स्मृति पत्रकारिता सिरपाः हटौंडा वाःपौया सम्पााक मोहनमान सांगामीयात, बाबुराजा ज्यापु फोटो पत्रकारिता सिरपाः बरिष्ठ फोटोपत्रकार राजेन्द्र चित्रकारयात व पुरुषोत्तम–निरादेवी पत्रकारिता सिरपाः न्हापांम्ह नेवाः कार्टुनिस मोहन श्याम खोकनायात लःल्हायेगु नेवाः पत्रकार राष्ट्रिय दबूया केन्द्रीय सचिवालया बैठकं निर्णय याःगु दु ।
नेवाः पत्रकारतयेत हःपाः बिइगु नापं सम्मान यायेगु कथं अथे सिरपाः बिइगु निर्णय यानागु खः धकाः धाःगु दु । थुगुसीया दँमुँज्या नापं कार्यकारिणी सभाय् नेवाः पत्रकारतय्गु नितिं ग्वहालि यायेत पत्रकारिता कल्याणकारी कोष तकं घोषणा याइगु जूगु दु ।
उगु दँमुँज्याय् स्वनिगः नापं स्वनिगः पिनेया थीथी जिल्लापाखें पत्रकार दबूया जिल्ला कचापाखें नं ब्वति कयादी धकाः नं धाःगु दु ।
सुनगाभायात छगू लखतका सिरपाः
नृपेन्द्रलाल श्रेष्ठ | ञंलाथ्व षष्ठी ११३७(अगष्ट २७ २०१७)
बौद्धिक अपाङ्गतायात कयाः ज्या यानावयाच्वंगु “सुनगाभा” संस्थायात हंगु दु ।
बोधिसत्व इन एक्सनया स्वक्वःगु दँमुँज्याया हनेगु झ्वलय् जूगु छगू ज्याझ्वःया दथुइ छगू लखतकाया नापनापं वहःया सिक्का व हनापौ नं लःल्हाःगु दु । उगु सिरपाः ज्याझ्वःया मूपाहां महिला तथा बालबालिका मन्त्री माननीय आशा कोइरालां सुनगाभाया नायः सुवर्णकेशरी चित्रकारयात लःल्हानादीगु खः ।
येँया जोरपाटीइ च्वंगु अर्थो अस्पतालया अपाङ्ग हलय् जूगु उगु ज्याझ्वःया सभाध्यक्षता ‘बोधिसत्व इन एक्सन’या नायः गोकर्ण ढुंगानां यानादीगु खः । बौद्धिक अपाङ्गतायात कयाः ज्वःमदुगु ज्या यानादीगुलिं उगु ज्याझ्वःयात निरन्तररुपं न्ह्याकेगु तातुनां उगु संस्थायात थुगु सिरपाः लःल्हाःगु ग्वसाः खलकं जानकारी ब्यूगु दु ।
जागरण मञ्चपाखें सरिता महर्जनयात ग्वाहालि
लहनान्युज | ञंलाथ्व षष्ठी ११३७(अगष्ट २७ २०१७)
अबुयात थःगु स्येँ दान बियाः जीवनदान ब्यूम्ह साहसी ज्या यानादीम्ह मय्जु सरिता महर्जनयात आर्थिक ग्वाहालि यायेगु ज्याझ्वः कथं नेवाः जागरण मञ्चया संयोजनय् थौं सुथय् येँया नेपाः ब्यांक्वेटय् सरिता महर्जनयात आर्थिक ग्वाहालि यायेगु ज्याझ्वः याःगु खः ।
मय्जु सरिता महर्जनयात नेपाः ब्यांक्वेटपाखें २५,००० तका ग्वाहालि याःगु खःसा नेवाः जागरण मञ्चपाखें ५,००० तका व नेवाः जागरण मञ्चया दुजःपिन्सं व्यक्तिगत रुपं व थीथी व्यक्ति व खलःपुचःपाखें आर्थिक ग्वाहालि याःगु खः ।
मय्जु सरिता महर्जनयात उगु ज्याझ्वलय् थ्यंमथ्यं ७०,००० तका दां आर्थिक ग्वाहालि लःल्हाःगु खः
उगु ज्याझ्वलय् आर्थिक ग्वाहालि यानादीपिनिगु नां धलः थुकथं दु ।
नेपाः ब्यांक्वेट, नेवाः जागरण मञ्च, लक्ष्मीदास मानन्धर, पंचवीर सिं तुलाधर, निरञ्जनरत्न शाक्य, सुजीव बज्राचार्य, अमृतरत्न ताम्राकार, भगवान शाक्य, नरेशरत्न तुलाधर, उत्तमदास तुलाधर, मुकेश मास्के, बालकृष्ण श्रेष्ठ, विद्या ताम्राकार, प्रमोद सिं सागर स्टार क्लब, सन्तोषलाल श्रेष्ठ, सूर्यबहादुर श्रेष्ठ, राजीव राजोपाध्याय, प्ररदिता बज्राचार्य, चेतना श्रेष्ठ, सत्यनारायण डंगोल, न्हुच्छे महर्जन, नाती महर्जन, सरोज बज्राचार्य
पत्रकारत दबूया न्याक्वःगु दँमुज्याय् न्यागू पत्रकारिता सिरपाः
नृपेन्द्रलाल श्रेष्ठ | ञंलाथ्व षष्ठी ११३७(अगष्ट २७ २०१७)
व्यावसायिक व समावेशी पत्रकारिताः नेवाः पत्रकार तयेगु क्रियाशीलता धइगु नारा थ्वयेका देय न्यंकंया नेवाः पत्रकारतयेगु मंकाःगु संगठन नेवाः पत्रकार राष्ट्रिय दबूया न्याक्वःगु दँमुज्या कार्यकारणी सभा वइगु भाद्र १७ गते याइगु जूगु दु ।
सासा बैंक्वय्ट टेकुइ जुइगु उगु ज्याझ्वलय् स्वनिगः नापं स्वनिगः पिनेया थीथी जिल्लाया प्रतिनिधितयेसं नं ब्वति कयादी धाःगु दु । लुमन्ति पौ तकं पितब्या याइगु न्याक्वःगु दँमुज्याया लसताय् न्याम्ह नेवाः पत्रकारपिन्त थीथी नगद नापं सिरपाः बिया हनेज्या याइगु जूगु दु ।
ज्याझ्वलय् वाङमय सताब्दी पुरुष डा.सत्यमोहन जोशी पत्रकारिता सिरपाः, ज्ञानदेवी स्मृति पत्रकारिता सिरपाः, पुरुषोत्तम–निरा पत्रकारिता सिरपाः, भिक्षु कुमार काश्यप स्मृति पत्रकारिता सिरपाः, बाबुराजा ज्यापु फोटो पत्रकारिता सिरपाः ल ज्या जुइ धकाः ग्वसाः खलः नेवाः पत्रकार राष्ट्रिय दबूपाखें जानकारी बिउगु दु ।
अथे हे उगु ज्याझ्वलय् नेवाः पत्रकार राष्ट्रिय दबूया आधिकारीक वेभसाइट शुभारम्भ याइगु जूगु दु ।
येँ महानगरपालिकाया मेयर विद्यासुन्दर शाक्यया मूपाहांसुइ जुइगु उगु ज्याझ्वलय् नेपाल पत्रकार महासंघया न्हूपिं निर्वाचित जुयादीपिं केन्द्रीय पदाधीकारी नापं जनजाति केन्द्रीय सदस्यपिन्त हनेज्या नं याइगु जूगु दु ।
श्रीघः विहारय् शुभकाजी शाक्य न्हूम्ह नायः
लहनान्युज | ञंलाथ्व षष्ठी ११३७(अगष्ट २७ २०१७)
ऐतिहासिक व धार्मिक महत्वं जाःगु विहार श्रीशान्तिघट बज्रधातु महाविहार श्रीघः विहार संरक्षणया न्हापांगु तःमुंज्याः क्वचाःगु दु । उगु महाविहारया सर्वसंघ दुजःत मुना निस्वंगु उगु संरक्षण वंगु माघ महिनाय् दर्ता जूगु खःसा म्हिगः यलया गोदावरी च्वंगु धार्मिक स्थल नौधारा लागाय् न्हापांगु तःमुंज्या जूगु खः ।
उगु तःमुंज्या संरक्षण समितीया तदर्थ समितीया नायः शुभकाजी शाक्यं थथे सर्वसंघया दुजःत जाना संरक्षण समिती निस्वनेमाःगुया कारण धइगु राज्यया प्रशासनिक निकायया लगतय् दुथ्यायेत खः धका धयादिलसा छ्यान्जे पूर्ण शाक्यं वार्षिक प्रतिवेदनया नापनापं समितीया न्हूगु कार्य योजना नं न्ह्यब्वःया दीगु खः । न्हापांगु सत्र क्वचाय् धुंका न्हूगु ज्यासना पुचःया नं ल्यःज्याः नं जूगु खः ।
उगु ल्यज्याय् सर्वसम्मतं शुभकाजी शाक्ययात नायःकथं ल्यःगु खःसा मेमेपिं पदाधिकारीपिं नं सर्वसम्मतं हे ल्यःज्या जूगु खँ निर्वाचन समितीया कजि मदन शाक्यं उगु सभाय् घोषणा यानादीगु खः ।
निर्वाचन समितीं घोषणा याकथं न्वकुया पदय् मय्जु अमीर कुमारी शाक्य , छ्रयान्जे पूर्ण शाक्य , ल्यू छ्यान्जे गुलाफ शाक्य , दाँभरीं कमलरत्न शाक्य व ल्यू दाँभरी कथं सर्वज्ञरत्न शाक्ययात ल्यःगु दु । मूक्कं झिंछम्ह दुजः दूगु ज्यासना पुचलय् सुगतानन्द शाक्य ,अष्टरत्न शाक्य , सुरेश शाक्य , दिनेश शाक्य , सुरेश शाक्य(पुतलीसडक)यात दुजःकथं सर्वसम्मतं ल्यःगु खः ।
उगु ज्याझ्वलय् सर्वसंघया दुजःमध्ये एसइइ पास जूपिं व एम ए याःपिन्त नं भिन्तुना देछागु खः सा लच्छियंकं गुंला ज्वःछी तुते मजुइक नियमित रुपं तुतः ब्वनेत ताःलापिं सर्वसंघया दुजःपिन्त नं थीथी उपहार लःल्हागु खः । थथे तुतः ब्वंपिन्त नं हने कथं थथें उपहार बिया वया च्वनागु खँ संरक्षण समितीया न्हू निर्वाचित नायः शुभकाजी शाक्यं जानकारी बिया दिल । श्रीशान्तिघट बज्रधातु महाविहारया थाय्पा आजु नांजाम्ह पर्यटन व्यवसायी व सकारात्मक सोच अभियानया कर्ण शाक्य खः ।
