Display Style:
Column Style
विहारय् धार्मिक ज्या यायेत रोक
लहनान्यूज सम्वाददाता | कौलाथ्व सप्तमि ११३६ (अक्टोबर ९ २०१६)
येँया धल्कोय् च्वंगु संघाराम विहारय् धार्मिक ज्याखँ यायेत जिल्ला प्रशासन ज्याकू, येँय् नं रोक तःगु दु ।
प्रमूख जिल्ला अधिकारी होमनाथ दवाडीं वइगु शुक्रबाः असोज २८ गतेतक्क विहारया धम्म हलय् छुं नं कथंया ज्याझ्वः यायेत रोक तःगु खः ।
भिक्षु आनन्दं विहारया धम्म हल व भुथू (भान्सा) कोथा तालं ग्वयाः भिक्षुपिन्त महिनौंतक्क छ्ययेके मब्यूगु खः । भिक्षु आनन्दं अनाधिकृत रुपं विहार दर्ता यानाः थज्याःगु ज्याखँ याःगु धकाः मेमेपिं भिक्षुपिन्सं उपासक उपासिकाया साथ कयाः धम्म हल व भान्साय् ग्वयातःगु ताः तछ्यानाब्यूगु खः ।
मेमेपिं भिक्षुपिन्सं ताः चायेकेवं भिक्षु आनन्दं विहारय् अनाधिकृत रुपं ताः चायेकल धासें भिक्षुपिन्त कारवाही यायेमाल धकाः सोर्हखुट्टे प्रहरी बृत्तय् उजुरी ब्यूगु खः ।
उजुरी याःम्ह भिक्षु आनन्द धाःसा प्रहरी वृत्तय् उपस्थित मजूगु श्रोतं जानकारी ब्यूगु दु ।
थौं कूछि भ्वय् नयेगु
लहनान्यूज सम्वाददाता | कौलाथ्व अष्टमि ११३६ (अक्टोबर ९ २०१६)
मोहनिया थौं च्यान्हुगु दिं अर्थात महाअष्टमि ।
थौं सकल नेवाःतय् कूछि भ्वय् नयेगु याइ । परीवारया भ्वछिं छथासं मुनाः थौं कूछि भ्वय् नयेगु याइ ।
निगू मानायात कूछि धाइगु ल्याखं थौं कूछि अर्थात निमाना बजिलिसें थीथी घासा तयाः भ्वय् नयेगु याइ । निमाना बजि नये मफयाः वांछ्वये म्वाःलेमा धयागु ल्याखं मानाया दुने कापः वा भ्वं स्वचाकाः निमाना दानाः बजि तयेगु याइपिं नं दु ।
तर थौंया दिं कूछि बजि दानाः नयेगु मखसें कूलया सकलें छथाय् मुनाः नयेगु दिं खः धकाः विज्ञतयसं धायेगु याः । कूलया भ्वछिं छथासं मुनाः भ्वय् नयेगु जूगुलिं थुकियात खास कुलछि भ्वय् धाःगु खः धइगु संस्कृतिविद्पिनिगु धापू दु ।
- थौं महालक्ष्मी द्यः पुज्यायेगु
नवरातया झ्वलय् थौं महालक्ष्मी द्यःया पूजा यायेगु दिं खः ।
मोहनिया पारुनिसें नवमितक्कया दुने नवदुर्गा दुने गुम्ह द्यःपिन्त पुज्यानाः नवरात हनेगु याइ । व हे झ्वलय् अष्टमिया दिनय् धाःसा शाक्ततयसं महालक्ष्मीयात पुज्यायेगु याइ ।
थौं आगं वा कुथि दुने पुज्यायेगु विधियात थापं पूजा धाइगु खः । अथे जुयाः थौंया दिंयात थापंपूजा नं धाइ ।
वैदिक मत कथं थौंया दिनय् महागौरीयात पुज्यायेगु याइ । दुर्गा भवानीया च्यागूगु रुप कथं शास्त्रीय विधि कथं महागौरीयात पुज्याइगु खः ।
देयया थीथी शक्तिपीठलिसें स्वनिगःया अजिमा द्यःपिनिगु देगलय् दर्शन याइपिं थौं सुथंनिसें म्वः म्वः हे मुंगु खः । द्यः ख्युं ख्युं धालंनिसें हे देगः देगलय् ताःहाकःगु हे झ्वः खने दयेधुंकूगु खः ।
न्हूदँ ११३७ या नायः भीमसेनदास
लहनान्यूज सम्वाददाता | कौलाथ्व सप्तमि, ११३६ (अक्टोबर ८, २०१६)
न्हूदँ समारोह समिति ११३७ या नितिं नेपाली कांग्रेसया नेता लिसें सांसद भीमसेनदास प्रधानयात नायः ल्यःगु दु ।
न्हूदँ समारोह समितिया नेवाः न्ह्यलुवाः लक्ष्मीदास मानन्धरया छेँय् थौं च्वंगु मुँज्यां सांसद प्रधानयात नायः ल्यःगु खः । न्हूदँ समारोह समिति ११३६ या नायः डा. महेशमान श्रेष्ठं सल्लाहकारपाखेंया सल्लाह कथं धकाः प्रधानया नां प्रस्ताव यायेधुकाः मुँज्यां अनुमोदन याःगु खः ।
डा. श्रेष्ठं न्हूम्ह नायः प्रधानयात खादां न्ययेकाः भिन्तुना देछानादीगु खः ।
न्हूदँ समारोह समितिया नायःया पदभार लःल्हानाकासें प्रधानं नेवाःत राजनीति ख्यलं लिचिलाच्वंगुलिं हे झनझन ल्यूने लाना वनाच्वंगु धयादिल । पद कायेगु थासय् लिचिलेगु बानीं थौं नेवाःत राजनैतीक लिसें प्रशासनिक ख्यलय् गनं हे खनेमदुगु वयकःया धापू खः ।
नेवाःतयत छथाय् मुंकाः थःगु अधिकारया संघर्ष न्ह्याकातयेगु सोचं झी पुर्खां न्ह्याकावंगु नेपाल सम्वतया आन्दोलनयात ई कथं झीसं निरन्तरता बीमाःगु पुलांम्ह नायः डा.श्रेष्ठं धयादिल ।
न्हूदँ समारोह समितिइ प्यम्ह नायः
लहनान्यूज सम्वाददाता | कौलाथ्व षष्ठी ११३६ (अक्टोबर ७, २०१६)
न्हूदँ समारोह समिति ११३७ या नायः पदया नितिं मुक्कं प्यम्हेसिया नां प्रस्ताव दुगु धाःगु दु ।
न्हूदँ समारोह समितिया थौं येँय् क्वचाःगु दुजः नीस्वना ज्याझ्वलय् न्हूम्ह नायःया नितिं सल्लाहकार परीषदयाके प्यम्हेसिगु नांया प्रस्ताव दुगु धाःगु खः । लिसें व हे प्यम्ह मध्ये नं छम्हेसित कन्हय् छगू मुँज्या च्वनाः नायः ल्यइगु जूगु दु ।
ज्याझ्वलय् न्हूदँ समारोह समिति ११३६ या नायः डा. महेशमान श्रेष्ठं न्हूदँया समारोहयात स्थायित्व बीगु नितिं समितियात दर्ता यानाः न्ह्याःवनेगु योजना न्यंकादिल ।
न्हूदँ समारोह समिति ११३६या दांभरि रमेशरत्न बज्राचार्यं ल्याःचाः न्ह्यब्वयादिसें आः समितियाके मुक्कं २,०७,६३० तका ल्यं दुगु धयादिल । वय्कलं न्हूदँ ११३६ या मुक्कं खर्च ७,०३,६,८० तका व आम्दानी ९,११,३१० तका जूगु जानकारी बियादीगु खः ।
समारोह समितिया सल्लाहकार नेवाः न्ह्यलुवाः लक्ष्मीदास मानन्धर व डा. चुन्दा बज्राचार्यं नं थःथःगु नुगःखँ तयादीगु खः । व्यवस्थापन समितिया दुजः पंचनारायण महर्जनं सुभाय् बियादीगु खः ।
क्षेत्रपाटि अस्पतालया भिन्तुना
लहनान्यूज सम्वाददाता | कौलाथ्व षष्ठी, ११३६ (अक्टोबर ७, २०१६)
नेपाःमिया दक्कले तःधंगु नखः मोहनिया लसताय् क्षेत्रपाटि निःशुल्क चिकित्सालय (अस्पतालं) भिन्तुना कालबिल ज्याझ्वः याःगु दु ।
अस्पतालं मोहनिया लिसें न्ह्यःने वयाच्वंगु नेपाःमिपिनिगु निगूगु तःधंगु नखः स्वन्ति, न्हूदँ ने.सं.११३७ व छठया लसताय् भिन्तुना ज्याझ्वः याःगु खः । ज्याझ्वलय् राजनैतीक पार्टिया नेता, पत्रकार, भाषिक न्ह्यलुवाःलिसें कार्यकर्तापिनिगु उपस्थिती दुगु खः ।
ज्याझ्वलय् नेपाली कांग्रेसपाखें क्षेत्र नं. ९या सांसद ध्यान गोविन्द रंजित मू पाहांकथं झायादीगु खः ।
लिसें नेकपा एमालेपाखें क्षेत्र नं. ७या सांसद रामबीर मानन्धर, पूर्वमन्त्री पि.एल.सिंह, वरिष्ठ पत्रकार सुरेशकिरण मानन्धर, रमेशकाजी स्थापित, विजयरत्न असंबरेलिसेंयापिनिगु ब्वति दुगु खः ।
