Display Style:
Column Style
न्यत अजिमाया झिनिदँ जात्रा क्वःचाल
नृपेन्द्रलाल श्रेष्ठ | ञंलागा द्धादशी ११३७ (सेप्तेम्बर १७ २०१७)
न्यत अजिमाया झिनिदँ जात्रा ओपचारिक रुपं हनुमानध्वाखाया नासः चुकय् द्यप्याखँ हुइका क्वःचागु दु । थौं स्वया च्यादँ न्ह्यः २०६६न्साल निसें ु थुगु जात्रा न्ह्याःगु खः ।
मापन ज्याझ्वलय् थःगु खँ तयादीसें राष्ट्रपति बिद्यादेवी भण्डारीं स्वनिगः परापूर्वकाल निसें सांस्कृतिक ख्यालय् तसकं तःमि धका धयादीसें थः ज्यागु सस्कृतियात संरक्षण यायेत संघीय व स्थानीय सरकार ध्यान बिइमा धःका बःबिया दीगु दु । नाप वयकलं नेपाः थी थी संस्कृति व भाषायाना धनी देय् खः धयादीसें थःज्यागु मौलिक संस्कृतियात ल्यंका तयेमा धयादीगु दु ।
अथेहे येँ महानगरपालिकाया मेयर बिद्यासुन्दर शाक्यं न्यतया द्यः छेँ दनिगु लागि महानगरपालिकां ९० लख छुट्यानागु धयादीगु दु । उगु ज्याझ्वलय् सांसद नबिन्द्रराज जोशी न्ह्यःसः दँ न्ह्यःनिसे न्ह्यानाच्वंगु थुगु द्यःप्याखँ जीवन्त मौलिक सम्पदायात झीसं संरक्षण याना तयेमा धयादीगु दु ।
श्वेतकाली संरक्षण समितिया नायः सत्यनारायण डंगोलं च्यादँ न्ह्यः न्ह्यागु थुगु जात्रा ओपचारिक रुपं क्वचाःगु न जानकारी बियादीगु खः ।
थुगु झिनिदँया जात्रा न्यत, वःघः, ख्वप, यल, भ्वँत, धुलिख्यल लगायत झिनिगु थासय् यकें माःगु परम्परा दु ।
थुगु द्यःप्याखनय् भैरब, काली बाराही, महालक्ष्मी, चण्डेश्वरी, कुमारी, महाद्यः,गणेश, नारायणी, इन्द्रायणी, रुदायणी, ब्रम्हायणी, सिंगिनि, व्यांगिनि ध्वों दैत्य व खिचा देवगण दइ ।
नेपालभाषा साहित्य नखः क्वचाल
लहनान्युज | ञंलागा द्धादशी ११३७ (सेप्तेम्बर १७ २०१७)
नेपालभाषाया साहित्यिक इतिहासय् दकलय् न्हापाखुसी वंगु शन्चरबार यलया दरबार दुने च्वंगु केशवनारायण चोकय् तःजिक नेपालभाषा साहित्य नखः क्वचाःगु दु । नेपालभाषाया साहित्ययात कया थीथी ज्याझ्वःत जूगु नेपालभाषा साहित्यया उलेज्या मूपाहाँ कथं झायादीम्ह अतिकं हनेबहम्ह वाङ्गमय शताब्दि पुरुष डा. सत्यमोहन जोशीं यानादीगु खः ।
उगु ज्याझ्वलय् मूपाहाँ डा. जोशी व नेपाल संगीत तथा नाट्य प्रतिष्ठानया कुलपति सरुभक्त श्रेष्ठं मंका कथं नेवाः न्ह्यलुवा साहित्यकार मल्ल के.सुन्दरया उपन्यास “द पोस्टर” व उद्योगपति व समाजसेवी कवि बसन्त चौधरीया नेपाली भाय्या कवितायात कवि सुरेश किरणं अनुवाद यानादीगु “बसन्त”चिनाखं मुनाया नं चिखिफ्यना सार्वजनिक यानादीगु खः ।
साहित्य नखलय् प्रा.प्रेमशान्ति तुलाधरं नेपालभाषाया साहित्यया इतिहासयात कया प्रवचन बियादीगु खःसा कन्हय्या नेपालभाषा साहित्य यात कया साहित्यकारपिं भूषण प्रसाद श्रेष्ठ , सुलोचना मानन्धर धिताल , ध्रुब मधिकःमि , राजेन मानन्धरपिन्सं न्ववानादीगु खःसा थुकियात सुरेशकिरण मानन्धरं सहजकर्ताया रुपय् न्ह्याकादीगु खः । अथेहेतुं खस नेपाली भाषं च्वसाः न्ह्याकावया च्वंपिं नेवाः साहित्यकारतय्त कया नं सहलह जूगु खः । साहित्यकार नबिन चित्रकारं सहजकर्ताया जुया न्ह्याकादीगु थूगु सहलहलय् सरुभक्त श्रेष्ठ , स्नेह साय्मि , श्रीओम श्रेष्ठ रोदन , जलेश्वरी श्रेष्ठपिन्सं थःथःगु विचाः तयादीगु खः । शन्चरबार जूगु
नेपालभाषा साहित्य नखलय् जनकवि दुर्गालाल श्रेष्ठ , मथुरा साय्मि , नर्मदेश्वर प्रधान , योगेन्द्र प्रधान , पूर्ण बैद्य , भूषणप्रसाद श्रेष्ठ , लोककवि राजभाई जकःमि , गणेशराम लाछी , प्रतिसरा सायमि , सुधीर ख्वबि , शशीकला मानन्धर , सौरभ शाक्य , शरद कसाः , सुरेश किरण , रजनीमिला , शाक्य सुरेन , राज सायमि , सुरेन्द्र तुलाधर व सुरजवीर बज्राचार्यआदीपिन्सं थःथःगु च्वसु वाचन यानादीगु खः ।
वाङमय शताब्दी पुरुष सत्यमोहन जोशीयात जनस्तरं हन
लहनान्युज | ञंलागा दशमी ११३७ (सेप्तेम्बर १५ २०१७)
वाङमय शताब्दी पुरुष सत्यमोहन जोशी हनाया ग्वसालय् शुक्रवाः तःजिक जनस्तरं हना ज्याझ्वः याःगु दु । राष्ट्रपति विद्यादेवी भण्डारीं हनापौ लःल्हानादीगु उगु ज्याझ्वः याये न्ह्यः संस्कृतिविद जोशीयात यलंनिसें येँय् तक कलाकारपिंपाखें मोटर साइकल याना जात्रा याना हःगु खःसा येँया बसन्तपुलिइ थ्यंका जनस्तरं छगू कथं सिन्दुर जात्रा याना हे चाःहिइकूगु खः । सिन्दुर जात्रा क्वचाये धुंकाः राष्ट्रिय सभागृहलय् तःजिक अथे सामारोह याना हनेज्या याःगु खः ।
वाङमय शताब्दी पुरुष सत्यमोहन जोशी हनाया ग्वसालय् जूगु उगु समारोहया नायः हना ज्याझ्वःया कजि लक्ष्मीदास मानन्धर जुयादीगु खः । ज्याझ्वलय् सकलसित लसकुसयासें मानन्धरं वाङमय शताब्दी पुरुष सत्यमोहन जोशीया नामय् अक्षय कोषया घोषणा यानादीगु खः । उगु कोषया नितिं थीथी बैंकपाखें ध्यबा वःगु जानकारी नं बियादिल ।
ज्याझ्वलय् येँ महागनरपालिकया मेयर विद्यासुन्दर शाक्यं नं अक्षयकोषण नितिं न्यागू लख तका दां महानगरपालिकां तयेगु घोषणा यानादीगु खः । ज्याझ्वलय् न्वंवासें मूपाहां राष्ट्रपति विद्यादेवी भण्डारीं सत्यमोहन जोशी नेपाःया हे अमुल्य व मंकाः निधी खः धयादिसें वय्कःया अभिनन्दन यायेखंगु धइगु राष्ट्रया हे गौरव खः धयादिल । वय्कलं सत्यमोहन जोशी धयाम्ह जीवत ज्ञानया कोष खः धकाः तकं धयादिल ।
येँ महानगरपालिकाया मेयर विद्या सुन्दर शाक्य, नेवाः न्ह्यलुवाः मल्ल के सुन्दर, पत्रकार सुरेश किरण मानन्धर, निरञ्जनरत्न शाक्य लगायतपिन्सं न्वंवानदीगु उगु ज्याझ्वः नेवाः जागरण मञ्चया नायः सुजिप बज्राचार्यं न्ह्याकादीगु खः ।
सुभाय् न्वचू बिइगु झ्वलय् ग्वसाः खलःया दुजः नापं पुलांम्ह राज्यमन्त्री तिर्थराम डंगोलं सत्यमोहन जोशीं साहित्य ख्यलय् ज्वःमदुगु योगदान यानादीगुलिं वय्कःयात नोबेल पुरस्कारया नितिं राट्रपतिपाखें सरकारयात निर्देशन बिइत माग यानादीगु खः ।
ज्याझ्वलय् रक्षामन्त्री भिमसेनदास प्रधान, जनकवि दुर्गादाल श्रेष्ठ, येँ महानगरपालिकाया उप मेयर हरिप्रभा खड्गी, कृष्ण गोपाल श्रेष्ठपिं पाहां जुयादीगु खः । उगु सरामारोहलय् नेवाः ख्यःया थीथी ब्यक्तित्वपिं सहभागी जुयादीगु खः ।
शनिवाः तःजिक नेपालभाषा साहित्यक सम्मेलन जुइगु
नृपेन्द्रलाल श्रेष्ठ | ञंलागा नवमी ११३७ (सेप्तेबर १४ २०१७)
‘नेपालभाषा टाइम्स’ दैनिक व ‘सन्ध्या टाइम्स’ सन्चार सहकारीया मंकाः ग्वसालय् थ्व हे वइगु ज्ञंलागा एकादशी शनिवाः कुन्हु यलया केशवनारायण चुकय् नेपालभाषा साहित्य महोत्सव जुइगुु दु ।
उगु नेपालभाषा साहित्य महोत्सव वाङ्मय शताब्दी पुरुष डा.सत्यमोहन जोशीं छगु ज्याझ्वः दथुइ उलेज्या याइगु ज्याझ्वः दु ।
उगु ज्याझ्वः खुगुगु ब्बःय् न्ह्याइगु ज्याझ्वः दु । ज्याझ्वलय् उपन्यासकार मल्ल के.सुन्दरया ‘द पोष्टर’ व कवि वसन्त चौधरया नेपालभाषाय् अनुवादित कविता संग्रह ‘वसन्त’या विमोचन याइगु ज्याझ्वः दु ।
न्हापांगु ब्बःय् प्राध्यापक प्रेमशान्ति तुलाधरं नेपालभाषा साहित्यया म्हसिका न्हयब्बयादी सा निगुगु ब्बःय् ‘भोलीको नेपालभाषा साहित्य’ नेपालभाषा विषयक अन्तरक्रिया जुइुगु ज्याझ्वः दु ।
स्वंगुगु ब्बःय् नेपालभाषाया नेवाः श्रष्टनाप सहलह ज्याझ्वः दु । सहजकर्ताया कथं कवि नवीन चित्रकारं नेपाल संगीत तथा नाट्य प्रज्ञा प्रतिष्ठानका कूलपति अन्तरक्रिया याइगु ज्याझ्वः दु ।
प्यंगुगु ब्बः य् जनकवि दुर्गालाल श्रेष्ठ, वरिष्ठ साहित्यकार पूर्ण वैद्य, मथुरा सायमी, नर्मदेश्वर प्रधान, राजभाई जकःमि, गणेशराम लाछि, शशिकला मानन्धर, सौरभ शाक्य, सुधीर ख्वबि, प्रतिसरा सायमी, केशरत्न शाक्यं पिनिगु थःथःगु साहित्य ब्बना दीं ।
दकलय् लिपागु ब्बःय् गायक पवित्र कसाः, गायिका रिता महर्जन पिन्सं सास्कृतिक ज्याझ्वः तया तंगु दु । नाप लोकव्हापि सांगीतिक पुचः कुटुम्बया सांगीतिक न्ह्यःब्बइगु ज्याझ्वः न दु ।
।
महोत्सवय् नेवाः नसा नाप सफू ब्बज्या नं दु धःका ग्वसाः खलकं धाःगु दु ।
न्ह्यःक्वःगु भूटान अन्तर्राष्ट्रिय व्यापार मेला शुरु
राजेश बज्राचार्य | ञंलागा नवमी ११३७ (सेप्तेबर १४ २०१७)
भूटानया अर्थमन्त्री ल्योन्पो नाम्गे दोर्जीया छगु ज्याझ्वः दथुइ न्ह्यःक्वःगु अन्तर्राष्ट्रिय व्यापार मेला राजधानी थिम्पुस्थित चाङलिङमिथाङ्ग मैदानय् थौ बिहिवार उलेज्या यानादीगु दु ।
अर्थमन्त्री नाम्गे दोर्जीं भूटान उद्योग बाणिज्य संघया ग्वसालय् अन्तर्राष्ट्रिय व्यापार मेलां छिमेकी मूलुकपिनिगु औद्योगिक सम्बन्ध नाप भूटानय् लगानीया सम्भावना अप्पो दइगु धःका भलसा कयादीगु दु ।
न्यान्हु तक न्ह्याइगु थुगुव्यापार मेलाय् भूटान, नेपाल, भारत व थाइल्याण्ड याना प्यंगु देशया २३४ थी थी स्टल दुथ्यागु दु ।मेलाय् नेपाल जकः १०२स्टल दुथ्यागु खः ।
मेलाय् ग्वसाखलः पाखे भूटान उद्योग बाणिज्य संघया महासचिव फूप छिरिङ्गं नेपाल व भुटानया बाणिज्य संघबनाप या सम्बन्धनय् विशेष जोड बियादीगु दु ।
ललितपुर उद्योग वाणिज्य संघया पहलय् सन २००९ निसे शुरु जुगु भूटान उद्योग बाणिज्य संघया सम्बन्धन पश्चात प्रत्येक वर्षय् औद्योगिक मेलाय् नेपाली तय्गु पहुँच सहज वया पनाच्वंगु द धःका अध्यक्ष सविन श्रेष्ठं धयादीगु दु ।
थौं बिहिवार भाद्र २९ गते निसे न्ह्याइगु थुगु अन्तर्राष्ट्रिय मेला असोज २ गते सोमवार क्वःचाइगु खः ।
