Display Style:
Column Style
सिद्धिदास–कोशया सम्पादकयात हन
अमिर मैया रञ्जित | कौलाथ्व दुतिया ११३७ (सेप्तेम्बर २१ २०१७)
महाकवि सिद्धिदास महाजुया १५० क्वःगु बुदिंया लसताय् पिदंगु ‘सिद्धिदास–कोश’ या सम्पादक प्रा.डा. तुयूबहादुर महर्जनयात कुतः पिकाकः पाखें छगू ज्याझ्वः यासे शुक्रवाः च्वसापासाय् तःजिक हंगु दु ।
नेपालभाषा परिषद्या नायः बौद्धविद्वान् प्रा.सुवर्ण शाक्यया मूपाहाँसुइ जूगु ज्याझ्वलय् सम्पादक डा.महर्जनं उगु कोशय् सिद्धिदासया ४१ गू स्वयां अप्वः पिदंगु कृति दुनेया खँग्वःतय्गु अर्थ बर्णानुक्रमय् न्ह्यब्वयागु धयादिल । डा.महर्जनया न्हापांगु कृति नेपालभाषाया उपन्यास ‘खों म्वः’ खःसा ‘सिद्धिदास कोश’ २३ गूगु कृति खः ।
भाषाय् च्वजाःम्ह मनुखं जक सिर्जनात्मक ज्या यायेफइगु धयादिसे मूपाहाँ शाक्यं उगु कोश सिद्धिदासया न्हूगु सिर्जना धाःसां पाइमखुगु धयादिगु खः ।
अथेहे उगु खँग्वःधुकू सफुतिं नेपालभाषाय् महाकवि सिद्धिदासबारे अनुसन्धान याइम्ह शोधकर्तायात तःधंगु ग्वाहालि जुइगु मुँज्या नायः मथुरा सायमिं धयादिल ।
कुतः प्रकाशनया ग्वसालय जूगु ज्याझ्वलय् प्रकाशकपिं विमल ताम्राकारं लसकुस न्वचू तयादीगु खःसा विष्णु ताम्राकारं नेपालभाषाया उपन्यासकार शशिकला मानन्धरयात कुतः प्रकाशनयात ग्वाहालि यानादीगुलिं दोसल्लां न्ययेकाः हनादीगु खः ।
नीलः सहकारीया च्याक्वःगुु साधारण सभा
लहनान्युज | कौलाथ्व तृतिया ११३७ (सेप्तेम्बर २३ २०१७)
नीलः बचत तथा ऋण सहकारी संस्था लि.या च्याक्वःगुु वार्षिक साधारण सभा संस्थाया नायः भाजु कृष्णसुन्दर श्रेष्ठया सभापतित्वय् ग्रीन पार्टी प्यालेस जमलय् सम्पन्न जुगु दु ।
उगु सभाय् संस्थाया छ्याञ्जे भाजु माधवरत्न ताम्राकारं लसकुस न्वचु बियादीगु खःसा नायः भाजुया आ.व. २०७३।२०७४ या प्रगति प्रतिवेदन पारित याःगु खः ।
अथेहे आ.व. २०७४।२०७५ या नितिं संचालक समितिपाखें प्रस्तावित लेखा परिक्षक ईश्वर पौडेल(ईश्वर एसोसियट्स) यात स्वीकृत याःगु उगु सभाय् विशेष प्रस्तावकथं संस्था नाफाय् वंगुलिं जगेडा कोष व मेमेगु कोष खडा याना वनेगु व शेयर पू“जी ८० लाख थ्यंकेगु प्रस्ताव सभां पारित याःगु खः ।
अथेहे आ.व. २०७४।२०७५ या नितिं अनुमानित बजेट संस्थाया दा“भरि अनिशमान श्रेष्ठजुं न्ह्यब्वयादीगु सभाय् सल्लाहकार भाजु आनन्दराम ताम्रकारं त्वाःदेवाय् मत च्याका ज्याझ्वः न्ह्याःगु खःसा का.म.पा. २५ वडाया वडा नायः भाजु नीलकाजी शाक्य मूपाह कथं झाया संस्थाया प्रगतिया नितिं भिन्तुना बियादीगु खः ।
उगु ज्याझ्वः अमित महर्जनंं न्ह्याकादीगु खः ।
संचारमन्त्री यात ज्ञापन पौ लःल्हात
लहनान्युज | कौलाथ्व दुतिया ११३७ (सेप्तेम्बर २१ २०१७)
संचारमन्त्री मोहन बहादुर बस्नेतयात नेपाल आदिवासी जनजाति पत्रकार महासंघ फोनिजया नेतृत्वय् मन्त्रालय हे वना ज्ञापन पौ लःल्हायेगु ज्या याःगु दु । राष्ट्रिय आम संचार प्रशिक्षण प्रतिष्ठान गठन यायेगु सरकारं अन्तिम तयारी याःगु अले उगु प्रतिष्ठानया नांया न्ह्यःने कृष्णप्रसाद भट्टराईया नां तयेत्यंगुलिं फोनिजं आपत्ति प्वंकूगु दु ।
सत्यनारायण बहादुर श्रेष्ठ नेपाल पत्रकार महासंघया संस्थापक नायः धकाः स्पष्ट जूगु अवस्थाय् नं गुगु कथं प्रतिष्ठानया नां तकं कृष्णप्रसाद भट्टराईया नामं तयेत्यन उकियात थःपिन्सं स्वीकार यायेफइमखु धकाः ज्ञापन पतिइ उल्लेख यानातःगु दु ।
ज्ञापन पौ फोजिनया मूछ्याञ्जे गजुर्धन राई नं लःल्हानादीगु खःसा मन्त्री बस्नेतं फोनिजलिसे सहलह ब्याका न्ह्याः वनेगु जुइ धकाः धयादिल ।
ज्ञापन पौ लःल्हायेत फोजिनया नेतृत्व नापं नेवाः पत्रकार राष्ट्रिय दबूया केन्द्रीय नायः श्रीकृष्ण महर्जन, दबूया न्वकू नापं नेपाल पत्रकार महासंघया केन्द्रीय दुजः टिकाराम प्रधान, मूछ्याञ्जे सुनिल महर्जन, दांभरी सुरेन्द्रभक्त श्रेष्ठ, केन्द्रीय दुजः रचना श्रेष्ठ अथे हे नेवाः पत्रकार रवि डंगोल लगायतयापिं सहभागी जुयादीगु खः ।
पत्रकार दबू न आन्दोलन याइगु
लहनान्युज | कौलाथ्व पारु ११३७ (सेप्तेम्बर २० २०१७)
नेवाः पत्रकारतयेगु राष्ट्रिय संगठन नेवाः पत्रकार राष्ट्रिय दबूया केन्द्रीय समितिया मुँज्या विहिवाः ऐतिहासिक नगर तोखाय् क्वचाल । पत्रकार दबूया इतिहासय् हे न्हापांखुसि तोखाय् केन्द्रीय समितिया मुँज्या जूगु खः ।
पत्रकार दबूपाखें आः नेपाल पत्रकार महासंघया संस्थापक नायः सत्यनारायण बहादुर श्रेष्ठयात घोषणा यायेमाःगु माग याना आन्दोलन याइगु धकाः उगु मुँज्यां क्वःछिउगु दु । २००८ सालय् सत्यनारायण बहादुर श्रेष्ठ अध्यक्ष ल्यया नेपाल पत्रकार संघ गठन याःगु अले लिपा २०१२ सालय् उगु संघयात पुनगठन याना कृष्णप्रसाद भट्टराईया नायः ल्यःगु इतिहासय् स्पष्ट जुइक जुइकं हे आः तक नं कृष्णप्रसाद भट्टराईयात हे नेपाल पत्रकार महासंघया संस्थापक नायः ल्ययातःगुलिं बास्तविकतायात स्वीकार यायेमाल धकाः पत्रकार दबुलिं आन्दोलन यायेगु निर्णय याःगु खः ।
पत्रकार महासंघयात दच्छि न्ह्यः ज्ञापन पौ बिइगु ज्या जूगु अले आदिवासी जनजाति पत्रकार महासंघ फोनिजपाखें तकं उगु मुद्दायात कया ज्ञापन पौ बिइगु ज्या याःगु जूसां नं बेवास्ता याःगुलिं आः आन्दोलन यायेमाःगु मुँज्यां ठहर याःगु खः । नेवाः जूगु नातां हे नेपाल पत्रकार महासंघं सत्यनारायण बहादुर श्रेष्ठयात संस्थापक नायःया रुपय् अस्वीकार याःगु ठहरयासें आन्दोलन यायेगु निर्णय यानागु खः धकाः नेवाः पत्रकार राष्ट्रिय दबुलिं धाःगु दु ।
आन्दोलनया तयारी कथं थ्व हे मंगलवाः सरोकारवाला पत्रकार तयेगु दथुइ अन्तक्र्रिया ज्याझ्वः यायेगु नापं आन्दोलनया ज्याझ्वः तकं घोषणा यायेगु तयारी याःगु दु । थुगु आन्दोलनय् नेपाःया आदिवासी जनजाति पत्रकारतय्गु मंकाःगु संगठन नेपाल आदिवासी जनजाति पत्रकार महासंघ नं नाप नापं दइ धाःगु दु । आन्दोलनया ज्याझ्वलय् पत्रकार महासंघय् धर्ना तकं च्वंवनेगु जुइ धाःगु दु ।
भूटानय् अन्तर्राष्ट्रिय व्यापार मेला क्वचाल
राजेश बज्राचार्य | ञंलागा चतुर्दशी ११३७ (सेप्तेम्बर १८ २०१७)
भूटानया राजधानी थिम्पुइ चाङलिङमिथाङ्ग मैदानय् न्याःन्हुयंक जुया च्वंगु न्ह्यःक्वःगु अन्तर्राष्ट्रिय व्यापार मेला थौं क्वचागु दु ।
उगु व्यापार मेलायु नेपाल सच्छि व निगु स्टलनाप भूटान, भारत व थाइल्याण्ड नाप प्यंगु देशयाा २३४ स्टलहरु दुगु खः ।
“मेलाय् ७० द्धः स्वया अप्पो अवलोकनकर्तात सहभागिता दुगु खः ।” भूटान उद्योग तथा बाणिज्य संघया महासचिव फुम छिरिङ्गंं “मेलाय् प्रदर्शन यानातःगु सामाग्री ंसहभागी देशयाःगु व भूटानया व्यवसायपि नापया सम्बन्ध विकास जुया वना च्वंगु दु दु धकाः धयादीगु ।
मेलाय् भारतया बोडोल्याण्ड, आसामया थीथी थाय् या हस्तकला, तयारी पोशाक व मस्तय्गु खेलौनाया स्टल न दुगु खः । अथेहे थाइल्याण्डया थीथी नँसा ज्वंल स्टलया ब्यवस्था दु ।
