Display Style:
Column Style
त्यप आजुया जात्रा न्ह्यात
लहना न्यूज सम्वाददाता | कौलाथ्व चतुर्थी ११३६ (अक्टोबर ५ २०१६)
येँया क्वःने लागाया त्यप आजु अर्थात पचली भैरवया जात्रा थौंनिसें न्ह्याःगु दु ।
त्यप आजुयात थौं येँया थकू जुजुया छेँय् नं पचली भैरव पीठय् यंकूगुलिसें पचिमरः जात्रा न्ह्याःगु खः । व स्वयां न्ह्यः न्हूम्ह द्यःयात दुष्टि कंकेगु लिसें न्यास तयेगु ज्या जूगु खः ।
पुंपाखें दृष्टि कंकेमाःगु परम्परा कथं किचःमान चित्रकारं लंपू छायेगुलिसें द्यःया दुष्टि कंकूगु खः । अथे हे आचाःजुं न्हूम्ह द्यःयात न्यास तःगु खः ।
थकू जुजुया छेँय् नं द्यः गमय् थ्यनेधुंकाः द्यः झासु फल्चा दिकूगु खः । झासु फल्चां द्यःयात गमय् बिज्याकेधुंकाः पञ्चबलिलिसेंया पूजा जूगु खः ।
आचाःजुं पूजा याइगु इलय् बाजं थानाच्वंपिं गथुतयके उजं कायेमाःगु चलन दु । व हे कथं पूजाया इलय् आचाःजुयात ग्वाहालिया नितिं भाजु (स्थापित) नं नापं दइसा थकू जुजुया नं अनिवार्य उपस्थितिया परम्परा दया वयाच्वंगु दु ।
पूजा क्वचायेकाः त्यपय् पञ्चमाकारया थीथी ज्वलंत त्यपय् तयेगु याइ । त्यपय् अयलाः, थ्वँलिसें न्या, ख्येँय्, वः, ला, स्याःबजि, हाकुमुस्या लिसेंया ख्येँय्सगं व समयबजिया ज्वलंत तइगु खः ।
त्यपय् थुकथं पञ्चमाकारया ज्वलंत न्ह्याक्व तःसां त्यप गबलें जाइमखूगु जनविश्वास दु । लिसें आःतक्क गबलें त्यप जाःगु नं मदुनिगु जात्रालिसे सम्बन्धितपिनिगु दावी दु ।
पुलांम्ह द्यः जीर्ण जुइधुंकूगु अवस्थाय् थुगुसी न्हूम्ह द्यः प्रतिस्थापन याःगु खः ।
नेवाः पत्रकारपिन्सं दुर्गालाल नापलात
लहना न्यूज सम्वाददाता | गुंलाथ्व ९, ११३६ (अगष्ट १२, २०१६)
जनकवि दुर्गालाल श्रेष्ठयात थौं नेवाः पत्रकार राष्ट्रिय दबूया पत्रकारत वनाः नापलाःगु दु ।
जनकबि श्रेष्ठया थँबहिलिइ च्वंगु छेँ वंगु गुंलाथ्व ५ (अगष्ट ७) आइतबाःकुन्हु बांमलाक्क च्यायेधुंकाः वयकः व वयकःया छेँया स्थितीया जानकारी कायेत नेवाः पत्रकारत थौं वयकःया छेँय् हे वंगु खः ।
थःत नापलाःवःपिं पत्रकारतलिसे खँ ल्हासें जनकवि श्रेष्ठं थम्हं थःगु छेँ च्याःगु दुःखय् नं सुख लुइकागु धयादिल । अज्याःगु विपतया इलय् जःलाखलालिसें थः भिंच्यूताःमिपिन्सं थःगु हे ज्यानया परवाह मयासे थः व थःगु परीवारयात याःवःगु ग्वाहालि खनाः थः लयताःगु वयकःया धापू खः ।
जनजाति पत्रकारत सम्मानित
लहना न्यूज सम्वाददाता | गुंलाथ्व अष्टमि, ११३६ (अगष्ट ११, २०१६)
आदिवासी जनजाति पत्रकार महासंघं जनजातिया बुखँ सम्प्रेषणय् योगदान ब्यूपिं पत्रकारतयत थौं येँय् हंगु दु ।
जनजाति पत्रकार महासंघया १७क्वःगु वार्षिकोत्सवया लसताय् येँय् जूगु ज्याझ्वलय् सञ्चार ख्यलय् जनजातिया बुखँ सम्प्रेषणय् ताः ई न्ह्यःनिसें योगदान बिया वयाच्वंपिं स्वम्ह पत्रकारतयत हंगु खः । छापा, रेडियो व अनलाइन संचार ख्यलय् क्रियाशिल पत्रकारतयत नेपाल आदिवासी जनजाति राष्ट्रिय प्रतिष्ठानया न्वकू चन्द्रबहादुर गुरुङं हनापौ लिसें तका सिरपाः लःल्हानाः हनादिल ।
ज्याझ्वलय् अनलाइनपाखें देवकुमार सुनुवार, छापापाखे मीरा अमात्य राजभण्डारी अले रेडियोपाखे बुद्ध योन्जन तामाङयात सिरपाः ब्यूगु खः । सिरपाःया राशि म्हतिं २०द्वः तकाया दु ।
ज्याझ्वलय् प्रतिष्ठानया न्वकू गुरुङलिसें नेपाल आदिवासी जनजाति महासंघया नायः नगेन्द्र कुमाल, प्रेस चौतारीया नायः गणेश बस्नेत, प्रेस युनियनया न्वकू इश्वरी ओझालिसें नं थःथःगु नुगःखँ तयादीगु खः ।
सिरपाः ल्यज्या समितिया कजि गोरखापत्र दैनिकया निमित्त प्रधान सम्पादक पुष्कर माथेमां क्षमता, योगदानया लिसें भविष्यय् नेपाःया अदिवासी जनजाति पत्रकारतयत नेतृत्व बीफइगु सम्भवनायात नं ध्यानय् तयाः सिरपाः बीपिं पत्रकारतयत ल्ययागु खँ तयादिल ।
नेवाः पत्रकारतयसं महान्यायाधिवक्ता नापलात
लहना न्यूज सम्वाददाता | गुंलाथ्व अष्टमि, ११३६ (अगष्ट ११, २०१६)
नेवाः पत्रकारतयगु पुचलं थौं न्हूम्ह नियुक्त जूम्ह महान्यायाधिवक्ता रमण श्रेष्ठयात नापलाःगु दु ।
नेवाः पत्रकार राष्ट्रिय दबूया ग्वसालय् दबूया पदाधिकारी, दुजः लिसें थीथी संचार संस्थाय् आवद्ध नेवाः पत्रकारत वनाः महान्यायाधिवक्ता श्रेष्ठयात नापलाःगु खः ।
पत्रकार दबूया नायः श्रीकृष्ण महर्जन, न्वकू नृपेन्द्रलाल श्रेष्ठ, मू छ्यान्जे सुनिल महर्जन, दांभरिं सुरेन्द्रभक्त श्रेष्ठ, दुजः नविन जोशी लिसें नं श्रेष्ठयात महान्यायधिवक्ताया ज्याकुथिइ हे वनाः नापलाःगु खः । उगु इलय् दबूया पूर्व छ्यान्जे राजु महर्जन, दबू येँ जिल्लाया न्वकू बिराजकाजी राजोपाध्याय, नेवाः अनलाइन न्यूजया रबि महर्जन, इ इनडेफ्ट डट कमया राजेश बज्राचार्यया नं उपस्थिती दुगु खः ।
पत्रकारतयगु पुचःयात नापलासें महान्यायाधिवक्ता श्रेष्ठं देय् संक्रमणकालीन अवस्थाय् न्ह्याःवनाच्वंगुलिइ शान्ति प्रक्रिया क्वचायेकेगु, मधेसया माग सम्वोधन लिसें संविधान कार्यान्वयनया हाथ्यात आः दुगु धयादिल । लिसें देययात विकासया लँपुइ न्ह्यज्याकेत राज्यया प्यंगूगु अंग संचारपाखें तःधंगु ग्वाहालि दइगु अपेक्षा थःत दुगु वयकलं धयादिल ।
नेवाः पत्रकारत टिष्टुङ वन
लहना न्यूज सम्वाददाता | गुंलाथ्व ५, ११३६ (२०७३/०४/२३)
स्वनिगः दुने थीथी संचार माध्यमय् ज्या यानाच्वंपिं नेवाः पत्रकारतय्सं मकवानपुर जिल्लाया टिष्टुङ, पालुङ व चित्लाङ लागाया भ्रमण याःगु दु ।
टिष्टुङया १२दँया ‘बौ थनेगु जात्रा’या ई लाकाः नेवाः पत्रकार राष्ट्रिय दबू येँ जिल्ला ग्वसालय् ४० नेवाः पत्रकारत निन्हुया भ्रमणय् उखे वंगु खः । वंगु गुंलाथ्व ४ शन्चरबाः उखे वंपिं पत्रकारत टिष्टुङ पालुङ व चित्लाङया थीथी लागा चाःह्यूगु खः ।
अन थ्यंपिं पत्रकारतयसं टिष्टुङया १२दँया जात्राया लिसें टिष्टुङया हे बज्रबाराहि पीठ, तलेजु कोट व रानीपुखू, कुन्छाल गाविस व अनया गनेद्यःया लिसें पालुङ अले चित्लाङया अशोक चैत्य लगायतया थायया भ्रमण याःगु खः ।
टिष्टुङया सामाजिक, सांस्कृतिक, लिसें शिक्षा, कृषि, पर्यटन आदिया प्रचार प्रसार लिसें विकासया निम्तिं ग्वाहालि यायेगु ताःतुनाः उखे वंपिं पत्रकारतयगु भ्रमणया निम्तिं ज्यापु महागुथि टिष्टुङ लागा, थाहा नगरपालिका व नेपाल पर्यटन बोर्डं ग्वाहालि याःगु खः ।
- टिष्टुङ नगरपालिका घोषणा यायेत माग
ऐतिहासिक नां टिष्टुङयात नं स्वानाः थाहा नगरपालिकायात टिष्टुङ थाहा नगरपालिका घोषणा यायेत थनया स्थानीयं माग याःगु दु ।
टिष्टुङया १२दँया ‘बौ थनेगु जात्रा’ क्वचाःगु जानकारी बीगु लिसें येँय् नं टिष्टुङ थ्यंपिं पत्रकारतलिसे अन्त्रक्र्रिया ज्या ज्याझ्वलय् नवासें थनया स्थानीयं थानकोट–चन्द्रागिरी–चित्लाङ सडकया निर्माण नं याकचं क्वचायेकेत सरकारयात माग याःगु दु ।
उगु हे ज्याझ्वलय् पत्रकार दबू येँ जिल्लाया नायः नातीकाजी महर्जनं थःगु भाय मत्वःते टिष्टुङया नेवाःतयत इनाप यानादिल । लिसें नायः महर्जनं छेँ दयेकेबलय् वा छुं नं ज्याय् तकं फत्तले नेवाः पहः दुथ्याकेत नं टिष्टुङवासी नेवाःतय्त इनाप यानादिल ।
ज्यापु महागुथि, केन्द्रिय अध्यक्ष मण्डलया दुजः विनोद महर्जनलिसें स्थानीय समाजसेवी प्रमोद जोशीं तःधंगु पर्यटकिय सम्भावना कुबियाच्वंगु टिष्टुङ लागा प्रचारया अभावय् ल्युने लाःगु धासें थुगु लागाया विकासया नितिं ग्वाहालि यायेत पत्रकारतयत इनाप यानादिल ।
ज्याझ्वलय् येँय् नं वःपिं नेवाः पत्रकारतय्त ह्याउँ सिन्हः तिकाः सगं नं ब्यूगु खः ।
