Display Style:
Column Style
थौं स्वन्तिया लिपांगु दिं, किजापुजा
लहनान्यूज सम्वाददाता | कछलाथ्व दुतिया ११३७ (नोभम्बर १ २०१६)
थौं स्वन्तिया लिपांगु, सकल तताकेहेँपिन्त छेँय् छेँय् थः दाजुकिजायात पुज्यानाः किजापुजा हनाच्वंगु दु ।
थौंया दिनय् लः व चिकनं च्वयाः उकी आखेय्, ताय्, हाकुमुस्या, माय् आदि नं तयाः मन्दः दयेकाः किजापुजा यायेगु याइ । तःकेहेँनं थः दाजुकिजायात ह्याउँ सिन्हः तिकेगुलिसें ग्वय्स्वांमाः व जजंका कोखायेकाः, साःसाःगु मरिचरिलि, लिसें भोगत्या, तःसि आदि लिसेंया सिसाबुसा नं बियाः, ख्वःसिं नं तयाः किजापुजा याइ ।
थुकथं किजापुजा यायेबलय् चिकंमन्दः मगंतल्ले, ग्वयस्वांमाः झ्वाः मजूतल्ले, ख्वःसिं ध्वमगीतल्ले कालं थः दाजुकिजायात यंके दइमखूगु कामना तःकेहेँ नं याइ । थ्व हे खँ लिसे स्वानाः थः किजायात ततां यमराजया ल्हातं बचेयाःगु किम्बदन्ति झीगु समाजय् प्रचलित दु ।
थुगु दिनय् यमलोकया जुजु यमराज नं थः दूततलिसे केहेँ यमुनायाथाय् किजापुजा याकः वनीगु पौराणिक विश्वास दु ।
किजापुजा यायेधुंकाः दाजुकिजां थः तःकेहेँयात फुकथं धेबा, वसः व मेमेगु देछात नं बीगु चलन दु ।
थौं म्हपुजा, दँया न्हापांगु दिं
लहनान्यूज सम्वाददाता | कछलाथ्व पारु ११३७ (अक्टोबर ३१ २०१६)
थौं स्वन्तिया झ्वलय् सकलसिया छेँय् छेँय् म्हपुजा हनाच्वंगु दु ।
थौं सकल नेवाःतय् छेँय् छेँय् मन्दः दयेकाः म्हपुजा याइ । लः व चिकनं च्वयातःगु मन्दलय् आखय्, ताय्, हाकुमुस्या, वा तयाः म्हपुजा यायेगु याइ ।
म्हपुजा यायेबलय् छेँजः सकलें झ्वःलाक च्वनाः छेँया नकिम्हं यायेगु याइ । छेँजः सुं पिहां वनाच्वंगु वा म्हपुजा याःवये मफइगु अवस्थाय् उम्ह छेँजःया नामय् मन्दः जक सां पुज्यायेगु याइसा गुलिसिया थःगु छेँय् लःहिनातयापिं पशुपंक्षीयात तकं म्हपुजा यायेगु याइ ।
सुस्वास्थ्य व ताःआयूया कामना यासें पंचतत्वयात नं त्याकातये फयेमाः धइगु आशिका कथं पंचतत्वया प्रतीक ख्येँय् सगं बियाः म्हपुजा याइ । दँया दक्कले लिपांगु दिं लक्ष्मीपुजा कुन्हु मेगु दँया आर्थिक ल्याःचाः कथं लक्ष्मीपूजा याइगु खःसा दक्कले न्हापांगु दिं म्हपुजाकुन्हु दच्छियंकं बल्लाक ज्या यानाच्वने फयेमा धइगु ल्याखं म्हपुजा याइ ।
थःगु शरीरया प्रतीक कथं मन्द दयेकाः मन्दःयात पुज्यासें थम्हं थःयात हे पुज्यायेगु नेवाः परम्परा म्हपुजा हलिंया हे अनुपम व दर्शनं जाःगु तजिलजि खः ।
‘संविधान संशोधन यानाःसां व्यवहारय् छ्यले’
लहनान्यूज सम्वाददाता | कछलाथ्व पारु ११३७ (अक्टोबर ३१ २०१६)
प्रधानमन्त्री पुष्पकमल दाहालं संविधान संशोधन यानाः हे जूसां नेपाल सम्वतयात व्यवहारय् छ्यलेगु नितिं थम्हं कुतः यायेगु धयादीगु दु ।
न्हूदँ नेपाल सम्वत ११३७ या लसताय् थौं न्हूदँ राष्ट्रिय समारोह समितिया ग्वसालय् येँया बसन्तपुलिइ जूगु सभायात सम्वोधन यासें प्रम प्रचण्डं न्हापाया कार्यकालय् थम्हं हे नेपाल सम्वतयात राष्ट्रिय सम्वत घोषणा याःसां थीथी कथंया प्राविधिक लिसें प्रशासनिक परिस्थितीं यानाः व्यवहारय् छ्यलेमफूगु धयादिल । आःया पालय् संविधान संशोधन हे यानाः हे जूसां थुकियात व्यवहारय् हयेगु प्रम दाहालया दाबी खः ।
नेपाल नेपाल सम्वतयात व्यवहारीक रुपं छ्यलेत तिथिमितिया ल्याःचाः थाकु धाइगु जूगुलिं थुकियात छ्यले अःपुकेगु नितिं थम्हं पंचाग सम्बन्धि विज्ञतलिसे नं सहलह यानाच्वनागु दाहालं धयाद्यूगु खः । आः देयया नामं स्वनातःगु नेपाल सम्वतयात नेवाःतयसं नं थःगु जक धकाः बिचाः यायेगु व गैर नेवाःतयसं नं नेवाःतयगु सम्वत धकाः बिचाः यायेगु त्वःतेमाःगु दाहालया धापू खः ।
नुगः खँ तयेगु झ्वलय् समारोह समितिया नायः भीमसेनदास प्रधानं नेपाल सम्वतयात नोटय् नं छ्यलेमाःगु, बैंकया चेकय् छ्यले दयेमाःगु, नेपाल सम्वत अध्ययन प्रतिष्ठान दयेकाः थुकिया बारे अध्ययन, अनुसन्धान न्ह्याकेमाःगु, राष्ट्रिय विभूति शंखधर साख्वाः व नेपाल सम्वतया विषय पाठ्क्रमय् दुथ्याकेमाःगु लिसें म्ह्वतिं नं प्रधानमन्त्रीया लेटर पायडय् नेपाल सम्वतयात छ्यलेमाःगु थःपिनिगु माग यथावत हे दुगु धयादिल । नायः प्रधानं थुगु मागत थःपिनिगु पहिचानलिसे हे स्वानाच्वंगु जूगुलिं थुगु माग पूमवंतल्ले थम्हं सः थ्वयेका हे च्वनेगु धयादिल ।
उगु हे ज्याझ्वलय् कवि लिसें पूर्व सभासद् बुद्ध सायमियात नेपाल सम्वत इमेज सिरपालं हंगु खः । कवि सायमियात प्रम दाहालं सिरपालं सम्मानित यासें खादां कोखायेकेगु लिसें हनापौ व सिरपाःया राशि २५द्वः तका लःल्हानादिल ।
व स्वयां न्ह्यः थीथी बाजंखलः लिसें क्लब संघसंस्थाया ब्यानरलिसें येँया थःने व क्वःने लागाय् न्हूदँया र्यालि चाःह्यूगु खः । र्यालिइ समारोह समितिया नायः भीमसेनदास प्रधान, नेवाः न्ह्यलुवा लिसें पूर्वमन्त्री तीर्थराम डंगोल, समाजसेवी लक्ष्मीदास मानन्धर लिसें कलाकार, पत्रकार, साहित्यकार, उद्योगी, व्यापारीलिसें तःधंगु ल्याखय् सर्वसाधारणया नं ब्वति दुगु खः ।
थौं लक्ष्मीपूजा, दँया लिपांगु दिं
लहनान्यूज सम्वाददाता | कौलागा आमै ११३६ (अक्टोबर ३० २०१६)
थौं स्वन्तिया झ्वलय् लक्ष्मी पूजा, सकसियां छेँय् छेँय् लक्ष्मी द्यः पुज्यानाः हंगु दु ।
थौं सकसियां पिखालखुं बँ थिलाः लक्ष्मी द्यःयात सालाः धुकुतिइ दुत हयाः पुज्यायेगु याइ । थौं लक्ष्मीद्यः पुज्याइगु इलय् द्यःया लिसें वा, तुफि, धनद्रव्य आदिलिसें छेँया लालपुर्जा तकं तयाः पुज्यायेगु चलन दु ।
थौं दँया दक्कले लिपांगु दिनय् मेगु दँय् थःगु छेँज्याया ल्याःचाः यायेगु ल्याखं थुकथं थःगु दक्वं सम्पत्तिया नं ल्याःचाः कायेगु याःगु कथं काइ ।
थौंया चायात मोहरात्री नं धायेगु याः । थौैं मत च्याकाः झःझः धाःगु छेँय् लक्ष्मीद्यः दुहां बिज्याइगु विश्वासय् सकसियां छेँय् छेँय् पाल्चालिसें झिलिमिलि मत तकं च्याकाः छेँ झःझः धायेकेगु याइ ।
थौं लक्ष्मीद्यः पुज्यायेधुंकाः कन्हय धाःसा म्हपुजा यानाः न्हूगु दँयात लसकुस याइ । कन्हय् स्वनिगःया थीथी थासय् थीथी ज्याझ्वःत ग्वसाः ग्वयाः न्हूगु दँयात लसकुस यायेत्यंगु दु ।
१५दँ लिपा ज्या मालेत तापलय् वनेम्वाःलीगु
लहनान्यूज सम्वाददाता | कौलागा आमै ११३६ (अक्टोबर ३० २०१६)
उद्योगमन्त्री नवीन्दराज जोशीं आःया १५दँलिपा ज्या मालेत नेपाली ल्याय्म्हत तापलय् वनेच्वने म्वाःलीगु स्थिती ब्वलंकेत थः क्रियाशिल दुगु धयादीगु दु ।
थौं नेपाली कांग्रेस सतुंगः इकाइ समितिं चन्द्रागिरी नगरपालिका सतुंगलय् ग्वसाः ग्वःगु स्वन्ति नखः, न्हूदँ नेपाल सम्वत ११३७ व छठया लसताय् ग्वसाः ग्वःगु चियापान अले भिंतुना कालबिल ज्याझ्वलय् उद्योगमन्त्री जोशीं थः आः देशय् बन्द जूगु उद्योगत हाकनं न्ह्याकेगु योजनाय् जानाच्वनागु धयादिल । गणेशमान सिंह व विपि कोइरालाया आर्थिक क्रान्तिया परिकल्पनायात मूर्तरुप ब्युसें देययात समृद्ध दयेकेगु भाला आः थःगु ब्वहलय् महसूस थम्हं यानाच्वनागु जोशीया धापू खः ।
२०३६ सालय् विपि कोइरालां न्ह्याकाद्यूगु मेलमिलाप ज्याझ्वःया निरन्तरतालिसें थौंकन्हय् तिनि घोषणा जूगु चन्द्रागिरी नगरपालिकायात म्हसीकेगु आज्जुं च.न.पा. सतुंगःया १५, १६ व २४ वडापाखें मंकाः रुपं ग्वसाः ग्वःगु ज्याझ्वलय् सांसद अले पूर्व उपप्रधानमन्त्री प्रकाशमान सिंहं २०६२/६३ सालया जनआन्दोलनयात लुमंकुसें आन्दोलन ताःलाकेत निर्णायक भूमिका म्हितूगु गाविस मध्ये सतुंगःया महत्वपूर्ण थाय् दुगु धयादिल ।
मेगु छगू प्रसङ्गय् सांसद सिंहं अख्तियार दुरुपयोग अनुसन्धान आयोगया प्रमूख आयुक्त लोकमानसिं कार्की विरुद्धय् वःगु महाभियोग प्रस्तावया पक्षय् नेपाली कांग्रेस दुसां प्रस्ताव हःगु प्रक्रियाप्रति धाःसा पार्टिया असन्तुष्टि दुगु स्पष्ट यानादिल । सत्ता साझेदार दललिसे हे सहलह मयाःसे निगू जक दल जानाः क्वःछ्यूगु खँय् थम्हं ल्हाःचिं तयाबीमाःगु खँ कांग्रेसयात मान्य मजुइगु सिंहया धापू खः ।
चन्द्रागिरी नगरपालिका वडा नम्बर २४ सतुंगःया कूलनारायण महर्जनया सभानायकय् क्वचाःगु ज्याझ्वलये नेपाली कांग्रेसया विपि कोइराला, गणेशमान सिंह, कृष्णप्रसाद भट्टराई लिसेंया ततःधंपिं अले च.न.पा.या स्थानीय दिवंगत नेतातयगु फोटोय् स्वांमाः कोखायेकेगु लिसें मदुपिं नेतापिन्त श्रद्धान्जलि प्वंकुसें १ मिनेट मौन धारण याःगु खः ।
ज्याझ्वलय् सांसद राजन के.सी., भौतिक पूर्वाधार विकास तथा यातायात व्यवस्थामन्त्री रमेश लेखक, नेका येँ जिल्ला सभापति सबुज बानियाँलिसें स्थानीय नेतात च.न.पा. १६ या राजेन्द्र महर्जन, च.न.पा. १५ या पंचबहादुर महर्जनलिसेंया उपस्थिती दुगु खः ।
थौंकन्हय् पुनर्निर्माणया अवस्थाय् दुगु भुखाचं क्षतिग्रस्त विष्णुदेवी देगः, मांया ख्वाः स्वयेगु दिंलिसे स्वानाच्वंगु धार्मिक व सांस्कृतिक महत्वया मातातीर्थ, कालुपाण्डेया छ्यं थुनातःगु समाधिस्थल, मच्छेगां लिसें चन्द्रागिरीया ग्वंगः महाःद्यः देगःलिसेंया थीथी पर्यटकिय सम्भावना दुगु चन्द्रागिरी नगरपालिका दुने तत्कालीन ११ गाविस दुथ्यानाच्वंगु दु । तत्कालीन १२ भन्ज्याङ, थानकोट, दहचोक, महादेवस्थान, मातातीर्थ, सतुंगः, मच्छेगां, बलम्बु, तीनथाना, न्हूगु नैकाप, पुलांगु नैकाप गाविसयात छथाय् लाकाः नगरपालिका घोषणा याःगु खः ।
