Display Style:
Column Style
दान्यहिरा सिरपाः मथुरा सायमियात
लहनान्यूज सम्वाददाता | कौलाथ्व चतुर्दशि ११३६ (अक्टोबर १५ २०१६)
थुगुसीया दान्यहिरा सिरपाः साहित्यकार मथुरा सायमियात बीगु जूगु दु ।
लिसें दान्यहिरा हःपाः सिरपाः धाःसा साहित्यपाखे हे नारद बज्राचार्ययात लःल्हाइगु जूगु दु । निम्हेसितं वइगु कौलागा नवमि (कार्तिक ८) कुन्हुया यलया अशोक हलय् छगू ज्याझ्वः यासें लःल्हाइगु जूगु दु ।
दान्यहिरा सिरपाः हनापौलिसें ५०द्वः तकाया खःसा दान्यहिरा हःपाः सिरपाः हनापौलिसें २५द्वः तकाया खः ।
दँयदसं बिया वयाच्वंगु दान्यहिरा सिरपाः व दान्यहिरा हःपाः सिरपाः निदँय् छक्वः संगीतपाखे व निदँय् छक्वः साहित्यपाखे लःल्हाना वयाच्वंगु दु । थुगुसी साहित्यपाखे सिरपाः बीगु पाः खः ।
बिराट साहित्य सम्मेलन क्वचाल
लहनान्यूज सम्वाददाता | कौलाथ्व द्वादशि ११३६ (अक्टोबर १३ २०१६)
बिराट नेपालभाषा साहित्य गुथिया ग्वसालय् ५५क्वःगु विराट नेपालभाषा साहित्य सम्मेलन ख्वपय् तःजिक क्वचाल ।
ज्याझ्वःया मू पाहां विराट नेपालभाषा साहित्य सम्मेलन गुथिया पुलांम्ह नायः लिसें सल्लाहकार डा.योगेन्द्र प्रधानजुं त्वाःदेवाय् मतः च्याकाः ज्याझ्वःया उलेज्या यानादिल ।
ज्याझ्वलय् साहित्यकारपिन्सं थःथःगु चिनाखँ, मुक्तक, बाखं लिसेंया साहित्यिक रचनात न्यंकूगु खः । लिसें कलाकारपिनिगु सांस्कृतिक न्ह्यब्वया नं न्ह्यब्वःगु खः ।
उगु हे ज्याझ्वलय् वंगु एसएलसी परीक्षाय् नेपालभाषा विषय कयाः दकले अप्वः ल्याः हयाः पास जूम्ह आदर्श मा.वि. लायकू थिमिया अनिता प्रजापतियात नेपालभाषा पदक लःल्हाःगु खः । प्रजापतियात मू पाहां प्रधानं पदक लःल्हानादिल । लिसें नेपालभाषा विषय ब्वंका वयाच्वंगु लायकू थिमिया आदर्श मा.बि.यात नं हंगु खः ।
साहित्य सम्मेलनय् डा. पुष्पराज राजकर्णिकार, साहित्यकार लिसें गुथिया पुलांम्ह नायः त्रिरत्न शाक्य, मू पाहां प्रधानलिसें नं मातृभाषाया उत्थानय् साहित्य ख्यलं तःधंगु भूमिका म्हितावःगु व म्हिताच्वंगु दुगु खँय् बः बियादिल । ज्याझ्वः गुथिया नायः कृष्णभक्त बोडेया नायकय् क्वचाःगु ख ।
ख्वपय् साहित्य तःमुँज्या तःजिक न्ह्यात
लहनान्यूज सम्वाददाता | कौलाथ्व द्वादशि ११३६ (अक्टोबर १३ २०१६)
जनता म्वाःसा भाषा म्वाइ धइगु नारालिसें स्वीखुक्वःगु नेपालभाषा साहित्य तःमुँज्या व सांस्कृतिक ज्याझ्वः थौं ख्वपया भार्वाचोय् न्ह्याःगु दु ।
थौं तःमुँज्याया उलेज्या ज्याझ्वलय् भाषा व साहित्यया ख्यलय् ताः ई न्ह्यःनिसें मदिक्क योगदान बिया वयाच्वंगु धकाः प्रा. माणिकलाल श्रेष्ठयात हंगु दु । प्रा. श्रेष्ठयात ज्याझ्वःया मू पाहां नेपाल मजदुर किसान पार्टिया नायः नारायणमान बिजुक्छें दोसल्लां न्ययेकेगु लिसें हनापौ व २५द्वः तका लःल्हानादिल ।
तःमु्ँज्याया उलेज्या धाःसा भार्वाचो त्वाःया ज्याथःम्ह व्यक्ति ९६दँयाम्ह वीरबहादुर शिल्पकारं त्वाःदेवाय् मत च्याकाः यानादिल । थौंया मुँज्याय् साहित्यकारपिन्सं थःथःगु साहित्य न्ह्यब्वयेगु झ्वलय् १५पु चिनाखँ, ५ बाखं व ५ च्वखं लिसें कलाकारपिनिगुपाखें सांस्कृतिक न्ह्यब्वयात नं न्ह्यब्वःगु दु ।
वरिष्ठ अधिवक्ता कृष्णप्रसाद भण्डारी, डा. शम्भु पहाडि, डा. उर्मिला कार्की, नरेन्द्र प्रसाइ, इन्दिरा प्रसाइ, भक्तपुर विकास सहयोग संगठनयापाखें राजाराम जोशी, सांसद सुनिल प्रजापति, ख्वप इन्जिनियरीङ कलेजया प्राचार्य सुजन माकः, ज्याझ्वलय् ब्वति कायेत बुटबलं थ्यंपिं नवराज श्रेष्ठ, बाबुराम पोखरेल लिसें नं नुगःखँ तयादीगु खः ।
कन्हयतक्क न्ह्याइगु तःमुँज्याय् थौंया ज्याझ्वः च्वमि भाजु कृष्णकुमार वैद्यया सभानायकय् जूगु खःसा कन्हयया ज्याझ्वः मिसा च्वमि अनुराधा थापा मगरया सभानायकय् जुइगु ग्वसाः खलकं जानकारी ब्यूगु दु ।
मरु गनेद्यःया जात्रा क्वचाल
लहनान्यूज सम्वाददाता | कौलाथ्व एकादशि ११३६ (अक्टोबर १२ २०१६)
येँया हनुमानध्वाखा दरबार लिक्कया नांजाःगु मरु गनेद्यःया खःयाः थौं क्वचाःगु दु ।
स्वनिगःया प्यम्ह नांजाःपिं गनेद्यःमध्ये मरु गनेद्यः अशोक विनायकया खःयाः देय् चाःहुइकाः क्वचाःगु खः । मरु गनेद्यःया देगलय् प्रतिस्थापन यानातःम्ह वहःया गनेद्यःया मूर्तियात खटय् तयाः देय् चाःहुइकूगु खः ।
थुगु जात्राय् खःयात मरु गनेद्यः गुथिया दुजःया म्ह्यायमस्तयगु छेँय् यंकाः पुज्यायेगु याइ । देय् चाःहुइके धुंकाः वहःया गनेद्यःया मूर्तियात द्यःछेँय् हे हाकनं प्रतिस्थापन यायेगु चलन दु ।
स्वनिगलय् क्वयना गनेद्यः अर्थात जलविनायक, कार्यविनायक, सूर्यविनायक व अशोक विनायक नांजाः ।
मरुइ दुगु अशोक विनायकया देगलय् गजू मदुगुलिं थ्वयात मरु गनेद्यः धाःगु खः । व हे लिसें त्वाःया नां तकं मरु हे च्वंवंगु खः ।
असं चालं लिसें पायाः नं पिकात
लहनान्यूज सम्वाददाता | कौलाथ्व एकादशि ११३६ (अक्टोबर १२ २०१६)
येँय् असंत्वाःया उराय्तय् मोहनिया स्वां थौं क्वकाया चालं याःगु दु ।
मेमेपिनि दशमिया दिनय् स्वां क्वकाइगु खःसां असंया उरायतय् धाःसा थौं अर्थात एकादशिया दिनय् तिनि स्वां क्वकाइ । अथेजुयाः थौंया दिंयात असं चालं धकाः धाइ ।
उकिया लिसें असंया उरायतय् थौं हे पायाः नं पिकाःगु दु । चिचीधिकःपिं मचातयगु नं ब्वति दइगु धइगु असंया पायाःयागु बिस्कं परम्परा खः ।
मेमेगु पायाः वा जात्राय् दक्कले ज्याथःम्ह नायः जुइसा असंया पायाःलय् दक्कले क्वकालिम्ह नायः जुइगु परम्परा दु । थुगुसी दक्कले क्वकालिम्ह सायन तुलाधर नायः जूगु खः ।
असंया आगंद्यःया छेँय् नं पिकाइगु पायाः असंभलु अजिमा व गनेद्यःया देगः चाःहिलाः व हे छेँय् लिहांवनाः भुइफसि पालाः क्वचाइ । कलिङ युद्ध धुंकाः ल्वाभः त्वःताः बौद्धमार्गी जूगु थुगु समुदायं थःगु न्हूगु पुस्तायात पुर्खाया बीरताबारे जानकारी बीत पायाः पिकायेगु परम्परा दयेकूगु किम्वदन्ती दु ।
