Display Style:
Column Style
न्हूदँ तःजिक हनेत तयारी तच्वल
लहनान्यूज सम्वाददाता | कौलागा तृतीया ११३६ (अक्टोबर १८ २०१६)
नेपालसंवत न्हूदँ राष्ट्रिय समारोह समिति ११३७ ब्यवस्थापन समितिया मुँज्यां न्हूदँ तःजिक हनेगु नितिं थीथी खँत क्वःछित ।
समारोह समितिया नायः भिमसेनदास प्रधानया नायकय् जूगु मुँज्याय् वइगु ने.सं. ११३६ कौलागा पंचमी (कार्तिक ४ गते) बिहिवाः आर्थिक समितिया लिसें मञ्च, माईक ब्यवस्थापन कवःया मुँज्या तःगु दु । अथेहे, संचार व स्वयंसेवक कवःया मुँज्या नं उकुन्हु हे तःगु दु ।
अथेहे, ने.सं. ११३६ कौलागा षष्ठी (कार्तिक ५ गते) शुक्रवाः नेपाल सरकारयात नेपाल संवतयात कयाः ध्यानाकर्षण पौ लःल्हायेगु नितिं सल्लाहकार समितिया मुँज्या सःतूगु दु । व हे कथं ने.सं. ११३६ कौलागा सप्तमी (कार्तिक ६ गते) शनिवाः न्हूदँया सांस्कृतिक
¥यालीइ ब्वतिया नितिं मिसा मुना, क्लब व संघसंस्था मुना, सांस्कृतिक बाजं कवः मुना सःतूगु दु ।
वइगु कौलागा दशमी (कार्तिक ९ गते) मंगलवाः समारोह समिति ११३७ या पूर्ण बैठकया मुँज्या सःताः न्हूदँया जानकारी बिइगु ज्याझ्वः तयातःगु दु । कौलागा द्वादशी (कार्तिक ११ गते) बिहिवाः नासः पूजा व बाजं खलःयात केपू लःल्हायेगु ज्याझ्वः तयातःगु दु ।
कौलागा त्रयोदशी (कार्तिक १२ गते) शुक्रवाः न्हूदँया लसताय् च्यापान ज्याझ्वः याइगु जूगु दु । उकिया नापं मुँज्यां ब्यवस्थापन समितिया संयोजन यायेगु नितिं संयोजक पुचलय् सुजीव बज्राचार्य, उमेश स्थापित व राजेश शाक्ययात ल्यःगु दु ।
नरःया गनं मदुगु जात्रा क्वचाल
लहनान्यूज सम्वाददाता | कौलागा पारु ११३६ (अक्टोबर १७ २०१६)
येँया नरलय् (हाडिगां) न्यायेकीगु गनं मदुगु धयातःगु जात्रा थौं तःजिक क्वचाल ।
नरःया थथालत्वाः, क्वतालत्वाः व न्यालमात्वालय् स्वंगः खःया जात्रा यानाः नरः जात्रा क्वचाःगु खः । स्वंगुलिं खः नरः चाःहिकाः थथाल त्वालय् हयाः क्वचाःगु खः ।
स्वंगुलिं त्वाःया स्वंगुलिं रथय् चोक्ते नारायणद्यःया जात्रा याइगु खः । स्वंगू खः मध्ये थथालत्वाःया खःयात मां, क्वतालत्वाःया खःयात अबु व न्याल्मा त्वाःया रथयात काय् धायेगु चलन दु ।
गन मयाः कथं नारायणद्यःयात जात्रा याइगु जूगुलिं थुगु जात्रायात गनं मदुगु जात्रा धाःगु खः । थुगु जात्राय् रथया घःचाः च्वय् जुइसा द्यः दक्कले च्वय् व गजू क्वय् लाइसा जात्रा यायेत लुँया स्वां मदयक मगाः धयागु विश्वास दु ।
चोक्ते नारायणद्यःया लुँया स्वां प्वाथय् दुम्ह मिसायात बिल धाःसा मचा याउँक बुइगु जनविश्वास दया वयाच्वंगु दु ।
- जात्रालिसे स्वानाच्वंगु किम्वदन्ति
धयावः कथं न्हापा नरःया जुजुया व वया पासाया नापनापं प्वाथय् दत । रानी व पासाम्हेसिया प्रसव पीडा गथे सह याये धकाः खँल्हाबल्हा जूगु इलय् पासाम्हं नारायणद्यःया इच्छा धकाः लिसः बिल सा रानिं मचा बुइकीपिं झी, नारायण द्यवं छु याइ धकाः लिसः बिल ।
पासाम्हेसिया याउँक हे मचा बुल तर रानिया झिंनिदँतक्क मचा मबुल । थथे छाय् जुल धकाः जुजुं जोशितयत सःताः क्यंकेब्यूबलय् थःत अपहेलना याःगु तमं नारायणद्यः हिमालय पर्वतय् च्वंवंगुलिं थथे जूगु खँ कन ।
व धुंकाः गनं मयाइगु कथं जात्रा याये धकाः नारायणद्यःयात ह्ययेकाः थन हल । व धुंकाः रानीया मचा बुल धइगु बाखं थुगु जात्रालिसे स्वानाच्वंगु दु ।
गन मयाइ कथं जात्रा याये धाःगु ल्याखं द्यःयात दक्कले च्वय् तयाः रथया गजू क्वय् तयाः रथयात चाचाहिकीगु खः । व हे कथं रथया घःचाः नं बँय् मखसें च्वय् फसय् हे चाःहिकीगु लिसें गनं मदुगु लुँया स्वां छायेगु याइ ।
विज्ञान ख्यलय् नं दान्यहिरा सिरपाः
लहनान्यूज सम्वाददाता | कौलाथ्व पुन्हि ११३६ (अक्टोबर १६ २०१६)
नेपालभाषा एकेदमिपाखें थुगुसी विज्ञान व प्रविधि ख्यलय् नं दान्यहिरा सिरपाः बीगु जूगु दु ।
थुगुसीनिसें २५द्वः तका राशिया दान्यहिरा विज्ञान प्रविधि सिरपाः नं बीत्यंगु खः । दक्कले न्हापांगु दान्यहिरा विज्ञान प्रविधि सिरपाः डा. रमेशमान सिंहयात बीगु जूगु दु ।
थ्वयां न्ह्यः हे दान्यहिरा सिरपा मथुरा सायमियात अले दान्यहिरा हःपाः सिरपाः नारद बज्राचार्ययात लःल्हायेगु घोषणा जुइधुंकूगु दु । वइगु कौलागा नवमि (कार्तिक ८) या दिनय् यलया अशोक हलय् जुइगु ज्याझ्वलय् थुगु स्वंगुलिं सिरपाः लःल्हायेत्यंगु दु ।
लिसें उगु हे ज्याझ्वलय् यज्ञरत्न धाख्वाःजुया ११गूगु सफू कथं बाखं मुना सफू ‘तुतां’ नं पिदनीगु जूगु दु । साहित्यकार धाख्वालं दँय्दसं दान्यहिरा सिरपाः लःल्हायेगु ज्याझ्वलय् थःगु न्हूगु सफू नं पिथना वयाच्वनादीगु दु ।
थुगु लिंक नं चायेकाः स्वयादिसँ
न्हूदँ हनेत थीथी कवः नीस्वन
लहनान्यूज सम्वाददाता | कौलाथ्व पुन्हि ११३६ (अक्टोबर १६ २०१६)
न्हूदँ समारोह समिति ने.सं. ११३७ तःजिक हनेगु नितिं नायः भीमसेन दास प्रधानया नायकय् थीथी कवः नीस्वनाः उकिया भाला लःल्हायेगु ज्या क्वचाःगु दु ।
न्हूदँ समारोह समिति ११३७ या थौं येँय् च्वंगु मुँज्यां थीथी कवःया भाला लःल्हायेगु लिसें न्हूदँया दिं अथे धइगु म्ह पुजाकुन्हु दँयदसं थें येँया बसन्तपुलिं ¥याली पिकयाः येँया क्वःने व थःने लागा चाःहिलेगु क्वःछ्युगु दु । लिसें ¥याली धुंकाः बसन्तपुलिइ हे सभा यायेगु व उगु सभाय् प्रधानमन्त्री पुष्पकमल दाहाल प्रचण्डयात मू पाहां कथं सःतेगु नं थौंया मुँज्यां क्वःछ्यूगु दु ।
लिसें थौंया हे मुँज्यां ११म्ह दुजः दुथ्याःगु व्यवस्थापन समिति नं नीस्वंगु दु । समितिइ सुजीव बज्राचार्य, राजेश शाक्य, उमेश स्थापित, पंचनारायण महर्जन, नानीहेरा महर्जन, रविन्द्र श्रेष्ठ, शैलेस शाक्य, ज्योति शाक्य, नविन मानन्धर, मचाराजा महर्जन व अमृत ताम्राकार दु ।
अथे हे थीथी कवः नीस्वंगुलिइ आर्थिक कवःया भाला अमृत ताम्राकारयात, सांस्कृतिक कवः पंचनारायण महर्जन, संचार कवः नृपेन्द्रलाल श्रेष्ठ, कुमार रंजितयात, प्रतिनिधि मण्डल उमेश स्थापित, ¥याली व्यवस्थापनलिसें स्वयम् सेवक कवःया भाला उमेश स्थापित व विष्णु स्यस्यःयात ब्यूगु दु । व हे कथं मिसा कवः नानीहेरा महर्जनयात भाला ब्यूगु दुसा मिसा प्रतिनिधिइ नानीहेरा महर्जनलिसे शान्ता महर्जन, ज्ञानीशोभा महर्जन, शोभा महर्जन, मीना महर्जन, डा. शिलु बज्राचार्य, शशिकला मानन्धर, जीवन डंगोल, प्रेरणा शाक्य, मन्जु श्रेष्ठयात ल्यःगु दु ।
मंच अले माइक व्यवस्थापन ज्योति शाक्य, राजेश शाक्य, देय्न्यंक देवदास मानन्धर, क्यालेण्डर विष्णु चित्रकार व देवदास मानन्धरयात, गैर नेवाः कवः लालवावु तामाङ व सुवोध राज आचार्य, भाषिक खलःपुचः÷साहित्य ख्यःया भाला मथुरा साय्मि व भूषणप्रसाद श्रेष्ठ, जातीय खलः पुचः केन्द्रिय मानन्धर संघ व द्यःला समाजयात भाला ब्यूगु दु । बाजं समन्वय शेषनारायण महर्जनयात, गुंला बाजं समन्वय भगवान शाक्ययात भाला ब्यूगु दु । अथे हे सकल पुलांपिं नायःपिन्त समारोह समितिया सल्लाहकार ल्यःगु दु ।
‘नेपाल वयेत तयार दु’
लहनान्यूज सम्वाददाता | कौलाथ्व चतुर्दशि ११३६ (अक्टोबर १५ २०१६)
चिनियाँ राष्ट्रपति शी जिन पिङं सहज जुइकथं याकनं हे नेपालया भ्रमण यायेत थः तयार दुगु धयादीगु दु ।
प्रधानमन्त्री प्रचण्डयात सन्चरबाः भारतया गोवाय् नापलानाः जूगु खँल्हाबल्हाय् थथे बचं बियादीगु परराष्ट्रमन्त्रीं प्रकाशसरण महतं धयादीगु दु । खँल्हाबल्हाय् पूर्वाधार, सञ्चार, व्यापार व पारवहन लिसेंया ख्यःया विकासया लागिं सहकार्य यायेगु विषयस तकं सहलह जूगु बिबिसिया बुखँय् न्ह्यथनातःगु द ।
सन्चरबाः प्रधानमन्त्री प्रचण्डं चिनियाँ राष्ट्रपति सीयात नापलानाः नेपाल भ्रमणया नितिं ब्वनादीगु खः । लिसलय् राष्ट्रपति सीं याकनं हे नेपाल भ्रमण यायेगु बचं बियादीगु परराष्ट्रमन्त्री महतं धयादिल ।
थ्वयां न्ह्यः प्रधानमन्त्रीया दूतया रुपय् चीन झाःम्ह उपप्रधानमन्त्री कृष्णबहादुर महरां नं सीयात नेपाल भ्रमणया लागिंं ब्वनादीगु खः ।
सन्चरबाः हे प्रधानमन्त्री प्रचण्डं भुटानया प्रधानमन्त्री छिरिङ तोब्गेयात नं नापलानाः भुटानी शरणार्थी समस्या समाधान यायेत ग्वाहालिया लागिं इनाप यानादीगु दु ।
थुगु लिंक नं चायेकाः स्वयादिसँ
