Display Style:
Column Style
शान्तिया कामना यासें कथिन चीवरदान
लहनान्यूज सम्वाददाता | कौलागा अष्टमि ११३६ (अक्टोबर २३ २०१६)
देशय् शान्ति, मैत्री व समृद्धिया कामना यासें सलंसः भिक्षु व भिक्षुणीपिनिगु उपस्थितिइ राजधानीइ कथिन चीवर दानया ग्वसाः ग्वल ।
द्रव्यमानसिंह तुलाधर (भाईराजा) व बसन्धरा तुलाधरं राजधानीया भृकुटीमण्डपस्थित बुद्ध विहारय् थुगु ज्याझ्वःया ग्वसाः ग्वयादीगु खः । तुलाधर त्यपुया आव्हानय् ज्याझ्वलय् थ्यंपिं भिक्षुपिनिगुपाखें शीलप्रार्थना व प्रवचन याःगु खः ।
व धुंकाः तुलाधर त्यपुलिसें बुद्ध धर्मप्रति आस्था तइपिं सलंसःम्हेसिनं भिक्षुभिक्षुणीपिन्त न्हियान्हिथंया जीवनय् मदयकं मगाःगु च्याता ज्वलं (अष्टपरिष्टकार) दान याःगु खः । दानं मनय् दुगु लोभ व कञ्जुस भाव चिलावनीगु विश्वास लिसें उपस्थित दातापिन्सं थम्हं फुथे नगद लिसें थीथी ज्वलं दान याःगु खः ।
भिक्षुपिं असार पुन्हिनिसें कतिपुन्हितक्क छगू हे विहारय् च्वनाः ध्यान व ज्ञानया अभ्यास (वर्षावास) यायेधुंकाः जक उगु दान बीगु परम्परा दुगुलिं स्थविरवाद बुद्ध धर्मय् थुगु दानयात दुर्लभ कथंया दानया रुपं काइ । गौतम बुद्धया पालनिसें हे न्ह्यानावयाच्वंगु थुगु परम्परा कथं थुगुसी बुद्ध विहारय् अखिल नेपाल भिक्षु महासंघया मू छ्यान्जे तकं खःम्ह भिक्षु कौण्डन्य, भिक्षु सुद्धिको व भिक्षु धम्मदत वर्षावास च्वनाद्यूगु खः ।
दानया महिमा ब्वलंकीगु थुगु पर्वय् अष्टपरिष्टकार दानय् प्राप्त जुइगु धेबा लुम्बिनीइ नेपाःमिनिगु पाखें दयेकाच्वंगु थेरवाद बुद्ध विहार दयेकेगु ज्याय् खर्च यायेगु नं मू छ्यान्जे भिक्षु कौण्डन्यं जानकारी बियादिल । ‘अष्टपरिष्टकार दानपाखें म्हइगु धेबा व भिक्षुपिन्त प्राप्त जुइगु दानया निश्चित धेबा लुम्बिनीइ विहार दयेकेगु ज्याय् खर्च यायेगु नीति न्हापा थें थुगुसी नं निरन्तरता बियागु दु । ’मू छ्यान्जे भिक्षु कौण्डन्यं लहनान्यूजयात धयादिल ।
भिन्तुना र्यालिया नितिं जनकबिया चिनाखँ
लहनान्यूज सम्वाददाता | कौलागा अष्टमि ११३६ (अक्टोबर २३ २०१६)
वइगु कछलाथ्व पारुया दिनस ने सं ११३७ न्हूदँया लसताय् येँया बसन्तपुरं न्ह्याइगु सांस्कृतिक र्यालीइ जनकवि दुर्गालाल श्रेष्ठं च्वयादीगु भिंतुना चिनाखँ मंकाः कथं हालीगु जूगु दु ।
जनकवि श्रेष्ठं न्हूदँया र्याली सांस्कृतिक जूगु हुनिं उकिया म्हसीका उकथं हे ल्यंकातयेत भिंतुना चिनाखँ मंकाः कथं हालेछिंक च्वयागु खँ कनादीगु दु ।
जनकवि श्रेष्ठया भिंतुना चिनाखँ मंकाः कथं हालाः र्यालीइ ब्वति कायेगु नितिं न्हूदँ राष्ट्रिय समारोह समितिया दुजः रमिता बज्राचार्यं व्यवस्थापनया ज्या यानाच्वंगु दु । बज्राचार्यया कथं जनकवि श्रेष्ठं च्वयादीगु चिनाखँ र्यालीइ मंकाः कथं हालाः वनेगु नितिं रिहर्सल जुइत्यंगु दु ।
येँयाःया द्यःप्याखं खलःयात हन
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
जात्रापर्व ब्यवस्थापन समिति नयाँबजाःया ग्वसालय् येँयाःया इलय् पिहांवःगु श्री हल्चोक आकाश भैरव, लाखय्, पुलुकिसि व महाकालियात हनेज्या थौं येँय् क्वचाल ।
ज्याझ्वलय् डा.सत्यमोहन जोशीं सम्मानितपिन्त सम्मान लःल्हानादिल । लिसें ज्याझ्वलय् ज्याझ्वःयात ग्वाहालि याःपिं ग्वाहालिमिपिन्त नं हंगु खः ।
नुगः खँ तयेगु झ्वलय् शताब्दि पुरुष डा. सत्यमोहन जोशीं हिन्दु अले बौद्ध धर्मावलम्वि सकसिनं हनीम्ह जीवित देवी कुमारी नेपालय् हे जक दुगु खँ तयादिल । येँ महानगरपालिकाया कार्यकारि अधिकृत रुद्रसिं तामाङं नेवाःतयगु तजिलजि हे हलिमय् नेपाःया म्हसिका जुयाच्वंगु धयादिल ।
सांसद रामवीर मानन्धरं सास्कृति ख्यलय नं थुकथं सम्मान याःगु बालागु परम्पराया शुरुवात कथं कायेमाःगु खँय् बः बियादिल ।
ज्याझ्वलय् हनुमानध्वाखा दरबार क्षेत्र संरक्षण ज्याझ्वःया प्रमुख उदय पसखलः श्रेष्ठ, राजा शाक्य, अमृतचन्द श्रेष्ठ, अष्टनारायण महर्जनलिसें नं थःथःगु नुगःखँ तयादीगु खः ।
न्हूदँ तःजिक हनेत संघसंस्थालिसे सहलह
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
न्हूदँ ने.सं. ११३७ तःजिक न्यायेकेत थौं न्हूदँ राष्ट्रिय समारोह समिति ११३७ पाखें थौं येँय् क्लब, संघसस्था मुना ज्याझ्वः याःगु दु ।
न्हूदँ समारोह समितिया नायः सांसद भिमसेनदास प्रधानं न्हूदँ तःजिक हनेगु नितिं क्लब, संघ ,सस्थायात ग्वाहालि यायेत इनाप यासेंं नेपाल संवत् सकसिगु खँ धइगु भावना ब्वलंकेमाःगु बिचाः तयादिल ।
र्याली व सभाया बारे ब्यबस्थापन समितिया दुजः सुजिब बज्राचार्यं जानकारी बियादिल ।
लसकुस न्वचु ब्यबस्थापन समितिया दुजः पंच नारायण मर्हजन बियादिगु खः ।
मुनाय् नेवाः न्हयलुवाः मल्ल के सुन्दर, गणेश सायमिलिसें थीथी क्लब, संघ, संंस्थाया प्रतिनिधिपिनिगु उपस्थिति दुगु खः ।
ज्वेल्स् बचतया न्हयक्वःगु दँमुँज्या क्वचाल
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
लुँवहः, तिसा सम्बन्धी व्यवसायीतयत लक्षित यानाः न्ह्याकातःगु ज्वेल्स् बचत तथा ऋण सहकारी संस्था लिमिटेडया न्हयक्वःगु दँमुँज्या यलय् क्वचाल ।
न्हयक्वःगु दँमुँज्याया लसताय् यलय् ग्वसाः ग्वःगु सभाया ‘ललितपुर विकासको लागि समाज’या नायः लिसें पूर्वमन्त्री बुद्धिराज बज्राचार्यं उलेज्या यानादिल । पूर्वमन्त्री बज्राचार्यं सहकारी ख्यः नाफामुखी जक मजुसें समाजया आर्थिक स्तर थकायेगु व सामाजिक उत्तरदायीत्वया भावनां न्ह्यज्यायेमाःगुलिइ बः बियादिल ।
ज्याझ्वलय् संस्थाया नायः किरणभाई बज्राचार्यं छुं खराब सहकारीयात नियन्त्रण यायेगु नामय् मुक्कंसहकारी ख्यःयात हे लिकुंकेगु ज्या सह याये मफइगु धयादिल । जिल्ला सहकारी संघया न्वकू रामशरण घिमिरें सहकारी ख्यःया खराबी चीकेगु नामय् बांलाःगु सहकारीं देयया अर्थतन्त्रय् ब्यूगु योगदानया अवमूल्यन यायेमज्यूगु बिचाः तयादिल ।
सभाय् संस्थाया दांभरिं प्रज्ञाराज शाक्यं थःगु आर्थिक प्रतिवेदन न्ह्यब्वसें संस्थां थीथी उपलब्धीलिसें तरलता व्यवस्थापन, विकेन्द्रीकृत अले सुरक्षित कर्जा प्रवाह क्षेत्र पहिचान, कार्यक्षेत्रया विस्तार, दुजः अले कारोबार थकायेमाःगु, जोखिमं जाःगु कर्जा असुलीत दुगु धयादिल ।
वंगु आर्थिक दँया असारतक्कय् मिजं ४सः व ४० अले मिसा ४सः व ८७ यानाः ९सः व २७ दुजः थ्यंगु उगु संस्थां उगु दँय् ३७ करोड ५ लख ४४द्वः तका बचत मुंकागु न्ह्यथंगु दु । अथे हे संस्थाया वंगु आर्थिक दँया असारतक्कय् शेयर पुँजी १ करोड ५५ लख ४३द्वः व २सः दुगु व उगु हे दँय् ३२ करोड ३० लख १२द्वः, ८सः व ५२ तका त्यासा प्रवाह जूगु जानकारी बिल ।
