Display Style:
Column Style
मुदिता सेवा गृहया संस्थापिकायात मातृशोक
लहनान्यूज सम्वाददाता | कौलागा नवमि ११३६ (अक्टोबर २४ २०१६)
ज्याथःपिं नागरिक, याकः मिसा अले असहाय, अनाथ मचातयगु सेवाय् समर्पित मुदिता सेवागृहया संस्थापिका नायः अले समाजसेवी राज्यलक्ष्मी बज्राचार्ययात मातृशोकं कःगु दु ।
नायः बज्राचार्यया मां लक्ष्मीदेवी बज्राचार्य ९०दँया वैंशय् आइतबार चान्हय् वासः यायेगु झ्वलय् मदुगु खः । ताः इलंनिसें ओष्टोपोरोसिस ल्वचं कयाच्वंम्ह मदुम्ह बज्राचार्यया थौं शंखमुलस्थित घाटय् दाहसंस्कार याःगु दु ।
मदुम्हेसिया आत्माया चीरशान्तिया कामना यासें सामाजिक, धार्मिक ख्यलय् ज्या यानाच्वंपिं मनूत, उद्यमीलिसें थीथी ख्यःया व्यक्तित्वपिं शंखमुलय् थ्यंकाः मदुम्हेसित लिपांगु श्रद्धाञ्जली प्वंकूगु खः ।
ओष्टोपोरोसिस ल्वचं कयाच्वंम्ह थः मांया सुसाःकुसाःलिसें महत्वबोध यानाः वयकःया हे हःपालं समाजसेवी राज्यलक्ष्मी बज्राचार्यं मेपिं ज्याथःपिं नागरिकतयगु संरक्षणया लागिं मुदिता सेवागृह स्थापना यानाद्यूगु खः ।
थः मांया लागिं जक मखसें थीथी परिवेशय् लाःपिं असहायपिन्त पारिवारीक लकस दयेकेगु आज्जुं याकः मिसा व असहाय, अनाथ मचातयगु कल्याण यायेत बज्राचार्यं थःगु हे नीजि भवनय् संस्थायात थाय् बिया वयाच्वनादीगु खः ।
झीत नेवाः स्वायत्त राज्य हे माः
लहनान्यूज सम्वाददाता | कौलागा नवमि ११३६ (अक्टोबर २४ २०१६)
शताब्दि पुरुष, संस्कृतिविद् डा. सत्यमोहन जोशीं राज्यपाखें हे नेपाःया आदिवासी जनजातितयगु मांभाय् न्हंकेगु ज्या जुयाच्वंगुलिं हे झीत नेवाः स्वायत्त राज्य माःगु धयादीगु दु ।
नेपालभाषा एकेदमिपाखें थौं यलय् ग्वसाः ग्वःगु दान्यहिरा सिरपाः लःल्हायेगु ज्याझ्वलय् संस्कृतिविद् लिसें एकेदमिया संरक्षक जोशीं राज्यया एक भाषा नीतिं यानाः नेपाःमिपिन्सं थःगु मांभाय् त्वःतेत बाध्य जूगु अवस्थाय् आः थःगु भाय्, संस्कृति ल्यंकेत स्वायत्त राज्य हे माःगु खँय् बः बियादिल । राज्यपाखें करोडौंया बजेट बियाः स्वंगू स्वंगू प्रतिष्ठान यानातःगु अवस्थाय् नेपालभाषा एकेदमि धाःसा जनता थम्हं हे गठन यायेमाःगु अवस्था नेवाःतयगु लागिं छखें गौरव खःसां राज्यं जनजाती समुदाययात वास्ता मयाःगुया दसु नं खःगु जोशीया धापू खः ।
थौंया ज्याझ्वलय् दान्यहिरा हःपाः सिरपाःपाखें सम्मानित साहित्यकार नारद बज्राचार्यं थन नेवाः स्वायत्त राज्य धकाः हालाजूपिं गुलिखे न्ह्यलुवाःतयसं थः कायम्ह्याययात विदेशय् छ्वयेगु अवस्थां हे नेवाः आन्दोलन सफल मजुयाच्वंगु धयादिल । न्ह्यलुवाःतयसं नेवाः आन्दोलनय् ल्यायम्ह पुस्तायात सालेगुपाखे बिचाः यायेमाःगु बज्राचार्यं धयादिल ।
दान्यहिरा सिरपाःपाखें सम्मानित साहित्यकार, उपन्यासकार मथुरा सायमिं न्हापा न्हापा द्वःछिपाः सफू पिकायेगु यानाच्वनागुलिइ आः वयाः ५सःपाः जक पिकायेगु यानागु खँ कनादिल । साहित्यया ब्वँमि झं झं पाः जुयावंगुलिं न्हूपिं पाठक गुकथं सालेगु धकाः गम्भीर जुयाः बिचाः यायेगु अवस्था वःगु सायमिया धापू खः ।
अथे हे दान्यहिरा विज्ञान प्रविधि सिरपाः त्याकादीम्ह वैज्ञानिक रमेशमान सिंहं थम्हं सितिं वनाच्वंगु घाँय्, सिमाया हः आदिं वैकल्पिक उर्जा कथं व्रिकेटया विकास यानागु खँ कँसें थथे हे सितिं वनाच्वंगु ज्वलंयात हाकनं छ्यलाः नं झीसं इन्धनप्रतिया परनिर्भरता चीके फइगु बिचाः तयादिल ।
थुगु बुखँ नं ब्वनादिसँ
प्रचार प्रसारया अभावय् ने.सं. छ्यलेमफुत
लहनान्यूज सम्वाददाता | कौलागा नवमि ११३६ (अक्टोबर २४ २०१६)
नेपाःया हे गौरव खयाः नं प्रचार प्रसारया अभावं यानाः थम्हं यक्व कुतः यानागु खःसां नेपाल सम्वतयात व्यवहारीक रुपं छ्यले मफूगु प्रधानमन्त्री पुष्पकमल दाहालं धयादीगु दु ।
नायः भीमसेनदास प्रधानया नेतृत्वय् थःत नापलाःवःगु न्हूदँ राष्ट्रिय समारोह समितिया प्रतिनिधि मण्डलयात प्रधानमन्त्री दाहालं देययात हे त्यासा मुक्त दयेकूगु घटनावलिलिसे स्वानाच्वंगु नेपाल सम्वत नेवाःया जक मखु देयया हे गौरव खः धयादिल । देयया नामं स्वनातःगु सम्वतयात सकल नेपाःमिया गौरव तायेकाः थम्हं राष्ट्रिय सम्वत घोषणा यानागु खःसां प्रचार प्रसारया हे अभावं व्यवहारय् छ्यलेत थाकूगु दाहालं धयादिल ।
नेवाःतयसं जक प्रचार यानाच्वंगु व न्हूदँ न्यायेका वयाच्वंगुलिं थौंकन्हय् नेपाल सम्वत नेवाःतयगु थें जक खने दयाच्वंगु धासें प्रम दाहालं आः थुकियात व्यवस्थित रुपं प्रचार प्रसार याना वनेमाःगु धयादिल । थःगु न्हापाया कार्यकालय् सुयागुं दवाव वा प्रभावं मखसें थम्हं अध्ययन यानाः हे नेपाल सम्वतयात राष्ट्रिय सम्वत घोषणा यानागु दाहालया धापू खः ।
न्हूदँ राष्ट्रिय समारोह समितिया नायः भीमसेनदास प्रधानं धाःसा राज्यं राष्ट्रिय सम्वत घोषणा याःसां सरकारी स्तरं हे व्यवहारय् मछ्यलाच्वंगु खँ तयादिल । लिसें नायः प्रधानं समितिपाखें नेपाल सम्वतयात बैंकया चेकय् छ्यले दयेमाःगु, नोटय् छ्यलेमाःगु, नेपाल सम्वत अध्ययन प्रतिष्ठान दयेकाः थुकिया अध्ययन न्ह्याकेमाःगु, राष्ट्रिय विभूति शंखधर साख्वाःया व नेपाल सम्वतया विषय पाठ्यक्रमय् दुथ्याकेमाःगु, नेपाल सम्वत न्हूदँ राज्य स्तरं हनेमाःगु, कोषया व्यवस्था यायेमाःगु लिसेंया माग दुथ्याःगु ज्ञापनपौ प्रम दाहालयात लःल्हानाद्यूगु खः ।
प्रम दाहालयात नापलायेत थौं प्रधानमन्त्री ज्याकू, सिंहदरवारय् न्हूदँ राष्ट्रिय समारोह समितिया नायः प्रधान, दुजःपिंलिसें सल्लाहकारपिं लक्ष्मीदास मानन्धर, डा.रत्नकमल वैद्य, पूर्वमन्त्रीपिं कृष्णगोपाल श्रेष्ठ, राजेन्द्र महर्जन, दिलिप महर्जन लिसेंया पुचः थ्यंगु खः ।
थक्वातय् नं शंखधरया सालिक
लहनान्यूज सम्वाददाता | कौलागा नवमि ११३६ (अक्टोबर २४ २०१६)
प्राचीन नेवाः बस्ती येँया थक्वातय् (थानकोटय्) नं शंखधरया सालिक तइगु जूगु दु ।
स्थानीय संस्था थक्वाः भिंतुना नेवाः खलःया न्ह्यलुवाय् शंखधरया सालिक दयेकाः थक्वाःया सिलाफलय् तयेत्यंगु खः । वइगु कौलागा आमै, लक्ष्मीपुजाया दिनस उगु सालिकया उलेज्या जुइत्यंगु खलःया नायः मोहनबहादुर बलामिं लहनान्यूजयात जानकारी बियादिल ।
लक्ष्मीपुजाया दिनय् प्रधानमन्त्री पुष्पकमल दाहालं उगु सालिक उलेज्या यानादीत्यंगु खः ।
नायः बलामिं उगु दिनय् सुथय् ८ताः इलय् सिलाफलय् छगू ज्याझ्वः यासें प्रधानमन्त्रीया ल्हातं सालिकया उलेज्या जुइगु बलामिं कनादीगु दु ।
दान्यहिरा सिरपाः लःल्हात
लहनान्यूज सम्वाददाता | कौलागा नवमि ११३६ (अक्टोबर २४ २०१६)
नेपालभाषा एकेदमिपाखें साहित्य व कलाकारीता ख्यलय् पालंपाः यानाः दँयदसं लःल्हाना वयाच्वंगु दान्यहिरा सिरपाः, दान्यहिरा हःपाः सिरपाः लिसें थुगुसीनिसें न्ह्याःगु दान्यहिरा हःपाः सिरपाः लःल्हायेगु ज्या यलय् क्वचाःगु दु ।
नेपालभाषा एकेदमिं यलय् ग्वसाः ग्वःगु छगू ज्याझ्वःया दथुइ थुगुसीया दान्यहिरा सिरपाः साहित्यकार लिसें उपन्यासकार मथुरा सायमियात लःल्हात । अथे हे दान्यहिरा हःपाः सिरपाः साहित्यकार नारद बज्राचार्ययात लःल्हात ।
व हे कथं थुगुसीनिसें न्ह्याकूगु दान्यहिरा विज्ञान प्रविधि सिरपाः रमेशमान सिंहयात लःल्हात । वैकल्पिक उर्जाया ख्यलय् ताः ई न्ह्यवनिसें बिया वयाच्वंगु योगदानया नितिं सिंहयात सिरपाः लःल्हाःगु खः ।
सम्मानित स्वम्हं व्यक्तित्वपिन्त नेपालभाषा एकेदमिया चान्सलर चित्तरन्जन नेपालीं हनापौ, स्वांया बुके एकेदमिया सदस्य सचिव मल्ल. के सुन्दर व तका सिरपाः दाता यज्ञरत्न धाख्वालं लःल्हानादिल । स्वांमाः शताब्दि पुरुष संस्कृतिविद् डा. सत्यमोहन जोशीं कोखायेकादिल ।
दान्यहिरा सिरपाः ५०द्वः तका राशिया खःसा दान्यहिरा हःपाः सिरपाः व दान्यहिरा विज्ञान प्रविधि सिरपाः २५द्वः÷२५द्वः तका राशिया खः । सिरपाःया दाता साहित्यकार यज्ञरत्न धाख्वाः खः ।
उगु हे ज्याझ्वलय् नेपालभाषा एकेदमिया भाइस चान्सलर लिसें साहित्यकार यज्ञरत्न धाख्वाःया १२गूगु सफू ‘तुतां’ नं विमोचन जुल । संस्कृतिविद्, शताब्दि पुरुष डा. सत्यमोहन जोशीं सफूया उलेज्या यानाद्यूगु खः ।
- थःथःगु ख्यलय् योगदानया कदर स्वरुप सिरपाः
सिरपा लःल्हाये स्वयां न्ह्यः ज्याझ्वलय् स्वम्हं सम्मानित व्यक्तित्वपिनिगु म्हसिका ब्वनाः न्यंकूगु खः ।
प्रा. प्रेमशान्ति तुलाधरं साहित्यकार मथुरा सायमि व साहित्यकार नारद बज्राचार्यया म्हसिका ब्वनाः न्यंकादिल । ने.सं. १०८० निसें साहित्य ख्यलय् निरन्तर च्वसा न्ह्याकाच्वनादीम्ह साहित्यकार, उपन्यासकार मथुरा सायमिया आःतक्क ८ बाखं सफू, १० उपन्यासलिसें २२ सफू पिदनेधुंकूगु दुसा मेम्ह सम्मानित नारद बज्राचार्यं ५०दँ न्ह्यःनिसें साहित्य च्वसा न्ह्याकाच्वनादीगु दु ।
अथे हे मेम्ह सम्मानित वैज्ञानिक रमेशमान सिंहजुया म्हसिका डा. दिनेश भुजुं ब्वनाः न्यंकादिल । बैकल्पिक उर्जाया ख्यलय् योगदान बिया वयाच्वनादीम्ह सिंह पोलिमर टेक्नोलोजिइ विद्यावारिधि यानादीम्ह खः ।
