Display Style:
Column Style
सुनागुथिया ‘पी सी वनेगु’ क्वचाल
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
यलया सुनागुथिइ विश्वकर्मा कोषया न्ह्यलुवाय् जूगु पींगः पूजा तःजिक क्वचायेकूगु दु ।
पीन्हुया जात्रा धइगु ल्याखं ‘पी सी वनेगु’ धाइगु थुगु जात्राया लिपांगु दिं सम्बन्धित दक्वं बाजं खलः व स्थानीययात भ्वय् नकूगु खःसा थुगुसी थ्यंमथ्यं २५सःम्ह मिसातयगु सहभागिताय् देय् चाःहिलाः क्वचायेकूगु खः । देय् चाःहुलेगु ज्या उटुझोलं न्ह्यानाः बालकुमारी– चौतारा– छास्त्वाः– हितिफुसय् – चपाफल– खासीत्वाः – पुखुसि– कुलाफः जुयाः हाकनं व हे त्वालय् थ्यंकाः क्वचाःगु खः ।
जात्राय् देय् थकालीपिनिगु उपस्थिति अनिवार्य नाली । भृंगारेश्वर महादेव वृद्ध सेवा समितिया ग्वाहालिइ ज्याःजंक्व क्वचायेधुंकूपिं सुनागुथिया ९२दँया तुईसिली महर्जनलिसें मेपिं ७०म्ह ज्याथःपिं नागरिकपिन्त नं ब्वति कायेकूगु खः । स्थानीय संस्कृति अध्ययेता प्रशान्त मालीया कथं थ्वयां न्ह्यः २०६४ सालय् दम्पा छें व २०६५ स विश्वकर्मा कोषं थुगु जात्राया ग्वसाः ग्वःगु खः ।
थुगुसी पुजाय् खिं, ३ खलः, धाः बाजं २ खलः, नामसंगिती भजन खलः, पछिमा बाजं, थीथी भजन खलःलिसें ल्यायम्ह पुचः नं यानाः थ्यंमथ्यं १६ स्वयां आपाः बाजं पुचः दुगु खः । स्थानिय गणेश भजन मण्डल अले काः बाजंया नायः जितमेल महर्जनया कथं स्थानीय ७६२ छेँखाया दक्वं धइथेंयात ब्वति कायेकाः थुगुसी थुगु जात्रा ८दँ लिपा न्यायेकूगु खः ।
- आधुनिकतालिसें पहिचान न्ह्यब्वल
थौं हे न्हिनय् बालकुमारी पीठस्थित ख्यलय् थ्यंमथ्यं ४द्वः स्वयां आपाः स्थानीयबासी थःथःगु सांस्कृतिक बाजंगाजं व परम्परागत पुँसालिसे जात्राय् ब्वति काःगु खः । लिसें एम्स कजेजय् ब्वनाच्वंपिं मिसात हाकुपतासिया आधुनिक डिजाइनया पुँसा पुनाः जात्राय् ब्वति काःवःगु खः ।
थुगु जात्रा भाद्र शुक्ल अष्टमीनिसें ४०न्हु स्वयां आपाः न्यायेकेगु याइ । परम्परागत धापू कथं सुनागुथिइ ४४न्हुतक्क न्यायेकूगु थुगु जात्राय् न्हियान्हिथं सनिलय् सांस्कृतिक बाजंगाजंलिसें स्थानीय मिसातयसं बालकुमारी पीठ, चैत्य, देगः देगलय् मत च्याकाः हनेगु याइ ।
जात्रा क्वचाःगु लसताय् वइगु मंगलबाः प्यन्हु बिचाः जुइ ।
मरुजोशीया भिंतुना ज्याझ्वः क्वचाल
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
सनातन इष्टदेवता गुथि (मरुजोशी) या भिंतुना ज्याझ्वः थौं येँया मरुत्वालय् क्वचाःगु दु ।
मरुत्वाःया जोशीतय् आगं चुक मरुइ थौं गुथिं मोहनि, स्वन्ति व न्हूदँ नेपाल सम्वत ११३७या या भिंतुना कालबिल कथं च्यापान ज्याझ्वः याःगु खः ।
च्यापान ज्याझ्वलय् मरुया स्थानीयतलिसें राजनैतीक, भाषिक कार्यकर्ता, पत्रकार, कलाकार, साहित्यकारलिसेंया ब्वति दुगु खः । ज्याझ्वलय् उद्योगमन्त्री नवीन्द्रराज जोशी तकं थ्यंगु खः ।
गुथिं वंगु न्हयदँ न्ह्यः ने.सं.११३० निसें दँयदसं मदिक्क भिंतुना च्यापान ज्याझ्वः याना वयाच्वंगु दु ।
हेमराज सिरपाःया १ लख तका लःल्हात
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
मांभाय् पुचः यलयात हेमराज सिरपाःया १ लख तका राशि लःल्हायेगु ज्या थौं यलय् क्वचाःगु दु ।
लोक साहित्य परिषदं थौं यलय् छगू ज्याझ्वःया ग्वसाः ग्वसें मांभाय् पुचःयात सिरपाःया राशि १ लख तका लःल्हाःगु खः । ज्याझ्वलय् मांभाय् पुचःया नायः हेरारत्न शाक्ययात लोक साहित्य परीषदया नायः प्रा.प्रेमशान्ति तुलाधरं स्वां देछानादिल सा मदुम्ह हेमराज शाक्यया जहान चन्द्रलक्ष्मी शाक्यं सिरपाःया राशि १ लख तका लःल्हानादिल ।
नुगः खँ तयेगु झ्वलय् सिरपाःया दाता मदुम्ह हेमराज शाक्यया काय् सुरेन्द्र शाक्यं थः अबुजु हेमराज शाक्यया बारे चर्चा यासें थम्हं मांभाय् ख्यलय् योगदान बियाच्वंगु संस्थायात फुकथं हःपाः बीगु ल्याखं थुगु सिरपाःया राशि छगू लख तका थ्यंकागु धयादिल ।
शताब्दि पुरुष सत्यमोहन जोशीजुं मदुम्ह पं.हेमराज शाक्यया नेवाः भाय् व लिपि ख्यलयया योगदान च्वछायेबहःगु धयादिल । शाक्यया थुगु योगदान नेवाः ख्यलय् जक मखु, अन्तर्राष्ट्रिय ख्यलय् हे ज्वः मदुगु जोशीया धापू खः ।
वंगु च्याला न्ह्यः हे मांभाय् पुचःयात थुगु सिरपाः ब्यूगु खःसा थौं सिरपाःया तका राशि लःल्हाःगु खः । सिरपाः लःल्हाःगु उगु हे ज्याझ्वलय् पं.शाक्यया काय् सुरेन्द्र शाक्यं सिरपाःया राशि १०द्वः तकां थकयाः १ लख तका थ्यंकागु घोषणा यानादीगु खः ।
थुगुसी न्हूदँया ज्याझ्वःत सार्वजनिक
लहनान्यूज सम्वाददाता | कौलागा पञ्चमि ११३६ (अक्टोबर २० २०१६)
न्हुदँ राष्ट्रिय समारोह समितिपाखें न्हूदँ नेपाल सम्वत ११३७या लसताय् जुइत्यंगु थीथी ज्याझ्वःत थौं सार्वजनिक याःगु दु ।
थौं येँय् पत्रकार मुना यासें समितिं न्हूदँया लसताय् जुइत्यंगु च्यागू ज्याझ्वःत सार्वजनिक याःगु खः । उकिया झ्वलय् शंखधर पार्क दयेकेगु कुतः न्ह्याकायंकेगु नं समितिं न्ह्यथंगु दुसा विज्ञतयत मुंकाः नेपाल सम्वत विषयस गोष्ठी नं जुइगु जूगु दु ।
लिसें न्हूदँ समारोह समितियात विधिवत रुपं दर्ता यानावनेगु जानकारी नं पत्रकार मुनाय् ब्यूगु खः । थुगुसीनिसें सांसद मन्त्रीपिन्सं नेपाल सम्वतया न्हूदँया लसताय् भितुना कार्ड बियावनीगु नं धाःगु दु ।
प्रधानमन्त्री पुष्पकमल दाहालयाथाय् वइगु ७ गते समितिया छगू पुचः वनाः औपचारीक रुपं ब्वनापौ लःल्हाःवनीगु जूगु दु । समितिपाखें समितिया नायः भीमसेनदास प्रधानलिसें समन्वय कमिटिया कजि सुजिब बज्राचार्य, दुजः उमेश स्थापित, राजेश शाक्य लिसें संचार कवःया कजि नृपेन्द्रलाल श्रेष्ठ व संचारकःमिपिं उदेन न्हुसायमि, रत्न श्रेष्ठ, बुध्द शाहि प्रधानमन्त्रीयाथाय् वनाः न्हूदँया मूल समारोहस मू पाहां कथं झायेत प्रधानमन्त्रीयात औपचारीक रुपं ब्वंनापौ लःल्हाइगु जूगु दु ।
आवंलि वरिष्ठ न्वकू स्वतः नायः
लहनान्यूज सम्वाददाता | कौलागा पञ्चमि ११३६ (अक्टोबर २० २०१६)
नेपाल उद्योग वाणिज्य महासंघय् आवंलि वरिष्ठ न्वकू स्वतः नायः जुइगु जूगु दु ।
महासंघया विहीबाः राजधानीइ क्वचाःगु विशेष साधारणसभां महासंघया विद्यमान विधान २०४९या खुक्वःगु संशोधन यानाः वरिष्ठ न्वकू स्वतः नायः जुइगु व्यवस्था याःगु खः । थ्व धुंकाः थौंकन्हयया वरिष्ठ न्वकू भवानी राणा आः साधारणसभा धुंकाः स्वतः नायः जुइगु निश्चित जूगु दु ।
विशेष साधारणसभाय् ९० प्रतिशत प्रतिनिधिपिन्सं विधान संशोधनया पक्ष काःगु खः ।
येँय् पत्रकार सम्मेलन यासें नायः पशुपति मुरारकां विशेष साधारणसभां विधान संशोधन यानाः न्हूगु व्यवस्था याःगु विषयस जानकारी बियादिल । नायः मुरारकां ७ प्रदेशय् प्रादेशिक उद्योग वाणिज्य संघया व्यवस्था जूगु, वरिष्ठ न्वकू खुला धेंधें बल्लाखं ल्यइगु जानकारी नं बियादिल ।
- खुम्ह पूर्वनायःपाखें वहिष्कार
थ्व हे दथुइ महासंघया खुम्ह पूर्वनायःपिन्सं धाःसा विशेष साधारण सभाया वहिष्कार याःगु दु ।
नेपाल उद्योग वाणिज्य महासंघया नायःयात सम्बोधन यासें पौ च्वयाः खुम्हेसिर्न औपचारिक जानकारी मदुगु धासें विशेष साधारण–सभाय् उपस्थित जुइमफइगु धाःगु खः । पतिइ पूर्वनायःपिं महेशलाल प्रधान, पदम ज्योती, आनन्दराज मुल्मी, प्रदीपकुमार श्रेष्ठलिसें विनोदबहादुर श्रेष्ठ व कुशकुमार जोशीया ल्हाःचिं दु ।
पतिइ थीथी माध्यमं विधान संशोधन यायेत विशेष साधारण–सभा जुइत्यंगु जानकारी दुसां विधान संशोधन प्रक्रियाय् पूर्वनायःया हैसियतं व्यक्तिगत व सामूहिक रुपं छ्याता कायेगु व सहलह मयाःगु धयातःगु दु ।
‘२०७३ कात्तिक ४ गते जुइगु विशेष साधारण–सभाय् ब्वति कायेत परम्परानिसें पूर्व नायःपिन्त उपस्थितिया लागिं ब्वना वयाच्वंगुलिइ थुगुसी अथे छुं हे कथं ब्वंगु मदुगुलिं उपस्थित जुइ मफइगु व्यहोरा विशेष साधारण–सभाय् न्यंकाबियाः जानकारी याकेत नं इनाप याये’ पतिइ धयातःगु दु ।
नायः मुरारकां धाःसा पत्रकार सम्मलेनय् नवासें ६ पूर्वनायःपिन्सं विशेष साधारणसभा बहिस्कार याःगु दुःखं जाःगु धयादिल । पूर्वनायः रविभक्त श्रेष्ठं ६ पूर्वनायःपिन्सं ब्यूगु विशेष साधारणसभाबारे जानकारी मदुगु धइगु द्वपंया खन्डन यासें विशेष साधारणसभां क्वःछीगु खँत थःपिन्त मान्य जुइगु जानकारी पूर्वनायःपिन्सं थःत ब्यूगु धयादिल ।
