प्रधानमन्त्री केपी शर्मा ओलीं जोरपाटी च्वंगु नेपाल मेडिकल कलेज लिसें शिक्षण अस्पतालया रजत जयन्तीया लसताय् थौं नवनिर्मित डेन्टल कलेजया भवन उलेज्या यानादीगु दु।

जनतायात अःपुक गुणस्तरीय स्वास्थ्य सेवा बिइगु व दक्ष स्वास्थ्य जनशक्ति उत्पादनय् न्हूगु भवन उपयोगी जुइगु तायेकूगु दु।

उगु कलेजं आःतक एमबिबिएसय्् निद्वः व २६२, बिडिएसय् ३३५, एमडी÷एमएस व एमडिएसय् ३२४ म्ह, विशिष्टीकृत सेवाकथं डिएम एमसिएचय् च्याम्ह, बिएस्सी, नर्सिङ व एमएस्सी नर्सिङय् २०८ म्ह यानाः आःतक प्यद्वः व ९८ म्ह दक्ष प्राविधिक जनशक्ति उत्पादन याये धुंकूगु धाःगु दु।

ज्याझ्वलय् स्वास्थ्य व जनसंख्यामन्त्री प्रदीप पौडेल, प्रतिनिधिसभाया दुजः तय्सं ब्वति कयादीगु खः।

विश्व स्वास्थ्य सङ्गठनया आर्थिक लिसें प्राविधिक ग्वाहालिइ स्वास्थ्य नापं जनसंख्या मन्त्रालयपाखें ग्वसाः ग्वःगु ‘टेबलटप अभ्यास’ धनगढीइ क्वचाःगु दु। विपद् तयारी व प्रतिकार्य प्रणालीयात चुस्त व सुुदृढ यायेत सुदूरपश्चिम प्रदेशय् ल्यःपिं ‘हब’ व ‘स्याटेलाइट’ अस्पतालय् ज्या यानाच्वंपिं स्वास्थ्यकःमि तय्सं थुगु अभ्यासय् ब्वति कयादीगु खः।

मन्त्रालयं सेती प्रादेशिक अस्पताल धनगढीयात ‘हब’ अस्पताल कथं ल्यःगु खः। अभ्यासय् भुखाचं यानाः उत्पन्न जूगु घाःपाः जूपिं पुचःया अवस्थाया प्रतिरुपण यानाः अस्पतालया तःधंगु आपत्कालीन घटना व्यवस्थापन यायेगु तयारी अवस्थाया मूल्याङ्कन याःगु मन्त्रालयया प्रवक्ता लिसें स्वास्थ्य आपत्कालीन लिसें विपद् व्यवस्थापन कार्यसञ्चालन केन्द्रया प्रमुख डा प्रकाश बुढाथोकीं कनादिल।

विपद् व्यवस्थापन यायेत ल्यःगु ‘हब’ व ‘स्याटेलाइट’ अस्पतालया मुख्य ज्याखँ, म्हितेमाःगु भूमिका, सक्रियता, ‘ट्रायज’, ल्वगि व्यवस्थापन, स्रोत साधनया वितरण, ‘हब’ व ‘स्याटेलाइट’ अस्पताल ‘नेटवर्क’ नापं आपत्कालीन सञ्चालन केन्द्र दथुया समन्वय सम्बन्धी सहलह तकं थुगु अभ्यासय् दुथ्याकातःगु खः। प्रवक्ता डा बुढाथोकीं टेबलटप अभ्यासया आज्जु आः दयाच्वंगु योजनाया कमजोरी म्हसीकेगु, सञ्चार व समन्वय सुधार यायेगु व अस्पतालया विपद् तयारी व प्रतिकार्य प्रणाली सुदृढ यायेत ज्यावःगु सुझाव बिइगु खः धकाः धयादिल।

वय्कलं धयादिल, “थुजागु अभ्यासं तःधंगु स्वास्थ्य आपत्कालीन परिस्थितिया व्यवस्थापन, ‘फिल्ड’ अस्पतालया एकीकरण व ल्वय्या प्रकोपया इलय् मदिक्क उपचार पक्का यायेगु विषयस सुधार यायेमाःगु महत्वंजाःगु पक्षत चकंकल।”थ्वहे दथुइ प्रवक्ता डा बुढाथोकीनापं नेपाःया युरोपियन युनियनया राजदूत भेरोनिक लोरेँजो, विश्व स्वास्थ्य सङ्गठनया डा एलिसन गोकोटोनो प्रतिनिधिया पुचलं सुदूरपश्चिम प्रदेश, धनगढीया प्रादेशिक स्वास्थ्य आपत्कालीन कार्य सञ्चालन केन्द्रया अनुगमन लिसें ज्याखँया बारे सुचं काःगु खः।

उगु ज्याझ्वलय् सुदूरपश्चिम प्रदेशय् स्वास्थ्य सेवा प्रवाहया गुणस्तर अप्वकेत च्वछायेबहःगु योगदान व ग्वाहालि याःगुलिं युरोपियन युनियन व विश्व स्वास्थ्य सङ्गठनयात नं हंगु खः।(रासस)

बिपी राजमार्गया काभ्रेपलाञ्चोकया धौख्यः नगरपालिका–१० शारदा बतासय् थौं सुथय् बस दुर्घटना जुयाः १८ म्ह घाःपाः जूगु दु। येँपाखें ओखलढुङ्गा वनाच्वंगु बागमती प्रदेश ३–०१–००५ ख ९९४२ ल्याःया बस अनियन्त्रित जुयाः सतकया धलय् फतापूगु प्रहरीं धाःगु दु।

उगु बसय् चालक व सह–चालकयानाः २४ म्हमध्ये १८ म्ह घाःपाः जूगु जिल्ला प्रहरी ज्याकुथिया प्रहरी नायब उपरीक्षक मीनबहादुर घलें धयादिल। थुपिं मध्ये न्हय्म्हेसिया अवस्था मध्यम व मेपिं सामान्य घाःपाः जूगु धाःगु दु।

घाःपाः जूपिनिगु धौख्यः अस्पतालय् उपचार जुयाच्वंगु प्रहरी नायब उपरीक्षक घलें धयादिल।

राष्ट्रपति रामचन्द्र पौडेलयात युवा कालबिल ज्याझ्वः, २०२५ य् ब्वति कायेत नेपाः झायादीपिं भारत, भूटान व माल्दिभ्सया ‘राष्ट्रिय क्याडेट कोर’ (एनसिसी)या प्रतिनिधिमण्डलं थौं नाप लानादीगु दु।

महाशिवरात्रि नापं नेपाली सेना स्थापनाया २६२ क्वःगु वार्षिकोत्सवया झ्वलय् येँय् ग्वसाः ग्वये त्यंगु युवा कालबिल ज्याझ्वलय् ब्वति कायेत झायादीपिं उगु देय्या टोलीं राष्ट्रपति निवास, शीतल निवासय् नापलानादीगु खः। नेपाली सेनां जःला खःला देय्या सेनालिसे थवंथः सम्बन्धयात अझ क्वातुकेत ‘क्याडेट’दथुइ सीप, तजिलजि व परम्पराया कालबिल यानावयाच्वंगु खः।

राष्ट्रपति पौडेल नेपाली सेनाया परमाधिपति खः। थुगु कथंया युवा कालबिल ज्याझ्वलं थवंथः सामाजिक, आर्थिक व सांस्कृतिक यथार्थत थुइकेत ग्वाहालि जुइगु नापं थवंथः सम्बन्धयात अझ सुमधुर व प्रगाढ दयेकेत भूमिका म्हितीगु भलसा कयातःगु खः। राष्ट्रिय सेवा दल (एनसिसी)पाखें बिइगु तालिम स्येनेज्यां युवा तय्त छथाय् मुंकाः बफादार, अनुशासित व जिम्मेवार नेतृत्वकर्ता नापं भिंम्ह नागरिकया कथं रूपान्तरण याना वयाच्वंगु दु।

एनसिसीं भिंगु अभ्यासया कालबिलनापं युवातय्के राष्ट्रियता, देशभक्ति, नेतृत्व, आत्मविश्वास व राष्ट्रसेवाथेंजाःगु गुणत विकास नापं प्रवद्र्धनयात प्राथमिकताय् तयातःगु दु।थ्व हे फागुन ९ गते नेपाः थ्यंकः वःपिं उगु भ्रमण टोलीइ ३४ म्ह प्रतिनिधि दु।

उगु नापलायेगु ज्याझ्वलय् नेपाःया राष्ट्रिय सेवा दलया कार्यकारी महानिर्देशक उपरथी यामप्रसाद ढकाल, भारतया एनसिसीया महानिर्देशक गुरवीरपाल सिंह, भूूटान स्काउट एसोसिएसनया निर्देशक साङ्गे चोदेन व माल्दिभ्सया प्रतिनिधिमण्डलया प्रमुख रिफान अलीलिसें ब्वति कयादीगु राष्ट्रपतिया ज्याकुथिं धाःगु दु। (रासस)

लुँ तोलां थौ न्यासः थहावंना आःतक या हे न्हुगु कीर्तिमान तःगु दु। लुँ तोलां थौ १ लाख ७१ हजार ३ सय तका न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथेह वहः तोलां थौ झीन्यातका कुहावःगु दु। वहः तोलां झीन्यातका कुहावया १ हजार ९ सय ७० रुपैयाँ कायम जुगु दु धका महासङ्घं धाःगु दु।