प्रधानमन्त्री केपी शर्मा ओलीं स्वक्वःगु नेपाल–जापान फ्रेन्डसिप समिट–२०२५ या माध्यमपाखे निगु देय् दथुइ सम्बन्ध अझ विस्तार यायेत ग्वहालि जुइ धका धयादीगु दु।

समिटइ ब्बति कायेत नेपाः वःपि जापानी टोली व नेपाःया समन्वयकर्तापि नाप म्हिगः प्रधानमन्त्री निवास, बालुवाटारय् नापालायेगु झ्वलय् प्रधानमन्त्री ओलीं नेपाः व जापान दथुइ सरकार–सरकार व जनता–जनता दथुइ ताः इलनिसे सम्बन्ध आः आयात–निर्यातय् न विकसित जुया वःगु दु धका धयादीगु दु।

प्रधानमन्त्री ओलीं युद्धं विनाश व शान्तिं विकास बिइ धइगु उदाहरण जापानं न्ह्यब्बःगु दु धका धयादीसे हलिमयय् शान्ति जुइमाः धइगु थःगु तधःगु इच्छा व सक्रिय कुतः यानागु दु धका वयकलं धयादीगु दु।

छगू दशक निसे अप्पो ईनिसे उद्यमशीलता प्रवर्धन व व्यावसायिक मार्गदर्शनय् सक्रिय दुगु आइडिया स्टुडियो नेपाल अन्तर्गतपाखे सञ्चालित लिडएक्स नेपाल व फोर्थ लिभायेया ग्वसालय् थ्व हे फागुन १४ निसे १६ गते तक नेपालय् समिटया ग्वसालय् जूगु खः।

मध्यपुरथिमि नगरपालिका–१ लोकन्थलीय् लाःगु अरनिको राजमार्गब्वया सुचुकुचुइ ‘देय्या निंतिं निघौ अभियान’यात साथ बिइत बागमती प्रदेशया स्वास्थ्यमन्त्री किरण थापा ल्हातय् तुफि व डस्विन ज्वनाः सतकय् वयादीगु दु।

‘देय्या निंतिं निघौ अभियान’ पाखें सच्छि व प्यंगूगु वाय् सुचुकुचु अभियानया झ्वलय् थौं सुथय् अरनिको राजमार्ग सुचुकुचु यायेगु ज्याझ्वलय् अभियन्ता टोलीलिसें मन्त्री थापा नं ल्हातय् तुफि व डस्विन ज्वनाः सुचुकुचु यानादिल। ज्याझ्वलय् मन्त्री थापां सतक सुचुकुचु यायेत स्थानीय तह व स्थानीयबासी तय्त भाला बिइमाःगु धयादिसें सतक दुर्घटनाय् लाःपिंत थत्थें उपचार यायेफइगु कथं ख्वपय् ट्रमा सेन्टर निर्माण यायेत्यंगु खँ नं कनादिल।

वय्कलं धयादिल, “अरनिको राजमार्ग ब्वय् दुर्घटना जुया हे च्वनी। पूर्वं वइगु सवारी साधन दुर्घटना जुइबलय् घाःपाः जूपिंत तप्यंक येँय् यंकीबलय् ज्यानया जोखिम जुइ, उकिं ख्वपय् हे छगू ट्रमा सेन्टरया आवश्यकता जुयाच्वंगुलिं राजमार्गय् हे न्ह्याकावयाच्वंगु सूर्यविनायक नगर अस्पतालयात आः प्रदेश सरकारं ट्रमा सेन्टर कथं विकास यायेत्यंगु दु।”

सूर्यविनायक नगर अस्पतालयात ट्रमा सेन्टरकथं स्तरोन्तति व विकास यायेत प्रदेश सरकारं आवश्यक प्रक्रिया न्ह्याकेधुंकूगु कनादिसें वय्कलं वइगु आर्थिक दँय् प्रदेश सरकारं आवश्यक बजेट विनियोजन याइ धकाः धयादिल।अभियानया प्यंगूगु चरणया स्वदायित्व बोध ज्याझ्वः व सुरक्षित राजमार्गया निंतिं ट्राफिक ज्याकुथिया मंकाःज्याय् सतक व गाडीइ सुरक्षित सतक छ्यलेगु बारे जनचेतना थनेधुंकूगु अभियन्ता नवराज काफ्लें कनादिल।

वय्कलं सच्छि व प्यंगू वाःतक अभियान न्ह्यानावयाच्वंगु कनादिसें चाँगुनारायण नगरपालिकाय् नं थ्व अभियान न्ह्यायेधुंकूगु धयादिल। वय्कलं ट्राफिकलिसे मिले जुयाः सतक दुर्घटना म्ह्वः यायेगु अभियान नं नापनापं न्ह्याकूगु खँ नं कनादिल।

राष्ट्रपति रामचन्द्र पौडेल पोखरा महानगपालिका–१८ सराङकोटय् न्ह्यानाच्वंगु श्रीमद्भागवत ज्ञान महायज्ञ नापं धार्मिक उत्सवय् ब्वति कायेत सराङकोट थ्यंकादीगु दु।

नेपाली सेनाया हेलीकप्टरय् झायादीम्ह वय्कलं सराङकोटय् नीस्वंगु पञ्चमुखी गणेश व कैलाशेश्वर शिवालयया उलेज्या यायेगु ज्याझ्वः दु।

सराङकोटय् थ्व हे फागुन १४ गतेनिसें श्रीमद्भागवत ज्ञानमहायज्ञ जुयाच्वंगु खः।

सञ्चार लिसे सूचना प्रविधिमन्त्री पृथ्वीसुब्बा गुरुङं सामाजिक सञ्जाल सञ्चालन, प्रयोग व नियमन यायेगु विधेयक दुने दुगु प्रावधानं अभिव्यक्ति स्वतन्त्रता हनन् जुइ मखु धका धाःगु दु।

हिमालय आँखा अस्पतालया ३२ क्वःगु वाषिकोत्सवया लसताय् थौ पोखराय् जुगु ज्याझ्वलय् न्ववानादीसे वयलकं संविधानं जनतायात ब्यूगु अधिकार कुण्ठित जुइ कथं सरकारं सामाजिक सञ्जाल नियमन विधेयक हयेत्यनागु मखु धका धयादीगु खः।

सरकारया प्रवक्ता तक जुयादीम्ह मन्त्री गुरुङं प्रेस लिसे अभिव्यक्ति स्वतन्त्रता कुण्ठित यायेगु व नागरिकया संवैधानिक हकय् अंकुश तयेगु प्रावधान विधेयकय् मदु धका दाबी यानादीगु खः।

गुरुङं पोखराया हिमालय आँखा अस्पताल, गण्डकी बोर्डिङ स्कुल, एसओएस बालग्राम गण्डकी प्रदेशं गौरव यायेगु संस्था खः धका धयादीगु खः। हिमालय आँखा अस्पतालया अध्यक्ष सुरेन्द्र थापाया सभाध्यक्षताय् उगु ज्याझ्वः जुगु खः।

नेपाःया न्हापाम्ह मिसा न्यायाधीश शारदा श्रेष्ठ म्हिगः शुक्रवाः मन्त। पूर्वन्यायाधीश श्रेष्ठ ८४ दँय् महाराजगञ्जस्थित प्रहरी अस्पतालय् मदुगु धका सर्वोच्च अदालतया सूचना अधिकारी निराजन पाण्डे न जानकारी ब्यूगु दु।

स्वास्थ्यय् भचा समस्या खने दयेवं उपचार यायेत भर्ना जुयादीगु खः। सर्वोच्च अदालतया न्यायाधीशया कथं श्रेष्ठ विसं २०६१ वैशाख ३ निसे २०६५ जेठ २१ गते तक ज्या यानादीगु खः। वयकः अधिकृत निसे न्यायक्षेत्रय् ज्या यानादीगु खः।

वयकःया निम्ह काय्पि दिइ।