हतियार त्वःतगु जक खः धका धया बिइगु धम्कीयात लक्ष्य यासे प्रधानमन्त्री ओलीं चाःया दुने सुचुका खःत नःगु हतियारं आः ज्याय जुइ मखु धका धयादीसे नेपाःया समाजय् मखु प्रचार याना धम्की मबिइत इनाप यानादीगु खः।

थःत अलोकप्रिय जूगु धका टिप्पणी याःपिन्त लिसः बिइगु झ्वलय् प्रधानमन्त्री ओलीं धयादीगु दु, “भाडाय् खटे यानातःपिन्स केपी ओलीया साख घटे जुल धका धाय्फु, सचेत जनतापिन्स स्यु कि झीपि गुलि लोकप्रिय दु धका ओलीया साख घटे जुल धाःपिन्स २०८४ या निर्वाचनय् स्वय्।” प्रधानमन्त्री ओलीं लोकतन्त्र धइगु छाडातन्त्र मखु धका धयादीसे नेपाः ल्वाना दयकागु व ल्वाना बचे यानागु राष्ट्र जुगुलि सिंहदरबार व बालुवाटार कब्जा याये, दाय्, स्याय् धइगु छाडातन्त्र जुगुलि थज्यागु क्रियाकलाप सह्य जुइ मखु धका धयादीगु खः।

वयकलं राष्टया निति माःगु पूर्व सुरक्षाकर्मी एकता व अनुशासन नाप खटे जुइपि व न्हुगु पुस्तायात प्रेरणा बिइमाः धका धयादीगु खः। वयकलं सामाजिक सञ्जालय् यः यः थे न्ह्यब्बइपिन्त उत्तरदायी दयकेगु लँय् सरकार दु धका स्पष्ट यानादीगु दु। सहकारी अपचलनबारे संसदीय समितिया प्रतिवेदनयात सरकारं कार्यान्वयन यानाच्वंगु दु धका धयादीसे प्रधानमन्त्री ओलीं अनुसन्धानया झ्वलय् दुपि मनूतयेगु पक्षय् अदालतया न्ह्यने हे वना हालेगु धइगु लोकतान्त्रिक मान्यतासङ्गत मखु धका धयादीगु दु।

वयकलं थः सूयात न पूर्वाग्रह मदु व न्यायिक निरुपणपाखे जुइपाखे निष्कर्षयात सकसिया न माने यायेमाः धका बःबियादीगु दु। उगु ज्याझ्वलय् नेपाली सेना, नेपाल प्रहरी, सशस्त्र प्रहरी व राष्ट्रिय अनुसन्धान विभागया अवकाश काये धुकुपि उच्चाधिकारीपाखे राष्ट्रिय सुरक्षा व पूर्व सुरक्षाकर्मीया भूमिकाबारे विचाः न्ह्यब्बयादीगु खः।

 झिंन्हयक्वःगु गोदावरी स्वाँया धेँधेँबल्ला लिसें ब्वज्यासं थ्यंमथ्यं ४५ लख बराबरया ब्यापार जुगु दु।फ्लोलिकल्चर एसोसिएशन (फ्यान) नं ग्वसाः ग्वःगु ‘गोदावरी स्वाँ पिये, छेँ लाय्भू सजेयाये’ नारा बिया बिहीवाःनिसें न्ह्यागु मेलाय् निन्हुया दथुइ थुलि ध्यबाःया ब्यापार जुगु खः।

वइगु आइतवाः तक न्हयाइगु उगु मेलाय् छगू करौड मल्याक आर्थिक कारोबार जुइगु आशा यानागु एसोसिएसनया नायः दिलीप बादेजुं जानकारी बियादिगु दु। वय्कया कथं मेलाय् बिहीवा व शुक्रवाः याना १६ द्वः म्हेस्यां मेलाया अवलोकन याये धुंकूगु दु।

अवलोकनय् वयादीपिनिगु मंू आकर्षण गोदावरी स्वाँ जूगु व थुगु स्वाँया ब्यापार ६० प्रतिशत जुइधुंकूगु खँ नं नायः बादें कनादिल । थुगु ब्वज्याय् व्यावसायिक स्टल ६८ गू, धेँधेँबल्ला स्टल निगू, अफिसियल स्टल प्यंगु व किपा पारखीतय् निंति सेल्फी स्टल छगू याना मुक्कं ७५ गू प्रदर्शनी कक्षत तयातःगु दु।

प्रदर्शनीइ गोदावरी स्वाँया धेँधेँबल्लानापं दुगुलिं थुगु स्वाँया थी थी विधाय् धेँधेँबल्ला याना सिरपाः इनेगु ज्याझ्वः दूगु फ्यानं जानकारी ब्यूगु दु।

सरकारं डेङ्गीया महामारी न्यंके मबीगु नितिं देय्न्यंकया सरकारी ज्याकुथीइ सुचुकुचु अभियान न्ह्याकूगु दु। बिहीवाः सनिलया मन्त्रिपरिषद्या मुंज्यां देय्न्यंकका सकल सरकारी ज्याकुथी परिसरस सुचुकुचु यायेगु निर्णय याःगु खः।

स्वास्थ्य व जनसङ्ख्या मन्त्रालयया प्रस्तावय् मन्त्रिपरिषदं उगु निर्णय याःगु सरकारका प्रवक्ता लिसें सञ्चार व सूचना प्रविधि मन्त्री पृथ्वी सुब्बा गुरूङं धाःगु दु। ‘डेङ्गी न्यंके मबीत लः मुनिगु थाय्, मोटर ग्यारेज, कवाडी स्टोरलिसें जोखिम दूगु थाय्या सुचुकुचु अभियान न्ह्याकेगु स्वास्थ्य मन्त्रालयया प्रस्तावया कथं हे डेङ्गु नियन्त्रण अभियान न्ह्याकेगु निर्णय जुगु खः,’ वय्कलं धयादिगु दु।

थ्वहे दथुइ, सञ्चार व सूचना प्रविधि मन्त्रालय नं मन्त्रिपरिषद्या निर्णयकथं थःथःगु ज्याकुथी परिसरय् सुचुकुचु याना डेङ्गी नियन्त्रण अभियान न्ह्याकेत थः क्वय्या ज्याकुथितयत् निर्देशन ब्युगु खः। स्वास्थ्य व जनसङ्ख्या मन्त्री प्रदीप पौडेलं देय्या छुँ जिल्लास डेङ्गी प्रकोप अप्वःयाच्वंगुलिं थुकियात याकनं नियन्त्रण यायेत सरकारं इलय् देयन्यंक पत्ती च्वनिगु थाय् मालेगु व पत्ती नष्ट अभियान यायेगु ज्याझ्वः तयागु खँ कनादिल।

वय्कलं डेङगी नियन्त्रणय् सक्रियरूपं ब्वति कायेया नितिं सरोकारवाला निकाय, निजामती कर्मचारी, सुरक्षा निकाय, सामाजिक अभियन्ता लिसें सकलसित इनाप यानादीगु दु।

ख्वप नगरपालिकां थ्व हे वइगु मङ्सिर २८ निसें पुस २ गतेतक ख्वप महोत्सव २०८१ यायेत्यःगु दु। नगरपालिकां सःतूगु ख्वप महोत्सव मूल समितिया सहलहलय् समितिया नायः नापं नगरपालिकाया प्रमुख सुनिल प्रजापतिं महोत्सवया तयारी यायेत्यनागु दु धका धयादिगु दु।

ज्याझ्वलय् नगर प्रमुख प्रजापतिं ख्वप महोत्सव ख्वप नगरपालिकाया जक मखुसे दक्व ख्वपया जनताया महोत्सव खः धकाः धयादिल। प्रमुख प्रजापतिंं धयादिल, “ख्वप नगरपालिकाया ग्वसालय् २०८१ मङ्सिर २८ निसें पुस २ गते तक न्यान्हुयंक ख्वप महोत्सव यायेगु ज्याझ्वः दु, ख्वपया मौलिक व ऐतिहासिक कला, संस्कृति, जात्रा, पर्व व जीवनशैली अन्तर्राष्ट्रिय रुपं प्रचार यायेत ख्वप महोत्सवया आयोजना यायेत्यनागु खः।”

वय्कलं महोत्सवं ख्वपय् च्वंपिं नगरबासीतय्गु अर्थोपार्जन यायेगु उद्देश्य कयाः थी थी लजगाः व बन्जाःतय्त ग्वाहालि जुइगु आशा यानादीगु दु। ज्याझ्वलय् ख्वप नगरपालिकाया उपप्रमुख रजनी जोशी, प्रमुख जिल्ला अधिकारी रोशनी कुमारी श्रेष्ठ, ख्वपया प्रहरी उपरीक्षक माधवप्रसाद बुढाथोकी लगायतं ख्वप महोत्सवयात शान्तिपूर्ण ढङ्गं पूवंकेमाः धकाः धयादिल।

नेपाल संवत न्हूदँ राष्ट्रिय समारोह समिति ११४५ पाखें नेपाल संवतया आन्दोलन व थुकिया महत्वयात कयाः युवापुस्तापिन्त प्रशिक्षण बिइगु ज्याझ्वः याइगु जूगु दु।

न्हूदँ ११४५ या लसताय् समारोह समितिं कछलाथ्व एकादसी (२०८१ कार्तिक १९ गते) सोमवाः न्हिनसिया निताः इलय् येँया नेपाः ब्यांक्वेटय् थथे प्रशिक्षणया ज्याझ्वः ग्वसाः ग्वःगु दु।

नेपाल संवत आन्दोलनयात कयाः अभिलेखीकरण यानाच्वनादीम्ह व नेपाल संवत सफूया च्वमि नेवाः न्ह्यलुवा मल्ल के सुन्दरं थथे छघौ प्रशिक्षण बिइगु खँ समारोह समितिं जानकारी ब्यूगु दु।