मंगलवाः थौ सेयर बजाः ३.०२ प्रतिशत थहावःगु दु। ७५.३३ अंक थहावंगुलि नेप्से परिसूचक २५६३ ल्याखय् कायम जूगु दु। थ्व ल्याः धइगु १६ चैत २०७८ लिपाः दकलय् अप्पो खः।

म्हिगः १३ अर्ब ९१ करोडया कारोबार जूगुलि थौ १४ अर्ब ११ करोड थ्यःगु खः। २२० गु कम्पनीया भाः थहावंगुलि नीगु कम्पनीया भाः कुहावःगु दु सा निगु धाःसा स्थिर जूगु खः। बैंकिङ २.३९, विकास बैंक २.९६, फाइनान्स २.५३, होटल लिसे पर्यटन ३.१४, हाइड्रोपावर ३.९७, लगानी ३.८७, जीवन बीमा ४.४५, उत्पादन ३.७७, माइक्रोफाइनान्स १.३९, निर्जीवन बीमा ४.३७, मेमेगु १.७३ व व्यापार समूह ५.०६ प्रतिशत थहावःगु दु।

होटल व पर्यटन समूहया सूचक आःतक हे दकलय् अप्पो ६५९१ विन्दुइ थ्यःगु खः। खुगु कम्पनीया भाः १० प्रतिशत स्वया अप्पो थ्यःगु दु। बोटलर्स नेपाल बालाजु, समृद्धि फाइनान्स, माण्डु हाइड्रोपावर, हाथवे इन्भेस्टमेन्ट कम्पनी, नेपाल वेयरहाउजिङ कम्पनी, साहस ऊर्जा व हिमालय ऊर्जा विकास कम्पनीया भाः १० प्रतिशत स्वया अप्पो थ्यःगु दु।

युनिभर्सल पावरया ९.८ व पिपुल्स पावरया भाः ८.७ प्रतिशतं थहावःगु दु। गणपति लघुवित्तया भाः ५.८ प्रतिशत कुहावःगु दु। कारोबार रकमया आधारय् शिवम् सिमेन्ट, अपी पावर, हिमालयन रिइन्स्योरेन्स, साइन रेसुङ्गा विकास बैंक व ङादी गु्रप पावर न्ह्यने लागु दु।

एमालें बागमती प्रदेश सरकारय् मन्त्रालय क्वजिगु दु। थौ सुथय् जक एमालें सरकारय् छ्वयेगु सांसदया नां अन्तिम रुप बिउगु खः।

एमाले संसदीय दलं प्रकाश श्रेष्ठयात कृषि तथा पशुपंक्षी मन्त्रालय, किरण थापामगरयात स्वास्थ्य व कृष्ण सिलवालयात वन तथा वातावरण मन्त्रालय बिइगु निर्णय याःगु दु।

अथे हे सुकमाया तामाङयात उद्योग, वाणिज्य, भूमि तथा प्रशासन मन्त्रालय, अमन मास्केयात भौतिक पूर्वाधार विकास व प्रेमभक्त महर्जनयात श्रम मन्त्रालय, रोजगार व यातायात ।

श्रेष्ठ बाहेक फुक्कं एमालेया मन्त्रीत न्हूपिं ख्वाःपाः खः । श्रेष्ठ शालिकराम जमकट्टेल नेतृत्वया सरकारय् उद्योग, वाणिज्य, भूमि व प्रशासनमन्त्री जुयादीगु खः।

नेकपा एमालें बागमती प्रदेश सरकारय् ब्वति काइपिं खुम्ह मन्त्रीपिनिगु नां क्वछिउगु दु।

एमालें येँपाखे प्रकाश श्रेष्ठ व अमन मास्के, यलपाखे प्रेमभक्त महर्जन, ख्वपं किरण थापामगर, चितवनया कृष्ण सिलवाल व सिन्धुलीया सुकमाया तामाङयात मन्त्री दयेकेत्यंगु दु।

प्रकाश श्रेष्ठ बाहेक फुक्कं न्हूपिं ख्वाःपाः खः। प्रकाश थ्व स्वया न्ह्यः उद्योग, वाणिज्य, भूमि तथा प्रशासनमन्त्री जुयादीगु खः।थौं हे मुख्यमन्त्री व मन्त्रीपिं नियुक्ति जूसां नं बुधवाः हे सपथ ग्रहण यायेगु ज्याझ्वः तयातःगु दु।

बागमती प्रदेशय् नेपाली कांग्रेस व नेकपा एमाले दथुइ मन्त्रालय साझेदारी क्वचाःगु दु । कांग्रेसं न्ह्यय्गु मन्त्रालय व एमालें मुख्यमन्त्री नाप खुगु मन्त्रालय काय्ेगु सहमति जूगु दु।

सोमवाः मन्त्रालयया खँ मिले कांग्रेसया बहादुर सिं लामाया दाबी मुख्यमन्त्री पदय् न्ह्यब्वयेगु पूर्वनिर्धारित ज्याझ्वः दिकूगु खः।कांग्रेस संसदीय दलया नेता लामां थौं सुथय् ११ ता इलय् मुख्यमन्त्री न्ह्यःने थःगु दाबी न्ह्यब्वइगु जूगु दु। नेता लामां मंगलवाः ११ ता इलय् दावी पेश यायेत वनेगु निंतिं तयार दुगु जानकारी ब्यूगु दु। वय्कःया कथं दाबी बुझे यायेगु फुक्क प्रक्रिया पूवनेधुंकूगु दु।

एमाले संसदीय दलया नेता जगन्नाथ थपलियां थः सुथय् हेटौंडा लिहां वयाः दाबी लःल्हायेगु धयादीगु दु।आइतबाः बहनी हेटौंडाय् च्वंगु छगू होटलय् कांग्रेस व एमालेया दथुइ मन्त्रालय साझेदारी यायेगु बैठक जूगु खः। युवा लिसे खेलकुद मन्त्रालय व कृषि तथा पशुपंक्षी विकास मन्त्रालय सुनां कायेगु धैगु खँय् सहमति मजुगु खः। कांग्रेसं एमालेयात खेलकुद मन्त्रालय कायेगु प्रस्ताव तःगु खः। २०८० असार २ गते शालिकराम जमकट्टेलया नेतृत्वय् मन्त्रिपरिषदं सामाजिक विकास मन्त्रालय भंग यानाः युवा तथा खेलकुद मन्त्रालय दयेकूगु खः।े१३ म्ह दुजःया मन्त्रिमण्डल दुगु बागमतीइ कांग्रेसं मुख्यमन्त्रीलिसें न्ह्यय्गू व एमालें खुगू मन्त्रालय काइगु जूगु दु।

कांग्रेसया प्रमुख सचेतक गोविन्द लम्सालं जमकट्टेल नेतृत्वया सरकारय् कांग्रेसयात मुख्यमन्त्रीलिसें न्यागू व एमालेयात न्यागू मन्त्रालय वितरण क्वचाये धुंकूगु जानकारी बियादीगु दु। कांग्रेसं मुख्यमन्त्रीलिसें आन्तरिक मामिला व कानुन मन्त्रालय, भौतिक पूर्वाधार विकास मन्त्रालय व सामाजिक विकास मन्त्रालयलिसें संस्कृति, पर्यटन तथा सहकारी मन्त्रालय, युवा लिसे खेलकुद व श्रम रोजगार व यातायात। एमालें आर्थिक मामिला तथा योजना मन्त्रालय, जल, ऊर्जा तथा सिँचाइ मन्त्रालय, वन तथा वातावरण मन्त्रालय, स्वास्थ्य मन्त्रालय, उद्योग, वाणिज्य, भूमि तथा प्रशासन मन्त्रालय व कृषि तथा पशुपन्छि विकास मन्त्रालय काःगु दु

न्हुसतकय् फुटपाथ विस्तारया विवाद क्वचाःगु दु। थौ जूगु सहमति कथं वडा नम्बर २४ य् फुटपाथ विस्तार क्वचाय् धुका आः मंसिर तक दिइकिइगु जुइ।

मेयर, उपमेयर, प्रशासकीय प्रमुख व वडाध्यक्ष दथुइ थौ सोमवाः जूगु वार्ताय् वडा नम्बर २४ य् फुटपाथ विस्तारया ज्या क्वचायेकिइगु व उकिइ आर्थिक, सामाजिक सांस्कृतिक व लँय् वइ वनिइपिनिगु प्रभावबारे अध्ययन यायेगु सहमति जूगु खः।

उगु अध्ययन रिपोर्टया आधारय् वडा नम्बर २२ व २३ य् फुटपाथबारे निर्णय जुइ। वडा नम्बर २३ या वडाध्यक्ष मचाराजा महर्जनं थौ जूगु छगु सभाय् धयादीगु दु, ‘२२ व २३ य् विस्तार याये ल्यदनिइगु ज्याय् दक्को वस्तुस्थिति अध्ययन याये धुका वइगु लिच्वःया आधारय् मेगु ल्यः दनिइगु ज्या न्ह्याकिइगु।’

वयकःया कथं उगु अध्ययन समितिया नेतृत्व सहरी योजना आयोगया उपाध्यक्ष सुमनराज भण्डारीं याइ। वडा नम्बर २२, २३ व २४ या वडाध्यक्षपि सदस्यय् जुइ। वडा नम्बर २२ न निम्ह व २३÷२४ वडां छम्ह छम्ह विषयविज्ञ सदस्यपि दइ। निर्माण विभागया विभागीय प्रमुख सुरज शाक्य सदस्य सचिव जुइ थुगु समितिं मंसिर २ गते प्रतिवेदन लःल्हाइ। समितिं प्रतिवेदन तयार याये धुका स्थानीय च्वपिनाप सहलह यायेगु जुइ धका वडाध्यक्ष महर्जनं धाःगु दु।

थौ जूगु उगु सहमतिनापं वडा नम्बर २२ य् आन्दोलन क्वचाःगु दु धका वडाध्यक्ष चिनीकाजी महर्जनं जानकारी बिउगु दु। वयकलं धयादीगु दु, ‘थौ धाथे जनता त्याःगू दु।’ वयकलं ग्वाहालि याःपिन्त सकसित सुभाय् न देछानादील।