सरकारं स्वंगू प्रदेशय् प्रदेशया प्रमुखपि उखेथुखे याःगु दु। बागमती, लुम्बिनी व कर्णालीया प्रदेश प्रमुखपिन्त चिइकूगु दु सा न्हुपि प्रदेश प्रमुख नियुक्त याःगु दु धका छम्ह मन्त्रीं जानकारी बिउगु दु।

सोमवाः च्वंगु मन्त्रिपरिषद बैठकं बागमतीइ दीपकप्रकाश देवकोटा, लुम्बिनीइ कृष्णबहादुर घर्तीमगर व कर्णालीइ यज्ञराज जोशी प्रदेश प्रमुखय् नियुक्त जुगु दु धका छम्ह मन्त्रीं जानकारी बिउगु दु।

थ्व स्वया न्ह्यः बागमतीइ यादव शर्मा, लुम्बिनीइ अमिक शेरचन व कर्णालीइ तिलक परियार प्रदेश प्रमुख जुयाच्वंगु खः। शर्मा एकीकृत समाजवादी, शेरचन व परियार नेकपा माओवादी केन्द्रयापि खः।

स्वम्हं प्रचण्ड नेतृत्वया सरकारं नियुक्त यानातःपि खः।

सरकारं चीनया नितिं नेपाःया राजदूत विष्णुपुकर श्रेष्ठयात लित सःतूगु दु। सोमवाः च्वंगु मन्त्रिपरिषद बैठकं श्रेष्ठयात लितः सःताः वय्कःया थासय् कृष्णप्रसाद ओलीयात सिफारिस याःगु छम्ह मन्त्रीं जानकारी ब्यूगु दु।

माओवादी केन्द्र लिक्क लाःम्ह श्रेष्ठ नेपाली कांग्रेसया अध्यक्ष शेरबहादुर देउवा प्रधानमन्त्री जुयाच्वंगु इलय् हे राजदूत नियुक्त जूगु खः। उगु मुँज्याय् अमेरिकाय् लोकदर्शन रेग्मी, बेलायतय् चन्द्र घिमिरे, दक्षिण कोरियाय् शिवमाया तुम्बाहाङ्फे, मलेसियाय् डा. नेत्र तिमल्सिनायात सिफारिस याःगु दु।

अथे हे शंकर शर्मायात भारतया नितिं नेपाली राजदूतया पदय् निरन्तरता बीगु निर्णय जूगु दु। शर्मायात वंगु महिनाय् जक माओवादी एमाले गठबन्धन सरकारं लित सःतूगु खः।

सत्ता गठबन्धनय् हिउपाः वयेवं कांग्रेसया सिफारिसय् नियुक्त जूम्ह शर्मायात दिल्लीइ निरन्तरता बिउगु न्हूगु निर्णय जूगु दु।

प्रधानमन्त्री केपी शर्मा ओलीं युगकवि सिद्धिचरण श्रेष्ठया कृतिपाखें थः तसकं प्रभावित जूगु धयादीगु दु।

प्रधानमन्त्री ओलीं युगकवि सिद्धिचरण श्रेष्ठया थौं १३० दँ बुदिंया लसताय् जूगु ज्याझ्वलय् सम्बोधन यासें युगकविया कृतिपाखें क्रान्ति प्रज्वलित याःपिं ल्याय्म्हतय्गु उदाहरण बियादिसें देय्या नितिं माःगु इलय् ल्याय्म्हत उत्साहित जुइगु स्वाभाविक खः धका धयादीगु दु।

वय्कलं धयादीगु दु, “नेपाः–अंग्रेजी युद्धया इलय् गथे नेपाःमित उत्साहित जुल, उकथं हे माःगु इलय् जोश पिकाय्माः, ल्याय्म्हपि चम्कें जुइमामाः ।” प्रम ओलीं थः नं युगकवि सिद्धिचरणपाखें वैचारिक व साहित्यिक रुपं प्रभावित जूगु उल्लेख यानादिगु दु। “वय्कः जिमि गुरु नं खः, जि वय्कःपाखें तसकं प्रभावित जुयाच्वना“, प्रम ओली धयादीगु दु, “वय्कलं च्वयादीगु म्येया प्रेरणां आपालं ल्याय्म्हत क्रान्तिइ शहीद व शहीद जुइत तयार जुल।“

गंगालाल श्रेष्ठयात नं वयागु म्येपाखें प्रभावित जुयाः सहिद जूगु खः। जि नं क्रान्तिइ संलग्न जुया।“ प्रम ओली धयादीगु दु युगकविया सिर्जनां आपालं च्वमिपिनिगु सिर्जनाय् प्रभाव लाकूगु धयादिगु दु।

युगकवि सिद्धिचरण प्रतिष्ठानया ग्वसालय् जूगु उगु ज्याझ्वलय् प्राडा उषा ठाकुरयात युगकवि सिद्धिचरण सिरपाःलिसें १ लख नगद लःल्हाःगु खः सा नेपाल टेलिभिजनया नितिं ओखलढुंगा संवाददाता नवराज कार्कीयात युगकवि सिद्धिचरण युवा पत्रकारिता सिरपापाखें ४० हजार नगद लःल्हाःगु खः।

उगु ज्याझ्वलय् प्रधानमन्त्री ओलीं प्रतिष्ठानपाखें पिथंगु ‘युगकवि सिद्धिचरण गद्य कविता’ व ‘विज्ञान दृष्टिमा युगकवि’ नांया निगू कृति सार्वजनिक यानादीगु खः।

सरकारं सचिवतय्त सरुवा याःगु दु। २२ म्ह सचिव छक्वलं सरुवा यागु खः।

थौ सोमवाः च्वंगु मन्त्रिपरिषद बैठकं वर्तमान राजस्व सचिव रामप्रसाद घिमिरेयात अर्थ सचिवया जिम्मेवारी बिइगु निर्णय याःगु खःसा अर्थ सचिव जुयाच्वम्ह मधुकमार मरासिनीयात उपराष्ट्रपतिया ज्याकुथिइ सरुवा याःगु स्रोतं जानकारी ब्यूगु दु।थौंकन्हय् उद्योग, वाणिज्य लिसे आपूर्ति मन्त्रालयय् वाणिज्य सचिव जुयाच्वम्ह दिनेशकुमार घिमिरेयात राजस्व सचिवया जिम्मेवारी ब्यूगु दु।

केशवकुमार शर्मा भौतिक पूर्वाधार लिसे यातायात मन्त्रालयय् सचिव जुयादीगु दु। थौंकन्हय् वय्कः जल तथा ऊर्जा आयोगय् च्वनाच्वम्ह खः।अथे हे भौतिक पूर्वाधार लिसे यातायात मन्त्रालयया सचिव गोपालप्रसाद सिग्देलयात उर्जा सचिवय् सरुवा याःगु दु।

थौंकन्हय् श्रम, रोजगार व सामाजिक सुरक्षा मन्त्रालयय् सचिव जुयाच्वंम्ह घनश्याम उपाध्याययात अख्तियार दुरुपयोग अनुसन्धान आयोगय् सरुवा याःगु दु। आःया प्राधिकरणय् सचिव जुयाच्वंम्ह रामेश्वर डंगालयात रक्षा मन्त्रालयय् सरुवा याःगु दु।

मौद्रिक नीति सार्वजनिक जुउगु न्हापागु दिं शेयर बजाः सच्छिगु ल्याखं थहावःगु दु।

शेयर बजाः परिसूचक नेप्से थौ १ सय १३ दशमलव ४२ ल्याखं थहावना २ हजार ६ सय ८१ दशमलव ५६ विन्दुइ थ्यःगु दु। नेप्से थौ २९ महिना लिपा दकलय् अप्पो थ्यःगु खः।

थ्व स्वया न्हापां २०७८ साल फागुन ११ गते शेयर बजाः २७ सय विन्दुइ थ्यःगु खः। बैंकिङ समूहया शेयर झन्डै १० प्रतिशतं थहावःगु दु। माइक्रोफाइनान्स बाहेक मेगु दक्को समूहया शेयर थहावंगु दु। १९ गु कम्पनीया शेयर १० प्रतिशतं थहावंगु दु सा दकलय् अप्पो वाणिज्य बैंकया शेयर थहावंगु दु।

समग्र बजाः थहावंसा थौ गणपति लघुवित्त वित्तीय संस्थाया शेयर झन्डै साढे ९ प्रतिशतं कुहावःगु दु। ४ करोड ३ लाख कित्ता शेयर १५ अर्ब ८१ करोड ५ लाख रुपैयाँया कारोबार जूगु दु। दकलय् अप्पो कुमारी बैंकया ३६ करोड १० लाख व एनआईसी एसिया बैंकया ३४ करोड ८१ लाख रुपैयाँयो शेयर कारोवार जूगु दु।

थौ निक्वः तक शेयर बजाः ’सर्किट ब्रेक’ जूया कारोबार बन्द जूगु खः। बजाः चाःगु छगु मिनेतय् नेप्से परिसूचक ४ प्रतिशतं थहावना न्हापागु सर्किट ब्रेक जूया कारोबार २० मिनेटय् स्थगित जूगु खः। २० मिनेट लिपा चाःगु बजाः हाकन छगू मिनेटय् ५ प्रतिशतं थहावना निक्वः तक सर्किट ब्रेक जूगु खः।