आदिवासी नेवाः राजनितिक अभियान नं थौ बसन्तपुरया महाद्यः पार्वती दबली प्लेकार्ड ब्बज्या याःगु दु। मुकुम्मलुङ्ग आन्दोनलय् राज्यं दमन याःगु बिरोधय् एक्यबद्धता यायेगु कथं प्लेकार्ड ब्बज्या याःगु खः

उगु प्लेकार्ड ब्बज्या नेवाः ख्यःया थीथी मनूतय्स ब्बति काःगु दु।

प्रधानमन्त्री केपी शर्मा ओलीं थौ येँ कमलादीस्थित स्वाइवाक टावरया अवलोकन यानादीगु दु।

प्रजातन्त्र दिवसया लसताय् उगु टावरय् राष्ट्रिय ध्वाँय् ब्बय्कादी प्रधानमन्त्री ओलीं उगु मचानिसे बुरा बुरीतक अपुगु गन्तव्य खः धका प्रतिक्रिया बियादीगु खः।

राष्ट्रिय समाचार समिति (राससं) थनिनिसें ‘रासस मिडिया सङ्ग्रहालय बुखँ बुलेटिन’ कक्ष सर्वसाधारण तय्गु निंतिं चायेकूगु दु। राससया ६४ क्वःगु वार्षिकोत्सव मूल समारोहया लसताय् थौं सञ्चार व सूचना प्रविधिमन्त्री पृथ्वीसुब्बा गुरुङं थुगु कक्षया उलेज्या यानादिल।

विसं २०१८ फागुन ७ गते रासस स्थापना जुसांनिसें आःतकया बुखँया बुलेटिनयात सङ्ग्रहालयय् सङ्ग्रहित याःगु खः। राससया महत्वपूर्ण सम्पत्ति व उपलब्धिया कथं दूगु बुखँ बुलेटिनयात पत्रकारिता यानाच्वंपिं, ब्वनामित व मिडिया अध्येतातय्गु निंतिं चायेकूगु राससया कार्यकारी अध्यक्ष धर्मेन्द्र झां धयादिल।

वय्कलं रासस राज्यया संस्था जूगु व थुकिया बुलेटिन व बुखँ सामग्रीत राससया जक मखुसे सकल नेपाःमितय्गु सम्पत्ति जूगुलिं उगु बुलेटिन अध्ययन अनुसन्धान यायेगु ह्वःताः सकसितं दयेमाः धइगु ताःतयाः बुलेटिन कक्ष अध्ययन अनुसन्धानया निंतिं चायेकूगु धयादिल।

रासस समाचार बुलेटिन कक्षं मिडियाया अनुसन्धानय् च्यूताः तइपिं, आमसञ्चारया ब्वनामिपिं व क्रियाशील पत्रकार तय्त लाभ जुइगु नापं नेपालय् बुखँ ‘एजेन्सी’या विकासया सन्दर्भय् अध्ययन यायेत ग्वाहालि जुइगु राससया महाप्रबन्धक सिद्धराज राईं धयादिल। भूकम्पं राससया भवन दुनाः वयेधुंकाः गोदामय् मुनाच्वंगु व जीर्ण जुयाच्वंगु बुलेटिन तय्त सङ्ग्रह यानाः राससया इतिहासयात जीवन्त दयेकेत व अभिलेखयात गथे खः अथे हे याना तयेत बुलेटिन कक्ष निस्वंगु वय्कलं धयादिल।

राससं नीप्यघौं हे राष्ट्रिय व अन्तरराष्ट्रिय महत्वया आधिकारिक व विश्वसनीय बुखँ सम्प्रेषण याना वयाच्वंगु दु। राससया ६४ क्वःगु वार्षिकोत्सवया लसताय् ग्वसाः ग्वःगु मूल समारोह समितिया ज्याझ्वः न्ह्यानाच्वंगु दु।

राष्ट्रपति रामचन्द्र पौडेल राष्ट्रिय प्रजातन्त्र दिवस, २०८१ या लसताय् मूलसमारोह समितिं थौ बुधवाः नेपाली सैनिक मञ्च तिनख्यलय् जुगु विशेष समारोहय् ब्बति कयादीगु दु।

उगु ज्याझ्वलय् नेपाली सेनाया हेलिकोप्टरं राष्ट्रिय प्रजातन्त्र दिवस, २०८१ अङ्कित ब्यानर प्रदर्शन याना स्वां ह्वंगु नाप रङ्गीचङ्गी बेलुन न ब्बयकूगु खः। समारोहय् नेपाली सेना, नेपाल प्रहरी, सशस्त्र प्रहरी बल नेपाल व नेपाल स्काउटं ‘मार्चपास’ व ‘ब्याण्ड’ न्ह्यब्बःगु खः।

उगु ज्याझ्वलय् स्वनिगःया थीथी नगरपालिकापाखे सांस्कृति झाँकी व लाखे प्याख, तेक्वान्दो कासा न्ह्यब्बःगु खः। ज्याझ्वलय् उपराष्ट्रपति रामसहायप्रसाद यादव, प्रधानमन्त्री केपी शर्मा ओली, प्रधानन्यायाधीश प्रकाशमान सिंह राउत, प्रतिनिधिसभाया सभामुख देवराज घिमिरे, राष्ट्रियसभाया अध्यक्ष नारायणप्रसाद दाहाल, उपप्रधानमन्त्री, मन्त्रीगण, सांसदपि, संवैधानिक निकायया प्रमुख व पदाधिकारी, नेपाल सरकारया उच्चाधिकारी, कूटनीतिक नियोगया प्रतिनिधि, समाजया थीथी प्रतिनिधिपिन्स ब्बति कागु खः 

सरकारं शान्ति, सुशासन, नवप्रवर्तन, वैज्ञानिक खोज, अनुसन्धान व विकासया ख्यलय् उल्लेखनीय योगदान याःपि प्रतिभाशाली नागरिक तय्त प्रधानमन्त्री राष्ट्रिय प्रतिभा पुरस्कार घोषणा याःगु दु।

राष्ट्रिय प्रजातन्त्र दिवस २०८१ या लसताय् थौ सैनिकमञ्च टुँनिख्यलय् जुगु मूल समारोहय् अथे सिरपा घोषणा यानादीगु खः। टेलिमेडिसिन ख्यलय् डा छिरिङ लामा (सिन्धुपाल्चोक), विज्ञान प्रविधि नवप्रवर्तनतर्फ डा विराजसिंह थापा (मोरङ), कीर्तिमानी पर्वतारोही पूर्णिमा श्रेष्ठ (गोरखा), विज्ञान प्रविधिपाखे आभाष मास्के (येँ) व हरिराम श्रेष्ठ (गोरखा) यात सिरपा घोषणा यानादीगु खः।

अथेहे चिकित्सा क्षेत्रय् डा ओम मूर्ति अनिल (महोत्तरी), कासाय् सावित्रा भण्डारी (लमजुङ), सम्पदा संरक्षणपाखे रवीन्द्र पुरी (ख्वप), मानवसेवा लिसे समाजसेवापाखे दिलशोभा श्रेष्ठ (येँ) व रामजी अधिकारी (गोरखा) पुरस्कृत जूगु दु। छगू विशेष ज्याझ्वः दथुइ सिरपा लःल्हाइगु ज्याझ्वः दु। २०७५ मङ्सिर १७ गते मन्त्रिपरिषदया बैठकं उगु सिरपा लःल्हायेगु निर्णय याःगु खः।

तत्कालीन प्रधानमन्त्री केपी शर्मा ओलीयात कोरिया सरकारपाखे ब्यूगु छगु लाख अमेरिकी डलर नेपाल सरकारयात १ करोड थप याना प्रधानमन्त्री राष्ट्रिय प्रतिभा पुरस्कार कोष स्थापना याःगु खः।उगु कोषपाखे दँय् दँसं निम्हेसित प्रतिभायात म्हति न्यागु लाख राशिया सिरपा लःल्हायेगु निर्णय याःगु खः। २०७६ सालय् न्हापागु पटक निगु विधाय् स्वम्हेसित प्रतिभा सिरपा लःल्हागु खः। कोरोना महामारी लिपा उगु सिरपा मजुगु खः।