राष्ट्रपति रामचन्द्र पौडेललिसे सङ्घीय संसदय् प्रतिनिधित्व यानाच्वंपिं मू प्रतिपक्षनापंया दलया नेतातय्सं नापलानादीगु दु। राष्ट्रपति भवन शीतल निवासय् मू प्रतिपक्षी दलया नेतानापं नेकपा (माओवादी केन्द्र) या नायः पुष्प कमल दाहाल ‘प्रचण्ड’जुनापं प्रतिपक्षय् च्वनाच्वंपिं दलया नेतातय्सं नापलानादीगु दु।

प्रतिपक्ष दलतय्सं प्रधानमन्त्री केपी शर्मा ओलीयात ज्ञापनपत्र लःल्हाःगु सन्दर्भय् सरकारपाखें जूगु मगाःमचाःयाबारे राष्ट्रपतियात खँ कनेत शीतल निवासय् नापलाना वइगु धकाः धयादीगु दु। राष्ट्रपति पौडेललिसे प्रतिपक्ष दलया नेतातय्सं थौंकन्हय्या परिस्थितिबारे जानकारी बिइत जिपिं वइगु खः धासें वय्कःपिंसं लोकतन्त्र व संविधानया संरक्षकया भूमिका म्हितेत इनाप याःगु राष्ट्रपतिया प्रेस सल्लाहकार किरण पोखरेलं धाःगु दु।

नेतातय्सं संविधानया मर्म अःखः व बहुलवादय् आधारित मर्म अःखःगु गुलिखे ज्याखँत जुइत्यंगु खँ न्ह्यथसें थुकी संविधानया संरक्षक व देशया अभिभावकया हैसियतकथं भूमिका म्हितादीत इनाप यानादिल। थ्व हे झ्वलय् राष्ट्रपति पौडेलं थः संविधान, राष्ट्र व राष्ट्रिय एकताया प्रवद्र्ध्धनप्रति प्रतिबद्ध दु व संविधानं थःत ब्यूगु कर्तव्य व सीमाकथं न्ह्याः वनेगु खँय् धुक्क जुयादीत इनाप यानादिल। वय्कलं धयादिल, “संविधानया मर्म व लोकतन्त्रया मर्मयात स्वयाः हे संविधानं निर्धारित राष्ट्रपतिया कर्तव्य व सीमायात स्वयाः जिं ज्या यायेगु खँय् छिकपिं सकसितं विश्वस्त यानाच्वना ।”

संसदय् प्रतिपक्षय् नेकपा (माओवादी केन्द्र)नापं राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा एकीकृत समाजवादी व आमजनता पार्टी दु। राष्ट्रपति पौडेललिसे नापलायेत नेकपा (माओवादी केन्द्र) या नायः दाहाल, शक्ति बस्नेत, राष्ट्रिय स्वतन्त्र पार्टीपाखें सांसदपि शिशिर खनाल व सुमना श्रेष्ठ, राष्ट्रिय प्रजातन्त्र पार्टीपाखें नेता बुद्धिमान तामाङ व हेमजङ्ग गुरुङ, नेकपा (एकीकृत समाजवादी) पाखें नायः माधवकुमार नेपाल व मू न्वकू राजेन्द्रप्रसाद पाण्डे व आमजनता पार्टीपाखें नेता तिलक थापामगरं ब्बति कयादीगु खः।

विश्व बैंक व अन्तर्राष्ट्रिय मुद्रा कोषया वार्षिक बैठकय् ब्वति कायेत थन दीम्ह उपप्रधानमन्त्री नापं अर्थमन्त्री विष्णु पौडेलं बुधबाः उगु बैंकया दक्षिण एसिया मामिला स्वइम्ह न्वकू मार्टिन रेजरलिसे नापलानाः खँ ल्हानादीगु दु।

उगु खँल्हाबल्हाय् नेपालय् लजगाः सिर्जना यायेगु विषयय् केन्द्रित जूगु थनया नेपाली राजदूतावासं कनादीगु दु। नेपालय् व्यावसायिक वातावरणया सुधार, मू पूर्वाधार आयोजना तय्गु कार्यान्वयन व विप्रेषण आप्रवाहया माध्यमपाखें नं लजगा सिर्जना यायेगुबारे खँल्हाबल्हा जूगु खः। थ्व हे झ्वःलय्, विश्व बैंकं नेपाःयात प्राकृतिक तःस्यंलिपाया पुनर्निर्माणया लागि ग्वहालि याइगु जूगु दु।

ग्वाहालि सम्बन्धी सम्झौताय् नेपाः सरकार व विश्व बैंक दथुइ हस्ताक्षर जुइ धुंकूगु दु।अर्थ मन्त्रालयया सचिव रामप्रसाद घिमिरे व नेपाःया लागि विश्व बैंकया प्रतिनिधि डेविड सिसलेनंं सम्झौतापत्रय् हस्ताक्षर यानादीगु दु। सम्झौता कथं विश्व बैंकं १५ लाख डलर उपलब्ध याइगु जूगु दु।

उपप्रधानमन्त्री पौडेल व विश्व बैंक (दक्षिण एसिया मामिला)या उपाध्यक्ष मार्टिन रेजरया उपस्थितिइ जूगु हस्ताक्षर ज्याझ्वःलय् नेपाःया प्राकृतिक व जलवायु हिउपाःया हुनिं वइगु स्वास्थ्य जटिलताया निंति स्रोत परिचालन याइगु खँ धाःगु दु।

ओली प्रधानमन्त्री केपी शर्मा ओली शान्ति प्रक्रियाया ल्यं दुगु ज्यायात निष्कर्षय् थ्यंकेत वर्तमान सरकार सफल जूगु धयादिल।

सरकार गठन जूगु सँछि दिंया उपलब्धिबारे सिंहदरबारंं सम्बोधनयासें प्रधानमन्त्री ओलीं धयादिल – ‘सत्य निरूपण व मेलमिलाप आयोग, २०७१’ यात संशोधन यायेत दयेका तःगु विधेयक सर्वसम्मतिं स्वीकृत जुया प्रमाणीकरण समेत जुइ धुकूगु दु धयादिल।

“शान्ति प्रक्रियायात पूर्णता बिइत आयोग गठनया निंति सिफारिस समिति नीस्वंगु दु, उकिं आयोग गठनया प्रक्रिया न्ह्याकूगु दु”, प्रधानमन्त्रीे ओलींं धयादिल – “ताः ई तक्क द्वन्द्व फगु झीगु समाजया निंति थ्व सुखद् सन्देश खः।”

वय्कलं थ्व ई दुने थी थी मन्त्रालयनाप सम्बन्धित प्यंंगु दर्जन स्वयां अप्वः ऐन, नियम व कार्यविधिलय् सहमति जुइ धुकूगु खँ नं कनादिल।

प्रधानमन्त्री केपी शर्मा ओलींं न्ह्यागु नं कालखण्डय् जूसां भ्रष्टाचारीयात कारबाही जुइ धकाः स्पष्ट यानादिइगु दु। सरकारया सच्छि न्हुया उपलब्धि सार्वजनिक यासें वय्कलं सर्वसाधारणं सहकारी संस्थाय् मुंकाःतःगु ध्यबा अपचलन व ठगीयाइपिंत सरकारं कानुनी कारबाही याइ  धका धयादीगु दु।

“आःतक ६०० स्वयां अप्वःयात कानुनी कारबाही याःगु दु, ५७५ स्वयां अप्वः जेलय् दु”, प्रधानमन्त्री ओलींं धयादिल, “सहकारी ठगतय्त कारबाही यायेगु जक मखु, बचतकर्ताया बचत लित बिइकेत मदयेक मगाःगु सहकारी प्राधिकरण ऐन तर्जुमा यायेगु व सहकारी कर्जा सूचना केन्द्र व त्यासा असुली न्यायाधीकरण यायेगु ज्या नं नापनापं न्ह्याकाः यंकीगु जूगु दु।

वय्कलं भ्रष्टाचार नियन्त्रण व सुशासन छगू क्षणया हल्लाबाजी व ‘सुटिङ’ यानाः क्यनेगु विषय जुइ मज्यूगु जूगुलिं थुकिं सुशासनया प्रणालीया रुपं गति कायेमाः धैगु खँय् सरकार स्पष्ट दु धकाः उल्लेख यानादिल। “भ्रष्टाचार नियन्त्रणय् सरकारं क्यामेरायात मखु, कानुनयात गुरु माने यानातःगु दु।

‘भ्रष्टाचारी ज्वन’ धैगु छुं ई हल्ला जुइगु तर, लिच्वलय् भ्रष्टाचार अप्वया वनीगु अवस्था मखु, भ्रष्टाचार नियन्त्रण जुइगु कानुनी प्रणाली नीस्वनेगु पद्धति दयेकेगु जिमिगु प्राथमिकता खः”, वय्कलं धयादिल, “भ्रष्टाचारया कसुरय् लाइगु ग्याचिकु व उकिं उम्के जुइगु आकांक्षा, भ्रष्ट व भ्रष्टाचारया मतियार बचे जुइगु उद्देश्य कथं देशय् अस्थिरता व अराजकता न्यंकेत स्वइपिं सक्रिय जुयाच्वंगु झीसं खनाच्वंगु दु।”

संस्कृति, पर्यटन नापं नागरिक उड्डयन मन्त्री बद्रीप्रसाद पाण्डें मन्त्रालय मातहतया प्रतिष्ठानतयेगु ज्याय् एकरुपता जुइमाःगुली बः बियादीगु दु।

वय्कलं पर्यटन मन्त्रालयय् नेपाल ललित कला प्रज्ञा–प्रतिष्ठानया वार्षिक प्रतिवेदन लःल्हानाः कासें गुलिखे प्रतिष्ठान नामं जक दुगु, गनं कानूनया म्हो जुयाच्वंगु व गनं भवनया अभाव जूगुलिं प्रतिष्ठानय् दथुइ एकरुपता हयेया लागि व्यवस्थित यायेगु ज्या मयासें मगाः धयादिल।

पर्यटन मन्त्री पाण्डेुंं गुलिखे पालिका, प्रदेश व सङ्घ अन्तर्गतय् लानाच्वंगु प्रतिष्ठानतय् दथुइ तालमेल जुयाच्वंगु मदु धासें प्रतिष्ठानया ज्याय् एकरुपता हयेत केन्द्रय् च्वंगु प्रतिष्ठानं नेतृत्वदायी भूमिका म्हितेमाःगुली बः बियादिल। ललित कला प्रतिष्ठानया कुलपति नारद मणि हातम्छालींं न्हापाया आर्थिक दँय् न्ह्यगू हे प्रदेशय् ललित कला प्रदर्शनी यायेगु ज्या जूगु व प्रदेश प्रदर्शनीइ १ हजार व १० म्ह कलाकारतय्सं विधागत रूपं भाग काःगु धयादिल।

वय्कलं गण्डकी, सुदूरपश्चिम व मधेश प्रदेशय् प्राज्ञिक भेला आयोजना याःगु नापं दाङयात ‘सेरामिक्स हब’या रूपय् विकास यायेगु बिचा तयाः ज्या जुयाच्वंगु खँ कनादिल। प्रतिष्ठानय् स्थायी कर्मचारीे व बजेट म्हो जूगु थे ंजाःगु विषयलय् वय्कलं पर्यटनमन्त्रीया ध्यानाकर्षण नं यानादिल।