Display Style:
Column Style
थौं चीर स्वात
लहनान्यूज | चिल्लाथ्व सप्तमी ११३७ (मार्च ५ २०१७)
येँया बसन्तपुलिइ थौं चीर स्वाःगु लिसें थुगुसीया फागु पर्व औपचारीक रुपं न्ह्याःगु दु ।
थौं सुथसिया ७ः४७ताः ईया साइतय् बसन्तपुलिइ थीथी उंया कापः चिनातःगु चीर थंगु खः । फागुन शुक्ल अष्टमीया दिनय् पंया स्वतजाःया चीर स्वाइगु लिसें फागु पर्व न्ह्याइगु मान्यता दु ।
थुगुसी तिथि कथं अष्टमि मदुगु जूगुलिं थौं सप्तमिकुन्हु चीर स्वाःगु खः । थौं सप्तमिकुन्हु हे अष्टमि क्यनेधुंकूगु ल्याखं थौं हे चीर स्वाःगु खः ।
स्वनिगः लिसें पहाडी जिल्लाय् वइगु चिल्लाथ्व पुन्हि कुन्हु फागु अर्थात होलि न्यायेकीसा तराईया जिल्लाय् चिल्लागा पारुकुन्हु न्यायेकेगु याइ । थुगुसी वइगु मार्च १२ आइतबाःकुन्हु होलि पुन्हि लाःगु दु ।
थौं थंगु चीर छवाः लिपा क्वथलाः तिंख्यलय् वायेयंकेगु याइ ।
धार्मिक मान्यता कथं थः काय् प्रल्हाद नारायणद्यःया भक्त जूगुलिं हिरण्यकश्यपुं मिं मथीगु वरदान दुम्ह थः केहेँ होलिकाया मुलय् प्रल्हादयात तयाः च्याकाब्यूगु खः । तर, उगु मिइ प्रल्हादयात छुं मजुसें होलिका हे नौ जुल ।
थुकथं होलिका च्याःगु दिनय् विजयोत्सवया रुपं अबिर नापं थीथी उनलिसे होलि म्हितेगु न्ह्याःगु खः ।
निगू सफूया छक्वलं विमोचन
लहनान्यूज | चिल्लाथ्व सप्तमी ११३७ (मार्च ५ २०१७)
थौं यलय् जूगु छगू ज्याझ्वःया दथुइ प्रा.डा. सुन्दरकृष्णया निगू सफूया छक्वलं विमोचन जूगु दु ।
नेपालभाषा केन्द्रीय विभागं यलय् ग्वसाः ग्वःगु ज्याझ्वलय् विभागया संस्थापक प्रमुख प्रा.डा. सुन्दरकृष्ण जोशीया बाखं सफू ‘तिकिझ्यालं’ व उकिया हे अंग्रेजी अनुवाद 'Through the Latticed Window' या विमोचन जूगु खः । नेपालभाषा केन्द्रीय विभागया प्रमुख प्रा.डा. चन्द्रमान बज्राचार्यया सभापतित्वय् जूगु ज्याझ्वलय् मूपाहां प्रा.डा. त्रिरत्न मानन्धर व पाहां प्रा माणिकलाल श्रेष्ठं मंकाः कथं सफूया विमोचन यानादीगु खः ।
सफुतिइ दुथ्याःगु बाखंयात कल्पना भर्सेस वास्तविकता धासें बाखंच्वमि जोशीं झीगु तजिलजिइ दुगु रहस्यमय अलौकिक विषयवस्तु कःघानाः थुकिइ वास्तविक पात्रपिं थम्हं थनेहयागु स्पष्ट यानादिल । प्रा.डा. त्रिरत्न मानन्धरं सफूया अनुवादयात च्वछायादिसें हरेक जातिया म्हसीका सीकेगु छगू श्रोत मौखिक इतिहास जुइ धासें थुगु सफूयात मौखिक इतिहासया छगू स्रोतया रुपय् कायेफइगु धयादिल ।
शिक्षक राजनलाल (रास) जोशीं सफूया विषयस न्ववासें थुकिया हरेक बाखं यथार्थय् दुब्वाःगु दुगु धयादिल । सफूया बाखंयात अंगेजी अनुवाद लिसें सम्पादन याःम्ह राजेन्द्र शाक्यं अंग्रेजीइ पिदंगु सफूयात अनुवाद जक मधासे पुनर्लेखन धायेल्वःगु खँ तयादिल ।
सफुतिइ दुथ्याःगु झिंखुपू मध्ये झिपु बाखंया अनुवाद शाक्यं यानादीगु खःसा न्यापुया अनुवाद अरुण श्रेष्ठं व छपुया भुवनलाल प्रधानं यानादीगु खः ।
स्वम्ह प्राध्यापकपिन्त सम्मान नं यात
थुगु हे ज्याझ्वलय् स्वम्ह प्राध्यापकपिनि हनेगु ज्या नं जूगु खः ।
ज्याझ्वलय् विभागय् प्राध्यापन लिपा अवकाश कयाद्यूपिं प्रा. माणिकलाल श्रेष्ठ, प्रा.डा. तुयुबहादुर महर्जन व प्रा.डा. चुन्दा बज्राचार्यपिंत बिदाइ यायेकथं हंगु नं खः । प्रा. माणिकलाल श्रेष्ठयात विभागया नायः डा.चन्द्रमान बज्राचार्य व प्रा.डा. त्रिरत्नमानन्धरं मंकाः रुपं हनादीगु खः ।
बज्राचार्य व मानन्धरं दोसल्लां न्ययेकाः, लुमन्ति चिं व हनापौ लःल्हासें श्रेष्ठयात सम्मान यानादीगु खः । सम्मानित निम्ह व्यक्तित्वपिं तुयुबहादुर महर्जन व चुन्दा बज्राचार्य धाःसा विशेष कारणं ज्याझ्वलय् उपस्थित जुइमफूगु जानकारी ज्याझ्वलय् ब्यूगु खः ।
छुं दिं न्ह्यः जक क्यान्सर ल्वचं कयाः मदुम्ह साहित्यकार, निर्देशक व कलाकार रामशेखर नकःमियात लुमंकुसें छगू मिनेट मौनधारणं न्ह्याःगु ज्याझ्वलय् विभागया शिक्षक ओमकारेश्वर श्रेष्ठं लसकुस यानादिसें सम्मानित व्यक्तित्वपिनि म्हसीका न्ह्यब्वयादीगु खः ।
थःगु नुगः खँ तयेगु झ्वलय् सम्मानित व्यक्तित्व माणिकलाल श्रेष्ठं नेपालभाषा केन्द्रीय विभाग चायेकेत यानागु कुतःया जानकारी ब्युसें आः नं थुगु विभागयात बन्द याकेत स्वइपिं दनिगुलिं थुकियात ल्यंकातयेत सकसिनं फूचाःगु ग्वाहालि यायेमाःगु बिचाः तयादिल ।
विभागया प्रमुख चन्द्रमान बज्राचार्यं त्रिभुवन विश्वविद्यालयपाखें बियातःगु स्वंगू रोपनी जग्गायात व्यवस्थित यायेगु ज्याय् थःपिं न्ह्यचिलाच्वनागु जानकारी बियादिल ।
ज्याझ्वलय् काशीनाथ तमोट, विभागया निवर्तमान प्रमुख तुलसीलाल सिं, विभागया पुलांम्ह प्रमुख प्रेमशान्ति तुलाधर, लुमन्ति दबूया नायः रामेश्वर श्रेष्ठ, सफूया पिकाकः सागरकृष्ण जोशी, सपना जोशीं थःथःगु नुगःखँ तयादीगु ख
देय् दबूया अधिवेशन लिज्याःगु मदुनि
लहनान्यूज | चिल्लाथ्व षष्ठी ११३७ (मार्च ४ २०१७)
नेवाः देय् दबूया खुक्वःगु तःमुँज्याया तिथि आःतक्क नं चैतया ४ व ५ गते हे जुइगु खुक्वःगु अधिवेशन ग्वसाः खलःपाखें न्ह्यथंगु दु ।
केन्द्रिय समितिया मुँज्यां खुक्वःगु अधिवेशन लछि लिछ्यायेगु क्वःछ्यूगु धइगु खँ पिहांवःगु हे इलय् ग्वसाः खलःपाखें धाःसा तःमुँज्याया न्हूगु तिथि क्वःज्यूगु हे मदुगु धाःगु दु । न्हापा क्वःछिनातःगु हे मितिइ तःमुँज्या जुइगु ग्वसाः खलकं न्ह्यथंगु दु ।
केन्द्रिय समितिया मुँज्यां देय् दबूया अधिवेशन लिछ्यायेगु छुं निर्णय नं याःगु मदुनिगु खुक्वःगु अधिवेशन ग्वसाः खलकं न्ह्यथंगु दु । थःपिन्त प्राप्त जूगु केन्द्रिय समितिया मुँज्याया निर्णयया प्रतिइ नं अधिवेशनया तिथिया खँय् न्हूगु तिथि क्वःछिनातःगु मदुगु धाःगु दु ।
तःमुँज्याया तिथि लिज्याइगु खः वा मखु धइगु न्ह्यसलय् ग्वसाः खलकं न्हापाया हे तिथिइ तःमुँज्या यायेगु कथं थःपिन्सं तयारी न्ह्याकाच्वनागु दुगु धाःगु दु । लिसें चैत ४ व ५ गते तःमुँज्या यायेगु कथं न्हापा दयेकूगु ज्याधलः कथं हे थःपिंसं ज्या न्ह्याकाच्वनागु दुगु ग्वसाः खलःया धापू खः ।
तःमुँज्या लिज्याःगु धकाः पिदंगु बुखँत भ्रामक जूगु ग्वसाः खलकं धाःगु दु । केन्द्रिय समितिपाखें हे ग्वसाः खलःयात तःमुँज्या सम्बन्धि सर्वाधिकार बीधुंकूगु अवस्थाय् तःमुँज्याया सम्बन्धि छुं नं खँ च्वयेत ग्वसाः खलःलिसे नं सहलह ब्याकेत खुक्वःगु तःमुँज्या ग्वसाः खलकं संचार माध्यमयात इनाप नं याःगु दु ।
बाद्य गुरु श्रीगोपालयात नागरिक अभिनन्दन
लहनान्युज | चिल्ला थ्व दशमी ११३७ (मार्च ७ २०१७)
थिमिया नांजाःम्ह बाद्यगुरु श्रीगोपाल प्रजापतियात नागरिक अभिनन्दन याःगु दु ।
“श्रीगोपाल प्रजापति नागरिक अभिनन्दन मूल समारोह समिति”पाखें अमूर्ति सम्पदा संरक्षणया क्षेत्रय् ज्वःमदुगु योगदान बियादीगुलिं वयकःयात जनस्तरपाखें अभिनन्दन याःगु खः ।
थिमिया बालकुमारीइ जूगु ज्याझ्वलय् शताब्दी पुरुष डा. सत्यमोहन जोशीं बाद्य गुरु प्रजापतियात खादागां न्ययेकादीगु खः । संस्कृतिविद् जोशीं भौतिक नापं अभौतिक संस्कृतियात अन्तर्राष्ट्रिय स्तरय् प्रचारप्रसार यायेमाःगु खँय् बः बियादीगु खः ।
ज्याझ्वलय् क्षेत्र नंं. २ ख्वपया सांसद रामेश्वर ढुंगेल, मूल समारोह समितिया कजि मदनसुन्दर श्रेष्ठ, प्रमुख जिल्ला अधिकारी, मध्यपुर थिमि नगरपालिकाया कार्यकारी अधिकृतलिसेंया ब्यक्तित्वपिन्सं नुगःखँ प्वंकादीगु खः ।
पुलांम्ह मन्त्री डा. केशवमान शाक्य, पुलांम्ह सभासद् लेखनाथ न्यौपाने, भाषासेवी, शिक्षासेवी थीथी दलया नेतालिसें साहित्यकार, बुद्धिजीविपिनिगु ब्वति दुगु उगु ज्याझ्वलय् अभिनन्दित जुयादीम्ह प्रजापतिया जीवनया पूर्वार्ध्द, उत्तरार्ध्दनिसें व्यावसायिक व साँस्कृतिक अनवरत यात्रा आदि दुथ्याःगु स्मारिका व चित्र दुगु वहःया पायम्वःतकं विमोचन याःगु खः ।
अभिनन्दित जुयादीम्ह बाद्य नापं प्याखं गुरु प्रजापतिं देश विदेशय् नेपाःया मौलिक बाजंनिसं थीथी प्याखंत स्यनादीगु दु ।
प्यंगू स्वास्थ्य विज्ञान प्रतिष्ठानय् उपकुलपति नियुक्त
लहनान्यूज | चिल्लाथ्व चतुर्थी ११३७ (मार्च २ २०१७)
सरकारं स्वास्थ्य मन्त्रालय अन्तर्गतया प्यंगू स्वास्थ्य विज्ञान प्रतिष्ठानय् उपकुलपति नियुक्त याःगु दु ।
स्वास्थ्य बिज्ञान प्रतिष्ठानया कुलपति अले प्रधानमन्त्री पुष्पकमल दाहालं प्वनाच्वंगु मध्ये बिपी कोइराला स्वास्थ्य विज्ञान प्रतिष्ठान, पाटन स्वास्थ्य विज्ञान प्रतिष्ठान, पोखरा स्वास्थ्य विज्ञान प्रतिष्ठान व कर्णाली स्वास्थ्य विज्ञान प्रतिष्ठानय् प्रमुख नियुक्त यानादीगु खः ।
नियुक्त जूपिं उपकुलपतिइ बिपीइ डा. राजकुमार रौनियार, पाटनय् डा. भरत यादव, पोखराय् डा. बुद्धिबहादुर थापा व कर्णाली स्वास्थ्य विज्ञान प्रतिष्ठानय् डा. राजेन्द्र वाग्ले दी । ल्यज्या समितिया सिफारिसया लिधंसाय् उपकुलपतिपिं नियुक्त याःगु खः ।
थ्वयां न्ह्यः सहकुलपति अले स्वास्थ्यमन्त्री गगन थापाया कजिसुइ नीस्वंगु उपकुलपति ल्यज्या समितिं इच्छुक उम्मेदवारयात कार्ययोजनालिसें दरखास्त बीत आह्वान याःगु खः । गुकी पाटनय् १५, कर्णालीइ ५, धरानय् १६ व पोखरा स्वास्थ्य विज्ञान प्रतिष्ठानया लागिं १०म्हेसिनं उपकुलपतिया लागिं दरखास्त ब्यूगु खः ।
