Display Style:
Column Style
वाशिङ्गटन राज्यय् नेवाः संस्कृति न्ह्यब्बल
लहनान्यूज | चिल्लाथ्व दशनि ११३७ (मार्च ७ २०१७)
संयुक्त राज्य अमेरिका वाशिङ्गटन राज्यय् नेपाः सम्बन्धीं महोत्सव 'कल्चर शेयर नेपाल’ ज्याझ्वः जूगु दु ।
सांस्कृतिक बिविधतालिसें प्रचार प्रसार व प्रवर्ध्दन यायेगु आज्जुं वाशिङ्गटन राज्यया शोरलाइन नगरपालिका व युथ फर कल्चर प्रमोशनया मंकाः ग्वसालय् ज्याझ्वः जूगु खः । थुगु ज्याझ्वः अमेरिकाय् नगर स्तरया हे न्हांपागु नं खः ।
शोरलाइन नगरपालिकाया टाउन हलय् जूगु ज्याझ्वलय् मुर्चुङ्गा, सहनाइ, ट्याम्को, धिमय्, धाः, नायखिं, पश्चिमा, दाफाखिं लगायत नेपाःया विभिन्न २५ता जि लोकबाजंया ब्वज्या जूगु खः ।
नेपालया थीथी हस्तकला, कलाकृति व दैनिक उपभोग्य ज्वलं, नेपाल सम्वन्धी सफूया नं ब्वज्या याःगु खः । महोत्सवया न्हांपागु ब्बय् पाहांपिन्त जा, केँ, तरकारी, अचार, छ्वयला, बजि, चतांमारि नकूगु खः ।
निगूगु ब्बया ज्याझ्वलय् शोरलाइन नगरपालिकाया विविधता विभागया प्रमुख सोनी टल्टनें लसकुस यानादिल । अथे हे महोत्सवया कजि लिसें युथ फर कल्चर प्रमोशनया संस्थापक सुभाषराम प्रजापतिं नेपालया इतिहास, भौगोलिक व सांस्कृतिक पक्षबारे जानकारी बियादीगु खः ।
महोत्सवय् नेपाली बाजं अन्तर्गत सामुहिक मादल वादन प्रशिक्षण लिसें ख्वपया घिन्ताङ घिसि प्याखं व नेपाली सामूहिक प्यांख नं न्ह्यब्वःगु खः ।
स्थानीय तगिं थपया निर्णय विरुद्ध रिट
लहनान्यूज | चिल्लाथ्व दशमि ११३७ (मार्च ७ २०१७)
स्थानीय तगिंया ल्याः थकायेगु मन्त्रिपरिषदया निर्णय संविधान विपरीत जूगु धासें उकिया विरुद्ध सर्वोच्च अदालतमा रिट निवेदन दर्ता जूगु दु ।
२५ स्थानीय तगिं थप यासें मन्त्रिपरिषदं स्थानीय तगिंया ७४४ थ्यंकूगु संविधान अःखः जूगु धासें अधिवक्ता चिरञ्जीवी रिजालं रिट निवेदन दर्ता याकूगु खः । मन्त्रिपरिषदया आइतबाःया मुँज्यां स्थानीय तगिंया ल्याः ७४४ दयेकेगु क्वःछ्यूगु खः ।
थ्वयां न्ह्यः स्थानीय तह पुनःसंरचना आयोगं गांपालिका व नगरपालिका यानाः देयन्यंक ७१९ स्थानीय तगिं दइगु क्वःछ्यूगु खः । स्थानीय तगिंया ल्याः वसीमा निर्धारण यायेगु अधिकार आयोगयात जक हे दुगुलिंसरकारी निर्णय संविधान विपरीत जूगु रिटय् धयातःगु दु ।
रिटय् निर्वाचनया मिति घोषणा व आचारसंहिता लागू जुइधुंकूगु अवस्थाय् सरकारं निर्णय याःगु धासें उकियात बदर यायेत माग याःगु दु ।
मधेसया जिल्लाय् सुथंनिसें प्रदर्शन
लहनान्यूज | चिल्लाथ्व दशमि ११३७ (मार्च ७ २०१७)
सप्तरी घटनाया विरोधय् मधेसी मोर्चां आव्हान याःगु बन्दया झ्वलय् मधेसया थीथी जिल्लाय् थौं सुथंनिसें प्रदर्शन जुयाच्वंगु दु ।
म्हिगः सोमबाः प्रहरीं कयेकूगु गोलिं लानाः प्यम्ह प्रदर्शनकारी सीगुया विरोधय् सप्तरी, धनुषा लिसेंया जिल्लाय् प्रदर्शन जुयाच्वंगु खः । स्थितियात भड्के जुइके मबीत धकाः तःधंगु ल्याखय् सुरक्षाकःमि परिचालन याःगु दु ।
मोर्चां मंगलबार व बुधबाः निन्हुया लागिं आह्वान याःगु बन्दया हुनिं मधेसया आपाःथे जिल्लाय् सवारीसाधान ठप्प दु । बजाः पसः लिसें शैक्षिक संस्थात नं बन्द दु ।
एमालें न्ह्याकूगु मेची÷महाकाली अभियानया सभाय् मधेसी मोर्चां विरोध क्यनेगु झ्वलय् सोमबाः सप्तरीइ प्रहरीं कयेकूगु गोलिं लानाः प्यम्ह सीगु खः ।
प्रहरीया गोलिं सप्तरीइ प्यम्ह सित
लहनान्यूज | चिल्लाथ्व नवमि ११३७ (मार्च ६ २०१७)
सप्तरीइ प्रहरी व मधेसी मोर्चाया कार्यकर्ता दथुइ जूगु झडपय् लानाः प्यम्ह सीगु दु ।
प्रमुख विपक्षी नेकपा एमालेया मेची महाकाली अभियान अन्तर्गत राजविराजया औद्योगिक क्षेत्रय् जूगु सभाय् विरोध प्रदर्शन याःपिन्त प्रहरीं पनेत स्वःबलय् झडप जूगु खः । व हे झ्वलय् प्रहरीं गोलिं कयेकूबलय् प्यम्ह सीगु खः ।
सुरक्षाकःमिं कयेकूगु गोलिं लानाः मलेठ–४याम्ह २०दँया संजन मेहता सीगु दु । लिसें मलेठ–४ याम्ह हे पिताम्बर मण्डल, लिमनयाम्ह दिगम्बर झा व प्रसवनीयाम्ह आनन्द प्रसाद शाह सीगु खः ।
मेहतायात एमालेया ज्याझ्वः जूगु थासं १०० मिटरति तापाक गोलिं लानाः घटनास्थलय् हे सीगु खः । मण्डलयात वासः यायेत धरान थ्यनाकथं धैथें मदुगु खः ।
गोलिं लानाः गम्भीर घाइते जूम्ह झायात धरानस्थित वीपी कोइराला स्वास्थ्य विज्ञान प्रतिष्ठान यंकाच्वंबलय् लँय् हे मदुगु खः । साह धाःसा वासः यायेगु झ्वलय् मदुगु खः ।
गोली प्रहारं मेपिं च्याम्हलिसें १२दँयाम्ह मचा सुरेन्द्र साह तकं घाःपाः जूगु दु । प्रहरीया लाठी चार्जं नं छगू दर्जन स्वयां आपाः घाःपाः जूगु दु ।
सद्भावनाया केन्द्रिय दुजः भीमराज यादव, दीपेन्द्र चौधरी, क्षेत्रिय नायः लक्ष्मण यादव, संजय यादव नं लाठी चार्जं घाःपाः जूगु दु । घाःपाः जूपिं आपाःसित धरान व राजविराजय् वासः यानाच्वंगु दु ।
झडपय् लानाः छुं प्रहरीत नं घाःपाः जूगु दु ।
थ्व हे दथुइ, एमालें स्वन्हुया लागिं मेची महाकाली अभियान स्थगित याःगु दु । अथे हे मधेसी मोर्चां आन्दोलन घोषणा यासें सरकारयात बियागु समर्थन लित कायेगु नं क्वःछ्यूगु दु ।
देय् दबूया अधिवेशन गबले जुइगु
लहनान्यूज | चिल्लाथ्व नवमि ११३७ (मार्च ६ २०१७)
नेवाः देय् दबूया केन्द्रिय समितिं देय् दबूया अधिवेशन लिज्याःगु धाःगु दु ।
खुक्वःगु अधिवेशन ग्वसाः खलकं अधिवेशन न्हापा क्वःछिनातःगु हे तिथिइ जुइ धयाच्वंगु हे इलय् देय् दबूया केन्द्रिय समितिं प्रेश विज्ञप्ति जारी यासें तःमुँज्याया माःगु तयारी पूमवंगु हुनि क्यनाः बैसाख ८ व ९ गतेया नितिं लिज्याःगु धाःगु खः ।
दबूया निं मू छ्यान्जे माइलाबाबु द्यःलाया ल्हाःचिं दुगु विज्ञप्तिइ वइगु वैसाख ८ व ९ गते दाङया घोराहिलय् हे जुइगु न्ह्यथनातःगु दु । चिल्लाथ्व सप्तमि आइतबाःकुन्हु च्वंगु देय् दबू केन्द्रिय समितिया मुँज्यां खुक्वःगु अधिवेशन लिछ्यायेगु क्वःछ्यूगु विज्ञप्तिइ धयातःगु दु ।
अधिवेशन ग्वसाः खलकं धाःसा थःपिन्त थुकिया बारे औपचारीक जानकारी वःगु मदुनिगु धाःगु दु । थःपिन्सं चैतया ४ व ५ गते हे अधिवेशन यायेगु कथं ज्या यानाच्वनागु दुगु धाःगु दु ।
थ्व अवस्थाय् देय् दबूया अधिवेशनया तिथिया खँय् आम नेवाःतय् दथुइ अन्यौलता ब्वलंगु दु । आः देय् दबूया अधिवेशन चैतया ४ व ५ गते जुइगु अथवा बैसाखया ८ व ९ गते जुइगु खः धइगु खँ अन्यौल खनेदुगु दु ।
देय् दबूया अधिवेशन लिज्याःगु खँय् वैसाखय् स्थानीय निकायया चुनावया लकसय् देय् दबूया अधिवेशन याये फइ लाकि मखु धइगु चर्चा नं शुरु जूगु दु ।
