Display Style:
Column Style
देय् दबूया अधिवेशन चैतय् हे
लहनान्यूज | चिल्लाथ्व प्रतिपदा ११३७ (फेब्रुअरी २६ २०१७)
नेवाःतयगु राष्ट्रिय संगठन नेवाः देय् दबूया राष्ट्रिय अधिवेशन वइगु चैतया ४ व ५ गते हे जुइगु जूगु दु ।
थौं नेवाः देय् दबूया अधिवेशन ग्वसा खलः समितिपाखें पत्रकार सम्मेलन यानाः देय् दबूया अधिवेशन चैतया ४ व ५ गते जुयां त्वःतीगु धाःगु खः । ग्वसाः खलकं गुगु नं परिस्थितिइ अधिवेशन लिज्याइगु वा स्थगित जुइगु अवस्था मदुगु धाःगु खः ।
विधानया खँय् दुगु कचवंयात थातं तयाः चैतया ४ व ५ गते दाङय् न्हापा आनन्दकुटिइ स्थगित जूगु अधिवेशनयात क्वचायेकेगु ज्या जुइगु ग्वसाः खलः समितिया कजि विजयप्रकाश तण्डुकारं धयादिल । विधान भिंकेगु वा मेगु अज्याःगु छुं नं खँ वःसा उकिया नितिं दाङ अधिवेशनं बरु मेगु मिति क्वःछिनाः अधिवेशनयात ताःलाकां त्वःतेगु तण्डुकारं धयादिल ।
आः जुइत्यंगु अधिवेशन न्हापाया हे अधिवेशनया निरन्तरता जूगुलिं न्हापा दर्ता दुगु संस्थायात नं थाय् बीगु थौंया पत्रकार सम्मेलनय् जानकारी बिल । न्हापा दर्ता जूगु संस्थापाखें छम्ह छम्ह प्रतिनिधिं अधिवेशनय् ब्वति काये दइगु जानकारी ब्यूगु खः ।
न्हूगु संस्थाया हकय् धाःसा न्हूगु हे विधान कथं जिल्ला समितिपाखें प्रतिनिधित्व जुइगु धाःगु दु । पुलांगु संस्था नवीकरण यायेगु नितिं वइगु फागुन २५ गतेतक्कया ई दुगु ग्वसाः खलकं धाःगु दु ।
सशस्त्र प्रहरी महानिरीक्षक श्रेष्ठयात सम्मान
लहनान्यूज | सिल्लागा चतुर्दशि ११३७ (फेब्रुअरी २५ २०१७)
सशस्त्र प्रहरी महानिरीक्षक सिंहबहादुर श्रेष्ठं पेशागत निष्ठा अले संगठनया छवि च्वन्ह्याकेत देय् व जनताया हितय् प्रतिबद्ध जुयाः ज्या यायेगु धयादीगु दु ।
महानिरीक्षक श्रेष्ठया सम्मानय् यलय् ग्वसाः ग्वःगु ज्याझ्वलय् सिंहं थुकथंया प्रतिबद्धता प्वंकादीगु खः । महानगरीय प्रहरी प्रभाग मंगलबजार भवन निर्माण समिति, बौद्ध युवा कमिटी यल, रुस्लान थ्री स्टार क्लब, राष्ट्रिय युवा महासंघ यल, नेवाः पत्रकार राष्ट्रिय दबू यल कचां मंकाः रुपं ज्याझ्वःया ग्वसाः ग्वःगु खः ।
ज्याझ्वलय् निगू दर्जन स्वयां आपाः संघसंस्थां खादां न्ययेकाः श्रेष्ठयात हंगु खः । वयां न्ह्यः श्रेष्ठयात नेवाः परम्पराकथं ख्येँय् सगं नं ब्यूगु खः ।
व झ्वलय् महानिरीक्षक श्रेष्ठं थुगु सम्मानं थःत थप जिम्मेवार दयेकूगु धयादिल । वयकलं सशस्त्र प्रहरी प्रमुखया रुपं सरकारं ब्यूगु भाला पूवंकेगु झ्वलय् छुं नं कथंया लोभय् तमक्यनेगु धयादिल ।
२०४६ सालय् प्रहरी प्रशासन व स्थानीयया स्वापू बांलाः मजूगु अनुभव लुमंकुसे थः मंगलबजार प्रहरी प्रमुखया रुपं वयाः नेपाल भासं खँ ल्हानाबलय् स्थानीयं झी मनू वल धाःगु ईयात नं श्रेष्ठं लुमंकादिल ।
राष्ट्रिय युवा महासंघ नेपाल यल कचाया नायः राजेश बज्रचार्यं सीमा सुरक्षाया झ्वलय् लागू वासः कारोबारयात नियन्त्रण यायेगुलिइ अग्रसरता क्यनेत इनाप यानादिल । बौद्ध युवा कमिटीया निवर्तमान नायः सुनील महर्जनं विविधतां जाःगु राष्ट्रिय एकता, नेपाली पहिचानप्रति सकसिगु अपनत्वं जक सामाजिक सद्भाव, राष्ट्रिय अखण्डता बल्लाइगु धासें सशस्त्र प्रहरीं थुगु मान्यतायात लिनाः न्ह्याःवनीगु विश्वास प्वंकादिल ।
समारोहया सभापति लिसें महानगरीय प्रहरी प्रभाग मंगलबजार भवन निर्माण समितिया नायः अजरमान जोशीं श्रेष्ठ प्रहरी निरीक्षक जुसांनिसें प्रहरी प्रशासनयात समुदायमैत्री, जनमैत्री दयेकेगु ज्या न्ह्याःगु धयादिल ।
नेपालभाषा विद्यार्थीपिनिपाखें रामशेखरयात ग्वाहालि
लहनान्यूज | सिल्लागा चतुर्दशि ११३७ (फेब्रुअरी २५ २०१७)
क्यान्सर ल्वचं कयाच्वंम्ह नांजाःम्ह कलाकार, निर्देशक रामशेखर नकःमियात नेपालभाषा स्नातकोत्तर तगिंया विद्यार्थी पुचः लुमन्ति दबुलिं आर्थिक ग्वाहालि लःल्हाःगु दु ।
नेपालभाषा स्नातकोत्तर तगिमय् ब्वनाच्वंपिं विद्यार्थी लिसें नेपालभाषा केन्द्रीय विभागया शिक्षकपिनिगुपाखें मुंकूगु ३४,५०१ तका थौं नकःमियात नापलानाः लःल्हाःगु खः ।
दबूया पुचः भक्तपुर क्यान्सर अस्पतालय् वनाः नकःमियात उगु ग्वाहालि लःल्हाःगु खः । लुमन्ति दबूया नायः रामेश्वर श्रेष्ठं नकःमियात उगु ग्वाहालि लःल्हानादीगु खः ।
विद्यार्थीलिसें शिक्षकतयगु पुचलं नकःमिया भिंउसाँयया कामना यासें आर्यतारा व महामृत्यूञ्जयया मन्त्र सहितया भिंतुना पौ नं लःल्हाःगु खः । केन्द्रीय विभागया शिक्षक शरद कसाःनं नकःमियात भिंतुनापौ देछाःगु खः ।
विद्यार्थी राजेन्द्र शाक्यं आर्यतारा व महामृत्यूञ्जयया मन्त्र लिसें भिंतुनापौ ब्वनाः न्यंकादीगु खः ।
नकःमियात आःतक स्वकः रेडियोथेरापी बीधुंकूगु वयकःया छेँजलं जानकारी ब्यूगु दु । नकःमिं च्वयादीगु बाखं, उपन्यास लिसें प्याखं नेपालभाषा स्नातकोत्तर तगिमय् ब्वनेमाः ।
पत्रकार महर्जनया लुमंतिइ नेवाः पत्रकारतय् मुना
लहनान्यूज | सिल्लागा चतुर्दशि ११३७ (फेब्रुअरी २५ २०१७)
नेवाः पत्रकार राष्ट्रिय दबूया स्वनिगः लिसें काभ्रे मुना ज्याझ्वः थौ किपुलिइ जूगु दु ।
थौं किपूया नेपालभाषा आकेदमिया हलय् जूगु उगु मुँज्याय् दबूया येँ जिल्लाया दांभरी मदुम्ह सानुकाजि महर्जनप्रति श्रद्धाञ्जली प्वंकेगु ज्या जूगु खः । मदुम्ह महर्जनया किपाय् स्वांमाः क्वखायेकेगु लिसें स्वां देछानाः नेवाः पत्रकारतयसं श्रद्धाञ्जली प्वंकूगु खः ।
ज्याझ्वलय् मदुम्ह पत्रकार महर्जनया योगदानयात कयाः दबू येँ कचाया नायः नातिकाजी महर्जनं नवानादीगु खः ।
पत्रकार दबूया केन्द्रीय नायः श्रीकृष्ण महर्जनया अध्यक्षताय् जूगु मुनाय् स्वनिगःया स्वंगू जिल्लालिसें काभ्रे जिल्ला कचाया दुजःपिं व केन्द्रीय पार्षदपिनिगु ब्वति दुगु खः। मुनाय् केन्द्रया थीथी कवःया आःतकया ज्याखँ व भावी योजनाबारे कवःया प्रमुखपिंन्सं न्वंवानादीगु खः ।
ज्याझ्वलय् वइगु चैत्र ४ गते पत्रकार दबूया बुदिं हनेगु लिसें बैशाख ११ गते तकया दुने जिल्ला व केन्द्रया दँमुँज्या यायेगु खँय् सहलह जूगु खः । लिसें सत्यनारायण बहादुर श्रेष्ठयात नेपाल पत्रकार महासंघया संस्थापक नायःया रुपय् स्थपित यायेगु नितिं माःगु कथंया ज्याझ्वः न्ह्याका वनेगु बारे नं मुनाय् सहलह याःगु खः ।
मिसा दबूया अधिवेशन येँय् जुइगु
लहनान्यूज | सिल्लागा त्रयोदशी ११३७ (फेब्रुअरी २४ २०१७)
नेवाः मिसातयगु राष्ट्रिय संगठन नेवाः मिसा दबूया राष्ट्रिय अधिवेशन वइगु चिल्लाथ्व पारुकुन्हु येँय् जुइगु जूगु दु ।
नेवाः मिसातयत संगठित यासें नेतृत्व विकास यायेगु आज्जुं नेवाः देय् दबूया विषयगत संगठन कथं गठन जूगु मिसा दबूया राष्ट्रिय अधिवेशन वइगु चिल्लाथ्व पारु (चैत १६) या दिनस येँय् यायेत्यंगु खः ।
वंगु कछलाथ्व ६ (कार्तिक २१) कुन्हु दबूया केन्द्रिय तदर्थ समिति गठन याःगु खःसा आः राष्ट्रिय महाधिवेशनपाखें केन्द्रिय पूर्ण कार्यसमिति ल्ययेत्यंगु खः । आःतक्क मेपिं सुयां दावी विरोध खने मदुनिगुलिं वर्तमान तदर्थ समितिया नायः रश्मिला प्रजापतियात हे सर्वसम्मतिं नायः ल्यइगु खनेदुगु दु ।
आः जुइत्यंगु राष्ट्रिय अधिवेशनय् देयया ३० स्वयां आपाः जिल्लां नेवाः मिसातयगु प्रतिनिधित्व दइगु धाःगु दु ।
मिसा दबूया केन्द्रीय समिति गठन जुइधुंकाः आःतक्क १२ जिल्लाय् जिल्ला समिति गठन जुइधुंकूगु दु । मेमेगु जिल्लां देय् दबूया जिल्ला समितिया मिसा प्रतिनिधिपिनिगु ब्वति दइगु नायः रश्मिला प्रजापतिं लहनान्यूजयात जानकारी बियादीगु दु ।
