Display Style:
Column Style
नेपालय् थौंनिसें अन्तर्राष्ट्रिय लगानी सम्मेलन
लहनान्यूज | चिल्लाथ्व चतुर्थी ११३७ (मार्च २ २०१७)
नेपालय् थौंनिसें अन्तर्राष्ट्रिय लगानी सम्मेलन जुइत्यंगु दु ।
नेपालया आर्थिक विकासया मेरुदण्ड नालातःगु ९ ख्यलय् केन्द्रित जुयाः थुगु सम्मेलन यायेत्यंगु खः । वैदेशिक लगानी दुकायेत धासें उद्योग मन्त्रालय व लगानी बोर्डया मंकाः ग्वसालय् सम्मेलन जुइत्यंगु खः ।
सम्मेलनय् २५ देय्या २सःत्या विदेशी अले झण्डै ३सः स्वदेशी लगानीकर्तां ब्वति कायेत्यंगु दु । सम्मेलनय् थीथी ख्यलय् करीब १ खर्ब तकाया लगानी प्रतिबद्धता वइगु मन्त्रालयया अनुमान दु ।
सम्मेलनय् दक्कले आपाः चीनपाखें ८९ कम्पनीया प्रतिनिधिपिनिगु ब्वति दु । अथे हे भारतया २१, श्रीलंकाया २०, मलेसियाया १४, जापानया १३, क्यानाडाया १२, हंगकङया १०, बेलायत, दक्षिण कोरिया व भियतनामया ८, रुसया ७ व अमेरिकाया ६ कम्पनीया प्रतिनिधिपिनिगु ब्वति दइगु जूगु दु ।
सम्मेलनय् ऊर्जा, पूर्वाधार, पर्यटन, सूचना प्रविधि, वित्तीय क्षेत्र, खानी अले खनिज, कृषि अले वनजन्य उत्पादन लिसेंया ख्यःलिसे सम्बन्धित विषयस ज्यापौ न्ह्यब्वइगु ज्याझ्वः दु । नेपालय् निक्वःगु खुसी अन्तर्राष्ट्रिय लगानी सम्मेलन जुइत्यंगु खः ।
धर्मकीर्ति विहारपाखें राजदूत रेयात विदाइ
लहनान्यूज | चिल्लाथ्व दुतिया ११३७ (फेब्रुअरी २८ २०१७)
थःगु कार्यकाल क्वचायेकाः लिहां वनेत्यंम्ह भारतीय राजदूत रणजीत रेयात येँया धर्मकीर्ति विहारपाखें विदाइ ज्याझ्वः याःगु दु ।
उगु विदाइ ज्याझ्वलय् धम्मावती गुरुमां नं राजदूत रेयात हनापौ लःल्हाना बिज्याःगु खःसा विहारया न्वकू द्रव्यमान सिंह तुलाधरं बुद्ध मूर्ति लःल्हानादीगु खः ।
विहारया दुजः मीना तुलाधरं लसकुस यानादीगु उगु ज्याझ्वलय् धम्मवती गुरुमांं नं राजदूत रें धर्मकीर्ति विहारयात यानादीगु ग्वाहालियात कयाः सुभाय् बियाबिज्याःगु खः ।
ज्ञानीमैंया सिरपाः व पूर्णहीरा हनापौ लःल्हात
लहनान्यूज | चिल्लाथ्व दुतिया ११३७ (फेब्रुअरी २८ २०१७)
चसान्दो मानन्धर सनागू खलःया ग्वसालय् न्याक्वःगु ज्ञानीमैंया सिरपाः व निक्वःगु पूर्णहीरा सिरपाः छगू ज्याझ्वःया दथुइ लःल्हाःगु दु ।
येँया जगतसुन्दर ब्वनेकुथिइ जूगु उगु ज्याझ्वलय् मूपाहां साहित्यकार ज्ञानकाजी खिं मानन्धरं डा. त्रिरत्न मानन्धरयात पूर्णहिरा हना सिरपाः व एसएलसी पास जूपिंमध्ये छम्हेसित ज्ञानीमैंया सिरपाः लःल्हानादीगु खः ।
चसान्दो त्वालय् ग्वाहालि यानादीपिं चन्द्रबहादुर मानन्धर, तीर्थबहादुर मानन्धर, संघरत्न मानन्धर व न्हू प्रतिभाकथं नमस्ते साय्मि व विवित मानन्धरयात नं पूर्णहिरा हनापाखें सम्मानित याःगु खः ।
खलःया छ्याञ्जे गजेन्द्र मानन्धरं लसकुस यानादीगु ज्याझ्वलय् जगतसुन्दर ब्वनेकुथिया प्रिन्सिपल माया मानन्धर, पूर्णहिरा हना सिरपाःया दाता कृष्णप्रसाद मानन्धरं नुगःखँ प्वंकादीगु खः ।
मिसा दबूया न्हापांगु तःमुँज्या क्वचाल
लहनान्यूज | चिल्लाथ पारु ११३७ (फेब्रुअरी २७ २०१७)
तदर्थ समितिया नायः रश्मिला प्रजापतियात हे सर्वसम्मतिं नायः ल्यसें नेवाः मिसा दबूया न्हापांगु तःमुँज्या थौं येँय् क्वचाल ।
नेवाः देय् दबूया विषयगत संगठन कथं नीस्वंगु नेवाः मिसा दबूया थौं क्वचाःगु तःमुँज्यां २६ दुजःया कार्यसमितियात सर्वसम्मतिं ल्यःगु खः । न्हूगु ल्यःगु कार्यसमितिइ पूर्वपाखें विमला प्रधान, मध्यपाखें कस्तुरी श्रेष्ठ व पश्चिमपाखें योगिता श्रेष्ठयात न्वकू ल्यःगु दु ।
दुजलय् धाःसा पूर्वपाखें कल्पना श्रेष्ठ, सपना प्रधान, रन्जना अमात्य, इन्द्र श्रेष्ठ, गंगा मास्केयात ल्यःगु दुसा पश्चिमपाखें जगिता बज्राचार्य, गीता मल्ल श्रेष्ठ, रम्बा शाक्य, श्रृजना श्रेष्ठयात ल्यल ।
व हे कथं मध्य लागां मेनुका श्रेष्ठ, विना महर्जन, विनु श्रेष्ठ, रीना श्रेष्ठ, सबिता श्रेष्ठ, सरस्वती वैद्ययात दुजः ल्यल सा स्वनिगःपाखें सुजाता श्रेष्ठ, विद्या श्रेष्ठ, सरीता श्रेष्ठ, शान्ति वैद्य, श्रीमिला सुवालयात ल्यल ।
वयां न्ह्यः तःमुँज्याया उद्घाटन सत्रय् नवाःपिन्सं भुतू ज्याय् जक तक्यनाच्वनीपिं नेवाः मिसातय्गु नं नेतृत्व विकास यायेत मिसा दबुलिं च्वछायेबहःगु पलाः न्ह्याका वनेफयेमा धकाः भिन्तुना देछाःगु खः ।
तत्कालीन तदर्थ समितिया नायः रश्मिला प्रजापतिया नायकय् जूगु ज्याझ्वलय् मू पाहां लोक सेवा आयोगया पूर्व नायः कयःदेबी यमिजुं नेवाः मिसातय्सं थःगु सशक्तिकरण यानावनेमाःगु खँय् बः बियादिल । थःगु भाषा, कला, संस्कृतियात नं निरन्तरता ब्युसें मिसातय्सं आःया विकासयात नं लिनावनेमाःगु यमिया धापू ख ।
ज्याझ्वःया उलेज्या मू पाहां यमिं त्वाःदेवाय् मत च्याकाः यानादीगु खः । ज्याझ्वलय् लसकुस न्वचु तदर्थ समितिया न्वकू कस्तुरी श्रेष्ठं बियादीगु खःसा मू दुजः शान्ति वैद्यं सुभाय् देछानादिल ।
तःमुँज्यां तदर्थ समितिया छ्यान्जे विद्या श्रेष्ठया प्रगती प्रतिवेदन व दांभरिं सरीता श्रेष्ठया आर्थिक प्रतिवेदन नं पारीत याःगु खः ।
ज्याझ्वलय् संस्कृतिविद् चुन्दा बज्राचार्य, सांसद् राज्यलक्ष्मी श्रेष्ठ, नेवाः देय् दबूया खुक्वःगु तःमुँज्या ग्वसाः खलःया कजि विजयप्रकाश तण्डुकार, नेवाः देय् दबूया नायः नरेश ताम्रकारं नेवाः मिसातय्गु नेतृत्व विकास यायेमाःगु खँय् बः बियादीगु खः ।
वरिष्ठ कलाकार, निर्देशक रामशेखर मन्त
लहनान्यूज | चिल्लाथ्व पारु ११३७ (फेब्रुअरी २७ २०१७)
क्यान्सर ल्वचं कयाच्वंम्ह वरिष्ठ कलाकार, निर्देशक लिसें साहित्यकार रामशेखर नकःमि थौं सुथय् मन्त ।
छुं ई न्ह्यःनिसें भक्तपुर क्यान्सर अस्पतालय् वासः याकाच्वनादीम्ह कलाकार नकःमि वासः यायेगु झ्वलय् थौं अस्पतालय् हे मदुगु खः । वयकःयात स्वकःतक्क रेडियोथेरापि नं यायेधुंकूगु खः ।
न्हापा वयकःयात सासः ल्हायेत समस्या जूबलय् येँया मोडल अस्पतालय् इमर्जेन्सीइ हःगु खः । अन वयकःया न्हासय् ला बढे जुइगु ल्वय् नोजेफारेन्सिजयल कार्सिनोमाया अप्रेशन याःगु खः ।
लिपा वयकःया न्हायया लाया बायोप्सि टेष्ट याःबलय् रिपोर्ट पोजिटिभ वयेवं भक्तपुर क्यान्सर अस्पताल रिफर याःगु खः ।
वयकः दम, प्रोष्टेड व चिनि ल्वचं नं कयाच्वंम्ह खः । दम, चिनि ल्वयया वासः याकुयाकुं वयकःयात क्यान्सर ल्वचं नं कःगु खः ।
वयकःया जन्म बिक्रम सम्बत १९९४ ज्येष्ठ कृष्ण षष्ठीकुन्हु मां मोहनमाया व अबु शेरबहादुर नकःमिया कोखं जूगु खः । ८१दँ दुम्ह कलाकार नकःमिया प्यम्ह काय् लिसें प्यम्ह म्ह्याय् दी ।
वयकःयात बि.सं. २०७० श्रावण १२ कुन्हु नागरीक स्तरं झी कलाकार रामशेखर हना ज्याझ्वः समितिपाखें तःजिगु सम्मान नं याःगु खः ।
वयकलं नसंफाःगु चा उपन्यासया लिसें आपालं बाखंत नं च्वयादीगु दु । नेपाल टेलिभिजनं प्रसारण जूगु नेपालभाषाया टेलिप्याखं १२ बजे लिसें न्हिसुतु, झ्वकमनीम्ह थुज्वःगु प्याखंत नं वयकलं दयेकादीगु दुसा पःखाः प्याखंया निर्देशन नं यानादीगु दु ।
