Display Style:
Column Style
जगतसुन्दर ब्बनेकुथिया नीन्हयक्वःगु बुदिं हन
नृपेन्द्रलाल श्रेष्ठ | सिल्लागा द्वादशि ११३७ (फेब्रुअरी २३ २०१७)
जगतसुन्दर ब्बनेकुथिया नीन्हयक्वःगु बुदिं ब्वनेकुथिइ हे छगू सांस्कृतिक ज्याझ्वः यासें हंगु दु ।
ज्याझ्वलय् ब्बनेकुथिया विद्यार्थीपिन्सं थीथी कथंया हुलाप्याखं लिसेंया सांस्कृतिक ज्याझ्वःत न्ह्यब्बःगु खः ।
नुगः खँ तयेगु झ्वलय् संचालक समितिया नायः लक्ष्मीदास मानन्धरं मातृभाषाया माध्यमं नं शिक्षा बीगु तातुनाः न्ह्याःगु जगतसुन्दर ब्वनेकुथिं स्तरीय शिक्षा बिया वयाच्वंगु धयादिल । वयकलं आःतक्क ब्वनेकुथिं सत प्रतिशत विद्यार्थी एस. एल. सी. इ ताःलाना वयाच्वंगु जानकारी बियादिल ।
उगु हे ज्याझ्वलय् ब्बनेकुथियात थीथी कथं ग्वाहालि याःपिन्त सुभाय पौ नं लःल्हाःगु खः । ब्वनेकुथि संचालक समितिया नायः मानन्धरलिसें दांभरिं चुन्दा बज्राचार्य, दुजः अनाररत्न बज्राचार्यं ग्वाहालिमिपिन्त सुभाय् लःल्हानादीगु खः ।
ब्बनेकुथिया संचालक समितिया नायः मानन्धरं त्वाःदेवाय् मत च्याकाः ज्याझ्वःया उलेज्या यानादिल । ब्वनेकुथिया प्रिन्सिपल माया मानन्धरं लसकुस न्वचु बियादीगु खः ।
गैरन्यायिक सडक विस्तार विरुद्ध धर्ना
लहनान्यूज | सिल्लागा द्वादशि ११३७ (फेब्रुअरी २३ २०१७)
काठमाडौं उपत्यका सडक विस्तार पिडित संघर्ष समितिं स्वनिगलय् थीथी थासय् जुयाच्वंगु सडक विस्तारया विरोधय् थौं येँया माइतीघरय् शान्तिपूर्ण धर्ना ज्याझ्वः याःगु दु ।
स्वनिगःया थीथी थासय् सडक विस्तार यायेगु नामय् स्थानीय जनताया पुर्ख्यौली सम्पत्ति अले पुरातात्विक सम्पदाय् तकं लालाःथे बुलडोजर न्ह्यकाः राज्यं आतंक न्यंकूगु धासें सडक विस्तारं पिडित स्थानीय वासिन्दापिन्सं विरोध ब्वज्या याःगु खः ।
ब्वज्याया ब्वतिमिपिन्सं संविधानं ब्यूगु जनताया आवासया हक व सम्पत्तिया हक कायम यायेमाःगु, सर्वोच्च अदालतया आदेश पालना यायेमाःगु, विना मुआब्जा जनताया सम्पत्ति अधिग्रहण याये मदइगु लिसेंया नारा च्वयाः छातिइ तिकाः धर्नाय् च्वंगु खः ।
ज्याझ्वलय् आदिवासी जनजाती महसंघया नायः जगत बराम, हेटौंडा सडक विस्तार पीडित संघया नायः रमेश वज्राचार्य, उपत्यका सडक पीडित संघर्ष समितिया न्वकू शान्त प्रकाश श्रेष्ठ, अभिवक्ता जितेन्द्र वज्राचार्य लिसें नं सरकारपाखें न्ह्यानाच्वंगु गैर न्यायिक सडक विस्तार दिकेमाःगु धयादीगु खः । लिसें ज्याझ्वःया वक्तापिन्सं जनताया विरोधय् कुहांवःपिं पार्टीया नाइकेपिन्त आः येँया जनतां त्वःतीमखूगु चेतावनी नं ब्यूगु खः ।
धर्नाय् बालाजु, कालिमाटी, थक्वाः, थसि, कलंकी आदि क्षेत्रया पीडितपिं थ्यंगु खः । पीडितपिन्सं माइतीघर बबरमहलय् नारा व जुलुस तकं याःगु खः ।
लागू वासः दुर्व्यसनी विरुद्ध र्याली
लहनान्यूज | सिल्लागा द्वादशी ११३७ (फेब्रअरी २३ २०१७)
प्रहरी जिगु पासा अभियानया मर्म प्रत्येक नागरिकयात थुइकेत धासें महानगरीय प्रहरी प्रभाग मंगलबजारं लागू औषध दुर्व्यसनी विरुद्ध बृहत साईकल र्यालीया ग्वसाः ग्वःगु दु ।
प्रहरी व समुदायया समन्वय, अपराधमुक्त समाजया उदय धइगु नारा लिसें राष्ट्रिय युवा महासंघ नेपाल यल कचाया संयोजनय् प्रभागं र्यालीया ग्वसाः ग्वःगु खः । छगू समारोहया दथुइ महानगरीय प्रहरी परिसर यलया निमित्त प्रमुख लिसें प्रहरी उपरीक्षक अशोक सिंहं र्यालीया उलेज्या यानादिल ।
मंगलबजारं न्ह्यानाः हःखा, नुगः, धालाछेँ, हकत्वाः, लुँखुसि, ओकुबहाल, इखालखु,, अग्नीशाला, पूर्णचण्डी, मानभवन, जावलाख्यलं पूच्व जुयाः नःत्वाः, छायबहाः, यलध्वाखा, झटापोल क्वन्ति, गाःहितिं च्यासलय् थ्यंकाः र्याली क्वचाःगु खः ।
समापन समारोहस परिसरया निमित्त प्रमुख सिंहं लागू वासः दुर्व्यसन अपराधया छगू महत्वपूर्ण श्रोत खःगु धासें थुकियात हांनिसें लिनाछ्वयेत प्रहरीया अभियानय् जनताया साथ ग्वाहालि महत्वपूर्ण जुइगु धयादिल ।
र्यालीया समापन धुंकाः च्यासलय् लागू वासः दुर्व्यसनी विषयस अभिमुखीकरण ज्याझ्वः नं जूगु खः । उगु ज्याझ्वलय् महानगरीय प्रहरी प्रभाग मंगलबजारया प्रमुख लिसें प्रहरी निरीक्षक प्रकाश थापां लागू वासः दुव्र्यसनीइ तक्यनाच्वंपिन्त माःकथंया वासः यायेगु, दुर्व्यसनीं तापाकेगु, लागू वासः मीपिन्त कडा स्वयां कडा कारवाही याये गु ज्या प्रहरी लिसेलिसें समुदायया नं जिम्मेवारी खः धकाः थुइकेमाःगु धयादिल ।
निवाः न्ह्यः प्रभागया सक्रियताय् लागू वासःया कारोबार याइपिं १२म्हेसित ज्वंगु खः । थुगु घटनां लागू वासःया दुव्र्यसनी व कारोबारया समस्याया विकराल अवस्थायात थुइकेत ग्वाहालि ब्यूगु सन्र्दभय् लागू वासः दुव्र्यसनी विरुद्धया अभियानया आवश्यकता सकसिनं महसुश याःगु नं प्रहरी निरीक्षक थापाया धापू खः ।
थौं अन्तर्राष्ट्रिय मातृभाषा दिवस
लहनान्यूज | सिल्लागा दशमि ११३७ (फेब्रुअरी २१ २०१७)
थौं फेब्रुअरी २१, हलिंन्यंक अन्तर्राष्ट्रिय मातृभाषा दिवस हनाच्वंगु दु ।
सन् १९५२स मांभाय् ल्हाये दयेमाः धकाः माग याःपिं विद्यार्थीतयत स्यानाब्यूगु दिंया लुमन्तिइ थुगु दिवस हनेगु याःगु खः । उगु इलय् बंगलादेशयात पूर्वी पाकिस्तान धाइगु खः ।
सन् १९९९ नोभेम्बर १७स युनेस्कों नं थुगु दिंयात विशेष दिंया रुपं स्वकार याःगु खः । सन् २०००य् संयुक्त राष्ट्रसंघं नं फेब्रुअरी २१ यात मातृभाषा दिवसया रुपं आव्हान यायेधुंकाः थुगु दिवस हनेगु याःगु खः ।
नेपालय् नं थीथी ज्याझ्वः यानाः थुगु दिवस हनाच्वंगु दु । दिवशया लसताय् नेपाल प्रज्ञा प्रतिष्ठान, नेपाल आदिवासी जनजाति उत्थान राष्ट्रिय प्रतिष्ठान, युनेस्को लिसें थीथी सरकारी अले गैर सरकारी संस्थां थौं थीथी ज्याझ्वः यायेत्यंगु दु ।
२०६८ सालया जनगणना कथं नेपालय् थीथी जातीय पुचःया १२३ भाय् मांभायया रुपं न्वःवायेगु यानाच्वंगु दु ।
पत्रकार सानुकाजीया अन्त्येष्टि क्वचाल
लहनान्यूज | सिल्लागा अष्टमि ११३७ (फेब्रुअरी १९ २०१७)
थौं सुथय् आकाझाकां मदुम्ह पत्रकार सानुकाजी महर्जनया अन्त्येष्टि येँया लुतिइ जूगु दु ।
मदुम्ह महर्जनयात वयकःया माइलाम्ह दाजु लक्ष्मीनारायण महर्जनं मि तयादीगु खः । महर्जनयात बिचाः हायेकेत लुतिइ तःधंगु हे ल्याखय् नेवाः पत्रकारत लिसें नेवाः न्ह्यलुवा, कार्यकर्तापिं थ्यंगु खः ।
अन्त्येष्टि स्वयां न्ह्यः, नेवाः पत्रकार राष्ट्रिय दबू केन्द्रिय नायः श्रीकृष्ण महर्जन व दबू, येँ जिल्लाया नायः नातीकाजि महर्जनं मदुम्ह महर्जनया सीम्हय् पत्रकार दबूया झण्डां फायेकाद्यूगु खः ।
मदुम्ह महर्जन पत्रकार दबू येँ जिल्लाया दांभरिं तकं खःसा वयकलं नेपालभाषाया न्हिपौ झीगु स्वनिगःया नितिं ज्या याना वयाच्वनादीगु खः । मदुम्ह महर्जनया छुं दिं न्ह्यःनिसें सुगर व ब्लड प्रेसर कुहां वयाच्वंगु खःसा झारा नं जुयाच्वंगु दुगु खः ।
मदुम्ह महर्जनया परीवारय् अबुलिसें निम्ह दाजु, न्याम्ह ततापिं लिसें जहान व म्ह्याय् छम्ह दु ।
थुगु बुखँ नं ब्वनादिसँ : पत्रकार सानुकाजी महर्जन मन्त
