Display Style:
Column Style
सिकागोय् नं न्हूदँ ११३७ तःजिक हन
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
नेवाः अमेरीकन दबू सिकागों न्हूदँ नेपाल सम्वत ११३७ तःजिक हंगु दु ।
गनेद्यः व शंखधरयात पुज्यानाः न्ह्याःगु ज्याझ्वलय् पाहांपिन्त दबूया दुजःपिं गंगामाया प्रधान व ज्ञानेश्वरी श्रेष्ठं सिन्ह तिकेगुलिसें सगं बियाः लसकुस याःगु खः । ज्याझ्वलय् अमेरीकान, नेपाली लिसें नेवाः राष्ट्रिय म्ये नं हायेकूगु खः ।
ज्याझ्वःया उलेज्या सिकागोया जिथिम्ह नागरीक सरस्वती महर्जनं त्वाःदेवाय् मत च्याकाः यानाद्यूगु खः । मिसातयगु पुचलं लसकुस म्येलिसें नं ज्याझ्वलय् लसकुस याःगु खः ।
नेवाः अमेरीकन दबूया नायः श्रवण श्रेष्ठं लसकुस न्वचुलिसें दबूया गतिविधिया जानकारी व सिकागोय् नेवाः तजिलजिया संरक्षणय् दबूया योगदानया विषयस कनादिल । ज्याझ्वलय् मूपाहां प्रेसिड्न्ट्ज आडभाइजरी कमिसन अन एशियन अमेरीकन एन्ड प्यासिफिक आइलायन्डर्सया कमिसनर संजिता प्रधानं दबूया दँपौ सिकागो नेवाःया उलेज्या यानादिल ।
ज्याझ्वलय् दबूया नायः श्रेष्ठं मू पाहां प्रधानलिसें दँपौया सम्पादक लिसें दबूया पुलांम्ह नायः केशरमान ताम्राकारयात सुभाय् पौ व मतिनाया चिं लःल्हानादिल । दांभरिं उदय महर्जनं ताम्राकारयात दोसल्लां न्ययेकाः हनादीगु खः ।
दबूया छ्यान्जे बिबेक श्रेष्ठं सुभाय् न्वचु तयादिल । ज्याझ्वःया अन्तय् सिकागोय् दुपिं कलाकारतयगुपाखें सांगितिक ज्याझ्वः नं न्ह्यब्वःगु खः ।
ज्याझ्वलय् सिकागोलायन्ड मैत्री समाजया नायः टेकराज पौडेल, गैर आवसीय नेपाली संगठन, इलिनियस च्याप्टरया नायः सुमन वस्ती, नेपाली अमेरीकन समाजया नायः श्याम श्रेष्ठ, सिकागो थारु समाजया नायः सुरेन्द्र चौधरी, सिकागो नेपाली लायन्स क्लबया न्वकू अनिल रिमालया नं उपस्थिती दुगु खः ।
समाजसेवी निर्मलरत्न तुलाधर मन्त
लहनान्यूज सम्वाददाता | कछलागा त्रयोदशि ११३७ (नोभम्बर २७ २०१६)
समाजसेवी, भाषासेवीलिसें लहना वाःपौया ग्वाहालिमि भाजु निर्मलरत्न तुलाधर मन्त ।
ब्लड क्यान्सर ल्वचं कयाच्वंम्ह भाजु तुलाधर थौं सुथय् बालाजुइ थःगु हे छेँय् आकाझाकां मदुगु खः । मदुम्ह तुलाधर लछि न्ह्यःनिसें ब्लड क्यान्सरया वासः याकाच्वनादीगु खःसा वयकः भारतया न्हू दिल्लीया मेदान्त अस्पतालय् नं उपचारया नितिं झाःगु खः ।
वयकःया अन्त्येष्टि थौं हे क्वचाःगु दु । मदुम्हेसित तःधिकःम्ह म्ह्याय् न्यूली तुलाधरं मि तयादिल ।
मदुम्ह तुलाधरया परिवारय् जहान व स्वम्ह म्ह्यायपिं दी ।
मदुम्ह तुलाधर बिनायक बस्ति टोल सुधार गुथि बालाजुया संस्थापक सचिव, सिन्धुली सिद्धबाबा मन्दिर जिर्णोद्धारया संस्थापक नायः, लायन्स क्लब अफ रिङरोडया संस्थापक नायः, न्यागःमणि जिर्णोद्धार कमितिया संस्थापक नायः, चःमति जग्गा एकिकरण आयोजनाया कजि, उदाय् समाजया ग्वसालय् सछिगः धाः बाजं (गुंला बाजं) ब्वज्याया कजि जुयाः सामाजिक ज्याय् सक्रिय जुयादीगु दुगु खः । लिसें वयकः छम्ह रेकि हिलर नं खः ।
बिनायक क्यान्डल हाउसया नामं मैनमतया ब्यवसाय नं याना वयाच्वनादीम्ह वयकलं थःगु मैनमत उद्योगपाखें गुलिखे नेवाः ज्याझ्वःया दबू छायेपीत ग्वाहालि यानादीगु दुगु खः ।
परिषदय् हाकनं तुलाधरया हे नेतृत्व
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
लोक साहित्य परिषदया न्हूम्ह नायः कथं हाकनं नं प्रेमशान्ति तुलाधरयात हे ल्यःगु दु ।
थौं यलय् क्वचाःगु परिषदया प्यक्वःगु दँमुँज्यां तुलाधरयात नायः ल्यलसा न्वकुलिइ दिलीप जोशी व तुलसीलाल सिंहयात ल्यल । अथे हे, छ्यान्जेय् राजितबहादुर श्रेष्ठयात ल्यल ।
ल्यू छ्यान्जेय् भरत महर्जनयात ल्यःगु तःमुँज्यां दांभरिं पदय् वासुदेव श्रेष्ठयात ल्यल । दुजलय् लक्ष्मीशोभा शाक्य, काजिमान डंगोल, निर्मला श्रेष्ठ व धर्मकृष्ण श्रेष्ठयात ल्यःगु खः ।
मदनसेन बज्राचार्यया कजिसुइ ल्यज्या कमिटि नीस्वनाः परिषदया ज्यासना पुचःया न्हूधाः याःगु खः ।
व स्वयां न्ह्यः परिषदया नायः प्रेमशान्ति तुलाधरया नायकय् जूगु तःमुँज्या उलेज्या सत्रय् परिषदया वार्षिक प्रगति प्रतिवेदन छ्यान्जे राजितबहादुर श्रेष्ठं न्ह्यब्वयादिल । आर्थिक प्रतिवेदन दांभरिं वासुदेव श्रेष्ठं न्ह्यब्वयादिल ।
लक्ष्मीनारायण पुनमाया सिरपाः लःल्हात
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
ने.सं. ११३६य् एस.एल.सी. परीक्षाय् नेपालभाषा विषय कयाः दक्कले आपाः ल्याः हयाः परीक्षा ताःलाःपिं विद्यार्थीपिन्त लक्ष्मीनारायण पुनमाया सिरपाः लःल्हाःगु दु ।
सिरपाःया नायः डा.चुन्दा बज्राचार्यया सभानायकय् जूगु ज्याझ्वलय् ज्याझ्वःया मू पाहां न्हूदँ राष्ट्रिय समारोह समिति ११३७ या नायः सांसद् भीमसेनदास प्रधानं विद्यार्थीपिन्त सिरपाः लःल्हानादिल । सिरपाःया दाता लक्ष्मीदास मानन्धरं तका सिरपाः लःल्हानादिल ।
एस.एल.सी. परीक्षाय् नेपालभाषा विषय कयाः दक्कले आपाः ल्याः हःपिं विद्यार्थी थिमिया आदर्श उच्च मा.वि.या अनिता प्रजापति, कन्या मन्दिर मा.वि., येँया रविना खड्गी व जगतसुन्दर ब्वनेकुथि मा.वि.या सुनिता गमालयात सिरपाः लःल्हाःगु खः ।
विद्यार्थीपिन्त दसिपौ, तक्मालिसें म्हतिं १०द्वः तका सिरपाः नं लःल्हाःगु खः । नेपालभाषा विषय कयाः ताःलाःपिं मेपिं विद्यार्थीपिन्त दसिपौ, तक्मालिसें द्वःछि तका लःल्हाःगु खः ।
मू पाहां प्रधानलिसें जनकवि दुर्गालाल श्रेष्ठ, हितकरविर सिं कंसाकारं राज्यपाखें हे मातृभाषा शिक्षाया विषययात न्ह्यःने यंकेमाःगु खँय् बः बियादिल । ज्याझ्वलय् जनगायक भृगुराम श्रेष्ठ, पूर्वमन्त्री तीर्थराम डंगोल, पूर्वमन्त्री दिलीप महर्जन, प्रा.डा. त्रिरतन मानन्धरया नं उपस्थिती दुगु खः ।
थुगु सिरपाः समाजसेवी लिसें व्यवसायी लक्ष्मीदास मानन्धरं थः मां अबुया नामं नीस्वनादीगु खः ।
मंकाः समाजं डा.श्रेष्ठयात हन
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
मंकाः समाज खुसिबुं नेवाः न्ह्यलुवा डा. महेशमान श्रेष्ठयात हंगु दु ।
समाजं येँय् छगू गुँभ्वयया ग्वसाः ग्वयाः डा. श्रेष्ठलिसें दक्कले न्हापांगु आदिवासी जनजाति संकिपा सिलुया नायः जय श्रेष्ठ, समाजेसवी मचाराजा महर्जनयात नं हंगु खः । संघीय समाजवादि फोरम नेपालया ल्यू नायः राजेन्द्र श्रेष्ठं सम्मानित व्यक्तित्वपिंलिसें समाजया १२म्ह मस्तयत नं सम्मान लःल्हानादिल ।
समाजया नायः भाइराजा महर्जनया सभानायकय् क्वचाःगु ज्याझ्वलय् संस्थापक नायः महेन्द्रविलाश जोशी, संकिपा निर्देशक पवन जोशी, येँ महानगरपालिका १७ वडाया सचिव राजेश श्रेष्ठया नं उपस्थिती दुगु खः ।
