Display Style:
Column Style
पत्रकार दबू मिसा विभागया न्हापांगु मुँज्या
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नेवाः पत्रकार राष्ट्रिय दबू, केन्द्रीय ज्यासना पुचःया मिसा विभागया न्हापांगु मुँज्या च्वंगु दु ।
मुँज्यां दुजलय् यलपाखें पूर्णिका शाक्य, येँय् नं रेणुका श्रेष्ठ, ख्वपं रमिता त्वायनाबासु व रीता दुवालयात मनोनित याःगु दु ।
अथेहे मिसा विभागया सल्लाहकारय् राष्ट्रिय समाचार समितिया महाप्रबन्धक निर्मला तुलाधर, प्रेस काउन्सिल नेपालया दुजः शुभेच्छा बिन्दु तुलाधर, नेपाल आदिवासी जनजाति महिला महासंघया सिर्जना प्रधान, नेपाल आदिवासी जनाजाति पत्रकार महासंघया सल्लाहकार रमिता लामायात मनोनित याःगु दु ।
व हे कथं गोरखापत्र न्हिपौया सम्पादक पुष्करभक्त माथेमा व नेपालभाषा टाइम्स न्हिपौया सम्पादक सुरेशकिरण मानन्धरयात नं सल्लाहकारय् ल्यःगु दु ।
‘पांगाया विष्णुदेवी बालकुमारी जात्रा’ विमोचन
लहनान्यूज सम्वाददाता | थिंलाथ्व चतुर्थी ११३७ (डिसेम्बर ३ २०१६)
नांजाःम्ह म्येहालामि दीपा महर्जनं च्वयादीगु अनुसन्धामूलक ‘पांगाया विष्णुदेवी बालकुमारी जात्रा’ सफू थौं विमोचन जूगु दु ।
थौं ज्यापु महागुथि किपू नगर समितिया ग्वसालय् किपुलिइ जूगु छगू ज्याझ्वलय् सफूया विमोचन जूगु खः । नेपालभाषा केन्द्रिय विभागया प्रमूख प्रा.डा.चन्द्रमान बज्राचार्ययालिसें पांगा दिख्यःया बाजं गुरु गोविन्द महर्जन, ज्यापु महागुथि किपू नगर समितिया नायः नजरराम महर्जन व ज्यापु महागुथिया केन्द्रिय नायः राजभाई जकःमिं मंकाः कथं सफू विमोचन यानादीगु खः ।
ज्याझ्वलय् ज्यापु महागुथि, किपू नगर समितिया आजीवन दुजःपिन्त दसिपौ नं लःल्हाःगु खः ।
ज्याझ्वलय् न्हूदँ ने.सं.११३७ व येँया पश्चिम लागाया न्हयगां जात्राया झ्वलय् हनीगु न्हयगां जात्राया नं भिंतुना कालबिल याःगु खः ।
ज्याझ्वलय् साहित्यकारलिसें थीथी ख्यःया ब्यक्तित्वपिनिगु नं उपस्थिति दुगु खः ।
डट्स क्लिनिकया विरामीतलिसे अन्तरक्रिया
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
नेपाल क्षयरोग निवारण संस्था ख्वपं ख्वपया डट्स क्लिनिकय् वासः नयाच्वंपिं गंल्वगि विरामी, डट्स क्लिनिकया इन्चार्ज व स्वयंसेविकातय् दथुइ “गंल्वय् नियन्त्रणय् समुदायया भूमिका विषयक अन्तरक्रिया ज्याझ्वः क्वचाःगु दु ।
संस्थाया सभापति राम सिख्वःया सभाअध्यक्षताय् जूगु अन्तरक्रिया ज्याझ्वलय् संस्थाया निवर्तमान सभापति बाबुकाजी श्रेष्ठं ख्वपय् गंल्वय् नियन्त्रण यायेत संस्थां याःगु कुतः व संस्थाया ज्याखँयाबारे जानकारी बियादिल ।
नुगः खँ तयेगु झ्वलय् जिल्ला जनस्वास्थ्य ज्याकू ख्वपया क्षयकुष्ट अधिकृत तारा शर्मां गंल्वयया विरामीत आः नं ल्वय् सुचुकाः च्वनेगु अवस्थाय् च्यूताः प्वंकुसें जनचेतना थनेत सकलें जायेमाःगुलिइ बः बियादिल । संस्थाया दुजः बालकृष्ण श्रेष्ठ, ल्यू छ्यान्जे लक्ष्मण सुजखु, पूर्व सभासद् सत्यलाल मुललिसेंया वक्तापिन्सं स्वास्थ्यकःमि व गंल्वय् विरामीया स्वापू बांलायेमाःगु धासें विरामी नं सचेत जुइमाःगु धयादिल ।
संस्था, गंल्वय् विरामी व ड्टस क्लिनिकया इन्चार्जतलिसे अन्तरक्रियात्मक रुपं याःगु ज्याझ्वलय् ब्वतिमि विरामीयसं निलातक्क वासः नयेधुंकाः जक ल्वय् मेपिन्त मपुनीगु जूगुलिं निलातक्क गंल्वयया वासः याइगु अस्पतालया माग याःगु खः ।
६३क्वःगु गंल्वय् नियन्त्रण दिवसया ई लाकाः ज्याझ्वःया ग्वसाः ग्वःगु खः ।
प्रेस काउन्सिलपाखें चिनियाँ प्रतिनिधि मण्डलयात लसकुस
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
प्रेस काउन्सिल नेपालं छगू ज्याझ्वः यासें चिनियाँ प्रतिनिधि मण्डलयात लसकुस लिसें अन्तरक्रिया याःगु दु ।
ज्याझ्वलय् प्रेस काउन्सिलया नायः बोर्ण बहादुर कार्कीं प्रतिनिधि मण्डलयात दोसल्ला न्ययेकाः लसकुस यानादिल ।
लसकुसया झ्वलय् कार्कीं शान्ति व विकासया नितिं नेपाःया संचार ख्यलं म्हितूगु भूमिका महत्वपूर्ण जूगु खँ न्ह्यथनादिल । कार्कीं चिनिया व नेपाःया संचार ख्यः दथुइ सहकार्ययात अझ प्रभावकारी दयेकेफःसा निगुलिं देशया नितिं उपलब्धीमूलक जुइगु खँ न्ह्यथनादिल ।
प्रधानमन्त्रीया प्रेस सल्लाहकार गोविन्द आचार्यं न्ह्याकादीगु ज्याझ्वलय् नेपाल–चाइना मिडिया फोरमया नायः किशोर श्रेष्ठ, चिनियाँ प्रतिनिधि मण्डलपाखें लु योङ्ग मिङ्गं नेपाः व चिनियाँ जनता दथुइ दयाच्वंगु बांलाःगु स्वापूयात कयाः चर्चा यानादीगु खः ।
पत्रकार दबू यें त्यःछिंत्यः ज्याझ्वः याइगु
लहनान्यूज सम्वाददाता | थिंलाथ्व द्वितिया ११३७ (डिसेम्बर १ २०१६)
नेवाः पत्रकार राष्ट्रिय दबू, येँ जिल्ला कचां यःमरि पुन्हिया दिनस त्यःछिंत्यः फ्वनेगु ज्याझ्वः याइगु जूगु दु ।
दबू, येँ जिल्लाया थौं च्वंगु मुँज्यां नेवाः पत्रकारतलिसें नांजाःपिं नेवाः कलाकारत मुनाः येँया थीथी लागा चाःहिलाः त्यःछिंत्यः फ्वंवनेगु क्वःछ्यूगु खः । तना वनाच्वंगु नेवाः तजिलजियात थौंया ल्यायम्ह पुस्तायात सीकेबीगु नितिं थुगु ज्याझ्वः यायेत्यनागु दबू येँ जिल्लां न्ह्यथंगु दु ।
ज्याझ्वः तःजिक व व्यवस्थित रुपं न्ह्याकेत दबू, येँया न्वकू बिराजकाजी राजोपाध्याययात कजिया भाला ब्यूगु दु ।
दबुलिं पुन्हिया दिनय् येँया दुनेया बस्तीइ त्यःछिंत्यः ज्याझ्वः यायेत्यंगु दुसा कन्हय् कुन्हु पिनेया नेवाः बस्तीइ नं त्यःछिंत्यः ज्याझ्वः यायेगु न्ह्यथंगु दु ।
लिसें थौंया हे मुँज्यां वइगु पुष १५ गतेया दिनय् फुटसल ज्याझ्वः यायेगु नं क्वःछ्यूगु दु । फुटसल ज्याझ्वःया नितिं दबू, येँया छ्यान्जे प्रजित शाक्ययात कजि ल्यःगु दु ।
फुटसलय् नं नेवाः पत्रकार, कलाकार, थीथी ख्यलय् नांदंपिं नेवाः व्यक्तित्वलिसें नेवाः न्ह्यलुवातयत तकं कासा म्हितकेगु ग्वसाः दुगु फुटसल कजि लिसें दबू, येँ छ्यान्जे शाक्यं लहनान्यूजयात कनाद्यूगु दु ।
