Display Style:
Column Style
नेपालभाषा क्लबं विद्यार्थीपिन्त हन
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
राष्ट्र भाषा विकास यायेत माध्यमिक तगिमय् आः लागु जुयाच्वंगु पाठ्यक्रमयात परिमार्जन यायेमाःगुलिइ सरोकारवाला पक्षं बः ब्यूगु दु ।
नेपालभाषा बचाउ अभियानय् जानाच्वंगु नेपालभाषा क्लबं ग्वसाः ग्वःगु नेपालभाषा विषय कयाः एस.एल.सी. परीक्षा ताःलाकूपिं विद्यार्थीपिन्त हनेगु ज्याझ्वःया वक्तापिन्सं राष्ट्र भाषा संकटय् लाःगु धासें पाठ्यक्रमयात भिंकाः भाषा संरक्षण यायेमाःगुलिइ बः ब्यूगु खः ।
ज्याझ्वलय् नेपालभाषा, मैथिलि, तामाङ, भोजपुरी लिसेंया राष्ट्र भाषायात माध्यमिक तगिमय् गणित विषयलिसे ऐच्छिक दयेकूगुलिइ मोडर्न नेवाः इङलिस स्कूलया प्रिन्सिपल लिसें नेवाः बस्ती नेवाः स्कूल अभियानया कजि दिपक तुलाधरं कुंखिनादिल । अथे हे नेपालभाषा क्लबया संरक्षक डा. महेशमान श्रेष्ठं नेपालय् नवाइगु सछिगु स्वयां आपाः भाषामध्ये आपाःथे संकटय् लाना वनाच्वंगु धासें देयया म्हसिका ल्यंकेत नं राष्ट्रभाषा संरक्षणय् जायेत आव्हान यानादिल ।
ज्याझ्वलय् नेपालभाषा विषय कयाः एसएलसी ताःलाःपिं ३० विद्यार्थीतयत ज्याझ्वःया मू पाहां कूलवीरसिंह तुलाधरं तका सिरपाःलिसें दसिपौ लःल्हानादिल ।
उगु हे ज्याझ्वलय् उद्घोषण तालीम काःपिन्त नं दसिपौ लःल्हाःगु खः । पत्रकार केके मानन्धरं बियादीगु उद्घोषण तालीमया प्रशिक्षार्थिपिन्त व प्रशिक्षक मानन्धरयात ज्याझ्वःया विशेष पाहां लिसें क्लबया संरक्षक डा. महेशमान श्रेष्ठं दसिपौ लःल्हानादिल ।
क्लबं मातृभाषा विकासया ख्यलय् जनचेतना थनेत व्यानर ब्वज्या, व्यक्तित्व विकास कार्यक्रम, सम्बन्धित ख्यःया सचेत याकेगु ज्याझ्वःत याना वयाच्वंगु नायः कमला मानन्धरं जानकारी बियादिल । साहित्यकारनिसें थीथी ब्वनेकूया प्रिन्सिपलपिनिगु ब्वति दुगु ज्याझ्वलय् थीथी ब्वनेकूया विद्यार्थीपिन्सं हुलाप्याखं नं न्ह्यब्वःगु खः ।
यलय् भिन्तुना कालबिल ज्याझ्वः क्वचाल
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
न्हूदँ समारोह समिति ११३७ यलया ग्वसालय् यलय् न्हूदँ ११३७ या लसताय् भिन्तुना कालबिल व कौला ज्याझ्वः क्वचाःगु दु ।
ज्याझ्वलय् समितिया नायः समाजसेवी मोतिलाल शिल्पकारं नेपाल सम्वतयात व्यवहारय् छ्यलेत राज्यं हे पलह यायेमाःगुलिइ बः बियादिल । अथे हे नेपालभाषा मंकाः खलः यलया नायः ऋषिप्रसाद श्रेष्ठं नेपाल सम्वतयात व्यवहारय् गुकथं छ्यला यंकेफइ धइगु वहस न्ह्याकेमाःगुलिइ बः बियादिल ।
ताम्रकार समाजया नायः रविन्द्रराज ताम्रकारं नेपाल सम्वतया छ्यलाबुला झीगु हे पाखें न्ह्याकायंकेमाःगु बिचाः तयादिल ।
ज्याझ्वलय् समितिया छ्यान्जे सुवर्णलाल अमात्यलिसें ज्यापु समाजया नायः प्रेम महर्जनया नं उपस्थिती दुगु खः ।
संकिपाकःमि अमृतचन्द्रया मां मन्त
लहनान्यूज सम्वाददाता | कछलागा नवमि ११३७ (नोभम्बर २३ २०१६)
नेवाः संकिपा ख्यलय् सक्रियम्ह नेवाः सिनेकःमि अमृतचन्द्र श्रेष्ठया मां हेरामाया श्रेष्ठ थौं मन्त ।
छाति स्यानाः वयकःयात वासः यायेत ग्रान्डि अस्पताल यंकूगु खः । अन हे सुथय् ४ः३०ताः इलय् मदुगु खः ।
७५दँ दुम्ह मदुम्ह श्रेष्ठयात नुगःया समस्या दुगु खः । मदुम्ह श्रेष्ठयात न्याला न्ह्यः हृदयघात जूगु खःसा व धुंकाः वयकःया नुगलय् पेसमेकर तयातःगु दुगु खः ।
मदुम्हेसिया थौं हे पशुपति आर्यघाटय् अन्त्येष्टि याःगु दु । काय् अमृतचन्द्र श्रेष्ठं मदुम्हेसित मि तयादिल ।
‘मरुसतः पुनर्निर्माण ठेक्काय् बीमज्यू’
लहनान्यूज सम्वाददाता | कछलागा अष्टमि ११३७ (नोभम्बर २२ २०१६)
मरुसतःया पुनर्निर्माणया ज्या ठेक्काय् बीमज्यूगु स्थानीय विज्ञ व सरोकारवालातयसं धाःगु दु ।
काष्ठमण्डप पुनर्निर्माणको लागि अभियान व सम्पदा तथा वातावरण प्रेमी पुचलं थौं येँय् याःगु काष्ठमण्डप लिसें थीथी सम्पदा ठेकेदारी प्रथाय् पुनर्निर्माणया औचित्य विषयक अन्तक्र्रिया ज्याझ्वःया वक्तापिन्सं काष्ठमण्डपया पुनर्निर्माण ठेकेदारी प्रथां यात धाःसा थुकिया अस्तित्व संकटय् लाइगु धाःगु खः । वक्तापिन्सं काष्ठमण्डपया पुनर्निर्माणय् स्थानीय मनूतयगु हे सहभागिता दयेमाःगुलिइ बः ब्यूगु खः ।
ज्याझ्वलय् नेकपा एमालेंपाखेंया सांसद रामबीर मानन्धरं धरहराया पुनर्निर्माणया खँ ल्हाइपिन्सं काष्ठमण्डपया पुनर्निर्माणय् छाय् सः मतःगु धकाः न्ह्यसः तयादिल । काष्ठमण्डप थुज्वःगु सांस्कृतिक व ऐतिहासिक सम्पदाया पुनर्निर्माण ठेक्कापट्टाय् याकाः स्थानीय आदिवासी जनजातिया संस्कृति हे न्हंकेत स्वःगु वयकःया धापू खः ।
लुम्बिनि विश्वविद्यालयया उपकुलपित प्रा.डा.नरेशमान बज्राचार्यं ठेकेदारी प्रथाय् अपनत्व मदइगु जूगुलिं हे काष्ठमण्डपया निर्माण नायः प्रथा कथं जुइमाःगु धयादिल । प्रा.डा.बज्राचार्य काष्ठमण्डपया चा, धलिं आदि कथंया भग्नावशेष चीकेत, ल्ह्ययेत जक मखु, पुनर्निर्माणय् नं स्थानीय समुदायया सहभागिता दयेमाःगु खँय् बः बियादिल ।
ज्याझ्वलय् नेपाल हस्तकला महासंघया नायः धर्मराज शाक्य, नेपाली कांग्रेसपाखेंया सांसद भीमसेनदास प्रधान, वास्तुविद सुदर्शनराज तिवारी, अनुसन्धाता प्रा. दिनेशराज पन्त, डा.साफल्य अमात्यलिसें नं सम्पदाया पुनर्निर्माणय् ऐतिहासिक महत्वयात ल्वःमंके मज्यूगु लिसें स्थानीय समुदायया ब्वति दयेमाःगु खँय् बः ब्यूगु खः ।
मत सीगुलिं घिसिङं माफी फ्वन
लहनान्यूज सम्वाददाता | कछलागा सप्तमी ११३७ (नोभम्बर २१ २०१६)
थौं सनिलय् मत सीगुलिं नेपाल विद्युत प्राधिकरणया कार्यकारी निर्देशक कुलमान घिसिङं माफी फ्वनादीगु दु ।
सामाजिक संजालया अंगलय् कार्यकारी निर्देशक घिसिङं प्राधीकरणया केन्द्रिय भारप्रेषण केन्द्रय् प्राविधिक समस्या वयाः मत सीगु जानकारी ब्युसें उपभोक्तायात जूवंगु समस्याया नितिं माफी फ्वनादीगु खः ।
थौं सनिलया ५ः४५ताः इलय् देयन्यंक हे विद्यूत आपूर्ती बन्द जूगु खः । करीब ४५ मिनेट लिपा जक मत वःगु खः ।
नेपाल बिद्यूत प्राधीकरणया मध्य मस्र्याङ्दी जलबिद्यूत आयोजनाया विद्यूत उत्पादन प्रणालीइ समस्या वःगु नं प्राधीकरणं न्ह्यथंगु दु । आयोजनापाखें ७० मेगावाट विद्यूत उत्पादन जुया वयाच्वंगुलिइ न्हापांगु युनिटं उत्पादन जुइगु ३५ मेगावाटय् समस्या वःगु धाःगु दु ।
सनिलया इलय् विद्यूतया माग आपाः दइगु जूगुलिं प्रणालीइ समस्या वःगु जुइफुगु धाःगु दु । विद्यूतया माग स्वब्वय् निब्व स्वयां आपाः स्वनिगलय् हे दुगुलिं मत वंगु इलय् राजधानी आपाः प्रभावित जूगु प्राधिकरणं न्ह्यथंगु दु ।
