सरकारं सीमांकन हेरफेरलिसें संविधान संशोधन विधेयक व्यवस्थापिका संसदय् दर्ता याःगु दु ।

प्रधानमन्त्रीया सरकारी निवास बालुवाटारय् थौं सनिलय् च्वंगु मन्त्रिपरिषद्या मुँज्यां प्रदेश ४ व ५ या सीमांकन हेरफेरलिसें संशोधन प्रस्ताव यायेगु क्वःछ्यूगु खः । मुँज्या धुनाकथं संसद सचिवालयस संशोधन प्रस्ताव दर्ता याःगु खः ।

संशोधन प्रस्तावय् प्रदेश ५ दुने लाःगु पहाडी जिल्लात पाल्पा, अर्घाखाँची, गुल्मी, प्युठान, रोल्पा व बछि रुकुमयात प्रदेश ४य् तयेगु प्रस्ताव याःगु दु । आः प्रदेश ५य् नवलपरासीया बर्दघाट सुस्तानिसें पश्चिम, रुपन्देही, कपिलबस्तु, दाङ, बाँके व बर्दिया च्वनी ।

अथे हे नेपाःमिलिसे इहिपा याइम्ह विदेशी मिसां थःगु देयया नागरिकता परित्यागया लागिं कारबाही न्ह्याकूसा संघीय कानुन कथं नेपालया वैवाहिक अंगीकृत नागरिकता कायेफइगु संशोधन प्रस्ताव दु ।

अथे हे राष्ट्रिय सभा गठनय् दलित, मिसा व अपाङ्ग/अल्पसंख्यक यानाः ३/३ प्रत्येक प्रदेशं ल्यइ सा ल्यं दुपिं ३५ जनसंख्याया लिधंसाय् जुइ । तर, प्रदेशपाखें ३५म्हेसिया निर्वाचन याइलबय् सम्वन्धित प्रदेशया जनसंख्याया अनुपातय् १४ मिसाया प्रतिनिधित्व जुइगु कथं संघीय कानुन कथं चुनाव यायेगु प्रस्तावय् न्ह्यथनातःगु दु ।

आःया संविधानय् प्रत्येक प्रदेशं समान ८/८ दुजः ल्यइगु व्यवस्था दु ।

प्रमुख विपक्षी दल एमालें धाःसा संविधान संशोधन प्रस्तावया प्रतिवाद यायेगु धाःगु दु । एमालें संसद व सडक निथासं संशोधनया प्रतिवाद यायेगु धया वयाच्वंगु दु ।