मोहनि न्ह्यःया लिपागु सेयर बजाःया कारोवार थौ छु भचा थहावंगु दु। थौ बुधवाः ४.८५ ल्याखं थहावना बजाः २६६८.१७ बिन्दुइ थ्यःगु दु।

नेप्सेय् थौ ३ अर्ब ७६ करोड १५ लाख १२ हजार ७०६ तका बराबरया कारोबार जूगु दु। बुधवाः २९४ गु धितोपत्रया ४० हजार १३१ कारोबारपाखे ८३ लाख १२ हजार ६८५ कित्ता सेयर कारोवार जूगु दु।

आः सेयर बजाः असोज २९ गते चालिइगु जूगु दु। बुधवाः बैंकिङ, वित्त, होटेल एण्ड टूरिजम, जलविद्युत, उत्पादन व प्रशोधन, लघुवित्त, म्यूचअल फण्ड, निर्जिवन बीमा व मेमेगु समूह थहावंगुलि विकास बैंक, लगानी, जीवन बीमा व व्यापार समूहया भाः कुहावःगु दु।

दकलय् अप्पो उत्पादन नाप प्रशोधन समूहया लगानीकर्ता तय्स १.०५ प्रतिशतं कमे याःगु दु। बुधवाः मध्यसोलु हाइड्रोपावर, अपर स्याङ्गे हाइड्रोपावर व राप्ती हाइड्रो एण्ड जनरल कन्स्ट्रक्सनया भाः सर्किट लेवलय् थहावंगु खः। बुधवाः दलकये अप्पो थ्रिस्टार हाइड्रोया लगानीकर्तात दकलय् घाटा जूगु दु। थुगु कम्पनीया भाः १० प्रतिशतं घटे जूगु खः।

सिटिजन्स सुपर ३० म्यूचुअल फण्ड, सिटिजन्स म्यूचुअल फण्ड १, सानिमा बैंक न यक्को घटे जूगु दु। थौ नेपाल फाइनान्स दकलय् अप्पो कारोबार जूगु दु।

बरिष्ठ गीतकार विश्व बल्लभ ८० दँय् थौ बुधवाः मन्त।छु दि न्ह्यःनिसे अन्नपूर्ण न्युरो अस्पतालय् मस्तिष्कघातया वासः याका वयाच्वंगु खः।

बल्लभयात वासः याकेगु निति अर्थ संकलन यायेगु सक्रियम्ह गीतकार राजेन्द्र थापां सामाजिक सञ्जालपाखे बल्लभ मदुगु धका च्वंगु खः।

ताः ईनिसे रेडियो नेपालया जागिर नयाच्वम्ह बल्लभया निम्ह म्ह्याय्पि दु। वयकःया जहान निदँ न्ह्यः क्यान्सरं मदुगु खः।

तारादेवीं हाःगु म्ये ‘शुभकामना’, अरूणा लामां हागू म्ये ‘भाग्यले खुसी खोसेर लग्यो’, अमर तण्डुकारं हालादिगु ‘धेरै दिन भो तिम्रो झझल्को’ थे लोकह्वागु म्ये बल्लभं च्वयादीगु खः ।

मध्यपुर थिमि बचत तथा ऋण सहकारी संस्थां थिमि भैलः २०८१ या कलाकार व व्यवस्थापन समितियात छगु ज्याझ्वः दथुइ हने याःगु दु।

आनुष्ठानिक प्याखं मध्ये थिमि भैलःयात म्वाका तयेगु ज्या याःगुलि अथे हने ज्या याःगु खः। सहकारीया १७ क्वःगु दँमुज्याय् थिमि भैलः २०८१ व्यवस्थापन समितिया माइला प्रजापति नाप कलाकारपि तृशल प्रजापति (ज्यापुंगः), अशोक प्रजापति (न्हापा भैलः), बाल मुकुन्द प्रजापति (लिपा भैलः), आयुष प्रजापति (न्हापा दागिं) र शाहील प्रजापति (लिपा दागिं)यात दोसल्लां न्यय्का थिमि नगरपालिकाया उपप्रमुख विजयकृष्ण श्रेष्ठं हनापौ लःल्हानादीगु खः।

संस्थाया अध्यक्ष नाप ज्याझ्वःया सभाध्यक्ष कृष्ण काजी मानन्धर जुगु उगु ज्याझ्वलय् मूपाहाँ मध्यपुर थिमि नगरपालिकाया उपप्रमुख विजयकृष्ण श्रेष्ठ व पाहाँपि ८ या वडाध्यक्ष रमेश थापा, समाजसेवी कृष्णलाल गोजा श्रेष्ठ, समाजसेवी न्हुछेरत्न मानन्धर, नेफ्स्कूनया सुशीला पराजुली, सिवा सायमि खलःया अध्यक्ष मनोज लाल मानन्धर, केन्द्रीय मानन्धर संघया सहायक सचिव तुलसीकाजी मानन्धर, मध्यपुर सञ्चार समाजया अध्यक्ष चन्द्रकृष्ण गोपाल श्रेष्ठपिनिगु न ब्बति दुगु खः।

हिसी मिडिया प्रा.लि.पाखे न्ह्याकाच्वंगु नेपालभाषाया अनलाइन पत्रिका लहनान्युज डट् कम थौ न्ह्यय् फुना च्यादँ क्यःगु दु।

नेपाल संवत ११३६ कुन्हु छगु ज्याझ्वः दथुइ बरिष्ठ पत्रकार पुष्कर माथेमा व सुरेशकिरण मानन्धरपि पाखे उलेज्या याना मदिक्क न्ह्यानाच्वंगु खः।

नेपालभाषां नेवाः तयेगु मुद्दा, तजिलजि नाप थीथी गतिबिधि वंगु न्ह्यय् दँनिसे मदिक्क प्रकाशन याना वयाच्वंगु खः। मदिक्क ग्वहालि याना वयाच्वपि बिज्ञापनदाता व शुभच्छेकपिन्त हिसी मिडियापाखे सुभाय् देछाउगु दु।

शेयर बजाःया थौ न्हापागु दिं बजाःया सूचक थहावंगु दु। नेप्से परिसूचक ५६.०९ ल्याखं थहावंना नेप्से २६५३ य् थ्यःगु दु।

सेन्सिटिभ सूचक २ प्रतिशतं थहावंगु दु।कारोबार रकम धाःसा कुहावःगु दु। वंगु बुधवाः ६ अर्ब ७७ करोडया कारोबार जूगुलि थौ ६ अर्ब १३ करोडय् सीमित जूगु दु।

कुल २१९ गु कम्पनीया थहावंगुलि २३ गु कम्पनीया भाः कुहावःगु दु सा निगु कम्पनीया भाः स्थिर जूगु दु। थौ फाइनान्स सेक्टरय् लगानीकर्तात आकषित जूगु दु। फाइनान्स सूचक दकलय् अप्पो ६.३० प्रतिशतं थहावंगु दु।

बैंकिङ २.२०, विकास बैंक २.२२, होटल लिसे पर्यटन १.७१, हाइड्रोपावर २.७३, लगानी १.९९, जीवन बीमा १.३४, उत्पादन ३.१२, माइक्रोफाइनान्स १.४७, निर्जीवन बीमा १.४९, मेमेगु १.६२ व व्यापार ०.९० प्रतिशतं थहावंगु दु।न्यादी हाइड्रोपावरया भाः १० प्रतिशत, मध्यभोटेकोशीया ९.७, इस्टर्न हाइड्रोपावरया ९.६, गुडविल फाइनान्सया ९.२७, सिनर्जी पावरया ८.१ प्रतिशतं भाः थहावःगु दु।

विन नेपाल लघुवित्तया १०, स्वरोजगार लघुवित्तयया ५.३, उपकार लघुवित्तया ४.४ प्रतिशतं भाः थहावंगु दु। कारोबार रकमया आधारय् साहस ऊर्जा, एनआरएन इन्फ्रास्ट्रक्चर, नेपाल फाइनान्स, गुडविल फाइनान्स व एसियन लाइफ इन्स्योरेन्स प्रमोटर सेयर न्ह्यने खनेदुगु दु।