राष्ट्रपति रामचन्द्र पौडेलं श्रीकृष्ण जन्माष्टमीया लसताय् यलय् कृष्ण द्यःया थाय् पूजा यानादीगु दु।वयकलं पुजारीपाखे सिन्हं व प्रसाद ग्रहण यानादीगु दु।

राष्ट्रपति पौडेलयात यलय् कृष्ण द्यःया थो यल महानगरपालिकाया पदाधिकारी नाप सांसदपिन्स लसकुस यानादीगु खः।

नेपालभाषा एकेडेमीया ग्वसालय् न्ह्यानावया च्वंगु साहित्यिक ज्याझ्वःया श्रृंखलाय् “सर्जक व सृजना” या न्हूगु श्रृंखलाय् थुगुसिइ नांजाम्ह कवि डा योगेन्द्र प्रधानयात कया ज्याझ्वः जूगु दु।

थ्व स्वया न्ह्यः जनकवि दुर्गालाल श्रेष्ठ व आख्यानकार मथुरा सायमियात कया “सर्जक व सृजना” ज्याझ्वः जुइ धुंकुगु खःसा थुगुसिइ कवि डा प्रधानाङ्गयात कया ज्याझ्वः जूगु खः। नेपालभाषा एकेडेमीया चान्सलर यज्ञरत्न शाक्यया सभाध्यक्षताय् जूगु उगु ज्याझ्वलय् एकेडेमीया प्राज्ञ दुजः त्रिरत्न शाक्यं लसकुस यानादीगु खः।

एकेडेमीया साहित्यिक कवःया कजिया नापनापं सर्जक व सृजना ज्याझ्वःया नं कजि खः। एकेडेमीया प्राज्ञ दुजः रजनीमिलां न्ह्याकादीगु उगु ज्याझ्वलय् सदस्य सचिव डा पुष्पराज राजकर्णिकार, एकेडेमीया प्राज्ञ दुजः विराट साहित्य गुथिया नायः महेन्द्र गोपाल कर्माचार्य, एकेडेमीया प्राज्ञ दुजः प्रा प्रेमशान्ति तुलाधर, सिद्दिदास प्रतिष्ठानया नरेन्द्र भक्त हाडापिन्स कवि डा प्रधानाङ्गया बारे थीथी खँ न्ह्यब्वया दीगु खः।

सांगितिक प्रस्तुति व साहित्यिक प्रस्तुति जूगु ज्याझ्वलय् इसास पाखें लसकुस म्ये न्ह्यब्वःगु खःसा रफेला महर्जन, सत्यनारायण मानन्धरपिन्स म्ये हाला न्यंकादिगु खः।

अथेहे तुं लोककवि राजभाइ जकःमि, साहित्यकार राजेन्द्र पुता, रश्मी नापित, नबिन प्रकाश श्रेष्ठ लगायतं कविता पाठ याना न्यंकादीगु उगु ज्याझ्वलय् एकेडेमीया भाइस चान्सलर मल्ल के सुन्दरया विशेष उपस्थिति दूगु खः।

येँ प्रधानमन्त्री केपी शर्मा ओलीं नेपाःया समाज बहुसांस्कृतिक व शान्तिप्रेमी जूगुलि थुगु समाजयात स्यकेत स्वयेगु कुतः ताः लाइ मखु धका धयादीगु दु।

सैनिकमञ्चय् थौ जुगु छगु ज्याझ्वलय् गौरा पर्वया ज्याझ्वलय् भिंतुना बियादीसे प्रधानमन्त्री ओलीं नेपाली पहः धइगु मिले जुया च्वनिइगु व शान्तिपूर्ण जूसा गुलि न्हुगु पुस्ताय् सभ्यता, शिष्टता व मर्यादाया मस्वइगुलि दुःख प्वकादिगु दु।

नेपाली काङ्ग्रेसया सभापति नाप पूर्व प्रधानमन्त्री शेरबहादुर देउवाया न उगु ज्याझ्वलय् ब्बति दुगुलि प्रधानमन्त्री ओलीं सुदूरपश्विमया बालगु नेपाःया नखः खः धका धयादीगु खः।

नेकपा एमाले न येँ महानगरं खुसि सिथय् जवः खवं मेगु २० मिटर जग्गाय् निर्माण निषेध याःगु धासे उकियात बदर यायेमाः धका माग याःगु दु।

नाप थुकिइ सम्बन्धी सर्वोच्च अदालतया फैसलाय् न्यायिक पुनरावलोकन यायेत न एमाले न माग याःगु दु। २०६५ मंसिर १ गते मन्त्रिपरिषदया बैठकं स्वनिगः दुने वाग्मती, विष्णुमती व मनोहरा खुसिइ दुने २० मिटर दुने दयका तःगु संरचना दयकेम मदुगु निर्णय यायेवं सर्वोच्च अदालतं वंगु पुस ३ गते मेगु २० मिटर त्वःत्यमाःगु परमादेश जारी याःगु खः।

सर्वोच्चया थुगु फैसला कथं येँ महानगरपालिकां नगरप्रमुख स्तरीय निर्णय याना तोके याःगु मापदण्ड अःखः जुइगु कथं नक्सा पास अनुमति मबिइगु सूचं जारी याःगु दु। नेकपा एमाले येँ जिल्ला कमिटीया नेतापि प्रधानमन्त्री नाप एमाले अध्यक्ष केपी शर्मा ओलीयात नापलाना महानगरपालिकां जारी याःगु सूचं खारेज यायेत व सर्वोच्चको फैसलाय् न्यायिक पुनरावलोकन यायेत माग याःगु दु।

प्रधानमन्त्री निवास बालुवाटारय् म्हिगः आइतवाः बहनि एमाले बाग्मती प्रदेशया इञ्चार्ज डा. राजन भट्टराई, जिल्ला अध्यक्ष दीपक निरौला, महानगरया उपप्रमुुख सुनिता डङ्गोल, पूर्वमेयर विद्यासुन्दर शाक्यनाप प्रतिनिधि मण्डल प्रधानमन्त्री ओलीयात ज्ञापन पौ लःल्हाःगु खः।

ज्ञापन पतिइ सर्वोच्चया आदेश व महानगरपालिकाया सूचं सम्पत्ति भोग याये दइगु संवैधानिक अधिकारया व्यवस्था अःखः खः धका तर्क तःगु दु। यदि महानगरपालिकां जारी याःगु सूचं खारेज मजूसा असामान्य परिस्थिति वयेफइगु चेतावनी तक एमाले नेतातय्स बिउगु दु।

एमालेया अध्यक्ष नाप प्रधानमन्त्री ओलीं जनजीवनय् जुगु समस्या सम्बोधनया लागि सरकारपाखे यायेमाःगु कुतः यायेगु जुइ धका धयादीगु दु। वयकलं छु न निकाय व मनूखं व्यवहारिकतायात ध्यान मबिउसे निर्णय यायेमज्यु धका धयादीगु खः।