प्रधानमन्त्री केपी शर्मा ओलीं ‘समृद्ध नेपाल, सुखी नेपाली’ या राष्ट्रिय आकाक्षाय् ग्वहालि यायेगु कथं अनुसन्धान याना नीतिगत सुझाव बिइत नीति अनुसन्धान प्रतिष्ठानया पदाधिकारी तयेत इनाप याःगु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् जुगु प्रतिष्ठानया पदाधिारीपि नाप जुगु सहलहय् प्रधानमन्त्री ओलीं सरकारया लक्ष्य व विकास नाप स्वागु मन्त्रालय व विश्वविद्यालय नाप संयोजन याना अनुसन्धान जुइ मागुलि बः बियादीसे प्रमाणया आधारय् जक नीति तर्जुमा यायेमाः धका धयादीगु खः।

अनुसन्धान प्रतिष्ठान थः याकचा जक ज्या याना लिच्वः वइ मखु व देशय् माःगु सम्बोधन जुइ मखुलि अनुसन्धान व उच्चतम् प्रविधिया नाप देशया विकास यायेत सरकारया प्राथमिकता दु धका धयादीगु खः।

प्रतिष्ठानया कार्यकारी अध्यक्ष डा लेखनाथ शर्मा न थीथी मन्त्रालयया समन्वयय् आःतक ५० गु अनुसन्धान याये धुकुगु जानकारी बियादीगु खः। प्रधानमन्त्री ओलीं न्हापागु कार्यकालय् उगु प्रतिष्ठानया स्थापना यानादीगु खः।

लुँया भाः आःतक हे दकलय् अप्पो थ्यःगु दु। लुँ तोलां च्यासः थहावना थौ १ लाख ५३ हजार १ सय तका थ्यःगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न्यातका थहावःगु दु। वहः तोलां न्यातका थहावना थौ १ हजार ८ सय ५५ तका थ्यःगु दु महासंघं धाःगु दु।

मुस्ताङय् हाकन हिमपहिरो वंगु दु। थासाङ गाउँपालिका–२ बोक्सीखोलाया च्वय् म्हिगः बहनि ६ बजे हाकन हिमपहिरो वंगु दु।

थासाङया बोक्सी खोला च्वय् छिप्लुङ लेक जूया धौलागिरि हिमालया फेदं चलः वःगु खः। मुस्ताङया प्रहरी नायब उपरीक्षक भोजराज पाण्डेय न न्हापा न चलः वगुलि मेगु हाकन वःगु धका जानकारी बिउगु दु।

थ्व स्वया न्ह्यः भदौ ६ गते न्हिनय् थासाङया बोक्सी खोलाया लेकय् हिमालया फेदपाखे हिमपहिरो वंगु खः। उगु चलः वसा अन च्वंगु बस्तीइ जोखिम मजुगु व अन च्वना च्वपिन्त सुरक्षित थासय् यकिइगु धका थासाङ गाउँपालिका अध्यक्ष प्रदिप गौचनं जानकारी बियादीगु दु।

नेपालभाषा मिसा खलःया स्वीन्यादँ बुदिं छगु ज्याझ्वः दथुइ तःजिक हंगु दु। उगु ज्याझ्वलय् थीथी व्यक्तिपिन्त सिरपाः व सम्मान याःगु दु।

मूपाहाँ कथं नांजाःम्ह पर्यटन व्यवसायी लिसें संरक्षणविद् कर्ण शाक्यं ज्याथम्ह साहित्यकार फणीन्द्र वज्राचार्य, भाषा आयोगया दुजः मा.सुरेश मानन्धर, स्वर्ण पदक विजेता कासामि केदारश्वरमान स्थापित, थँजिम्ह आजिवन जः जलेश्वरी श्रेष्ठ व निवर्तमान नायः मंगला कारंजितयात सम्मान याःगु खः।

अथे हे कमला लुमिन नेपालभाषा हःपाः सिरपाः दाता कमला लुमिन कुमारं च्वमि भवानी तुलाधरयात व रमा–कौशल्या लुमंति सिरपाः दाता मथुरा साय्मिं सिस्टर बिकुमाया कारंजित श्रेष्ठयात लःल्हानादीगु खः। मूपाहां शाक्यं नेवाः मिसापिंके नं अथाह शक्ति सुलाच्वंगु दु धासें थः मां व जहानपाखें प्राप्त जूगु प्रेरणाया प्रशंग कनादिगु खः।

लिसें वय्कलं ७५ दँया वैंशय् थःगु व्यवसाय फुक्क काय् म्ह्याय्पिंत त्वःताः थः न्हूगु चिन्तनय् लगे जुयागु व माल धाःसा उमेर वंसां नं ज्या यायेफु धइगु प्रेरणाया खँ नं कनादिगु खः। ज्याथम्ह साहित्यकार फणीन्द्ररत्न वज्राचार्यं नेपालभाषा मिसा खलः मिसापिनि संस्था खःसां थः मिजंम्ह मनूयात नं हंगुलिं लसता प्वंकादिल ।

मिसा खलःया नायः धर्मशोभा तुलाधरया सभाध्यक्षताय् जूगु उगु ज्याझ्वलय् नेवाः देय् दबूया नायः पवित्र वज्राचार्य, श्रद्धाचारी गुरुमां, मिसा खलःया पुलांम्ह नायः सुवर्णकेशरी चित्रकारपिन्स नं नुगँ खँ तयादीगु खः।

प्रधानमन्त्री केपी शर्मां जलाखला देय् दथुइ छु समस्या जुइगु सामान्य जुगुलि उगु विषय खुले जुया खँ ल्हाना समस्या समाधान याये फइ धका धयादीगु दु।

पूर्व उपप्रधानमन्त्री नाप परराष्ट्रमन्त्री कमल थापां च्वंगु ‘कूटनीति व भूराजनीति’ सफू थौ छगु ज्याझ्वः दथुइ प्रधानमन्त्री केपी शर्मा ओलीं विमोचन यानादीगु दु। प्रधानमन्त्री ओलीं जायज व न्यायोचित राष्ट्रिय हितया नाप अन्तर्राष्ट्रिय उत्तरदायित्व जुइफुगु तथ्य–प्रमाणया आधारय् समाधान मालेफत धाःसा समस्या वइ मखु धका धयादीगु खः।

“नेपाःया सन्तुुलत, इमानदारिता व पक्षधर बिहीनताया आधारय् निगु जलाखला देय् नाप बालागु सम्बन्ध तय् फइ । जिपि छम्ह जलाखला विरुद्ध मेम्ह जलाखला मेगु छु न कार्ड मछ्याला। सुयात बामलागु बिचाः मयाना। झिगु भूमिइ जलाखलाया विरुद्ध छ्यले बिइ मखु।’’, प्रधानमन्त्री ओलीं धयादीगु दु, “झिपि तटस्थता व शान्तिपूर्ण समाधानया लँय् दु।

संयुक्त राष्ट्रसङ्घया सिद्धान्तया पालना याये। उकिया उलङ्घन जूसा झीस अनुचित जुल धका धाये फय्केमाः। तर्कयात स्वया तथ्ययात न्ह्यने यके फय्माः।झिपि विश्वशान्ति व थःपिनिगु नागरिक तय्गु सुरक्षाया न्ह्यसलय् संवेदनशील दु। थःगु देय् या स्वार्थया लागि मेपिनिगु स्वाभिमानाय् धक्का यायेगु ज्या यायेमज्यु।’’

प्रधानमन्त्री ओलीं २०७२ सालय् भारतं नेपाःयात नाकाबन्दी तःगु इलय् थः प्रधानमन्त्री जुगु इलय् चीननाप व्यापार व पारबहन सन्धी जुगु छगु युुगान्तकारी ज्या जुगु धका लुमकादीगु खः।