वइगु २४ घण्टाय् देयन्यक तसक वा वइगु पूर्वानुमान यानातःगु दु। जल तथा मौसम विज्ञान विभागया मौसम पूर्वानुमान महाशाखां थौ न्हिनय् कोशी, बागमती, गण्डकी व लुम्बिनी प्रदेशया छगु निगु थासय् तसक वाः वइगु सम्भावना दु धका धाःगु दु।

महाशाखाया कथं दक्को प्रदेशय् वाः वइगु नापं नँ न्याइगु न सम्भावना दु धका धाःगु दु। २४ घण्टाय् २०० मिलिमिटर स्वया यक्को वा वउगु यात यक्को वाः वउगु धाइसा १०० मिलिमिटर निसे २०० तक वाः वउगु यात यक्को वाः वउगु धाइ। महाशाखाया कथं छु दिं अझ मदिक्क वा वइतिनि धका धाःगु दु।

महाशाखां विषेश बुलेटिन जारीयासे मनसुन न्यून चापीय रेखा नेपालय् न्ह्यने वयाच्वंगुलि बुधवाः तक मनसुन सक्रिय जुइ धका धागु दु।

संविधानं म्हमसिउगु जिल्ला प्रशासन कार्यालयं नेपालभाषाया संघसंस्था दर्ता याय्गु झ्वलय् नेवाः नां व नेपाल संवत तयातःगु संस्था दर्ता मयाय्गु यानाच्वंगु दु।

सिडिओ कार्यालयं संघसंस्थां तयाःगु नेवाः नां हिलेगु लिसे नेपाल संवत तयातःगु संस्था तकं दर्ता मयाय्गु नीति कयाच्वंगु सीदुगु दु। थ्वहे झ्वलय् येँया ओम बहाःया ‘ॐ बहाः त्वाः खलः मिसा पुचः’ दर्ता याय्गु वंगु झ्वलय् नेपाल संवत तयाः दर्ता याःगु खःसा दर्ता याय्त सिडिओ कार्यालय माने मजूगु खः।

संस्थाया लोगोय् नेपाल संवत तल धकाः सिडियो कार्यालयं नेपाल संवत लिकाया जक दर्ता याःगु खः। संस्थाया अध्यक्ष सजनी महर्जनया कथं न्हापा लोगोय् ‘विक्रम संवत् २०८१ व नेपाल संवत ११४४’ तयाः संस्था दर्ता याय्त स्वःगु खः। तर नेपाल संवत लिकयाः विक्रम संवत जक तयाः दर्ता याःगु खँ वय् कलं कनादीगु दु। नेवाः पत्रकार राष्ट्रिय दबूया सहसचिव सुनिता महर्जनं ॐ बहाःत्वाः खलः मिसा पुचः दर्ता मयाःगु खँयात कयाः सामाजिक सञ्जालय् तय्वं उकियात कयाः चर्चा परिचर्चा जूगु खःसा थ्व हे झ्वलय् दर्ता मजूगु थीथी संघसंस्था लहना वाःपौ यात थःपिनिगु संस्था दर्ता मजूगु जानकारी बिउगु खः। 

उकथं हे थ्व स्वयां न्ह्यः ‘हल्चोक आकाश भैरव समाज’ दर्ता याय्गु झ्वलय् नं लोगोय् ११४४ तयाः दर्ता याय्त स्वःगु खःसा नेपाल संवत लिकायेकाः विक्रम संवत २०८० तय्काः जक दर्ता याःगु खँ समाजया नायः शेरबहादुर पुतुवारं कनादीगु दु । वय्कलं नेपाल संवतयात सरकारी ज्याखय् छ्यलेगु धकाः संघीय सरकारं मान्यता बिउसां नं सिडिओ कार्यालयं सरकारं बिउगु मान्यतायात हे हाचां गाय्गु ज्या यानाच्वंगु द्वपं बियादीगु दु। लुमंके बहः जू सरकारं नेपाल संवतयात राष्ट्रिय संवत घोषणा याय्गुया लिसे सरकारया फुक्कं दस्तावेजय् नेपाल संवत छ्यलेगु निर्णय यानाः तत्कालीन प्रधानमन्त्री पुष्पकमल दाहालं च्वःगु पतिइ तकं नेपाल संवत छ्यःगु खः।

उकथं हे थीथी सरकारी निकायं तकं नेपाल संवतयात छ्यलाः पौ च्वय्गु ज्या न्ह्याकेधुंकूगु अवस्थाय् सिडिओ कार्यालयं थुकियात माने मयाय्गु ज्या गलत जूगु टिप्पणी नेवाः ख्यलय् जुयाच्वंगु दु। महर्जनया कथं थःपिसं नेपाल संवत तयाः छाय् संस्था दर्ता याय् मदइ धकाः प्रतिवाद यानागु खःसा सिडिओ कार्यालयया कर्मचारी नेपाल संवत तय्गु खःसा संस्था हे दर्ता मयाय्गु धकाः धायेवं थःपिं बाध्य जुयाः नेपाल संवत चीकाः संस्था दर्ता याय्त बाध्य जुइमाःगु खँ कनादीगु दु।

थ्व स्वयां न्ह्यः फसिगां भौमचा पुचः दर्ता याय्गु झ्वलय् नं सिडिओ कार्यालयं संस्था दर्ता याय्गु खःसा खँय् भासं भाय् हिउसा जक संस्था दर्ता याय्गु धायेवं थःपिनिगु मौलिकता हे तंकाः संस्था दर्ता याय् माःगु खँ संस्थाया सचिव उर्मिला महर्जनं कनादीगु दु । वय्कः पिसं संस्था दर्ता याय्गु झ्वलय् ‘फसिगां भौमचा पुचः’ दर्ता याय्त स्वःगु खःसा उकियात नां हिलेत बाध्य याकूगु खँ नं वय्कलं कनादीगु दु। संस्था दर्ता याय्गु झ्वलय् ‘फसिगां बुहारी समूह’ वयां लिपा ब्राकेटय् (फसिगां भौमचा पुचः) तय्काः जक संस्था दर्ता याःगु खः।

उकथं हे थ्व स्वयां न्ह्यः नेपालभाषाया संस्था ‘बाखं दबू’ दर्ता याय्त स्वःगु खःसा उकियात सिडिओ कार्यालयं अस्वीकार याय्वं थःपिसं बाखँ दबू दर्ता हे मयानागु खँ संस्थापक दुजः लोचनतारा तुलाधारं कनादीगु दु वय्कलं धयादिल, ‘जिपिसं बाखँ दबू दर्ता याय्त स्वयागु खः। तर सिडिओ कार्यालय बाखँ दबूया नां हिलाः ‘कथा दबू’ तःसा जक दर्ता ययोगु धकाः धायेवं जिमिसं दर्ता मयानागु खः।’ थ्वहे झ्वलय् थीथी सामाजिक सञ्जालय् गुगुल ट्रान्सलेटय् नेवारी तल धकाः विरोध यानाच्वंपिं नेवाःतय्सं धाःसा देशय् दुने दुगु थज्याःगु समस्या हे ज्यंके मफयाच्वंगु इलय् गुगुल ट्रान्सलेटरया खँ तयाः थवंथवय् विवाद याय्गु ज्या हे गलत जूगु टिप्पणी नं यानाच्वंगु दु।

सेयर बजाः थौ सोमवाः नेप्से २७९६ ल्याखय् थ्यःगु दु। न्हापागु कारोबार दिं स्वया थौ ४०.७६ ल्याखय् थ्यःगु दु।

कुल २१ अर्ब ८६ करोड तका बराबरया कारोबार जूगु दु। थौ १६३ गु कम्पनीया भाः थहावःगु दु सा ७८गु कक्पनीया भाः कुहावःगु दु सा छगु स्थिर जूगु दु। होटल लिसे पर्यटन समूह दकलय् अप्पो ६.६९ प्रतिशतं थहावःगु दु।

अथेहे मेमेगु ५.७३, हाइड्रोपावर ३.०९, लगानी ३.५२, जीवन बीमा ३.२३, निर्जीवन बीमा १.२५ प्रतिशतं थहावःगु दु। बैंकिङ ०.५०, विकास बैंक ०.१५ व फाइनान्स ४.६१ प्रतिशत कुहावःगु दु। उत्पादन ०.५१ लिसे माइक्रोफाइनान्स सूचक ०.७५ प्रतिशतं कुहावःगु दु।

रुरु जलविद्युत्, सीईडीबी हाइड्रोपावर, सगरमाथा जलविद्युत्, कुथेली बुकरी स्मल हाइड्रोपावर, भगवती हाइड्रोपावर, माथिल्लो मैलुङखोला, भिजन लुम्बिनी ऊर्जा, मुक्तिनाथ कृषि कम्पनी, सिटी होटल, माउन्टेन हाइड्रो नेपाल, हाथवे इन्भेस्टमेन्ट कम्पनीया भाः १० प्रतिशतं थहावःगु दु। रावा इनर्जीया ९.८ नाप हिमालयन रिइन्स्योरेन्सया ९.७ प्रतिशतं थहावःगु दु।

नेपाल फाइनान्सया भाः १० प्रतिशतं कुहावःगु दु। हिमालयन लघुवित्तया ७.६, गुहेश्वरी मर्चेन्ट बैंकया ६.२, श्रीइन्भेस्टमेन्ट फाइनन्सया ६.२ व समृद्धि फाइनान्सया ६.१ प्रतिशतं कुहावःगु दु। कारोबार रकमया आधारय् हिमालयन रिइन्स्योरेन्स, एनआरएन इन्फ्रास्ट्रक्चर, सानिमा माइ हाइड्रोपावर, शिवम् सिमेन्ट व माउन्टेन इनर्जी न्ह्यने खने दु।

नबिल बैंकया मू नाफा १० प्रतिशतं अप्वःगु दु। वंगु आर्थिक दँ २०८०÷८१ या सार्वजनिक च्यागूगु त्रैमासिकया वित्तीय विवरण कथं बैंकं उगु अवधिइ ७ अर्ब ६ करोड शुद्ध नाफा कमे याःगु दु।

थ्व न्हापाया आर्थिक दँया तुलनाय् १० दशमलव २३ प्रतिशत अप्वः खः।वंगु आर्थिक दँ २०७९÷८० य् बैंकं ६ करोड ४० करोड शुद्ध नाफा कमे याःगु खः।बैंकया शुद्ध ब्याज आम्दानी म्हो जूसां नं नाफा अप्वःगु खनेदु।

बैंकया शुद्ध ब्याज आम्दानी ८.६ प्रतिशतं म्हो जूगु दु। शुल्क व कमिशन आम्दानी अप्वःगु व ऋण घाटा प्रावधान (इम्पेयरमेन्ट चार्ज) म्हो जूगुलिं नाफाय् ग्वाहालि जूगु खनेदु ।बैंकया छगू शेयर आम्दानी २६ तका ९ पैसा खः। थ्वसिबें न्ह्यः छगू शेयर आम्दानी २३ हजार ६७ पैसा जूगु खः।

छगू शेयर वितरणयोग्य आम्दानी १४ तका २६ पैसा खः।बैंकया निष्किय कर्जा कुहावःगु दु। वंगु इलय् थुज्वःगु कर्जा कुल कर्जा १.१८ प्रतिशत जूगु खःसा आः १.०७ प्रतिशत जूगु दु। अथे हे सिडि रेसियो नं ८३ प्रतिशत दु। थुकिं बैंकयाके अप्वः लगानी यायेत पर्याप्त स्रोत दु धइगु संकेत बी।

अथे हे आधार कर नं कुहां वयाः ७.६३ प्रतिशत थ्यंगु दु। वंगु इलय् थुज्वःगु आधार दर ९.५२ प्रतिशत खः। बैंकया रिजर्भ कोषया आकार २८ अर्ब ६५ करोड दुसा चुक्ता पुँजी २७ अर्ब ५० करोड दु।बैंकया मू व्यवसायिक ऋण प्रवाह १२.९४ प्रतिशतं अप्वःगु दु । बैंकं असारया अन्त्यतक ३ खर्ब ७३ अर्ब त्यासा निकासा याःगु दु।

थौ गुलाथ्व पारु स्वयम्भूइ थौनिसे लच्छियक मेला सुरु जुगु दु। स्वयम्भू व्यवस्थापन नाप संरक्षण महासमितिं विश्वसम्पदा स्वयम्भू व वया जःखःसम्पदास्थलय् दर्शन यायेगु निति अप्पो ल्याखय् भक्तजनत वइगु भलसा कयातःगु दु।

थेरवाद, महायान व वज्रयान सम्प्रदायया अनुयायी राष्ट्रिय लिसे अन्तर्राष्ट्रिय ख्यलं करिव न्यागु लख भक्तजनत वइगु भलसा कयातःगु दु।