प्रतिनिधिसभा बैठक १५ मिनेटया लागि स्थगित याःगु दु। नेपाली कांग्रेसं पंगः थनाबिइवं सभामुख देवराज घिमिरें बैठक थौ १५ मिनेटया लागिु स्थगित याःगु खः।

बैठकय् नेपाली कांग्रेसं सहकारी ठगी प्रकरणय् नां स्वायेवं गृहमन्त्री रवि लामिछानेयात छानबिनया लागि समिति गठन यायेमाःगु माग याःगु खः।

कांग्रेसया सचेतक सुशीला थिङं न्ववाये धुका सभामुखं राष्ट्रिय स्वतन्त्र पार्टीया सांसद मनीष झायात न्ववायेगु ई बिउगु खः। कांग्रेसया सांसदतय्स पंगः थनेवं सत्ता पक्षया सांसद दना च्वगु खः।

लुँ तोलां थौ सच्छि थहावःगु दु। लुँ तोलां सच्छि थहावना १ लाख ३६ हजार ३ सय थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे थौ वहःया भाः धासा स्थिर जुगु दु।

नागरिक उन्मुक्ति पार्टी (नाउपा)या या अध्यक्ष रञ्जिता श्रेष्ठं सुदूरपश्चिम प्रदेश संसदीय दलया नेता घनश्याम चौधरीयात जिम्मेवारीं चिइकूगु दु।

श्रेष्ठं सुदूरपश्चिम प्रदेश सभाया सभामुख भीमबहादुर भण्डारीयात पौ छ्वया घनश्यामया जिम्मेवारी चिइका कैलाश चौधरीयात जिम्मेवारी बियागु दु धका उल्लेख याःगु दु।

‘प्रदेश सभा सदस्य घनश्याम चौधरीयात दलया नेता कथं न्ह्यावलय् सभा सञ्चालनया लागि सहमति जुगुलि वयकलं दलया निर्देशन पालन यागुलि हिलेगु निर्णय यानागु दु,’ रञ्जिता च्वंगु पतिइ धयातःगु दु, ‘दलया विधान तयार मदुगुलि आः दलया केन्द्रीय बैठकया निर्णय कथं माननीय सदस्य कैलाश चौधरीयात संसदीय दलया नेताया हैसियतं ज्या यायेगु निर्णय जुगु व्यहोरा इनाप यानागु दु।’

राष्ट्रिय सभा उपाध्यक्ष पदय् नेपाली कांग्रेस व नेकपा एमालेया उम्मेदवारपिन्स मनोनयन दर्ता याःगु दु।

नेपाली कांग्रेसया विष्णुदेवी पुडासैनी व नेकपा एमालेया विमला घिमिरें उम्मेदवारी दर्ता याःगु दु। निर्वाचन कन्ह्य बुधवाः जुइगु दु। उम्मेदवारी दर्ता याये धुका निम्हेसिया न थःपिनिगु उम्मेदवारी राष्ट्रिय सभाया गरिमा अझ थकायेगु भूमिका निर्वाह यायेगु जुइ धका धाःगु दु।

गणितीय हिसाबं न्ह्यने दुम्ह गठबन्धनया उम्मेदवार नाप एमाले सांसद घिमिरें थः निर्वाचित जुल धासा राष्ट्रिय सभा अध्यक्षनाप सहलह याना विधेयक न्ह्यने यकेगुलि प्रभावकारी भूमिका म्हितीइ जुइ धका धयादीगु खः।

अथेहे मेम्ह कांग्रेस उम्मेदवार विष्णुदेवीं दकोसित मिलेयाना न्ह्या वनेगु जुइ धका धयादीगु खः।

नेकपा एमाले यल जिल्लाया अधिवेशनपाखे पुरुषोत्तम आचार्य जिल्ला अध्यक्षय् निर्वाचित जूगु दु।

वयकलं स्वम्ह प्रतिस्पधीयात पराजित यासे अध्यक्षय् निर्वाचित जूगु खः। २२९ मत हया आचार्य जिल्ला अध्यक्ष निर्वाचित जुगु खःसा चेतनाथ आचार्यं १५४, दिनेश कार्कीं ८१ व सुवर्ण श्रेष्ठं ९ मत काःगु खः।

अथेहे जिल्ला उपाध्यक्षय् मञ्जली शाक्य बज्राचार्य निर्वाचित जूगु दु। वयकलं १७३ मत हयाः निर्वाचित जूगु खःसा निकटतम प्रतिद्वन्दीपि हरिगोविन्द श्रेष्ठं ११४ मत, श्याम ब्यञ्जनकारं ९८ व अष्टविर ब्यञ्जनकारं ८७ मत हंगु खः। सचिवय् राम राउत निर्वाचित जूगु दु।

खुम्हेसगु प्रतिस्पर्धा याउगुलि राउतं १७९ मत हया सचिव त्याकूगु खः। रत्न महर्जनं ११२, लक्ष्मणप्रसाद बजगाईं ५१, सहकुल खत्रीं २७, सुदनर्शन मिश्रं ७६ व हरिप्रसाद न्यौपानें २८ मत हःगु खः। उपसचिवय् प्रभाकर थापा व आशा राई निर्वाचित जूगु दु।