प्रधानमन्त्री केपी शर्मा ओलीं संघीयताया प्रभावकारी कार्यान्वयनया नितिं थःव थः सहकार्य व संवादया लिसें जनतायात केन्द्रीत जुया न्ह्यावनेत इनाप यानादीगु दु।

सिंहदरवारय् काठमाडौं उपत्यका मेयर फोरमया पदाधिकारीत नाप जूगु नापलाये ज्याय् प्रधानमन्त्री ओलीं ‘सु स्वया सु तःधं’ धइगु कथं मवसे केन्द्र व स्थानीय सरकार दथुइ समन्वय याना समस्याया समाधान याना जनताया सेवा बिइमाःगुलि बः बियादीगु दु।

वय्कलं जनप्रतिनिधिपिन्त थःपिं जनताया पक्षय् ज्या यायेत निर्वाचित जुयागु खः, अहंकार व अहंकारं निर्देशित जुइमखु धकाः धयादिगु खः वय्कलं नगर प्रहरी न्ह्यने तया सतक व्यापारीतय्त दमन याःगु खँ न्ह्यथनादिसें दिकेत इनाप यानादीगु खः। छिपिं जनताप्रति विनम्र व शिष्ट जुइमाः। प्रधानमन्त्री ओलीं जनप्रतिनिधियात सतकय् न्यासि वनीपिं जनतां याइगु प्रशंसा शुद्ध व दीर्घकालीन खः धकाः प्रधानमन्त्री ओलीं धयादीगु दु। सामाजिक संजालय् नक्कली नाम याइगु प्रशंसा ताः ईतक जुइमखु धका धयादीगु खः।

फोरमं नेपाल विद्युत प्राधिकरणं स्थानीय तहया नामय् थः यःथे सतक मतया बिल छ्वया बक्यौता क्यगुलि समस्या वःगु धका प्रधानमन्त्री ओलीयात ध्यानाकर्षण यागु खः। लिसः बिइगु झ्वलय् प्रधानमन्त्री ओलीं सम्बन्धित मन्त्रालय व निकायनाप थुइका माःगु सहजीकरण यायेगु भलसा बियादीगु खः। वयकलं फोहोरमैला व्यवस्थापन बालाक्क समाधान यायेगुलि सरकार ध्यान वःगु दु धका स्पष्ट यानदीगु खः।

फोरमया अध्यक्ष चिरीबाबु महर्जनं प्रधानमन्त्री ओलीया कार्यकाल बालाक्क न्ह्याय् फयेमाः धका धयादीसे पारस्परिक सम्बन्ध व सहअस्तित्वया ग्वहालि जुइमाः धका धयादीगु खः।

मन्त्रिपरिषदया आकस्मिक बैठक थौ च्वंगु दु। थौ बुधवाः न्हिनय् नुवाकोटय् एयर डाइनेष्टीया हेलिकप्टर दुर्घटनाय् न्याम्ह सीउगु खः।

दुर्घटन जुगु छु ईलिपा मन्त्रिपरिषदया आकस्मिक बैठक सःतूगु खः। प्रधानमन्त्री केपी शर्मा ओलीं दुर्घटनाबारे दुःख प्वकूगु दु।

नुवाकोटय् दुर्घटना जूगु हेलिकप्टर ये न ब्बःगु ३ मिनेट लिपा हे टावरनाप सम्पर्कविच्छेद जुगु धका धाःगु दु।

त्रिभुवन अन्तर्राष्ट्रिय विमानस्थल नागरिक उड्डयन कार्यालयं जारी यागु विज्ञप्तिइ दुर्घटनाग्रस्त हेलिकप्टर येँ न ब्बःगु ३ मिनेट लिपा हे सम्पर्कविहीन जूगु धका उल्लेख याःगु दु।

उगु दुर्घटनाय् न्याम्ह सीउगु दु धका प्रहरीं धाःगु दु। सीपि मध्ये प्यम्ह यात्रुपि चिनियाँ नागरिक जूगु दु।

येँ न रसुवाया स्याफ्रुबेसी ब्बयेत्यःगु एयर डाइनेस्टीया हेलिकप्टर दुर्घटना जूगु दु।

जिल्ला प्रहरी कार्यालय नुवाकोटया प्रमुख एसपी शान्तिराज कोइरालाया कथं शिवपुरी गाउँपालिका–७ सूर्यचौर क्षेत्रय् हेलिकप्टर दुर्घटना जूगु दु। आः सुरक्षाकर्मीपिन्स उगु थासय् वना उद्धार यायेगु ज्या जुयाच्वंगु दु धका जानकारी बिःगु दु।

वयकःया कथं हेलिकप्टर दुर्घटनास्थलय् मिँ च्यानाच्वंगु दु धका धाःगु दु। त्रिभुवन अन्तर्राष्ट्रिय विमानस्थलया कथं उगु हेलिकप्टर क्याप्टेन अरुण मल्लं ब्बयकूगु खः।

बेपत्ता छानबिन, सत्य निरूपण नाप मेलमिलाप आयोग ऐन संशोधन यायेत दयकूगु विधेयक क्वछिइत गठन जूगु कार्यदलं प्रधानमन्त्री केपी शर्मा ओलीनाप शीर्ष नेतातय्त प्रतिवेदन लःल्हागु दु।

स्वंगू तधःगु दल दुथ्याःगु कार्यदलया संयोजकतक जूयादीम्ह गृहमन्त्री रमेश लेखकं सिंहदरबारय् प्रधानमन्त्री कार्यालयय् प्रधानमन्त्री ओलीनाप नेपाली कांग्रेसया सभापति शेरबहादुर देउवा व नेकपा माओवादी केन्द्रया अध्यक्ष पुष्पकमल दाहाल प्रचण्डयात थौ प्रतिवेदन लःल्हागु दु।

कार्यदलं छवाः न्ह्यःनिसे दलपि नाप समन्वयय् याना विवादित विषय सहमति माले धुकुगु दु। प्रतिनिधिसभाय् दर्ता जूगु सभाया कानुन, न्याय लिसे मानव अधिकार समितिइ विचाराधीन जूगु विधेयकय् मू मुद्दाय् सहजीकरण व सहलह याना पिकायेगु कथं प्रतिवेदन लःल्हागु खः। कार्यदलय् कांग्रेसपाखे लेखकनाप एमालेपाखे प्रमुख सचेतक महेश बर्तौला व माओवादी केन्द्रपाखे जनार्दन शर्मा च्वनादिगु खः।

मेलमिलापया विषय, सशस्त्र द्वन्द्वय् अङ्गभङ्ग जूपिन्त क्षतिपूर्ति, सजायया विषय पीडितमैत्री जूया सहमति पिकायेगु धका गृहमन्त्री लेखकं जानकारी बिउगु दु। अथेहे नेकपा एमाले अध्यक्ष तक जूयादीम्ह प्रधानमन्त्री केपी शर्मा ओलीं शान्ति प्रक्रियाय् ल्यः दुगु ज्या सिधयकिइगु सहमति ’टर्निङ प्वाइन्ट’ जूगु धका धयादीगु खः।

कार्यदलं क्वछिउगु सहमतियात संसदया कानुन समितिं सर्वसम्मत कथं पास यायेगु भलसा दु धका वयकलं संसदय् थ्व हे अधिवेशनय् पास यायेगु जुइ धका धयादीगु खः। ओलीं कानुन कार्यान्वयनय् न सहमति कथं हे न्ह्यावनेगु प्रतिबद्धता प्वकादीगु खः।