डा.अञ्जान शाक्य राष्ट्रिय सभा सदस्य जुइत्यःगु दु।

थौ शुक्रवाः च्वंगु मन्त्रिपरिषदया बैठकं राष्ट्रपतिपाखे मनोनीत यायेगु निति राष्ट्रिय सभा सदस्य पदया लागि शाक्यया नां सिफारिस यायेगु निर्णय याःगु खः।

वयकः एमाले विदेश विभाग सदस्य शाक्य इजरायलया लागि पूर्वनेपाली राजदूत न जुयादी धुकुम्ह खः।

नेपालय् बुद्धधर्म प्रचारप्रसार यायेगु ज्याय् ज्ञानमाला भजन संगीतपाखें च्वछायेबहःगु योगदान दुम्ह यलया ज्ञानमाला भजन शिरोमणि लिसें बरिष्ठ संगीतकार किरण शाक्य मन्त।

गुन्हु न्ह्यः ब्रेन स्ट्रोक जुयाः अस्पताल भर्ना जुयादीम्अ वयकः बिहिवाः न्हिनय् येँया गोंगबुइ च्वंगु ग्रीनसिटी अस्पतालय् ८७ दँया उमेरय् मदुगु खः।

थँबहीया छायादेवी कम्प्लेक्सया ताःई न्ह्यवंनिसें जुयाच्वंगु विवादया विषय आः जग्गा अन्ततः सार्वजनिक हे खः धकाः सर्वोच्च अदालतं प्रमाणित याःगु दु।

वंगु चैत्र २० गते सर्वोच्चया न्यायाधीश प्रकाशमान सिंह राउत व डा. कुमार चुडालया मंकाः इजलासय् छगू आदेश जारी यासें थँबहीया १६७ नम्बर कित्ताया जग्गा न्हापा सार्वजनिक हे खः धकाः दर्ता जुयाच्वंगु खनेदु धकाः उल्लेख याःगु खः। थँबहीया विवादास्पद छायादेवी कम्प्लेक्स थ्वहे कित्ताया जग्गाय् निर्माण यानातःगु खः।

उगु जग्गा वि.सं. १९६५ तक २६ रोपनी ८ आना सार्वजनिक जग्गा दुगु खः। थ्व जग्गा अन दुगु पुखूया जग्गा खः। लिपा थ्व पुखू म्हासे यानाः राणा सरकारं छुं भचा जग्गा थःपिंसं दुकायेगु ज्या यात। वयां लिपा २०३३ साल थ्यंबलय् अन १२ रोपनी जग्गा जक ल्यं दनि। आः विवाद जुयाच्वंगु कित्ता नं. १६७ धइगु थ्वहे २६ रोपनी जग्गा दुनेया हे छकू कुचा खः।

थँबहीया स्थानीय अभियन्ता भागवत नर्सिंह प्रधानं छायादेवी कम्प्लेक्सया थ्व जग्गा सार्वजनिक ठहर यानाः अन दनातःगु कम्प्लेक्स भवन थुना छ्वयेमाः धकाः रिट तयादीगु खः। सर्वोच्च अदालतं छायाँदेवीया छेँ दनातःगु जग्गा जक मखुसें न्हापा राणाकालय् गुलि जग्गा दुगु खः व तक नं सार्वजनिक खः धकाः ठहर यासें थ्व जग्गा गय् यानाः व्यक्तिया नामय् वन धकाः उकिया समेत भ्वं झिके यायेत आदेश बिउगु दु।

२०३३ सालय् जूगु नापी पश्चात तत्कालिन काठमाडौं नगर पंचायत वडा नं. २९ या कित्ता नं. १६७, कि.नं. १०४०, कि.नं. १८७, कि.नं. २२२४, कि.नं. २२२९ व कि.नं. २४१३ या थ्व जग्गा छु स्रोतपाखें सु सु मनूया नामय् गय् यानाः दर्ता जूगु खः उकिया भ्वं मालपोत, गुठी व नापी कार्यालयपाखें लछिया दुने बुझे याये हजि धकाः अदालतं आदेश बिउगु खः।

ख्वपय् न्ह्याना च्वंगु बिस्का जात्राय् टौमढीइ रथ सालेगु झ्वलय् प्यागोडा शैलीया भैरवनाथया रथ त्वःधुगु दु।

रथ सालेगु झ्वलय् मुख्य स्वंगू खामा त्वःधुगु दु धका गुठी कार्यालय ख्वपया प्रमुख खिमा वलीं जानकारी बिःगु दु। रथ यक्को स्यंगुलि दयकेगु ज्या जुयाच्वंगु दु धका धाःगु दु।

नियम कथं कन्ह्यः चैत ३० गते भैरव व भद्रकालीया रथयात गःहिटीं सालां ल्यासिंख्यलय् थ्यके धुका जकः यःसि थनेगु ज्या याइगु खः।

अथेहे वैशाख १ गते यःसि क्वथला हाकनं रथयात ल्यासिंख्यलं गःहिटीइ हया भैरव व भद्रकालीया रथ ल्वाकेगु परम्परा दु। जात्रा सञ्चालनया झ्वलय् न्ह्यनलाथे साउगुलि रथ स्यंगु व खिपंतक खँुया यकूगु दु धका प्रमुख वलीं धाःगु दु।

बागमती प्रदेशय् नेपालभाषा व तामाङ भाषायात प्रदेशया सरकारी कामकाजि भाषाया रुपय् लागू यायेगु नितिं थःम्हं माःगु कथं फुक्क ज्या यायेगु जुइ धकाः बागमती प्रदेशया संस्कृति पर्यटन लिसे सहकारी मन्त्री शैलेन्द्रमान बज्राचार्यं धयादीगु दु ।

थौं विहिवाः नेवाः देय् दबू स्वनिगः विशेष प्रदेशपाखें वय्कःयात भिंतुना देछायेगु निति व भाषा ऐन लागू यायेगुबारे जूगु सहलह ज्याझ्वलय् मन्त्री बज्राचार्यं अथे धयादीगु खः। वय्कलं नेपालभाषा व तामाङ भाषायात सरकारी कामकाजि भाषा ऐन कथं लागू यायेगु नितिं हे थः मन्त्री जुयागु खः धकाः तकं धयादिगु खः।

उगु सहलह मुँज्याय् बागमती प्रदेशया राष्ट्रभाषा ऐन निर्माणया नितिं ज्वःमदुगु योगदान यानादीम्ह निर्वतमान प्रदेशया मन्त्री पुकार महर्जनं थुगु ऐन लागू यायेगु नितिं लिबाके मज्यूगु खँ कनादिसें म्हिगःया दिनय् थःम्हं उगु मन्त्रालयया नेतृत्वया ज्या यानागुया अनुभावयात कया कनादीगु खः। अथे हे भाषा आयोगया पुलांम्ह दुजः नापं प्रदेशं भाषा ऐन दयेकेगु नितिं निर्माण याःगु कार्यदलय् च्वना ज्या यानादीम्ह भाषाविद् अमृत योञ्जनं प्रदेशय् भाषा लागू यायेगु नितिं आः याकनं हे विज्ञ समुह गठन याना न्ह्याः वनेमाःगु खँय् बः बियादिल।

अथे हे कार्यदलया दुजः जुया ज्या यानादीम्ह प्रा. डा. ओमकारेश्वर श्रेष्ठं नं विज्ञ समुह गठन याना हे न्ह्याः वनेमाःगु खँय् बः बियादीगु खः। अथे हे नेवाः देय् दबू स्वनिगः विशेष प्रदेशया नायः श्रीकृष्ण महर्जनं भाषा ऐन हयेगु नितिं म्हिगः गुगु कथं भूमिका म्हितागु खः थौं लागू यायेगु नितिं नं उगु हे कथं भूमिका म्हिता ग्वहालि यायेत तयार दु धकाः धयादीगु खः।

सहलह ज्याझ्वलय् देय् दबू स्वनिगः विशेष प्रदेशया बरिष्ठ न्वकू नविन थेच्वमि, छ्याञ्जे गंगादेवी महर्जन, सचिवालय् दुजः अधिवक्ता नरेश श्रेष्ठ, भाषिक अभियन्ता अनुपसिंह सुवालं नं भाषा ऐन लागू यायेमाःगु खँय् बः बियादिसें थःगु बिचाः प्वंकादीगु खः।