बझाङय् निन्हुया दुने स्वकःतक भुखाय् ब्बःगु दु। बुधवाः न्हिनय् ३ बजे बझाङया धमेना केन्द्रविन्दु जूया ४.१ म्याग्निच्यूडया भुखाय् ब्बःगु दु।

म्हिगः बहनि ५ बजे जुया ८ मिनेटय् धमेना केन्द्र बिन्दु जुया ४.३ म्याग्निच्यूडया भुखाय् ब्बःगु खः। म्हिगः हे १ बजे जुया २ मिनेटय् बझाङया हे रायल केन्द्र जुया ३.९ म्याग्निच्यूडया भुखाय् ब्बःगु खः।

अमेरिकाया छगू स्कूलय् गोली चलेजुयाः निम्ह मनू सीगु दु। प्रहरीया कथं विद्यालयया छम्ह विद्यार्थीं गोली क्ययेकाः निम्ह मनूत सीगु खः।

घटनाय् मेपिं खुम्ह विद्यार्थी घाःपाः जूगु दु। विस्कन्सिन राज्यया छगू निजी क्रिश्चियन स्कूलय् शिक्षक व किशोरी विद्यार्थीपिन्त गोली क्ययेकाः स्याःगु १७ दँया मिसामचाया समाचार बीबीसीं पिथंगु दु।

गोली चलेयाःगु कारण धाःसा सार्वजनिक याःगु मदुनि। घटनाय् घाःपाः जूपिं निम्हेसिगु अवस्था गम्भीर जूगु समाचारय् उल्लेख यानातःगु दु। प्रहरीं छेँजःया ग्वाहालिइ मिसामचाया अनुसन्धान यानाच्वंगु दु।

अनुसन्धानया नितिं विद्यालय लिक्कया लँपु नं बन्द याःगु दु। स्थानीय संचार माध्यमया कथं थुगुसी जक अमेरिकान्यंकं ३८ गू स्कूल सुटिङ जूगु दु।

प्रधानमन्त्री केपी शर्मा ओलीें नगर प्रहरी वनिइगु इलय् जनता आतंकित जुइगु अवस्था वये मज्यु धका धयादीगु दु।

मंगलवाः यल महानगरपालिकाया स्थापना दिवसय् जुगु ज्याझ्वलय् सम्बोधन यायेगु झ्वलय् वयकलं यलया नगर प्रहरी याःगु प्रशंसा तक यानादीगु खः। जनप्रतिनिधि व कर्मचारी तय्स घमण्ड व तनाव मकासे सेवाभावं ज्या यायेमाः धका प्रधानमन्त्री ओलीं धयादीगु खः। ‘नगर प्रहरी खनेगु इलय् जनतां रक्षक वःगु कथं कायेमाः।

नगर प्रहरी वइगु इलय् जनता थःगु सामान याकन याकन सूचका बिस्यू वने म्वालेमाः थज्या आतंक याःगु अवस्था जुइमज्यु,’ प्रधानमन्त्री ओलीं धयादीगु दु। वयकलं जनप्रतिनिधिं शासक व हाकिम खः धका धायेगु प्रवृत्ति ल्वमकेमाः धका धयादीगु खः।

अथेहे वयकलं व्यवस्था हिल, अवस्था मह्यू धइगु भ्रम फैलै यानाच्वपि पाखे सचेत जुइत इनाप यासे प्रधानमन्त्री ओलीं देशय् व्यवस्था हिले धुका पूर्वाधार विकास व रोजगारी अप्पोया यक्को हे त तधःगु उद्योग सञ्चालनय् वःगु न दाबी यानादीगु दु।

नेप्से थौ मंगलवाः स्वंगू ल्याखं थहावना २६३३.८७ तक थ्यःगु दु। वंगु बिहीवाः १.२३ प्रतिशतं कुहावंगु नेप्से कारोबार जूगु न्हापागु दिं सोमवाः करिब २ प्रतिशतं घटे जूगु खः।

मंगलवाः थौ भचा थहावंगु खःसा कारोबार रकम धाःसा सुधार मजू। निन्हु कारोबार जूगुलि ६ अर्ब हाराहारी कारोबार जूगु खःसा थौ मंगलवाः जम्मा ४ अर्ब ३४ करोड तका जक सेयर कारोबार जूगु खः। मंगलवाः कारोबार जुगु १२ उपसूचकमध्ये न्ह्यगू उपसूचक मध्ये सीमान्त कथं थहावःगु खः।

न्यागु उपसूचक अथे कुहावंगु दु। दकलय् अप्पो फाइनान्स उपसूचक ०.८७ प्रतिशतं थहावःगु खःसा विकास बैंक उपसूचक दकलय् अप्पो ०.६५ प्रतिशतं कुहावःगु खः। सपोर्ट माइक्रोफाइनान्स व जानकी फाइनान्सया सेयर मूल्य सर्किट लेभलय् थहावंगु खः।अथेहे, सोमवाः सकारात्मक सर्किटय् थ्यना ३३ सय थ्यःगु कुथेली बुखारी साना जलविद्युत् आयोजनाया सेयर भाः थौ मंगलवाः नकारात्मक सर्किटय् वना २९७० य् थ्यःगु खः।

१ सय १७ कम्पनीया सेयर भा थहावंगु खःसा उलि हे कम्पनिया भाः कुहावःगु दु।

प्रधानमन्त्री केपी शर्मा ओलीं भ्रष्ट तयेगु ख्वाः स्वया मखु अपराध स्वया कारबाही जुइ धका दाबी यानादीगु दु।

मंगलवाः थौ यल महानगरया स्थापना दिवसया लसताय् जुगु ज्याझ्वलय् सम्बोधन यायेगु झ्वलय् प्रधानमन्त्री ओली अथे धयादीगु खः। ‘देय् याःगु अवस्था सचे यायेमाःगु दु। सुधार जुइ। देय् यात गरिबीपाखे च्वये यकेमाःगु दु।

सुशासन बिइमाःगु दु। भ्रष्टाचार नियन्त्रण यायेमाःगु दु,’ प्रधानमन्त्री ओलीं धयादीगु दु, ‘भ्रष्ट तयेगु ख्वाः स्वया मखु, अपराध स्वया कारबाही जुइ। देशय् सुशासन जुइ। जनतातय्त दुःख बिइपि कर्मचारी तयेसं न याये दइमखु। याये मज्यु।’ ओली धयादीगु दु जनप्रतिनिधि वा कर्मचारी न्ह्याम्हय् जूसा न जनताया सेवा यायेमाः।

‘झीपि जनताया सेवक खः, झीसं घमण्ड याये मज्यु,’ प्रधानमन्त्री ओलीं धयादीगु दु।