नेपाल आदिवासी जनजाति पत्रकार महासंघ(फोनिज) या गुक्वःगु संघिय समिति बैठक म्हिगः क्वचाःगु दु।

म्हिगः जुगु उगु मुज्यां मातृभाषा पत्रकारिता बिकास यायेगु नाप आःतक कार्यबाहक महासचिव जुयाच्वनादीम्ह समिर बलामीयात महासचिवय् नियुक्ति यायेगु निर्णय सर्वसम्मतं पारित यागु दु।

थ्व स्वया न्ह्यः महासचिव जुयाच्वनादीम्ह महासचिव मिलन लिम्बु वंगु उप निर्वाचन उम्मदवारी जुइगु निति वयकलं राजिनामा बियादीगु खः।

येँ महानगरपालिका १८ वडाया ग्वसालय् स्वलायंक जूगु धिमे स्यनेज्या जूगु दु।

उगु धिमे स्यनेज्या क्वचायेकाः दसिपौ लःल्हाःगु दु। पुष्पलाल स्मृति पार्कय् जूगु उगु ज्याझ्वलय् वडा अध्यक्ष न्हुछेकाजी महर्जनं प्रशिक्षार्थीपिंत दसिपौ लःल्हानादीगु खः।ज्याझ्वलय् मुक्कं ३५म्हेसिनं ब्वति काःगु खः।

दसिपौ लःल्हायेगु ज्याझ्वलय् प्रशिक्षार्थीपिनि पाखें साँस्कृतिक ब्वज्या नं जूगु खः । ज्याझ्वः वडा दुजः हेराशोभा महर्जनं न्ह्याकादीगु खःसा वडा दुजः हेमज्योती शाक्यं लसकुस यानादीगु खः।

धिमे स्यनेज्या गुरु अनिल महर्जनं (तुँछेँगल्ली) यानादीगु खःसा वय्कःयात ग्वाहालि सुजाता महर्जनं यानादीगु खः।

नेपालभाषा परिषदया छेँय् स्थापना जूगु चित्तधर हृदय स्मृति संग्रहालय भारतीय विदेश सचिव विक्रम मिश्री व नेपाःया शहरी विकास मन्त्रालयया सचिव मणिराम गेलालं उलेज्या यानादिगु दु।

उलेज्या याये धुंकाः विदेश सचिव मिश्रीं म्युजियम निरीक्षण नं यानादीगु खः। ४ करोड ७९ लाख दांया लागतय् दयेकूगु उगु छेँ पुनर्निर्माणया लागिं भारत सरकारं ग्वाहालि याःगु खः।

परिषदया छेँय् वय्कःपिंत नेपाल– भाषा परिषदया नायः प्रा. सुवर्ण शाक्य, पुलांम्ह नायः फणीन्द्ररत्न वज्राचार्य लिसें पदाधिकारीपिंसं लसकुस यानादीगु खः।

ललितपुर महानगरपालिका १६ वडा कलाकार समितिं वइगु भाद्र १ गते शनिवार नेपालभाषाया संकिपा ‘तिबः द सपोर्ट’ क्यनीगु जूगु दु । सुथसिया ८ः३० बजे व ११ः३० बजे येँया विश्वज्योति सिनेप्लेक्सय् क्यनीगु थुगु सकिंपा रवि सायमिं निर्देशन यानादीगु लोकं ययेकूगु संकिपा खः । न्हूगु पुस्ताया विदेश मोहं ज्येष्ठ नागरिकपिनिगु जीवनय् लाःगु लिच्वःयात मनय् थीक न्ह्यब्वयातःगु थुगु संकिपा १६ शोनिसें लगातार हाउसफूल जुयाच्वंगु निर्देशक सायमि कयादीगु दु ।

सरजु रंजित व समिता रंजित श्रेष्ठं निर्माण यानादीगु थुगु संकिपाया छायाँकन व सम्पादन अमर चित्रकार, संगीत भूपेन्द्र बज्राचार्यं यानादीगु खः । संकिपातय् सुशील राजोपाध्याय, आशाकाजी थकु, संघरत्न शाक्य, सरस्वती मानन्धर, मैंया मुनिकार, सुनीता श्रेष्ठ, मनोज महर्जन, श्रृष्टि महर्जन, पुष्करभक्त माथेमा लगायत कलाकारपिनिगु अभिनय दुथ्याः ।

ब
कला व कलाकारिता ख्यःया नितिं समपित जुयाः न्ह्यज्यानाच्वंगु ललितपुर महानगरपालिका १६ वडा कलाकार समितिं थुगु समितियात आर्थिकरुपं धिसि धायेकेत थुगु शो यानागु खँ समिति संयोजक सुरजवीर बज्राचार्यं कनादीगु दु । वडाया ग्वाहालि बाहेक नं मेमेगु सशक्त ज्याझ्वः यानाः कला ख्यलय् थप सक्रिय जुइत थुगु शो ग्वसाः ग्वयागु जुयाः सकलसित टिकट न्यानाः प्याखं स्वयादीत नं वय्कलं इनाप यानादीगु दु । थुकिं नेपालभाषाया संकिपा ख्यः, कलाकारिता ख्यलय् न्हूगु सशक्त ज्याझ्वः यायेत व टिकट मियाः ग्वाहालि यानादीपिन्त नं ग्वाहालि जुइकथं ब्यवस्था यानागु खँ नं वय्कलं कनादिल ।  

कलाकार समितिं झी नेवाःतय्गु नखःचखः येँयाःपुन्ही, न्हूदँया भिंतुना, श्रीपञ्चमी शास्त्रीय नखः, होलीया मेला थें जाःगु पर्वय् लसता हना ज्याझ्वः, म्ये व हुलाप्याखं कासा, नेवाः कलाकार मुना, म्यूजिक भिडियो वर्कशप, ‘ललित रत्न’ हना थें जाःगु थीथी ज्याझ्वः यानाः वयाच्वंगु दु ।

वरिष्ठपिन्त हना, न्हूपिन्त हःपा व थुगु पुस्ताया लोकं ययेकूपिं कलाकारपिन्त दबू दयेकेगु तातुनां ४ दँ न्ह्यः वडा १६ पाखें कलाकार समिति नीस्वंगु खः ।

 

ओली प्रधानमन्त्री केपी शर्मा ओलीं देशय् गरिबी मुक्त याये मफुत धाःसा समृद्ध नेपाः व सुखी नेपाःमिया राष्ट्रिय आकांक्षा पूवनी मखु धका धयादीगु दु।

प्रधानमन्त्री ओलीं थौं जिल्ला स्थापना व ‘लायन्स इन्टरनेशनल डिस्ट्रिक्ट ३२५के’ या न्हापांगु मन्त्रिपरिषदयात सम्बोधन यासें नेपाःयात अविकसित राज्यपाखें स्तरोन्नति यायेत रोजगारी, उत्पादन व उद्यमशीलताय् बः बियादीगु खः। “देशय् २० प्रतिशत नागरिक अझ नं गरिबी रेखा स्वयां क्वय् लानाच्वंगु दु।“ भोकमरीइ लानाच्वंपिं मस्त व मनूतय्त नयेगु वातावरण दयेके मफुत धाःसा समृद्ध नेपाःया कल्पना यायेगुया अर्थ मदु।

वइगु असोजया न्हापांगु वालय् संयुक्त राष्ट्र संघया महासभाय् नं थ्व विषय खँ ल्ह्वनिइगु जुइ धका धयादीगु दु। मानव जगतया सुरक्षा, शान्ति व समृद्धि झीगु मंकाः चिउताः खः । मानव जगत सुरक्षित मजूसा पृथ्वीया सुरक्षा खतराय् लायेफु। अन अशान्ति जुइफु। उकिं सकसिनं मानव अधिकारया संरक्षण हे न्हापांगु दायित्व खः धका धयादीगु खः। “जिं भ्रष्टाचार नं यायेमखु, जुइके नं बीमखु ।“ जिं छुं नं हालतय् थःगु नामय् राष्ट्रया सम्पत्ति हयेमखु ।’’

प्रधानमन्त्री ओली संकल्प यानादीगु खः। प्रधानमन्त्री ओलीं समाजयात संगठित यायेगु ज्या राजनीति व राजनीतिक दलया हे जूगु उल्लेख यासें असत्य वा असत्य खँया आधारय् मनूतय्त अपमान यायेगु व बदनाम यायेगु प्रवृत्ति बालागु खँ मखु धका धयादिगु खः।