राष्ट्रिय मुक्ति क्रान्ति अभियान अन्तर्गतया नेवाः राष्ट्रिय परिषदं भद्रकाली प्रदर्शनया झ्वलय् ज्वनायंकूपिन्त बुधबाःया दुने मत्वःतूसा प्रहरी चौकी घेराउ यायेगु चेतावनी ब्यूगु दु।

सोमबाः येँय् पत्रकार सम्मेलन यासें परिषदया कजि सुमन साय्मिं लोकतन्त्रय् शान्तिपूर्ण आन्दोलनय् तकं प्रहरीं याःगु धरपकड स्वीकार्य मदुगु धासें ज्वनायंकूपिंमध्ये सार्वजनिक मुद्दाय् तःपिं खुम्हेसित बुधबाःया दुने निःशर्त रिहाइ यायेत चेतावनी ब्यूगु खः। ‘जिमिसं ला छुं नं म्वाःमदुगु, अराजक कथंया ज्या यानागु मदु।

लोकतन्त्रय् शान्तिपूर्ण सांस्कृतिक प्रदर्शन यानां तकं प्रहरीं जिमि १२म्ह पासापिं ज्वनायंकाः खुम्हेसित सार्वजनिक मुद्दा हे तयाः कुनातःगु दनि। बुधबाःया दुने वय्कःपिन्त मत्वःतल धाःसा वयां लिपा पिहांवइगु लिच्वःया जिम्मेवारी राज्यं कायेमाली’ कजि साय्मिं धयादिल। बहुलराष्ट्र राज्य स्थापना व नेपाः मण्डल प्रदेश घोषणा मजूतल्ले थःपिं मदीगु साय्मिया धापू खः।

उगु हे ज्याझ्वलय् न्ववासें अभियानया नेता लिसें पूर्व उपप्रधानमन्त्री राजेन्द्र महतों बुद्ध बूगु देशय् प्रहरीं बौद्ध भिक्षुयात लाकमं च्वायेगु ज्या तसकं निन्दनीय जूगु धयादिल। नश्लीय सोच दुपिन्सं बहुलराष्ट्रया अवधारणा स्वीकार याये मफयाच्वंगु धासें महतों बहुलजाती, बहुलसंस्कृति दुगु देय् धइगु अथें हे बहुलराष्ट्रिय जुइधुंकूगु धयादिल। ‘राज्य अझं नं एकलजाती, एकनश्लीय हे जुयाच्वंगु दु। थीथी धर्म, संस्कृति, समुदाय जूगु देशय् बहुलराष्ट्रिय राज्य स्थापना याकेगु जिमिगु लक्ष्य खः। थ्व छगू माग शान्तिपूर्ण ढङ्गं तयाबलय् नं राज्यं सहः याये मफूगु खनेदत’ महतों धयादिल।

ज्याझ्वःया मेमेपिं वक्तातय्सं विनाकारण प्रहरीं निर्दोष मनूतय्त लाठीचार्ज यायेगुलिसें धरपकड याःगु दावी याःगु खः। प्रदर्शनया सहभागी मखुपिं भद्रकालीइ दर्शन यायेत वयाच्वंपिं तामाङतय्त तकं प्रहरीं छ्यंगुया बुँट न्ह्यानाः भद्रकालीइ हे दुहांवनाः दाःवंगु परिषदं धाःगु दु। थ्वयां न्ह्यः वंगु शनिबाः परिषदं येँय् नेपाः मण्डल प्रदेश घोषणाया माग तसें येँय् सांस्कृतिक जुलुस पिकाःगु खः। नेवाःलिसें थीथी समुदायं थःथःगु बाजागाजा थानाः बसन्तपुलिं ¥याली पिकयाः तिंख्यः जुयाः भद्रकाली थ्यंगु खः।

भद्रकालीइ कोण सभा यायेगु ज्याझ्वः क्वःछिनातःगुलिइ प्रहरीं निषेधित क्षेत्र धासें भद्रकाली थ्यनेवं ¥यालीयात पंगु खः। प्रहरीं पंक पंक नं ¥याली न्ह्याःवनेत स्वःबलय् प्रहरीं लाठी चार्ज याःगु खःसा लाठी चार्ज ३०म्ह धइथें प्रदर्शनकारीत घाःपाः जूगु परिषदं धाःगु दु। प्रहरीं मिसात व बौद्ध भिक्षुतय्त तकं लित्तुलिनाः हे दाःगु परिषदया कुंखिना दु।

उगु इलय् प्रहरीं १२ प्रदर्शनकारी ज्वनायंकूगु खःसा खुम्हेसित त्वःतेधुंकल। मेपिं खुम्हेसित सार्वजनिक मुद्दा तयाः कुनातःगु दनि।

नागरिक उन्मुक्ति पार्टी (नाउपा)या सुदूरपश्चिम प्रदेश सभा सदस्य इन्दिरा गिरी पदमुक्त जूगु दु।

सभामुख भीमबहादुर भण्डारीया निर्देशनय् प्रदेश सभा सचिवालयं गिरी पदमुक्त जूगु सूचं पिकागु खः। थौ सोमवाः पिकागु सूचलय् धयातःगु दु, ‘‘प्रदेशसभा सदस्य माननीय इन्दिरा गिरीयात लित सतःतिइगु धयातःगु सुदूरपश्चिम प्रदेश सभाया सचिवलयय् पेश जूगु राजनीतिक दलसम्बन्धी ऐन २०७३ या दफा ३५ बमोजिम सूचं प्रकाशित यायेत सभामुखया निर्देशन जुगुलि जानकारीया लागि थुगु सूचं प्रकाशित जूगु दु।’

सरकारयात कया आन्तरिक विवाद जुगुलि नागरिक उन्मुक्ति पार्टी (नाउपा) या अध्यक्ष रञ्जिता श्रेष्ठ चौधरीं गिरीयात लित सःतिइगु पौ सभामुखयात छ्वःगु खः। समानुपातिक सांसद गिरी कांग्रेस संसदीय दलया नेता कमलबहादुर शाह नेतृत्वया सरकारय् कृषि राज्यमन्त्री जूगु खः।

भद्रकालीइ न्यासी वना च्वपि भिक्षुयात लाकमं प्यकूपि प्रहरीतय्त कारबाही याइगु जुगु दु धका प्रहरी प्रधान कार्यालयं धाःगु दु।

प्रहरी प्रधान कार्यालयं सामाजिक सन्जालय् छगु सूचं पिकासे उगु घटनाय् दुथ्यापि प्रहरी कर्मचारीयात विभागीय कारबाही यायेगु ज्या न्ह्याकूगु दु धका जानकारी बिःगु दु। वंगु शनिवाः राजेन्द्र महतो नेतृत्वय् राष्ट्रिय क्रान्ति अभियानं यागु प्रदर्शनया झ्वलय् प्रहरी व प्रदर्शनकारी दथुइ ल्वापू जुगु खः।

उगु झ्वलय्  न्यासी वनाच्वपि निम्ह भिक्षुयात लाकमं प्यकूगु खः। छम्ह भिक्षयात प्रहरीं लिउने लाकमं प्यकूगु भिडिओ सामाजिक सन्जालय् तसकं भाइरल जूगु खः। उगु भिडिओ सामाजिक सञ्जालय् पोस्ट यासे गृहमन्त्री रवि लामिछाने व नेपाल प्रहरीया तसकं आलोचना जूगु खः। तर अय्न थुगु घटनायात कया गृह मन्त्रालय व गृहमन्त्री रवि लामिछानेया आःतक न छु धापू पिहावःगु मदुनि ।

नेपाल प्रहरी धासा भिक्षुयात जुगु दुर्व्यवहारया सम्बन्धय् नेपाल प्रहरी प्रधान कार्यालयया गम्भीर ध्यानाकर्षण जूगु दु धका धाःगु दु। नाप उगु घटनाय् दुथ्यापि प्रहरी कर्मचारीयात विभागीय कारबाही न्ह्याकेगु ज्या न्ह्यागु दु धका तक उगु सूचं पिकाया जानकारी बिगु खः ।

गण्डकी प्रदेशया मुख्यमन्त्रीइ एमाले संसदीय दलया नेता खगराज अधिकारी नियुक्त जूगु दु। प्रदेश प्रमुख डिल्लीराज भट्टं संविधानया १६८ या उपधारा २ कथं अधिकारीयात मुख्यमन्त्री नियुक्त यागु दु।

अधिकारीं एमाले, माओवादी केन्द्र व दीपक मनाङेया समर्थनय् आइतवाः प्रदेश प्रमुखयात दाबी पेस याःगु खः। कांग्रेसं सभामुखया न समर्थनय् याःगु दाबी असंवैधानिक धासे मुख्यमन्त्री नियुक्त मयायेत इनाप याःगु दु।

थौ हे न्हिनय् शपथ ग्रहण याइगु कथं प्रदेश प्रमुखया कार्यालयं धाःगु दु।

लुँया भाः थौ न्हुगु रेकर्ड कायम जूगु दु।

थौ लुँ तोलां २ हजार ९ सय थहावना १ लाख ३५ हजार ६ सय कायम जूगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न्यय् न्यातका थहावंगु दु। वहः तोलां न्यय् न्यातका थहावना १ हजार ६ सय ७० थ्यःगु दु धका महासंघं धाःगु दु।