नेपाल आदिवासी जनजाति पत्रकार महासंघ (फोनिज) न स्थापना दिवसया लसताय् थुगु दँय् सिरपाः काइपिनिगु नां सार्वजानिक याःगु दु।

फोनिज कार्यबाहक महासचिव समिर बलामीं म्हिगः पिथगु बिज्ञप्तिइ सिरपा काइपिं खुम्ह पत्रकार पिनिगु नां प्रकाशन याःगु दु। फोनिज राष्ट्रिय पत्रकारिता सम्मान २०८१ विजयरत्न असंबरे व पुष्पहरि क्याम्पा राईलयात लःल्हाइगु जूगु दु। अथेहे फोनिज मातृभाषा पत्रकारिता सम्मान थारु भाषाया पत्रिका लौव अग्रासनयात बिइगु जूगु दु।

फोनिज राष्ट्रिय पत्रकारिता पुरस्कार २०८१ सिरपा सटेन्द्र जबेगु, विष्णु तामाङ व खिमा गुरुङयात लःल्हाइगु जुगु दु धका फोनिजया कार्यबाहक महासचिव बलामीं जारी याःगु विज्ञप्तिइ उल्लेख याःगु दु। फोनिजं थःगु स्थापना दिवस थ्व हे साउन २७ गते येँ छगु ज्याझ्वःयासे सिरपा लःल्हाइगु जुगु दु।

अथेहे फोनिज स्थपना जूगु २५ दँ फुना २६ दँ दुगु लसताय् थीथी ज्याझ्वःयाना रजत दँ हनिइगु जूगु दु।

नेपाल प्रहरीइ प्यम्ह अतिरिक्त महानिरीक्षकपिन्त सरुवा याःगु दु।

मंगलवाः च्वंगु मन्त्रिपरिषदया बैठकं केन्द्रीय अनुसन्धान ब्यूरो (सीआईबी) य् दीपक थापा, उपत्यका प्रहरी कार्यालयय् किरण बज्राचार्य, प्रदेश समन्वय विभागमा श्यामलाल ज्ञवाली व कार्य विभागय् रामदत्त जोशीयात सरुवा यागु दु।

थ्व स्वया न्ह्यः ज्ञवाली सीआईबी प्रमुख खःसा थापा उपत्यका प्रहरी कार्यालयय् खः। बज्राचार्य प्रहरी प्रधान कार्यालयय् व जोशी नकतिनि बढुवा जूगु खः।

शेयर बजाः थौ तसक कुहावःगु दु। शेयर बजाः परिसूचक नेप्से थौ १ सय ४५ दशमलव शून्य ५ ल्याखं कुहावया २ हजार ६ सय ५१ दशमलव ३२ विन्दुइ थ्यःगु दु।

नेप्से थौ आःतक हे दकलय् अप्पो ल्याखं कुहावःगु दु। दक्को समूहया शेयर कुहावगुलि बीमा, होटल, उत्पादन, विकास बैंक, बैंकिङ, फाइनान्स, जलविद्युत्, व्यापार समूहया शेयर तधकं कुहावःगु खः।

थौ च्यागु कम्पनीया शेयर नकारात्मक सर्किटय् वःगु खः।अथेहे १२ गु कम्पनीया शेयर ९ प्रतिशत स्वया अप्पो कुहावःगु खः। बजाः यक्को ल्याखं कुहावंसा थ्री स्टार जलविद्युत् कम्पनीया शेयर १० प्रतिशत व कुथेली बुखारी हाइड्रोपावर कम्पनीया शेयर झन्डै १० प्रतिशतं थहावंगु दु।

बजाः कुहावःसा कारोबार रकम धाःसा ऐतिहासिक रेकर्ड कायम याःगु दु। थौ ३ सय २२ गु कम्पनीया ५ करोड ३८ लाख कित्ता शेयर २३ अर्ब ७१ करोड रुपैयाँया कारोबार जूगु दु। थ्व कारोबार रकम आःतक हे दकलय् अप्पो खः। थ्व स्वया न्ह्यः साउन १६ गते छन्हु हे २१ अर्ब ९१ करोड तक बराबरया शेयर कारोवार जूगु खः।

प्रधानमन्त्री केपी शर्मा ओलीं संघीयताया कार्यान्वयन, सुशासन कायम, जनताया सेवा प्रवाह व निराशा चिरे यायेगु लागि निगु तधःगु दल दथुइ सरकार सञ्चालन यायेगु सहकार्य जूगु धका धयादीगु दु।

सिंहदरबारस्थित प्रधानमन्त्री व मन्त्रिपरिषद कार्यालय बागमती प्रदेशया न्हुम्ह मुुख्यमन्त्री बहादुुरसिंह लामा व मन्त्रीपि सहलह यायेगु झ्वलय् प्रधानमन्त्री ओलीं संघीयतानाप प्रदेशया औचित्य व जनताया विकासया चाहना पूवकेु अभिभारायात ध्यान बिइत इनाप याःगु दु।

‘देशय् विषम् परिस्थितियात आत्मसात् याना नेपाली कांग्रेस व नेकपा (एमाले) दथुइ समीकरण जूगु खः। थ्व समीकरण भागबण्डा व नियुक्तिया लागि जूगु मखु,’ प्रधानमन्त्री ओलीं धयादीगु दु,‘देशय् राणा शासन व पञ्चायतया अन्त्यनिसे सशस्त्र संघर्षयात बालाक्क व्यवस्थापन, गणतन्त्र व संघीयताया लागि थुगु निगु तधःगु दल मिले जूया देशया संकट समाधान जूगु खः।

आर्थिक लगायत देशया विषम परिस्थितिया निति आःयागु विशेष संकल्पनाप झीगु सहकार्य जूगु खः।’धका धयादीगु खः।

वयकलं थीथी ख्यलय् खने दुगु विषमतायात क्वचाय्केगु व जनताया समृद्धि व सुखया लागि सरकार गठन जुगुलि प्रदेश सरकारं थुकिया ध्यान बिइमाः जनताया दुख, विकासया अवस्था, शिक्षा, स्वास्थ्य, कृषि उत्पादन, पूर्वाधार विकास, रोजगारी, सुशासनयात प्रत्याभूति कायम यायेगु निति थःगुपाखे ज्यायायेत इनाप यासे प्रधानमन्त्री ओलीं सार्वजनिक खर्चयात मितव्ययी व बालाक्क व्यवस्थापन यायेत, राजस्व अप्पोकेगु व सार्वजनिक सम्पत्तियात बालाक्क सदुपयोग यायेगु विषययात  न ध्यान बिइत इनाप यानादीगु खः।

वरिष्ठ संगीतकार, तबला वादक नाप रेडियो नेपाल संगीत शाखाया प्रमुख मनराजा नकःमिया मां मन्त।

वयकःया मां सिरीमाया नकःमि शनिवाः मदुगु खः। ९१ दँया सिरीमाया नकःमिया छम्ह काय् ,प्यम्ह म्ह्याय् पि दी।