शेयर बजाः लगातार थौ नाप न्यान्हु तक कुहावना च्वंगु दु।

वंगु आइतवाः निसे कुहावया च्वंगु शेयर बजाः परिसूचक नेप्से थौ २ दशमलव ७३ अङ्कं कुहावया २ हजार ४ दशमलव शून्य ५ विन्दुइ कुहावःगु दु।थौ फाइनान्स, होटल लिसे पर्यटन, माइक्रोफाइनान्स, निर्जीवन व व्यापारबाहेक दक्को समूहया शेयर कुहावःगु दु।

उत्पादन व प्रशोधन समूहया शेयर दकलय् अप्पो १ सय १० अङ्कं कुहावःगु दु। अथेहे पिपुल्स पावर कम्पनीया शेयर ९ प्रतिशत स्वया अप्पो कुहावःगु दु। समग्र बजाः कुहावःसा मानुषी लघुवित्त व मनकामना स्मार्ट लघुवित्त कम्पनीया शेयर १० प्रतिशतं थहावःगु दु। बजाः कुहावःसा थौ कारोबार रकम धाःसा सुधार जूगु दु।

स्वसः व निगु कम्पनीया ६९ लाख ६३ हजार कित्ता शेयर ३ अर्ब ३ करोड रुपैयाँया कारोबार जूगु दु। दकलय् अप्पो गुर्खाज फाइनान्स कम्पनीया २३ करोड ३२ लाख रुपैयाँया शेयर कारोवार जुगु दु।

गायक राजेश पायल राई प्रहरी ज्वंगु दु। अय्ला त्वःना हल्ला याःगु द्धपनय् राईयात वंगु चान्ह्यः प्रहरी ज्वंगु खः।

राजेश पायल राई नाप स्वम्हेसित मदन भण्डारी कलेज न्ह्यने ज्वना प्रहरी वृत्त नयाँबानेश्वरय् तयातःगु दु धका काठमाडौं उपत्यकाया प्रहरी कार्यालयया एआईजी दीपक थापां जानकारी बिःगु दु।

वंगु चान्ह्यः जक स्वनिगलय् १७२ म्हेसित प्रहरीं नियन्त्रणय् काःगु दु।

नेपालभाषा एकेदेमिपाखें नेवाः सांस्कृतिक ज्ञानकोश पिदनीइगु जूगु दु।

येँ महानगरपालिकाया ग्वाहालिं पिदनेत्यंगु उगु ज्ञानकोशयात कयाः नेपालभाषा एकेदेमिइ छगू ज्याझ्वः याःगु खः। नेपालभाषा एकेदेमिया भाइस चान्सलर मल्ल के सुन्दरं ज्ञानकोशय् न्ह्यथनातःगु थीथी खँया जानकारी बियादीगु खः।

वय्कलं नेवाः सांस्कृतिक ज्ञानकोशय् मुक्कं न्यागू ब्वः न्ह्यथनातःगु जानकारी बियादिसें न्हापांगु ब्वः नेवाः म्हसीका, निगूगु ब्वः नेपालभाषा साहित्य, लिपि, ब्याकरण व शब्दकोश, स्वंगूगु ब्वः संस्कृति व सम्पदा, प्यंगूगु ब्व प्रविधि, शिल्प व ज्ञान, अथेहे न्यागूगु ब्वः संगीत, वाद्य, नाट्य, फिल्म दुथ्याःगु दु।

भाइस चान्सलर सुन्दरं थथे न्यागू ब्वय् दुथ्याःगु ज्ञानकोश दुने छगू ब्वय् विषयगत धलः व सम्बन्धित किपाःत नापं दुथ्याकाः म्होतिं नं न्यासः पेज दूगु धका जानकारी बियादिगु खः। अथेहे, वय्कलं न्यागू ब्वनापं यानाः स्वीच्यासः पेज दुथ्याःगु जानकारी बियादीगु दु।

लुँ तोलां थौ १ हजार ८ सय तका थहावंगु दु। लुँ तोलां १ हजार ८ सय तका थहावना १ लाख ३३ हजार थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां थौ स्वीन्यातका थहावंगु दु। वहः तोलां स्वीन्यातका थहावना १ हजार ६ सय १० तका न कारोबार जूगु दु धका महासङ्घं धाःगु दु।

यलया ऐतिहासिक नेवाः बस्ती ख्वनाया १२ दँया सिकाली अजिमा जात्रा वइगु चिल्लागा दशमी (चैत्र २२ गते) येँय् हइगु जूगु दु।

येँय् छगू पत्रकार सम्मेलन यासें सिकाली अजिमाया १२ दँया जात्रा येँय् हयेत्यंगु सम्वन्धय् जानकारी ब्यूगु खः। पत्रकार सम्मेलनय् ज्यापु महागुथि येँ महानगर समितिया नायः लिसें सिकाली अजिमा जात्रा व्यवस्थापन तथा समन्वय समितिया कजि पञ्चलाल महर्जनं वइगु चैत्र २२ गते सिकाली अजिमा जात्राया द्यःगणपिं ख्वनां न्यासि हे वयाः येँय् बिज्याकेत्यंगु जानकारी बियादिल।

थःगु खँ तयेगु झ्वलय् कजि महर्जनं राष्ट्रया हे म्हसीका जुयाच्वंगु समुदायं ल्यंकातःगु परम्परागत मूतं अमूर्त सम्पदाया संरक्षण राज्यस्तरं हे यायेमाःगु माग तयादिल। ‘थज्याःगु हे द्यःप्याखंलिसें समुदायं दयेकूगु थीथी अमूर्त लिसें मूर्त सम्पदात राष्ट्रया हे म्हसीका जूगु दु। थुकीया संरक्षण, दीगो व्यवस्थापनया लागिं राज्यं हे अपनत्व लिएर कयाः न्ह्याःवनेमाः’ कजि महर्जनं धयादिल।

सिकाली अजिमाया येँय् जुइगु जात्राया धलः कथं चैत्र २२ गते द्यःगणपिं ख्वनां येँया पचली थ्यनीगु व पचलीं येँया थीथी थासं वनाः हनुमानध्वाखा नासः चुकय् थ्यंकी। व झ्वलय् द्यःगणपिं पचलीं मचली, चल्खु, मुसुंबहाः जुयाः सिकाली, कुमाःननि, ओन्दे, ह्यूमत, न्हूघः, क्वहिति, भिंद्यःत्वाः, मरु, प्याफः, कम्पुकोटया आर्मी गेटं मखन महिन्द्रेश्वर महादेवया लं हनुमानध्वाखा नासः चुकय् थ्यनी।

परम्परा कथं हनुमानध्वाखा दरवारय् स्वंगू द्यःप्याखं क्यनी। २२ व २३ गतेकुन्हु नासः चुकय् द्यःप्याखं क्यनीसा २९ व ३० गते तलेजु देगः न्ह्यःनेया त्रिशुल चुकय् सिकाली अजिमा द्यःगणया प्याखं क्यनी। २०८१ बैसाख ९ व १० गतेया दिनय् हनुमानध्वाखा पिने कालभैरव ल्यूनेया दबुलिइ द्यःप्याखं क्यनी। अथेहे जन समुदायपाखें माग व व्यवस्थापन जूसा वंगः, लगं व सिँल्यःसतःलिसेंया थासय् नं प्याखं न्ह्यब्वइगु जात्रा व्यवस्थापन तथा समन्वय समितिं धाःगु दु।

हनुमानध्वाखाय् जुइगु स्वंगू द्यःप्याखंया नितिं करीब १७ लख तका मालीगु व मेथाय् प्याखं क्यनेत स्थानीयपाखें हे दक्वं व्यवस्थापन जुइमाःगु समितिं धाःगु दु। थुगुसी सिकाली जात्राया १२ दँया मेला जूगुलिं सिकाली अजिमा द्यःगण येँय् वयाः थीथी थासय् द्यःप्याखं क्यनेत्यंगु यल महानगरपालिका २१ वडाया वडाध्यक्ष रविन्द्र महर्जनं धयादिल।

‘थ्व प्याखं न्हापा किपुलिइ नं यंकेमाःगु खः गुगु आः दीधुंकल। अथेहे, मेथाय् थीथी थासय् नं यंकेमाः। यल महानगरपालिकापाखें नं बजेट फ्यानाः कोष दयेकाः परम्परायात निरन्तरता बियाच्वनागु दु’ वडाध्यक्ष महर्जनं धयादिल । १२ दँया जात्रा जूगुलिं द्यःगणया न्हूगु वसः, ख्वाःपाः दयेकेत, पूजा व्यवस्थापन आदिया लागिं ६० लखया कोष दयेकागु महर्जनं जानकारी बियादिल।

पत्रकार सम्मेलनय् येँ महानगरपालिका १२ वडाया वडाध्यक्ष बालकृष्ण महर्जन, वडा सदस्यपिं, ज्यापु महागुथि येँ महानगर समितिया पदाधिकारी, दुजःपिनिगु नं उपस्थिती दुगु खः।