धरान उपमहानगरया खानेपानी आपूर्ति बोर्डं लः जडान शुल्क व महसुल अप्वयेकूगु दु।

नगर प्रमुख हर्क साम्पाङया अध्यक्षताय् दूगु धरान खानेपानी व्यवस्थापन बोर्डं साउन १ गतेनिसें लागू जुइगु कथं लःया महसुल व शुल्क अप्वयेकूगु दु। राजनीतिक दल व जनप्रतिनिधिपिन्सं लःया महसुल थकाःगु सम्बन्धय् सहलह मजूगु खँ धका धाःगु दु।

मेयर हर्क साम्पाङं एकतर्फी कथं कर अप्वयगुलि जनप्रतिनिधिलिसें राजनीतिक दलत नं असन्तुष्ट जूगु दु। झीगु राजनीतिक दलं आइतवाःनिसें बोर्डया न्हूगु नियमावलीइ चरणबद्ध विरोध यायेगु घोषणा याःगु दु। महसुल म्हो यायेत सरोकारवाला पक्षलिसे सहलह यायेगु घोषणा याःगु पार्टीं वइगु १८ गते फुक्क वडाय् ध्यानाकर्षण पौ लःल्हायेगु व साउन २० गतेनिसें धर्ना सुरु यायेगु धका धाःगु दु।

पुलांगु शुल्क कायम यायेत दलतसें साउन ११ गते बोर्डयात ७२ घण्टाया अल्टिमेटम ब्यूगु खः। नेपाली कांग्रेसया नगर अध्यक्ष श्याम पोखरेलं मेयर हर्क साम्पाङयात जानकारी बिइधुंकाः बोर्डया अध्यक्ष तकं जुयाच्वंम्ह मेयर हर्क साम्पाङं खँ मन्यगुलि आन्दोलनया घोषणा याःगु खः।

नेपाल आयल निगमं पेट्रोलियम पदार्थया भाः क्वकाःगु दु। निगमया संचालक समितिं थौ चान्ह्यः १२ वजेनिसे लागू जुइगु कथं पेट्रोल, डिजेल व मचिकंया भाः क्वकायेगु निर्णय याःगु दु।

निगमया कथं पेट्रोल लिटरय् छतका व डिजेल व मचिकं लिटरय् नितका क्वकाःगु दु। न्हूगु भाः कथं येँ, पोखरा व दिपालय्, पेट्रोल लिटरं १७० तका दां तुइगु जूगु दु।

डिजेल व मचिकंया मू लिटर न्हापांगु श्रेणीइ १५५ रुपैयाँ ५० पैसा, निगूगु श्रेणीइ १५७ व स्वंगूगु श्रेणीइ लिटरं १५८ तका तुइगु जूगु दु।

वंगु चान्ह्यः मदिक्क वा वया खुसि बा वया यलय् थीथी थासं २४ म्हेसित प्रहरीं उद्धार याःगु दु। प्रहरीं बागमती करिडोरं स्वम्ह मस्त, च्याम्ह मिसा व झीस्वम्ह मिजंपियाना २४ म्हेसित उद्धार याःगु दु।

प्रहरीया कथं यूएन पार्कं छम्ह मिजं व छम्ह मिसायाना निम्ह, सुन्दरीघाटं प्यम्ह मिजं व प्यम्ह मिसायाना च्याम्ह, बालकुमारी त्वाँय् छम्ह, महालक्ष्मी नगरपालिका–७ चागाथलीइ निम्ह मस्त व निम्ह मिसा नाप स्वम्ह मिजंपियाना न्ह्यय् म्ह, सानेपास्थित राम मन्दिर नापं छम्ह मिसा व छम्ह मचा नाप प्यम्ह मिजंयाना खुम्हेसित उद्धार याःगु दु।

प्रतिभा समाजया ३० क्वःगु दँमुज्याँ व प्रतिभा बुक बैकया दँमुज्या नाप सातोआकी इटो स्मृति दिवसया लसताय् छगु ज्याझ्वः जूगु दु।

उगु ज्याझ्वलय् योङ पिकासोया प्राविधिक ग्वाहालि छगू चित्रकला कासा ज्याझ्वः जूगु खः। उगु कासाय् ३६ गू ब्वनेकुथिया ४० म्ह मस्तय्सं ब्वति काःगु खः। कासाय् बालकिशोर चौधरी, सीतु मास्के व राजकुमार महर्जनं निर्णायकया रुपय् ज्या यानादीगु खः।

सिनियरपाखे न्हाप– नोरिन श्रेष्ठ, ल्यू– पालिजा महर्जन, लियांल्यू जेनिसा बज्राचार्य व प्यंगुगु थासय् प्रजना श्रेष्ठ लागु खः। अथेहे जुनियरय् न्हाप उत्सव चौधरी, ल्यू श्रीजल अधिकारी, लियांल्यू आशिर्य देसार, हःपाः सिरपा मैत्री शाक्य व सिरपा नुसला श्रेष्ठयात बिशेष सिरपाः इन्द्रेणी प्रधानं त्याकादीगु खः। ज्याझ्वःया मूपाहाँ यल महानगरपालिकाया उप मेयर मन्जली शाक्यं हना पौ, प्रतिभा समाजया नायः डा.बज्रराज शाक्यं नगद सिरपा व सचिवं किरणनरसिं शाक्यं मेडल लःल्हानादीगु खः।

अथे हे प्रतिभा बुक बैकं झीनिगु तःगिमय् ब्बनिइपिन्त सफू लःल्हायेगु ज्या न जूगु खः। शोभा बज्राचार्यं न्ह्याकादीगुलि समाजया नायः डा.बज्रराज शाक्यया सभाध्यक्षताय् जूगु उगु ज्याझ्वलय् डा.चुन्दा बज्राचार्य, शाक्य सुरेन त्रिरत्न कोषया अध्यक्ष सुदन रन्त बज्राचार्य व अजय देशारपिनिगु न ब्बति दुगु खः।

दँ मुज्याँया लसताय् बोधिबृक्ष सिमाक्व (बुद्ध धर्म सम्वन्धी) व साहित्य फल्चा साहित्य सम्वन्धि अन्तरक्रिया ज्याझ्वः न जूगु खः।

बल्खु खुसिइ छम्ह मनू सीउगु दु। थौ चान्ह्यः तसकं वा वःगुलि बल्खु खुसि बा वया उम्ह मनू सीउगु जुइ अनुमान यागु दु धका उपत्यका प्रहरी कार्यालय, रानीपोखरीं धाःगु दु।

उम्ह मनू बाँके छेँ दुम्ह सुकुम्बासी वस्तीइ च्वना च्वम्ह ४५ दँ दुम्ह राम सरुप महतो खः। थौ सुथय् ७ः३० बजेति बल्खु ताँ क्वय् थाना च्वंगु अवस्थाय् लुगु धका प्रहरीं धाःगु दु।दिल्लागा एकादशी ११४४, सावन १६ बुधवाः