यलया नांजाःगु ऐतिहासिक काति प्याखंया गुरु केशवकृष्ण श्रेष्ठ मंत। कात्ति प्यानय् झण्डै बागू शताब्दीतक वराह भूमिका निर्वाह यानादीम्ह गुरु श्रेष्ठ ८५ दँया वैंशय् वंगु शनिवाः बहनि मदुगु खः।

हर्नियाया समस्या जुयाच्वंम्ह वय्कः वासः याकुयाकुं मदुगु खः। मदुम्ह श्रेष्ठयात वय्कःया तःधिकःम्ह काय् अनिलकृष्ण श्रेष्ठं मिँ तयादीगु खः। मदुम्ह गुरु श्रेष्ठया निम्ह काय् व छम्ह म्ह्याय् दी।

वि.सं. १९९६ भादै १ गते यलय् जन्म जुयादीम्ह श्रेष्ठं २०१४ निसें २०६२ तक मदिक्क कात्ति प्याखनय् बराह जुयाः अभिनय यानादीगु खः

प्रधानमन्त्री केपी शर्मा ओलीं चिनियाँ जनक्रान्तिया सहिदया स्मारकय् स्वांमाः देछानाः श्रद्धान्जली प्वंकादीगु दु। चीनया औपचारिक भ्रमणय् झाया च्वनादीम्ह वय्कलं थौं बेइजिङया तियानमेनस्क्वायरय् च्वंगु चिनियाँ जनक्रान्तिया सहिदतय्गु स्मारकय् न्ह्यःने श्रद्धान्जली प्वंकादीगु खः।

चीनया प्रधानमन्त्री ली छ्याङया मैत्रीपूर्ण ब्वनाय् प्रधानमन्त्री ओली सोमबाः बेइजिङ झायादीगु खः। भ्रमणया झ्वलय् प्रधानमन्त्री ओलीं चीनया राष्ट्रपति सी जिनपिङलिसे नाप लानादीगु ज्याझ्वः दूगु परराष्ट्र मन्त्रालयं धाःगु दु।

थ्व स्वयां न्ह्यः प्रधानमन्त्री ओलीं थः चिनियाँ समकक्षी लीलिसे नाप लानाः निगूपक्षीय  दथुइ थी थी विषयकय् बिचाः कालबिल यायेगु नापं गुगू बुँदाया सहमतिइ ल्हाःचिं तयादीगु खः।

प्रधानमन्त्री ओली नेतृत्वया प्रतिनिधिमण्डल थ्व हे मङ्सिर २० गते देय् लिहाँझाइगु ज्याझ्वः दु। (रासस)

लुँया भाः तोलां द्वःछि थहावंगु दु। थौं छगू लख ५० द्वः व स्वसः कारोवार जुगु दु धका नेपाल सुनचाँदी व्यवसायी महासङ्घं धागु दु। 

वहःया भाः नं थहावंगु दु। वहः तोलां स्वीन्यातका थहावंगु दु। वहः तोलां स्वीन्यतका थहावनां थौं द्वःछि व च्यासः व ४५ तका कायम जूगु दु धका महासङ्घं धागु दु।

चीनया औपचारिक भ्रमणय् झाया च्वनादीम्ह प्रधानमन्त्री केपी शर्मा ओली व राष्ट्रिय जनकँग्रेस (एनपिसी) या अध्यक्ष चाव ल ची दथुइ थौं खँल्हाबल्हा जूगु दु।

नाप लायेगु झ्वलय् वय्कःपिनि दथुइ नेपाल–चीन स्वापूया नापं थःवं थःया च्यूताः व संसदीय मामिलाया विषयकय् सहलह जूगु प्रधानमन्त्रीया निजी सचिवालयं धाःगु दु।

थ्व स्वया न्ह्यः प्रधानमन्त्री ओलीें राष्ट्रपति सी चिनफिङयात नापलाना खँल्हाबल्हा यानादीगु खः। थौं हे प्रधानमन्त्री ओली नेतृत्वया प्रतिनिधिमण्डलं चिनियाँ प्रधानमन्त्री लि छ्याङ नेतृत्वया प्रमण्डलनाप खँल्हाबल्हा क्वचायेकूगु दु।

प्रधानमन्त्री लीया मैत्रीपूर्ण ब्वनाय् प्यन्हूया भ्रमणया झ्वलय् प्रधानमन्त्री ओली म्हिगः न्हिनय् थन थ्यंकादीगु खः।प्रकाश सिलवाल(रासस)

जनकपुरधामय् जुइगु रामजानकी ब्याहाय् ब्बति कायेत वःपि जन्तीतय्त मटिहानीइ लसकुस याःगु दु। भारतया अयोध्यां जन्ती वःगु खः।

मटिहानीया नगरप्रमुख हरिप्रसाद मण्डलनापं जनप्रतिनिधि, जिल्लाया प्रमुख जिल्ला अधिकारी लालबाबु कवारी व नेपाली सेना, नेपाल प्रहरी व सशस्त्र प्रहरीयया जिल्लास्थित प्रमुखपिन्स मटिहानीइ जन्तीयात लसकुस याःगु खः।

मटिहानीस्थित लक्ष्मीनारायण मठया मानमहन्थ, सामाजिक सङ्घसंस्थाया न्ह्यलुवा, मटिहानीस्थित याज्ञवल्क्य लक्ष्मीनारायण विद्यापिठया आचार्य व राजकीय संस्कृत माध्यमिक विद्यालय (मटिहानी गुरुकूल)या  शिक्षक, वटुकपि नाप महोत्तरी उद्योग वाणिज्य सङ्घया पदाधिकारीपिनिगुु ब्बति दुगु खः।