येँ महानगरपालिका वडा नम्बर १६ या वडाध्यक्षय् राष्ट्रिय स्वतन्त्र पार्टी (रास्वपा) या रोजिना श्रेष्ठ विजयी जूगु दु।

स्थानीय तहय् थ्व हे न्हापां रास्वपां त्याकूगु खः। रास्वपाया श्रेष्ठं २९०२ मत हया निर्वाचित जूगु खः। एमालेया लक्ष्मीरत्न तुलाधरं २२२० मत हःगु दु सा कांग्रेसया देवेन्द्र पाठकं २२१४ मत हःगु खः।

अथेहे एकीकृत समाजवादीया मीनबहादुर मानन्धरं १०९२ मत, राप्रपाया श्यामकृष्ण श्रेष्ठं ७४२ मत, स्वतन्त्र उम्मेदवार देवेन्द्रकुमार श्रेष्ठं ४९८ व स्वतन्त्र सम शाक्यं ३३४ मत हःगु दु।

गुल्मीया मुसिकोट नगरपालिका–१ य् नेपाली कांग्रेसया उम्मेदवार विजयी जूगु दु। नेपाली कांग्रेसया उम्मेदवार आनन्द श्रेष्ठ १ हजार १ सय ८४ मत हया विजयी जूगु दु।

श्रेष्ठया प्रतिस्पर्धी नेकपा एमालेया दलबहादुर थापां ९ सय ३० मत हःगु खः। वडाध्यक्षय् कांग्रेसया श्रेष्ठं २ सय ५४ मतान्तरं विजयी जूगु खः।

माओवादी केन्द्रपाखे दुर्गाबहादुर विकं १ सय ४३, राष्ट्रिय स्वतन्त्र पार्टीया विकास थापां ४४ व राष्ट्रिय पजातन्त्र पार्टीया ईश्वरी खाती क्षत्रीं ५ मत हःगु खः।

अन ०७९ या निर्वाचनय् न नेपाली कांग्रेस विजयी जूगु खः।

झापाया कनकाई नगरपालिका वडा नम्बर ६ य् स्वतन्त्र उम्मेदवार लक्ष्मीप्रसाद ओली निर्वाचित जूगु दु। चापाकल चुनाव चिं कया उपनिर्वाचनय् ब्बति काःम्ह ओलीं ४ सय ९३ मत हया विजयी जूगु खः।

ओली नेपाली कांग्रेसपाखे बागी दना स्वतन्त्र उम्मेदवारी ब्यउगु खः। ओलीया प्रतिस्पर्धी नेकपा एमालेया उम्मेदवार तुलाराम बस्नेतं ३ सय ५६ मत हःगु खः। थ्व स्वया न्ह्यः नेकपा एमाले निर्वाचित जूगु खः।

अथेहे, नेपाली कांग्रेसया रामगोपाल ओलीं ३ सय १७ व माओवादी केन्द्रया गणेशबहादुर थापां २ सय ७७ मत हःगु दु।

थौं आइतवाः जुगु उपनिर्वाचनय् ओखलढुंगाया मोलुङ गाउँपालिकाय् नेकपा एमाले त्याःगु दु। मोलुङ गाउँपालिका–५ या वडाध्यक्षय् नेकपा एमालेया उम्मेदवार गंगा तामाङ त्यागु खः ।

वयकःया निकटतम् प्रतिद्वन्द्वी नेपाली कांग्रेसया घनश्याम दाहालं १ सय ७७ मत हःगु खः। अथे हे राष्ट्रिय स्वतन्त्र पार्टी (रास्वपा) या उम्मेदवार विष्णु प्रसाद पोखरेलं १ सय ५१ मत हःगु दु।

नेकपा माओवादी केन्द्रया उम्मेदवार मान बहादुर सुनुवारं २३ मत हःगु दु।

दैलेखया दुल्लु नगरपालिका–१३ य् नेकपा एमाले विजयी जूगु दु। कांग्रेसया उम्मेदवारयात ३ मतं बूका नेकपा एमालेया उम्मेदवार निर्वाचित जूगु खः।

दुल्लु–१३ य् एमालेया उम्मेदवार लाल बहादुर शाहीं ५ सय ७४ मत हःगु खः। शाहीया निकटतम प्रतिस्पर्धी नेपाली कांग्रेसया रेशमबहादुर शाही न ५७१ मत हःगु खः।

अथेहे, नेकपा माओवादी केन्द्रया ढकेन्द्र बहादुर शाही न २७८ हःगु खःसा राष्ट्रिय स्वतन्त्र पार्टीया रामबहादुर शाही न ५३ मत हःगु खः।