छत्रपाटी निःशुल्क चिकित्सालययात थुगु दँया बेखा नारायण–देवकुमारी राष्ट्रिय प्रतिभा पुरस्कार लःल्हाइगु जुगु दु।

येँ महानगर १७ वडास्थित छत्रपाटी निःशुल्क चिकित्सालय वि.सं.२०१३ सालंनिसें गरिब व असहाय विरामीया सेवा याना वयाच्वंगु व वंगु कोरोना महामारीया इलय् प्रदान याःगु विशेष सेवाया कदरयासें थथे सिरपाः लःल्हायेत्यनागु खँ धका सिरपाः समितिया अध्यक्ष प्रा.डा. जगदिश नारायण मानन्धरं धयादीगु दु।

हनापौ नाप दोसल्ला सहित ५० द्वः तका धनराशीया खः। थ्वहे वइगु शनिवाः स्वयम्भूइ जुइगु मानन्धर स्वयम्भू भ्वजय् लःल्हाइगु ग्वसाः दु।

थगुने थ्व सिरपाः आविष्कार केन्द्रया वैज्ञानिक महाविर पुनयात लःल्हाःगु खः।

ग्वाज्यचा, ह्वान्तांचा, भिन्तुना लगायतया दर्जनं सिबें अप्वः नेवाः संकिपा म्हितुम्ह कलाकार राजु महर्जन जुजुया मां माया महर्जन वंगु चिल्लाथ्व चर्हे होलि कुन्हु आकाझाकां मन्त।

वयकः गुइदँय् मदुगु खः।

लुँ तोलां थौ प्यसः थहावःगु दु।लुँ तोलां थौ प्यसः थहावना १ लाख २६ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां झिन्यातका कुहावया १ हजार ४ सय ९० रुपैयाँ न कारोवार जूगु दु धका महासङ्घं धाःगु दु।

नेपाल संवत राष्ट्रिय शंखधर प्रतिष्ठानया संयोजनय् दयेकूगु नेपाल संवत व्यवहारय् छ्यलेफइगु ‘नेपाल संवत् मोबाइल एप्स’ प्रधानमन्त्री पुष्पकमल दाहाल प्रचण्डयात सोमवाः लःल्हाःगु दु।

प्रधानमन्त्री ज्याकुथि सिंहदरबारय् छगू ज्याझ्वःया दथुइ उगु एप्स लःल्हाःगु खः।नेपाल संवत एप डिजिटल युगय् झीगु सम्पदाया नां बियाः स्पाइरालोजिक्स इन्टरनेसनल थुगु ‘तिथिमिति डट कम’ सफ्टवेयर व ‘नेपाल संवत् मोबाइल एप्स’ शंखधर प्रतिष्ठानया सल्लाह व ग्वाहालिं ज्या न्ह्याकूगु खः।

प्रचण्डयात उगु एप्सया छ्यलाबुला गुकथं यायेज्यू व व्यवहारय् गुकथं छ्यलेफइ धकाः एप्स निर्माण पुचःया छम्ह दुजः अरुण थापां न्ह्यब्वयादीगु खः।बिक्रम संवत्, नेपाल संवत व इस्वी संवतया तिथि छगू हे एप्सय् वइगु व थुगु एप्सय् प्रधानमन्त्री प्रचण्डयात तिथि बिक्रम संवतं तयाः नेपाल संवत व इस्वी संवतया तिथि व तारिखया दिं न्ह्यब्वःगु खः।

प्रधानमन्त्री पुष्पकमल दाहाल प्रचण्डं नेपाल संवतयात राष्ट्रिय संवतया मान्यता लिसें व्यवहारय् छ्यलेगु निर्णय थःगु हे कार्यकालय् यानागु जूगुलिं थःपिं थुगु एप्सयात छ्यलेगु खँय् उत्साहित जूगु खँ कनादीगु खः।

नेवाः न्ह्यलुवाः मल्ल के सुन्दर, न्हूदँ समारोह समितिया नायः प्रा.डा. नरेशमान बज्राचार्य, नेवाः देय् दबूया नायः पवित्र बज्राचार्य, पंचाङ निर्णायक समितिया प्रतिनिधि लिसें थीथी व्यक्तिपिनिगु उपस्थितिइ शंखधर प्रतिष्ठानया नायः ज्ञानराम श्रेष्ठं प्रधानमन्त्री प्रचण्डयात उगु एप्स लःल्हाःगु खः।

थथे एप्स लःल्हायेगु ज्याझ्वलय् मुख्य सचिव उपस्थित जूगु खःसा वय्कलं थुगु एप्सयात थीथी न्ह्यसः नं तयादीगु खः।

नेवाः पत्रकार राष्ट्रिय दबुलिं छगु ज्याझ्वः दथुइ खुम्ह मिसा पत्रकार तय्त साधना पत्रकारिता सम्मान याःगु दु।

अन्तराट्रिय श्रमिक महिला दिवसया लसताय् जुगु उगु ज्याझ्वलय् उपप्रधान लिसें स्वास्थ्य तथा जनसंख्या मन्त्री उपेन्द्र यादव मूपाहाँ कथं झायादीगु खः। गोरखापत्र न्हिपौया यलु जोशी, नेपाल समाचारपत्रया भगवती तिमल्सिना, नेपाल टेलिभिजनया पवन वर्षा शाह, मेट्रो एफ एमया रिता महर्जन, नयाँ पत्रिकाया शान्ति तामाङ व स्वतन्त्र फोटो पत्रकार सुनी बनेपालीयात नेपाल आदिवासी जनजाती पत्रकार महासंघया न्वकू अमरध्वज लामां खादा, पत्रकार दबूया नायः नृपेन्द्रलाल श्रेष्ठं स्वामा व मूपाहाँ उपप्रधान लिसें स्वास्थ्य तथा जनसंख्या मन्त्री उपेन्द्र यादवं हनापौ लःल्हानादीगु खः।

मूपाहा उपप्रधानमन्त्री यादवं देशय् संघीयता वःसा न जातीय भेदभाव अझ न ल्य दयाच्वंगु दु धका धयादीसे परिवार, समाजयात बांलाःगु लँय् न्ह्याःवनेगु शिक्षा मिसां हे बीफइगु जूगुलिं समाजया विकास यायेत मिसातय् हे विकास जुइमाःगु धका धयादीगु खः । पत्रकार राष्ट्रिय दबुलिं ११४ क्वःगु महिला दिवसया लसताय् क्रियाशिल महिला पत्रकारतयत साधना मिसा पत्रकारिता सम्मान ज्याझ्वः याःगु खः ।

नेपाल न्हापां महिला लय्पौ प्रकाशक व सम्पादक जुयादीम्ह साधना प्रधानया हने कथं पत्रकार दबू न वंगु दँनिसे साधना मिसा पत्रकारिता सम्मान ज्याझ्वः याःगु खः। दबू न वंगु च्यादँनिसे मिसा पत्रकारपिन्त सम्मान याना वयाच्वंगु खः। अथेहे दबूया बुलेटिन न ‘आज्जु’या उलेज्या उपप्रधान मन्त्री यादव, दबूया नायः श्रेष्ठ, आदिवासी जनजाती महासंघया न्वकु लामा व दबूया कानूनी सल्लाहकार किरण शाक्यपिन्स मंकाः कथं यानादीगु खः।

दबूूया केन्द्रिय नायः गलत इतिहासयात भिंकाः वास्तविक इतिहास स्थापित यायेत दबुलिं संघर्ष यानाच्वंगु व गलती मभिंकूतल्ले थःपिं सुम्क मच्वनेगु उद्घोष नं नायः श्रेष्ठं यानादिल । नेपाःया न्हापाम्ह मिसा पत्रकार साधना प्रधान व कामाक्षी देवीया पत्रकार ख्यलं गुवलय् लुमकिगु ज्या मजु धका धयादीगु खः।

नेपाल आदिवासी जनजाती पत्रकार महासंघया न्वकू अमरध्वज लामा, दबूया निवर्तमान नायः सुरजबीर बज्राचार्य, कानूनी सल्लाहकार किरण शाक्य, केन्द्रिय सल्लाहकार विजयरत्न असंबरे, दबूया यल कचा नायः मन्जु बज्राचार्यलिसें नं नुगःखँ तयादीगु खः। दबूया ल्यू छ्यान्जे लिसें ज्याझ्वः कजि सुनिता महर्जनं लसकुस यानादीगु खःसाः न्वकू रचना श्रेष्ठं सुभाय् न्वचु तयादीगु खः।