शेयर बजाः थौ ३५ ल्याखं थहावःगु दु। न्हिच्छियकं थहाक्वहा जुयाच्वंगु शेयर बजाः परिसूचक नेप्से ३५ दशमलव ५५ ल्याखं थहावना २ हजार ६ सय ९६ दशमलव ६५ विन्दुइ थ्यःगु दु।

थौ बैंकिङ, म्युचल फन्ड व निर्जीवन बीमा बाहेक दक्को समूहया शेयर थहावंगुलि होटल, फाइनान्स, विकास बैंक समूहया शेयर यक्को कुहावःगु दु। थौ प्रोग्रेसिभ फाइनान्स, वरुण हाइड्रोपावर, सान्जेन जलविद्युत्, नेपाल वेयरहाउजिङ, सीईडीबी हाइड्रोपावर, नेपाल फाइनान्स कम्पनीया शेयर १० प्रतिशतं थहावःगु दु।

अथेहे खुगु कम्पनीया शेयर ९ प्रतिशत स्वया अप्पो थहावःगु दु। समग्र बजाः थहावःगु दु सा एशियन हाइड्रोपावर कम्पनीया शेयर १० प्रतिशत स्वया अप्पो कुहावःगु दु। ३२९ गु कम्पनीया ४ करोड ३ लाख कित्ता शेयर १७ अर्ब २६ करोड रुपैयाँया कारोबार जूगु दु।

दकलय् अप्पो हिमालयन रिइन्सुरेन्स कम्पनीया ६० करोड रुपैयाँ स्वया अप्पो शेयर कारोवार जूगु दु।

थेरवादी प्रवजितपिन्त क्षत्रपाति निःशुल्क चिकित्सालय (अस्पताल)य् निःशुल्क स्वास्थ्य उपचार यायेगु नितिं नीस्वंगु धम्मावती गुरुमां स्वास्थ्य उपचार कोषया नितिं थीथी दातापिनिगु पाखें मुंकूगु न्हापांगु चरणय् २७,९९, ३,६५ तका थौं मंगलवाः धर्मकीर्ति विहारय् चिकित्सालयया नायः डा. मनोजमान श्रेष्ठयात लःल्हाःगु दु।

श्रद्धेय धम्मवती गुरुमांपाखें तयाः बिज्याःगु १०,००,००० तका लिसें मेपिं गुरुमांपिं नापनापं श्रद्धालु उपासक उपासिकापिन्सं थुगु कोषयात सश्रद्धा आर्थिक ग्वाहालि यानादीगु दां थौं मंगलवाः लःल्हाःगु खः। वंगु श्रावण ६ गते गुरु पुन्हीया दिं धम्मावती गुरुमां स्वास्थ्य उपचार कोष घोषणा याःगु खःसा थुग दिं श्रद्धेय धम्मावती गुरुमांया ९१ दँय् च्वनाः बिज्याःगु खः।

क्षत्रपाति निःशुल्क चिकित्सालयपाखें धर्मकीर्ति विहार व धर्मकीर्तिया शाखा विहारया गुरुमांपिं, थ्वया लिपा बुलुहुँ नेपाःया सकल गुरुमांपिन्त क्षत्रपाति निःशुल्क चिकित्सालयस निःशुल्क स्वास्थ्य उपचार सेवा बीगु नितिं थुगु कोष नीस्वंगु खः। थुगु कोषपाखें गुरुमांपिन्त सेवा बिइगु नितिं संचालक समिति नीस्वंगु दु।

उगु संचालक समितिइ धर्मकीर्ति विहारपाखें खेमावती गुरुमां, धर्मकीर्ति बौद्ध अध्ययन गोष्ठीपाखें अरुणसिद्धि तुलाधर, क्षत्रपाति निःशुल्क चिकित्सालयपाखें डा. मनोजमान श्रेष्ठ, कृष्णप्रसाद मानन्धर व सामाजिक क्षेत्रपाखें सुजीव बज्राचार्य च्वनादीगु दु।

थुगु कोषय् ग्वाहालि निरन्तर रुपं म्हयेगु खँ धर्मकीर्ति विहारं जानकारी ब्यूगु दु। विहारं थुगु कोषय् ग्वाहालि यायेगु मन दुपिन्सं श्रद्धा कथं आर्थिक ग्वाहालि यानादीत इनाप याःगु दु।

बागमती प्रदेशया मुख्यमन्त्री बहादुरसिं लामां प्रदेश सभाय् बहुमत अर्थात् ६४ सांसदया मत काःगु दु। मंगलबार प्रदेशसभा बैठकय् मुख्यमन्त्री लामां संविधानया धारा १६८ या उपधारा (४) व प्रदेश सभा नियमावली २०७४ या नियम १४३ याःगु उपनियम (१) कथं विश्वासया मत कायेगु लागि प्रस्ताव पेस याःगु खः।

११० सदस्यीय प्रदेश सभाय् सरकार गठनया लागि ५६ सांसदपिनिगु समर्थन माः। नेपाली कांग्रेसया ३७ व नेकपा एमालेया २७ सांसदपिन्स प्रस्तावया पक्षय् मत बिउगु खः। नेकपा माओवादी केन्द्र, नेकपा एकीकृत समाजवादी राप्रपा, हाम्रो नेपाली पार्टीया ३५ सांसदपिन्स प्रस्तावया विपक्षय् मत बिउगु खः।

नेमकिपा तटस्थ च्वंगु खः। थौ प्रदेशसभा बैठकय् १०३ म्ह सांसदपिनिगु उपस्थित दुगु खः।

प्रधानमन्त्री केपी शर्मा ओलीं त्रिभुवन विश्वविद्यालयया पुनः संरचना व पाठ्यक्रमयात ई कथं हिलेमाः धका धयादीसे उच्चशिक्षाया लागि नेपाःया विद्यार्थी विदेशय् छ्वयेगु स्वया थःगु हे देशय् अवसर बिइमाः धका धयादीगु दु।

त्रिभुवन विश्वविद्यालयया साधारणसभा बैठक (सिनेट) य् थौ सम्बोधन यानादीसे प्रधानमन्त्री ओलीं विश्वविद्यालयय् न्हापा सेवा आयोगपाखे काःगु परीक्षाया लिच्वः प्रकाशन, शिक्षक कर्मचारी खाली जुगु थाय् न्हुगु दरबन्दीया लागि भर्ना यायेगु निति विज्ञापन याना जनशक्ति अभाव पूर्ति, विश्वविद्यालय सेवाय् दुहावये धुकुपि जनशक्तियात क्षमता अभिवृद्धि व अनुसन्धानया अवसर बिइमाः धका धयादीगु दु।

प्रधानमन्त्री ओलीें विश्वविद्यालयया नीतिगत व दीर्घकालीन महत्वया विषय माःगु गृहकार्य याना याकन हे मेगु सिनेट बैठक याना लिच्वः पिहावइगु भलसा कयादीगु दु।

किपूलि याक मिसायात स्वां देछाःगु दु । किपूली च्वम्ह ७३ दँ दुम्ह लक्ष्मीकुमारी महर्जन (याकः मिसा)यात बुगंद्यःया स्वां प्रसाद देछाःगु दु।

प्यन्हु न्ह्यः बुगंद्यः सालिइगु जुगुलि याक मिसायात स्वा बिइगु प्रचलन दुगु खः। लगंख्यलं जाह्वलाख्यः बुगंद्यः सालिइगु इलय् प्यन्हु न्ह्यः मू पुजारी (पानेजु) लाकां मन्ह्यास्ये किपूया प्यंगःथां तक वया याकः मिसायात स्वां छायेगु याना वयाच्वंगु खः।

याकः मिसायात बुगंद्यःया मतिना यानातम्ह मिसा कथं कयातःगु खः। बुगंद्यः थ्व हे वइगु साउन १७ गते रथ सालां जाह्वलाख्यलय् यंकीगु जूगु दु।

गुथि संस्थानं याकः मिसाया निंतिं वार्षिक ५ हजार ५५५ दक्षिणा दरबन्दि बिइगु याःगु दु। गुथि संस्थानं पिथंगु वक्तव्य कथं बुगंद्यःया रथ जात्रालिसे सम्बन्धित याकः मिसायात पानेजुं स्वां देछाइगु इलय् ज्याकुथिया प्रतिनिधि वनाः दक्षिण बिइगु खँ न्ह्यथनातःगु दु। गुथि संस्थानं निदँया नितिं १० प्रतिशतया दरं रकम अप्वयेकेगु नं जानकारी ब्यूगु दु।