थुगुसि स्वन्तिइ ५० करौड तकाया स्वाया ब्यापार जुगु दु धका फ्लोरिकल्चर एशोसिएसनया नायः दिलीप बादें धयादीगु दु। थुगुसि छमाः स्वाँमाःया सच्छि तक पुले माःगु खः।

बजाःया माग दँय्दसं १५ निसें २० प्रतिशततक अप्वःया वनाच्वंगु जुसां नं अप्वःयां अप्वः १० प्रतिशतजक स्वाँ ह्वयेके फयाच्वंगु दु। विशेषयाना स्वन्तिबलय् ग्वय्स्वाँ व गोदावरी स्वाँ स्वदेशी उत्पादनं हे गानाच्वंगु दुसां तफ्वःस्वां व ह्यांगु गुलाफ धाःसा भारतं हयेमाःगु बाध्यता दूगु खँ बादें धाःगु दु।

स्वनिगः नाप कास्की, चितवन, मकवानपुर, काभे्रपलाञ्चोक, गुल्मी, पाल्पा, धादिङ, मोरङ नापनापं मेगु ५२ गू जिल्लां स्वाँ ह्वयेका मिइगु याना वयाच्वंगु दु। व्यावसायिक कथं प्यसः व न्यय्गु प्रजातिया स्वाँ ह्वयेका च्वंगु वय्कलं कनादिल। स्वाँया बजाःपाखें ४४ द्वः सिबें अप्वस्यां लबः कयाच्वंगु दुसा निसः व २१ हेक्टरय् थ्यंमथ्यं झिंनिसः व्यवसायीपाखें स्वाँ ह्वयेका मीगु यानाच्वंगु दु।

थौ बुधवाः सेयर बजाःया परिसूचक नेप्से १.८८ ल्याखं कुहावःगु दु।थौ १२१ गु कम्पनीया भाः थहावंगुलि ११७ गु कम्पनीया भाः कुहावःगु दु सा खुगु कम्पनीया भाः स्थिर जुगु दु।

औसत तधःगु पूँजी जुगु कम्पनीया भाः घटे जुगु दु। थौ कारोबार रकम धाःसा छु भचा अप्पोगु दु।म्हिगः स्वया ४ अर्ब २० करोड कारोबार जुगुलि थौ ५ अर्ब २२ करोडया कारोवार जुगु खः।होटल व पर्यटन समूह ०.७५, बैंकिङ ०.१६, लगानी ०.३७, जीवन बीमा ०.१३, उत्पादन ०.२९, माइक्रोफाइनान्स ०.०९, निर्जीवन बीमा ०.८७ व मेमेगु समूह सूचक ०.१४ प्रतिशत घटे जुगु दु।

अथेहे म्युचुअल फन्ड १.०९, व्यापार ०.२९, हाइड्रोपावर ०.४६, फाइनान्स ०.७९ व विकास बैंक समूह ०.७३ प्रतिशत बढे जूगु दु। नारायणी डेभलपमेन्ट बैंक व बलेफी हाइड्रोपावरया भाः १० प्रतिशतं थहावःगु दु। पिपुल्स हाइड्रोपावरया ९.१, समृद्धि फाइनान्स ८.७, राप्ती हाइड्रोया ७.८ प्रतिशत थहावःगु दु।

कुथेली बुकरी स्मल हाइड्रोपावरया भाः दकलय् अप्पो ९.५ प्रतिशत घटे जूगु दु। नेपाल फाइनान्सया ८.२, समाज लघुवित्तया ६.२, युनाइटेड मोदीया ४.०३ व सुपरमादी हाइड्रोया ३.५ प्रतिशतं घटे जूगु दु। कारोबार रकमया आधारय् नेपाल फाइनान्स, पिपुल्स हाइड्रोपावर, समृद्धि फाइनान्स, सानिमा जीआईसी इन्स्योरेन्स न्ह्यने खने दुगु दु।

प्रधानमन्त्री केपी शर्मा ओलीयात भाइरल ज्वरोया संक्रमण जूगु दु। ओलीया निजी चिकित्सक डा. दिव्या सिंह शाह न भाइरल ज्वरो जूगु दु पुष्टि याःगु दु।

‘गःपतय् संक्रमण जूगु दु। लिपागु इलय् मौसमय् ह्यूपाः वःगुलि भाइरल ज्वरो संक्रमण जूगु दु,’ डा. सिंहं धाःगु दु, ‘आः वयकःया स्वास्थ्यया अवस्था सुधार जुयावया च्वंगु दु। छु दिं आराम यायेत सुझाव बियागु दु।’ मंगलवाः डेंगुया आंशकाय् हि परीक्षण याःगु खः। उगु रिर्पोट नेगेटिभ वःगु दु धका डा. शाह न धाःगु दु।

आः प्रधानमन्त्री ओली बालुवाटारस्थित सरकारी निवासय् आराम याना वयाच्वंगु दु।

प्रधानमन्त्री केपी शर्मा ओली बिरामी जूगु दु। प्रधानमन्त्रीया स्वास्थ्यय् प्रतिकूलता खनेदुगु धका प्रेस संयोजक प्रकाश सिलवालं जानकारी बिउगु दु।

‘वयकःयात ज्वरो वंगु दु,’सिलवालं धाःगु दु,‘वयकलं हिं परीक्षणया निति छ्वंगु दु।’ प्रधानमन्त्री ओली बालुवाटारस्थित सरकारी निवासय् आराम यानाच्वंगु दु।

स्वसँ व पीस्वदँनिसे न्ह्याना वयाच्वंगु कात्तिक प्याखँ थौनिसे शुरू जुइगु दु। यल लाय्कूलि न्ह्यने कात्तिक दबूलि थौनिसे सञ्चालन जुइ धका कात्तिक नाच संरक्षण समितिया अध्यक्ष नाप कलाकार किरण चित्रकारं जानकारी बियादीगु दु।

थुगु प्याखँ भगवान विष्णुया १७ गु बाखं नाप स्वागु धका धाइ। थ्व हे वइगु कार्तिक ३० गतेतक सञ्चालन जुइगुलि न्हिया न्हिथे बिस्क बिस्क बाखंया लिधसाय् प्याखं क्यनिइगु याइ। नेपाल संवत् ७६१ अर्थात् वि.सं.१६९७ य् ‘कात्तिक प्याखं’ न्ह्यागू धका इतिहासय् उल्लेख दु।

मल्लकालीन जुजु सिद्धिनरसिंह मल्लं यलय् च्वपिन्त भय व त्रासमुक्त यायेगु निति थुगु प्याखं न्ह्याकूगु धका मान्यता दु। थुगु प्याखँंया सर्जक, स्रष्टा नापं प्रवर्तक सिद्धिनर सिंहया शिक्षागुरु पण्डित हरिवंश उपाध्याय व दीक्षागुरु विश्वनाथ उपाध्याय खः धका उल्लेख यानातःगु दु। थुगु प्याखं न्हापां क्यंगु इलय् न्यान्हु जक क्यःगु खः।

सिद्धिनर सिंहया काय् श्रीनिवास मल्लं ‘बाथःप्याखँ’ अथे धइगु ‘लोक नाटक’, ‘सुदामा प्याखँ’ व ‘सुरदास प्याखँ’ थपे याना झिन्यान्हु याःगु खः। आः थीथी कारणं भिन्हु जक जुइ धका न समितिया नायः चित्रकारं धाःगु दु। थुगु प्याखं नेपाःया अमूर्त सम्पदा व परम्परागत संस्कृति जुगुलि आः दिउगु मदु धका अध्यक्ष चित्रकारं धाःगु दु। कात्तिक प्याखं धार्मिक व तान्त्रिक महत्त्वनाप स्वाना च्वंगु दु।