नेवाः पत्रकार राष्ट्रिय दबूया भिनिक्वःगु दँमुज्याय् खुम्ह पत्रकारयात सिरपा नापं स्वम्हेसित नेपालभाषा, संस्कृति प्रवद्र्धन नाप समावेशीकरण मुद्दाय् मदिक्क ज्या यानाच्वपिन्त सम्मान याःगु खः।

दबूया नायः नृपेन्द्रलाल श्रेष्ठया सभाध्यक्षताय् जूगु उगु ज्याझ्वलय् नेपालभाषा मंका खलःया भवनय् जूगु उगु ज्याझ्वलय् माउन्टेन टेलिभिजनया विश्वन्तर शाक्ययात नीद्धः ज्ञानज्योति लक्ष्मीप्रभा सिरपा, झंकार एफएम रामेछापया युवराज श्रेष्ठयात झिन्याद्धः नगद नापं ज्ञानदेवी मणि पत्रकारिता सिरपा, बुद्ध धर्मया सन्देश प्रचार प्रसार याःगु योगदानयात मेट्रो एफएमया उदेन न्हूसायमियात नीद्धः नगद नाप भिक्षु कुमार कश्यप स्मृति पत्रकारिता सिरपा ज्याझ्वःया मूपाहाँ बागमती प्रदेशया उद्योग वाणिज्य भूमि लिसे प्रशासनमन्त्री रामकृष्ण चित्रकारं लःल्हानादीगु खः।

अथेहे नेपाल मण्डलया सिल्भिया राजोपाध्याययात वाङमय शताब्दी पुरुष सत्यमोहन जोशी पत्रकारिता सिरपा, अनलाइन डबलीया बुद्धशरण शाहीयात बाबुराजा ज्यापु फोटो पत्रकारिता सिरपा व अनलाइन खबरया रेणु त्वानाबासुयात श्रीराम स्मृति पत्रकारिता सिरपा नापं स्वम्हसित झिद्धः नगद सिरपा न लःल्हाःगु खः।

दबूया झिनिक्वःगु दँमुज्याय् गुठी संस्थानया केन्द्रीय प्रशासक प्रमुख किरण शाक्य, गोरखापत्र दैनिकया सम्पादक सल्लाहकार उपेश महर्जन व नेपाल आदिवासी जनजाति पत्रकार महासंघया पूर्व अध्यक्ष दण्ड गुरुङयात विशेष सम्मान याःगु खः।

नेवाः पत्रकार राष्ट्रिय दबुया भिनिक्वःगु दँमुज्याय् नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठयात मान्यता मबिउसे इतिहास तोडमोड यायेत स्वगु बिषय खँ जुगु खः।

नेपालभाषा मंकाः खलःया भवनय् जूगु उगु ज्याझ्वलय् उलेज्या यानादीगु खः। पत्रकार दबुया लुमन्ति पौ ज्याझ्वलय् मंकाः कथं उलेज्या यानादीगु खः। बागमती प्रदेशया उद्योग वाणिज्य भूमि लिसे प्रशासन मन्त्री चित्रकारं पत्रकारया इतिहासयात समग्ररुपं न्ह्यावनेत मदिक्क सः थ्वय्का वनेमाः धका धयादीगु खः। येँ महानगरपालिकाया प्रवक्ता नवीन मानन्धरं पत्रकारतय्सं थःगु जिम्मेवारी बालाक्क यायेमागुलि बः बियादीगु खः।

अथेहे नेपाल आदिवासी जनजाति पत्रकार महासंघया अध्यक्ष गजुरधन राई न सत्यनारायण बहादुर श्रेष्ठयात नेपाल पत्रकार महासंघया अध्यक्ष घोषण मयातले थःपिनिगु अभियान मदिक्क न्ह्याना च्वनिइ धका धयादीगु खः। सम्मानित जूयादीम्ह नेपाल आदिवासी जनजाति महासंघया पूर्व अध्यक्ष दण्ड गुरुङं सत्यनारायण बहादुर श्रेष्ठयात नेपाल पत्रकार महासंघया संस्थापक अध्यक्षया कथं स्थापित यायेमाःगुलि थःम्हेसिया ल्ह्वनागु सः मदिक्क वयाच्वंगुलि लसता प्वकादील। व्यकलं गलत इतिहास स्थापित यायेत स्वंगु व सत्यतथ्य जानकारी बिइमाःपि पत्रकार तय्स थथे मयातकि इमान्दारिताय् न्ह्यसः वइ धका धयादीगु ख।

पत्रकार दबुया सल्लाहकार राजु शाक्यं नेवाः समूदायया मुद्दा, अभियानया बुखँ मेनस्ट्रिम मिडियाय् प्रसारण याकेत उलि अपू मजुगु थःगु अनुभव कनादीगु खः। दबुया अध्यक्ष नृपेन्द्रलाल श्रेष्ठं सत्यनारायण बहादुर श्रेष्ठयात संस्थापक अध्यक्ष स्थापित यायेगुलि थःपिनिगु अभियान मदिक्क न्ह्यावनिइ धका धयादीगु खः।

मातृभाषा पत्रकारया क्षमता विकासया लागि मातृभाषा सञ्चार प्रतिष्ठान सरकारं गठन यायेमाःगुलि बःबियादीगु खः। दबूया वरिष्ठ उपाध्यक्ष सुनील महर्जनं क्रियाशील पत्रकार तयेत उत्साह थकाय्गु निति दबू न सिरपा लःल्हाना वयाच्वनागु खः धका धयादिगु खः। अथेहे उपाध्यक्ष सुरेन्द्रभक्त श्रेष्ठ व येँ जिल्लया अध्यक्ष अरविन्दमान सिंहं लसकुस यानादीगु खः।

बागमति प्रदेश सांसद शैलेन्द्र बज्राचार्यं आः याकनं हे बागमति प्रदेशय् नेपालभाषा व तामाङ भाय् कामकाजि भायया रुपय् छ्यलीगु धयादीगु दु।

यलय् कन्फराक्टीभ मिडिया सोलुसनया ग्वसालय् जूगु छगू ज्याझ्वलय् वयकलं थथे धयादीगु खः ।उगु ज्याझ्वलय् सांसद बज्राचार्यं कन्फराक्टीभ हलया उलेज्या लिसें ईबुखँया उजेज्या यानादीगु खः।

कन्फराक्टिभ मिडिया सोलुसनया नायः बिराजकाजि राजोपाध्यायं स्थानीय बिषयबस्तु ल्ह्वनेत व न्हूगु खोजीया नितिं कन्फराक्टिभ हलयात संवाद व अन्तरक्रियाया दबूया रुपय् बिकास यायेगु धयादिल । मूलधारया धयावःगु संचारमाध्यमया मिखाय् मलाःगु स्थानीय सः, स्थानीय मुद्दा व विषयवस्तु हे समाचारडेस्क व ईबुखँया मेन न्यूज जुइगु राजोपाध्यायया धापू खः।

ईबुखँया सम्पादक बिशाल राजभण्डारीं स्थानीय मुद्दा, विषयवस्तुयात सशक्त ढंगं सम्प्रेषण यायेत स्थानीय समाजया सक्रिय ग्वहालिया नितिं इनाप यानादिल ।‘थौं ईबुखँ न्ह्यात तिनि, थुकियात जिं धायेगु छुं हे मदुनि । झी सकलें जानाः थ्वयात न्ह्यःने यंके । झीगु सः, झीगु खँ झी हे जानाः सशक्त ढंगं ल्ह्वनेनु’ सम्पादक भण्डारीं धयादिल।

काठमाडौं मोडल स्कुल एकल वाद्यवादन धेंधेंबल्लाः कासा वंगु शनिवा येँया राष्ट्रिय नाचघरय् याःगु दु। उगु ज्याझ्वलय् मूपाहाँ न्हूछेबहादुर डंगोल झायादीगु खः।

काठमाडौं मोडल स्कुलय् ३ निसें ८ तगिंयापिं नच्चापिं मस्तय्सं एकल वाद्यवादन धेधेंबल्लाः कासाय् न्ह्यब्वगु थःथःगु प्रस्तुतिं सकल स्वकुमिपिंत मन्त्रमुग्ध याःगु खः । जुनियर व सिनियर यानाः निगू पुचः दयेकाः धेंधेंबल्लाः जूगु उगु कासाय् मुक्कं २४ म्ह ब्वनामिपिंसं ब्वति काःगु खः । ब्वनामिपिंसं बाँसुरी, पियानो, कीबोर्ड, मादल, धिमे व खिं थानाः क्यंगु खःसा मस्तय्त प्रवेश महर्जन, विधान श्रेष्ठ व कृतज्ञ महर्जनपिंसं थीथी बाजं संयोजन यानाः साथ बियादीगु खः ।

युविन महर्जनं जुनियरपाखे हःपाः सिरपाः त्याकादीगु खःसा सिनियरपाखे रोनिश महर्जनं हःपाः सिरपाः त्याकादीगु खः । जुनियरपाखे निर्वेश श्रेष्ठ न्हाप, सुप्रिमा नाय लिउ व एलन राज डंगोल लियांलिउ लाःगु खःसा सिनियरपाखे सिमसन श्रेष्ठ न्हाप, रेमन श्रेष्ठ लिउ व समर तण्डुकार लियांलिउ लाःगु खः । न्हाप, लिउ व लियांलिउ लाःपिंत खुद्वः, प्यद्वः व निद्वः दां सिरपाः नं लःल्हाःगु खः ।

निर्णायकय् नरेश प्रजापति, सविन मुनिकार व अनिल महर्जन च्वनादीगु खः । ज्याझ्वलय् काठमाडौं युथ अर्केष्ट्रापाखें नेवाः धूनया अर्केष्ट्रा नं न्ह्यब्वःगु खः । ज्याझ्वलय् स्कुलया निर्देशक राजेन्द्र महर्जन व प्रिसिन्पल रविन महर्जनं ग्वाहालि याःपिंत सुभाय्पौ लःल्हानादीगु खः ।