नेपाल सम्वत ११४५ नव बर्ष, स्वन्तिया लसताय् यल महानगरपालिका १६ वडा कलाकार समितिया ग्वसालय् जूगु निक्वःगु हुलाप्याखं कासा आयोना लाखां त्याकल । गोल्मढी, ख्वपया आयोनां २२ म्ह कासामिपिन्त ल्यूने लाकाः शिल्ड, दसिपौलिसें ५० द्वः तकाः नगद सिरपा त्याकादीगु खः ।
कासाय् ल्यू चाकुपात, यलया इभान धाख्वा, लियांल्यू काय्गुननि, यलया लक्कि महर्जन व हःपा न्याखाचुक, यलया उत्पला बज्राचार्यं त्याकादीगु खः । वय्कःपिन्सं छसीकथं शिल्ड, दसिपौलिसें नगद सिरपा ३० द्वः तका, १५ द्व तका व ५ द्व तका त्याकादीगु खः ।
यलया कात्तिदबुलिइ जूगु उगु कासाय् वरिष्ठ कलाकार लोकगायक रत्न बेहोशी बज्राचार्ययात “ललितरत्न” उपाधि देछाःसें हंगु खः । कला ख्यलय् जीवन पानादीम्ह बज्राचार्ययात ललितपुरया रत्न भाःपा हंगु थुगु ज्याझ्वलय् वयकःयात दोसल्लां न्ययेकाः हनापौ देछाःगु खःसा नगद १५ द्व तका नं देछाःगु खः । थुगु हना दकले न्हापांगु खुसी वरिष्ठ कलाकार मोहनप्रसाद जोशीयात देछाःगु खःसा निक्वःगु खुसी वरिष्ठ कलाकार बज्राचार्ययात देछाःगु खः ।

यल महानगरपालिका १६ वडाया अध्यक्ष निर्मलरत्न शाक्यया नायःसुइ, थुगु वडाया कलाकार समितिया संयोजक सुरजवीर बज्राचार्यया ल्यूनायःसुइ जूगु थुगु ज्याझ्वः जनसंगीत श्रष्टा अमरराज शर्मा राजोपाध्यायको मूपाहांसुइ जूगु खःसा ज्याझ्वलय् संघीय सांसद प्रेमबहादुर महर्जन, यल महानगरपालिकाया उपप्रमुख मञ्जली शाक्य बज्राचार्य, प्रदेश सांसद रामकृष्ण चित्रकार, १६ वडा सदस्य नापं कार्यपालिका सदस्य वविता श्रेष्ठ, राष्ट्रिय उपभोक्ता मञ्चया नायः प्रेमलाल महर्जन, नृत्य निर्देशक संघ नेपालया नायः भूवनदास श्रेष्ठ, वरिष्ठ कलाकारपिं नारायणदेवी प्रधान, राधेश्याम प्रधान थेंजाःपिं ब्यक्तित्वपिनिगु ब्वति दुगु खः ।

निर्णायकपिं संजय शर्मा राजोपाध्याय, स्वजन रघुवंशी, श्रृष्टि महर्जन च्वनादीगु थुगु कासाय् १५ ल्यज्या जूगु खःसा कासाय् ब्वति कयादीपिं २३ म्ह कासामि दथुं उत्कृष्ट १५ ल्यज्या मिनर्वा शर्मा राजोपाध्याय व राजिप बज्राचार्यं यानादीगु खः ।
कलाकार समितिं न्हूपिं कलाकारपिन्त ह्वःता, थुगु पुस्ताया सक्रियपिं कलाकारपिन्त दबू व वरिष्ठपिन्त हना देछानाः वयाच्वंगु दुसा येन्यापुन्हि, न्हूदँ, श्रीपञ्चमी, फागु थें जाःगु पर्वय् सांस्कृतिक ज्याझ्वः यानाः वयाच्वंगु दुसा म्ये कासा, हुलाप्याखं कासा, कलाकार हकहितया नितिं कलाकार मुना, संकिपाया कार्यशाला (वर्कशप), प्रशिक्षण थें जाःगु ज्याझ्वः म्हो बजेटं अति प्रभावकारी जुइक यानाः वयाच्वंगु दु ।
५ दंनिसें सक्रिय थुगु समितिया छ्याञ्जे अनुप शाक्य, दांभरि सलोना बज्राचार्य खःसा दुजःपिं भूपेन्द्र बज्राचार्य, अमर चित्रकार, निल शाक्य, अमोघवीर बज्राचार्य, मोहिद्दिन खान, श्रुयति शाक्य, चनिरा बज्राचार्य व राधिका श्रेष्ठपिं खः ।

 

नेपाल आयल निगमं डिजेल व मचिकया भाः घटे याःगु दु। बिहीवाः बहनि च्वंगु निगम सञ्चालक समितिया बैठकं डिजेल व मचिकनय् लिटरं छतका घटे याःगु दु।

आः न्हुुगु भाः कथं चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी व वीरगञ्जय् डिजेल व मचिकं लिटरं १४७.५, सुर्खेत व दाङय् लिटर १४९ व स्वनगिः नाप पोखरा व दिपायलय् १५० तका कायम याःगु दु।

पेट्रोल, एलपी ग्यास व हवाइ इन्धनया भाः आः गथे खः अथे याःगु दु।

येँया यइताय् लाःगु चोभाः च्वःया आदिनाथया मेला जुयाः मनूतय् भिड खाःगू दु। दँय् दँसं लक्ष्मी पुजा कुन्हु देगलय् दर्शन याःवइपिं मनूत म्वःम्वः दइ।

येँ गाः व लिक्क च्वंनीपिं भक्ततय्सं थुकिइ ब्वति काइ। देगलय् च्वंपिं लक्ष्मी, सरस्वती आदि द्यःपिनिगु थौं दर्शन व पुजा याःसा यक्व ध्यबा कमे यायेफइ धैगु विश्वास दु।

हिन्दू व बौद्धतय्सं मंकाः देगः कथं आस्था तइगु थनया द्यःयात बौद्धतसें आनन्दादी लोकेश्वर नं धाइ। आदिनाथयात हिन्दू धर्मावलम्बीतय्सं शिव शक्तिया प्रतीक कथं पुजा यायेगु याः। आश्विन शुक्ल पूर्णिमा कुन्हुनिसें कात्तिक शुक्ल पूर्णिमा लच्छितक मेला जुइगु नापं आदिनाथ द्यःया दर्शन यात धाःसा ल्वचं व छ्यंगूया ल्वय् जुइमखु धैगु धाःपू दु।

लिसें भय, रोग व बिघ्नपाखें मुक्त जुयाः छेँजःया सुख व समृद्धि दइगु नं भलसा कायेगु याः। येँपाखें गुगू किलोमिटर यइतापाखे लाःगु थुगु थासं येँ गाःया मनोरम दृश्य खनेदु । उगु देगः लिच्छवीकालीन राजा अंशुवर्मां दयेके ब्यूगु धाइ।

लुँया भाः मदिक्क थहाँ वनाच्वंगु दु। न्हियान्हिथं थहाँ वनाच्वंगु लुँया भाः आतकया दकलय् अप्पो थ्यःगु दु। नेपाल सुनचाँदी व्यवसायी महासङ्घया कथं नेपाःमितयेगु निगूगु तःधंगु नखः स्वन्तिया इलय् लुँया भाः तच्वतं थहाँवना न्हूगु कीर्तिमान दयेकूगु दु।

बुधबाः छगु तोलाय् निद्वः व निसः तका थहाँ वना आः छगू लख ७० द्वः व न्हयसः कारोवार जुगु खः। छापावाला लुँया भाः थौंया निंतिं छगु लख ७१ द्वः तका क्वःज्यूगु दु। बुधबाःया तुलनाय् थौं तोलां स्वसः तका थहाँवंगु खः।

अथे हे वहः भाः तोलां स्वीतकां कुहाँवंगु दु। बुधबाः प्रतितोला निद्वः सच्छि व नीतका थःगु खःसा थौ निद्वः व गुइतका क्वःज्यूगु दु।

प्रधानमन्त्री केपी शर्मा ओलीं महाकवि लक्ष्मीप्रसाद देवकोटा संघर्षया निंतिं प्रेरणाया स्रोत खः धका धयादिगु दु।

प्रधानमन्त्री ओलीं महाकवि लक्ष्मीप्रसाद देवकोटां न्ह्याथें जाःगु अवस्थाय् नं कर्मशील जुइत प्रेरित यानादीगु खँ न्ह्यथनादीगु दु। महाकवि देवकोटाया ११६ गु जन्मजयन्ती जुगु ज्याझ्वलय् प्रम ओलीं देवकोटायात नेपाःमितय्सं न्ह्याबलें लुमंकाः च्वनी धकाः धयादिगु खः।

महाकविया प्रति हनाबनातया सामाजिक सञ्जाल फेसबुकय् प्रधानमन्त्रीं थथे च्वयादिल, “थौं देवकोटा जयन्ती, हार्दिक श्रद्धा, हार्दिक सम्मान महाकवि देवकोटा, छित न्ह्याबलें न्ह्याबलें लुमंकाः च्वने।” महाकवि देवकोटा वि.सं १०६६ कात्तिक कृष्ण औँसी अथे धइगु लक्ष्मी पूजा कुन्हु येँया डिल्लीबजार बूगु खः।

झिदँया वैंशय् चिनाखँ च्वयेगु न्ह्याकादीम्ह देवकोटाया यक्व महाकाव्य, खण्डकाव्य, च्वखँ, बाखँ, नाटक, उपन्यास, म्ये, समालोचना व फुटकर कवितात पिहाँवःगु दु।