शेयर बजाः थौ न घटे जूगु दु। शेयर बजाः परिसूचक नेप्से थौ १४ दशमलव १२ ल्याखं कुहावया २ हजार ७ सय ३४ दशमलव ८३ विन्दुइ थ्यःगु दु।

थौ विकास बैंक, फाइनान्स, जलविद्युत् व म्युचल फन्ड बाहेक दक्को समूहया शेयर घटे जूगु दु। अथेहे बीमा, उत्पादन, व्यापार समूहया शेयर यक्को ल्याखं थहावंगु दु।

कुथेली बुखारी हाइड्रोपावर कम्पनीया शेयर १० प्रतिशतं कुहावंगु दु। समग्रय् बजाः कुहावंसा सप्तकोशी विकास बैंक, शृजनशील लघुवित्त, मकर जितुमाया सुरी हाइड्रोपावर, पोखरा फाइनान्स व समृद्धि फाइनान्स कम्पनीया शेयर धाःसा १० प्रतिशतं थहावंगु दु।

३०८ गु कम्पनीया १ करोड ५३ लाख कित्ता शेयर ७ अर्ब ९१ करोड तकाया कारोबार जूगु दु। थौ दकलय् अप्पो जानकी फाइनान्स कम्पनीया ३३ करोडया शेयर कारोवार जुगु दु।

प्रधानमन्त्री केपी शर्मा ओलीं कर्णाली स्वास्थ्य विज्ञान प्रतिष्ठानयात अझ प्रभावकारी कथं चले यानाः गुणस्तरीय शिक्षा व स्वास्थ्य सेवा बिइगु प्रतिवद्धता प्वंकादीगु दु।

प्रतिष्ठानया न्हापांगु दीक्षान्त समारोहयात संबोधन यानाः प्रतिष्ठानया कुलपति नापं जुयादीम्ह प्रधानमन्त्री ओलीं कर्णालीया जनतां थःगु थासय् गुणस्तरीय स्वास्थ्य सुविधा कायेफूगुलिं खुसी जूगु कनादिल। वय्कलं धयादिल, “राकम कर्णालीइ सच्छिगू खाताया अस्पताल दयेकेगु प्रक्रिया न्ह्याये धुंकूगु दु।” प्रधानमन्त्री ओलीं प्रतिष्ठानय् माःगु थप सेवासुविधा बिइत सरकार कटिबद्ध दूगु धयादिल।

प्रतिष्ठानया परिकल्पनानिसें हे थःम्हसिनं स्यूगु व हाथ्यातय् दथुइ न्हापा थः प्रधानमन्त्री जूबलय् चिकित्सा शिक्षा आयोगया बैठकं स्वीकृति यानाः प्रतिष्ठानय् चिकित्सा कक्षा चले जुयाः न्हापांगू दीक्षान्ततक थ्यंगुलिं वय्कल लसता प्वंकादिल। “मांबौया लगानी, आशा व भलसा नापं छिकपिनिगु मेहनत व लगावया हुनिं थौं थ्व सफलता चूलाःगु दु। दीक्षित ब्वनामित हरेक थासय् ताःलानाः न्हून्हूगु कीर्तिमान तयेफइगु जिं भलसा कयागु दु।

थ्व ताः लाये धुंका तापाक्क तापाक्क च्वंपिं जनतातय्त नं गुणस्तरीय स्वास्थ्य सेवा बियादिसँ।” दीक्षित जूपिन्त प्रधानमन्त्री ओलीं इनाप यानादिल, “जि तसकं लय्ता याःगु दु, कर्णाली न्ह्यःने वयाच्वंगु दु। कर्णाली व सुदूरपश्चिमनापं १३ गू जिल्लाया जनतां थनं स्वास्थ्य सेवा दइगु असम्भव थें तायेकाच्वंगु म्हगसः पूवंगु दु। आः थुकियात अझ प्रभावकारी कथं चले यायेगु झीपिं सकसिगुनं दायित्व खः।”

संयुक्त राज्य अमेरिकाया हार्वड मेडिकल कलेज सेन्टर फर प्राइमरी केयर व सिस्टम स्ट्रेन्थेनिङया निर्देशक प्रा डा क्रिस्टिन मसेङ्गर मू पाहाँ जुयादीगु उगु ज्याझ्वलय् जनस्वास्थ्य, नर्सिङ व चिकित्साशास्त्र विषयस स्नातक व स्नातकोत्तर तहलय् अध्ययन पूवंकूपिं ५८ म्ह विद्यार्थीत दीक्षित जूगु प्रतिष्ठानया प्रशासकीय अधिकृत अमृतबहादुर भण्डारीं न्ह्यथनादिल।

उगु ज्याझ्वलय् स्वास्थ्य नापं जनसङ्ख्यामन्त्री प्रदीप पौडेल, चिकित्सा शिक्षा आयोगया उपाध्यक्ष प्रा डा अञ्जनीकुमार झालिसें मेमेपिंसं ब्वति कयादीगु खः।.(रासस)

राष्ट्रपति रामचन्द्र पौडेलं जलवायु समस्या व गरिबी निवारण ज्याझ्वःयात मंकाःकथं सम्बोधन यायेमाः धका धयादीगु दु। अजरबैजानया बाकुइ सोमबाःनिसें न्ह्याःगु कोप–२९ सम्मेलनया झ्वलय् किर्गिस्तानं थौं जूगु उच्चस्तरीय सत्रयात सम्बोधन यानाःदीसे जलवायु ह्यूपाःया हुनिं पीडितजूपिंत न्याय बिइगु खःसा इमिसं भोगे याःगु समस्यायात मुक्कं सम्बोधन यायेमाः धका धयादीगु दु।

“जलवायु ह्यूपाया हुनिं गुँ लागाया ल्याय्म्हत विदेशय् वंबलय् गरिब, मिसा, मस्त व ज्याथःजिथिःपिं अझ अप्वः प्रभावित जूगु दु, इमित न्याय बिइगु खःसा इमित जूगु जलवायु समस्यानाप गरिबी निवारण ज्याझ्वःयात मंकाः कथं सम्बोधन यायेमाः”, राष्ट्रपति पौडेलं धयादिल। गुँ लागाया नागरिकतय्त जूगु जलवायु समस्या इमित थःपिनिगु हुनिं जूगु मखुसे तसकं याकनं प्राकृतिक स्रोतया दोहन यानाः धनी जूपिं विकसित देय्तयसं याःगु कार्बन उत्सर्जनया हुनिं खः धैगु वय्कःया धापू खः। “इमित जलवायु न्याय बिइकेत कोप–२९ ताःलाइ धइगु जिगू भलसा दु”, राष्ट्रपति पौडेलं धयादिल।

जलवायु ह्यूपाःया प्रभाव दँय् दसं अप्वया वनेगु झ्वलय् दूगु व उकिं न्हूगु ‘रेकर्ड’ दयेकाः यंकूगु धासें उकिया कारणं गुँ लागा मेगु थाय् स्वयां अप्वः जोखिमय् लाः धैगु वय्कःया धापू खः। वंगु अगस्तय् नेपाःया सगरमाथा लागाय् हिमताल तज्यानाः सोलुखुम्बुया थामेगांया ३५ म्ह स्वयां अप्वः छेँखा प्वंनाः करौडं मल्याक नोक्सानी सहयाये माःगु खँ कसें वय्कलं वंगु मनसुन ‘सिजन’य् वःगु खुसिबालय् नेपाःया न्यासः स्वयां अप्वः मनूत सीगु न्ह्यथनादिल। “थ्व घाः आःतक नं मलंनि, वइगु दिं थ्व समस्या अझ अप्वया वनी व तःच्वःगु अवस्था दयेकीतिनि धैगु आकलन आः हे मयात व माःगु सावधानी मकाल धाःसा कन्हय् अझ अप्वः हानिनोक्सानी सहयायेमाली”, राष्ट्रपति पौडेलं धयादिल।

वय्कलं नेपाः व किर्गिस्तान निगुलिं हे गुँ देय्त जूगुलिं झीसं भोगे यानागु जलवायु ह्यूपाया लिच्वः नं उत्थें हे च्वं धकाः धयादिल। नापं, नेपाः व किर्गिस्तानं न्हापान्हापा हिउँ चितुवा संरक्षणय् मंकाःज्या यानागु अनुभव वय्कलं लुमंकादिल।उगु ज्याझ्वलय् किर्जिकिस्तानया राष्ट्रपति, मङ्गोलियाया राष्ट्रपति, अजरबैजानया विदेश मामिलामन्त्रीपिंसं नं थःगु खँ तयादिल।

अजरबैजानया बाकु सहरय् थ्वहे कात्तिक २६ गतेनिसें न्ह्याःगु जलवायु ह्यूपासम्बन्धी संयुक्त राष्ट्र सङ्घीय संरचना महासन्धि पक्ष देय्तय्गु २९ गूगु सम्मेलन (कोप–२९)अन्तर्गत मङ्गलबाः राष्ट्रपति पौडेलं उच्चस्तरीय सत्रया ‘विश्व नेतात जलवायु कार्य शिखर सम्मेलन’यात सम्बोधन यानादीगु खः।(रासस) 

राष्ट्रपति रामचन्द्र पौडेलं हिमालया सुरक्षा धइगु हे पृथ्वीया सुरक्षा खः धैगु खँ लुमंकेत विश्व समुदाययात इनाप यानादीगु दु। अजरबैजानया बाकु सहरय् थ्व हे कात्तिक २६ गतेनिसें न्ह्याःगु जलवायु ह्यूपाः सम्बन्धी संयुक्त राष्ट्रसङ्घीय संरचना महासन्धि पक्ष देय्तय्गु २९ गूगु सम्मेलन (कोप–२९) य् विश्व नेतातय्गु उच्च स्तरीय सत्रयात मङ्गलवाः संबोधन यानाः राष्ट्रपति पौडेलं अथे इनाप यानादीगु खः।

राष्ट्रपति पौडेलं धयादिल, “च्वापुगुँया निति सुरक्षा धइगु हे पृथ्वीया सुरक्षा खः धइगु खँ सकसिनं मनन याये, गुँ देय्या तुयूगु च्वापुगुँ हाकुगुँइ परिणत जुइगु झ्वलय् उगु देसय् जक मखु क्वय्च्वंगु तटीय देय्तय्त नं सङ्कट जुइ धइगु वास्तविकता विश्वं ल्वःमंके मज्यू।” वय्कलं थुकिया लागि च्वापुगुँनिसें समुद्रतकया मुक्कं व समष्टिगत अनुकूलन अवधारणायात औपचारिक खँल्हाबल्हाया विषय दयेकेत तकं उगु सम्मेलनय् प्रस्ताव तयादिल।

नापं, नेपालपाखें थ्व हे अवधारणाया लिधंसाय् सगरमाथा खँल्हाबल्हा ज्याझ्वः न्ह्याकेत कुतः यानाच्वन धकाः वय्कलं न्ह्यथनादिल। राष्ट्रपति पौडेलं थः जलवायु न्याय व क्षतिपूर्तिया सः ज्वनाः थुगु सम्मेलनय् ब्वति काः वयागु खः धकाः कनाः धयादिल, “गोलाबारुदय् खर्च जुयाच्वंगु तःधंगु स्रोतसाधन जलवायु ह्यूपाःया नकारात्मक लिच्वः म्ह्वः यानाः मानव सभ्यतायात बचे यायेत उपयोग जुइमाः।”

जलवायु ह्यूपाःया समस्यां पृथ्वी हे सङ्कटय् लानाच्वंगु वय्कलं धयादिल । विशेष यानाः गरीव, अल्पविकसित, विकासशील व चिचिधंगु टापु देय्त थुकिया स्याःचालं अप्वः प्रभावित जूगु वय्कःया धापू दु। “तसकं म्ह्वः कार्बन उत्सर्जन यायेगु, तर अप्वः नकारात्मक असर जूगु विरोधाभासपूर्ण अवस्थाय् नेपाः लानाः च्वंगु दु”, राष्ट्रपति पौडेलं धयादिल। उगु सत्रय् अजरबैजानया राष्ट्रपति इलहाम अलियेपंm लसकुस यानादिल धाःसा संयुक्त राष्ट्र सङ्घया महासचिव एन्टेरियो गुटरेसलिसें विश्वका थी थी देय्या राष्ट्र प्रमुख व सरकार प्रमुखतय्सं संबोधन यानादीगु खः।(रासस)

येँय् ज्वम्ह गण्डकी प्रदेशया पूर्वमन्त्री दीपक मनाङेयात प्रहरीं केन्द्रीय अनुसन्धान ब्यूरो (सीआईबी) न अदालतय् यकूूगु दु।

अदालतय् उपस्थित याये धुका वयात कारागारय् यकेगु तयारीइ दु। येँया सानोभ¥याङय् कम्फर्ट हाउजिङं वयात ज्वंगु खः। सीआईबीया पुचलं थौ सुथय् ज्वंगु खः। मनाङेयात सर्वोच्च अदालतं कात्तिक २० गते मनू स्याइगु उद्योगय् दोषी ठहर याःगु खः।

न्यायाधीश डा. नहकुल सुवेदी व टेकप्रसाद ढुंगानां इजलासं थ्व स्वया न्ह्यः तत्कालीन पुनरावेदन अदालत (आःया उच्च अदालत) यलं याःगु फैसलायात सदर यासे २०६९ सालय् न्यादँया कैद सजाय न्यकूगु खः।