महिला, बालबालिका लिसे ज्येष्ठ नागरिक मन्त्री भगबती चौधरीं ल्याय्म्ह तयेगु लागि लगानी व नीतिगत सुधार याये मागुलि सरकार प्रतिबद्ध दु धका धयादीगु खः।

नवलपुरको देवचुली नगरपालिका वडा नम्बर १० स्थित जागृति बाल लिसे युवा सरोकार नेपालं निर्माण यागु मस्तय्त सयकेगु व सिकाइ लिसे स्रोत केन्द्रया अवलोकन याये धुका ल्याय्म्ह व मस्त नाप अन्तरसम्वाद यासे मन्त्री चौधरीं अथे धयादीगु खः।

उगु ज्याझ्वलय् वयकलं ल्याय्म्हतय्त राज्यया दक्को निकाय, सामाजिक ख्यलय् व समाज, परिवार दक्कोसिया लगानी यायेमाः धका धयादीगु खः। मन्त्री चौधरीं सरकार मन्त्रालयगत बजेट बिइगु म्हो जक बजेट बिइगु व योजना कथं बजेट कटौती जुगुलि माःगु कथं ज्या मजुगु धका धयादीगु खः।

मन्त्री चौधरीं म्ह्याय् पिन्त न शिक्षानाप जीवन उपयोगी शिक्षा तक बिइमाःगुलि बः बियादीगु खः। खासयाना आत्मनिर्भर दयकेगु निति सीप स्यनेमाःगुलि बः बियादीगु खः। अथे जुगुलि म्ह्याय् पिनिगु लागिु आत्मनिर्भर ज्याझ्वः हयागु खः धका धयादीगु खः।

म्हिगःया तापक्रम ४० डिग्री सेल्सियस स्वया च्वये थ्यःगु दु। प्यंगु जिल्लाय् मापन केन्द्रया तापक्रम ४० डिग्री स्वया च्वये थ्यःगु दु धका मापन याइगु जल लिसे मौसम पूर्वानुमान महाशाखां धाःगु दु। महाशाखाया कथं म्हिगः बहनिया अधिकतम तापक्रम धनगढीइ ४४ डिग्री, नेपालगञ्जय् ४३ दशमलव ६, दीपायलय् ४० दशमलव ७ व वीरेन्द्रनगरय् ४० दशमलव ९ डिग्री मापन जुगु दु।

अथेहे दाङया घोराहीइ ३९ दशमलव ६, भैरहवाय् ३९ दशमलव ८, सिमराय् ३७ दशमलव ५ व जनकपुरय् ३७ डिग्री थ्यःगु खः। म्हिगः येँ तापक्रम ३४ दशमलव ४ डिग्री सेल्सियस थ्यःगु खः।

येँ तापक्रम ३४ दशमलव ४ डिग्री थ्यःगु थ्व निक्वःगु पटक खः।

नेकपा एमाले येँ जिल्लाया न्ह्यय्क्वःगु अधिवेशन शुरु जुयाच्वंगु दु। नेतृत्वया निति थीथी पदय् पदाधिकारीनाप थीथी क्लस्टरपाखे दुजःपिन्स उम्मेदवारी दर्ता याःगु दु।

अध्यक्षय् दीपक निरौला व निर्मल देउला उपाध्यक्षय् बिश्वराम सापकोटा, नमराज पराजुली, नवराज भट्ट व बिदुर बिक्रम खड्कापिन्स उम्मेदवारी दर्ता याःगु दु।

अथेहे सचिवय् राजेश शाक्य व सत्यनारायण डंगोल उपसचिवय् उद्धव भण्डारी, बिन्दु मर्हजन, गुन्जमान सींह बस्नेत, तारा भण्डारीपिन्स उम्मेदवारी दर्ता याःगु दु।

थौ ११ बजेनिसे मतदान जुइगु दु। एमाले येँ जिल्लाया सचिव राजेश शाक्यं थौ जुइगु मतदानय् हाकन सचिवया उम्मेदवारी बियादीगु दु।

स्मार्ट एरोविक्स व भिषा एलायन्सया मंकाः ग्वसालय् हिदान ज्याझ्वः जुगु दु। खुसिबुँ पहिक्वः त्वालय् जूगु ज्याझ्वलय् किड्नी, कोलेष्ट्रोल व ब्लडसुगरमा निःशुल्क शिविर नं संचालन याःगु खः।

शिविरं निसः न मल्याक मनूत लाभान्वित जूगु जानकारी ग्वसाः खलकं जानकारी ब्यूगु दु।

स्मार्ट एरोविक्सया नायः निर्मल महर्जनया सभाध्यक्षताय् जुगु हिदानया औपचारिक ज्याझ्वलय् ब्लड डोनर्स एशोसियसन अफ नेपाल (ब्लोदान) या केन्द्रीय नायः सानुबाबु प्रजापति मू पाहाँकथं झायादीगु खः।

नक्सालस्थित बाल मन्दिरया जग्गा प्रकरणय् ज्वनातम्ह नेपाल बाल संगठनया पूर्वउपाध्यक्ष तुल्सीनारायण श्रेष्ठ निन्हुलिपा त्वःतुगु दु। केन्द्रीय अनुसन्धान ब्यूरो (सीआईबी) य् बयान बिइ धुका श्रेष्ठयान निन्हुलिपा त्वःतुगु खः। सीआईबीया एसपी होविन्द्र बोगटीं जिल्ला सरकारी वकिलया कार्यालयय् बयान बिइ धुका माःसा हाकन उपस्थित जुइगु कथं त्वःतुगु खः।

पक्राउ पुर्जी जारी जुगुलि मेपि बाल संगठनया तत्कालीन उपाध्यक्षपि तुलसीनारायण श्रेष्ठ, योगेन्द्रबहादुर शाही, तत्कालीन महासचिवपि गणेशदत्त श्रेष्ठ सुवासकुमार पोखरेल, श्यामकुमार आले, प्रचण्डराज प्रधान, रामकाजी कोने, तत्कालीन उपमहासचिव सुमन शाक्य, संगठनया तत्कालीन सदस्य नाप स्रोत लिसे परिचालन उपसमिति संयोजक कृष्णबहादुर साह, संगठनया तत्कालीन कोषाध्यक्ष मनोहर गोपाल श्रेष्ठ व तत्कालीन उपकोषाध्यक्ष दीपकदास श्रेष्ठपि खः।

अथेहे वृहस्पति विद्या सदनया पाखे तत्कालीन अध्यक्ष पुरुषोत्तमराज जोशी, अख्तियार दुम्ह तत्कालीन अध्यक्ष चिरञ्जीवी तिवारी, विद्या सदनया तत्कालीन सञ्चालक प्रवीणराज जोशी, ऋद्धा संघाई, अभिनव सिंघानिया, सिद्धार्थ केडिया, कृतिप्रसाद पाण्डे व मुरारी निधि तिवारीविरुद्ध पक्राउ पुर्जी जारी जुगु खः।