पूर्वानुमान थौंकन्हय् देय्न्यंक पश्चिमया फय् नापं गुँया भागय् स्थानीय फँय्या नं छुं छुं प्रभाव दूगु जल व मौसम विज्ञान विभागं न्ह्यथंगु दु।

मौसम विभागया कथं थौ न्हिनय् कोशी, बागमती व गण्डकी प्रदेशया गुँया भागय् छुं छुं बदली जुयाः मेगु थासय् मौसम बांलाइ। कोशी, बागमती, गण्डकी प्रदेशया गुँया भागय् भतिचा व मेगु प्रदेशया गुँया भागय् छगू/निगू थासय् नँ न्याना वाः वइगु सम्भावना दु।

कोशी व गण्डकी प्रदेशया तजाःगु गुँया भागय् व च्वापुगुँया भागय् छुं थासय् भतिचा च्वापु गाइगु नं सम्भावना दु।

नेपाल प्रहरीया निम्ह प्रहरी नायव महानिरीक्षक (डिआइजी) तय्त प्रहरी अतिरिक्त महानिरीक्षक (एआइजी) पदय् बढुवाया निंतिं सफारिस याःगु दु।

गृह मन्त्रालय बढुवा समितिया सचिवालयया बुधवाः बहनी च्वंगु बैठकं नेपाल प्रहरीया जनपद प्रहरी पुचःपाखेया निम्ह डिआइजी तय्त एआइजी पदय् बढुवाया नितिं सिफारिस याःगु खः। बढुवा सिफारिस जूपिं बुद्धिराज गुरुङ व केदार ढकाल खः।

बढुवा सिफारिस जूम्ह गुरुङ थौकन्हे अख्तियार दूरुपयोग अनुसन्धान आयोग टङ्गाल व ढकाल प्रहरी प्रधान कार्यालय नक्सालया प्रशासन विभागय् ज्या यानाच्वना वंगु दु।

बढुवा समितिं प्रहरी नियमावली, २०७१ (संशोधन नापं) या नियम २७ या उपनियम (४) कथं गुरुङ व ढकालयात बढुवाया निंतिं सिफारिस याःगु समितिया सदस्य सचिव नापं प्रहरी महानिरीक्षक बसन्तबहादुर कुँवरं कनादिगु खः।

प्रधानमन्त्री केपी शर्मा ओलीं नेपाल दूरसञ्चार कम्पनी लिमिटेड (नेपाल टेलिकम) यात गुणस्तरीय सेवा प्रवाह यायेत निर्देशन बियादीगु दु।

प्रधानमन्त्री दैवीप्रकोप उद्धार कोषय् जम्मा जूगु ग्वाहालि ध्यबायाबारे खँ न्ह्यथनेत प्रधानमन्त्री ज्याकुथिइ वंगु टेलिकमया पुचःयात प्रधानमन्त्रीं नेपाल टेलिकम देय्या सम्पत्ति जूगुलिं जनतायात सेवा बिइगु खँय् म्हो मयायेत निर्देशन बियादिगु खः।

वय्कलं ज्याभः व प्रविधिया लागि ग्वाहालि माःसा सरकारं ग्वाहालि यायेगु आश्वासन बियाः संस्थाया मान च्वन्ह्याकेत इनाप यानादिगु खः।उगु ज्याझ्वलय् सञ्चार नापं सूचना प्रविधि मन्त्री पृथ्वीसुब्बा गुरुङ व सञ्चार नापं सूचना प्रविधि मन्त्रालयया सचिव राधिका अर्यालं नं ब्वति कयादीगु खः।

टेलिकमया प्रबन्ध निर्देशक सङ्गीता अर्यालं छगू करोड निगू लख ७० द्वः कोषय् दाखिला यानागु खँ न्ह्यथनादिल।

संसदीय सुनुवाइ समितिं बेल्जियमया निंतिं प्रस्तावित राजदूत सेवा लम्सालयागु नां अनुमोदन याःगु दु।

समितिया ज्याथःम्ह जः पशुपति शम्शेर जबराया अध्यक्षताय् थौं च्वंगु बैठकय् लम्सालया नां सर्वसम्मतिं अनुमोदन जूगु समितिया दुजः महेशप्रसाद बर्तौलां कनादिल।

थ्व स्वया न्ह्यः बैठकय् प्रस्तावित राजदूत लम्सालं थःगु अनुभव, योग्यता, अभिरुचि व लिपाया रणनीति दुथ्यागु कार्ययोजना न्ह्यब्वया दिइगु खः।

परराष्ट्र मन्त्रालया सचिवया कथं ज्या याना च्वनादिइम्ह वय्कलं थ्व सिबे न्ह्यः पाकिस्तानया निंतिं नेपाली राजदूतया जिम्मेवारी क्वबियादिइ धुंकूगु दु।

नेपाल संवत् ११४५ मू समारोह समितिं नेपाल संवत्या मौलिकता व महत्वयात अन्तर्राष्ट्रिय तहलय् प्रवद्र्धन यायेत कूटनीतिक नियोगतय्त इनाप याःगु दु।

हरेक दँय् कात्तिक शुक्ल प्रतिपदा कुन्हुनिसें न्ह्याइगु नेपाल संवत्यात प्रचारप्रसार हयेगु ज्या यायेत समितिं विदेशय् च्वंगु नियोग तय्त इनाप याःगु खः। समितिया नायः राजेन्द्र श्रेष्ठं राष्ट्रिय विभूति शङ्खधर साख्वालं ९३७ सालय् गरिब जनताया त्यासा पुलाः प्रचलनय् हःगु नेपाल संवत्या मौलिकता व महत्वयात संरक्षण यानाः राष्ट्रिय व अन्तर्राष्ट्रिय तगिंमय् प्रवद्र्धन यायेत दक्वः नियोग तय्त इनाप याना दीइगु दु।

वय्कलं नेवाः समुदायं देयन्यंक थी थी ज्याझ्वः यानाः न्हूदँया कथं न्याय् किइगु संवत् नेपाःपाखें नीजूगुलिं थ्व संवतयात छ्यलेगु ज्या अप्वयेकाः यंकेमाःगु खँय् बः बियादिल। समितिं थ्वहे कात्तिक १७ गते बसन्तपुरय् ग्वसाः ग्वइगु मू समारोहय् ब्वति कायेत मातहतया सङ्घसंस्थातय्त थःगु थासं परम्परागत बाजा, झाँकी व सांस्कृतिक वेशभूषानापं वयेत उजं ब्यूगु दु। उगु समारोहयात प्रधानमन्त्रीं सम्बोधन याइगु ज्याझ्वः दु।

विसं २०५६ य् तत्कालीन प्रधानमन्त्री कृष्णप्रसाद भट्टराई नेतृत्वया सरकारं साख्वाःयात राष्ट्रिय विभूति घोषणा याःगु खः। २०६५ सालय् प्रधानमन्त्री पुष्प कमल दाहाल ‘प्रचण्ड’ नेतृत्वया सरकारं नेपाल संवतयात राष्ट्रिय मान्यता बियागु घोषणा याःगु खः। समितिपाखें अन्तक्र्रिया, गोष्ठी, भिंतुना कालबिल ज्या याना वयाच्वंगु दु।