महिला, बालबालिका लिसे ज्येष्ठ नागरिक मन्त्री भगबती चौधरीं मिसापि लगानीकतातय्त प्रोत्साहन यायेमाः धका धयादीगु दु।

स्वतन्त्र ऊर्जा उत्पादकतयेगु संस्था, नेपाल (इप्पान) या ग्वसालय् थौ हिमालयन हाइड्रो एक्स्पो अन्तर्गत ऊर्जा ख्यलय् बातावरण, सामाजिक व सुशासन लिसे लैँगिक समताय् एकीकरण विषयय् अथे मन्त्री चौधरीं धयादीगु खः।

नेपालय् ताः ईनिसे मिसा सशक्तीकरणया निति ज्या जुया वयाच्वंगु धका धयादीसे वयकलं धयादीगु दु, मिसापि मेमेगु ख्यलय् न अप्पोया वयाच्वंगु दु धका धयादीगु दु। संविधान जारी जुइ धुका राजनीतिक ख्यलय् ३३ प्रतिशत मिसापिनिगु सहभागिता सुनिश्चित जूसा मेमेगु ख्यलय् अप्पोके मफुनि धका धयादीगु खः।

लगानी यायेगु निति प्रोत्साहन यायेगु लागि सरकारं लगानी सम्मेलन यानागु धका धयादीसे अपुक लगानी दुकायेगु निति विधेयक न हये धुकुगु दु धका धयादीगु खः। हिमालयन हाइड्रो एक्स्पो २०२४ सुरु जुइ धुकुगु दु। मत खपत अप्पोकेगु निति सन्देशनापं स्वतन्त्र ऊर्जा उत्पादकतयेगु संस्था, नेपाल (इप्पान) या ग्वसालय् हिमालयन हाइड्रो एक्स्पो सुरु जूगु खः।

ऊर्जा जलस्रोत लिसे सिँचाइमन्त्री शक्तिबहादुर बस्नेतं ¥यालीया उलेज्या यानादीगु खः।

थ्व हे वइगु बैसाख १५ गते जुइत्यःगु इलाम २ या उपनिर्वाचनय् पहिचानवादी स्वतन्त्र उम्मेदवार डेकेन्द्र थेगिमयात येँया पहिचानबादी नेवातय्पाखें सर्मथन याइगु जुगु दु।

कोशी प्रदेशया नां हिलाः लिम्बुवान प्रदेश नामाकरण यायेमाःगु माग यासें डेकेन्द्र थेगिमया नेतृत्व सशक्त आन्दोलन जुयाच्वंगु खः। सतक आन्दोलन नापं संसदय् न संर्घष यायेगु नितिं वयकलं थथे प्रतिनिधि सभाया सदस्यया नितिं उम्मेदवारी बियादिगु खः।

येँया पहिचान पक्षधर नेवातय्गु पाखें नं वयकःयात सर्मथन यायेगु लिसें इलामाय् च्वनाच्वपिं सकल नेवातय्त पहिचानबादी स्वतन्त्र उम्मेदवार डेकेन्द्र थेगिमयात ग्वाहालि यायेत इनाप यायेगु नितिं कन्हय् बुधवाः सुथय् येँया नेपाः ब्याकेटय् नेवातय्गु मुज्या च्वनेत्यंगु खः

उपप्रधान लिसें स्वास्थ्य व जनसंख्यामन्त्री उपेन्द्र यादव जनसंख्या सम्बन्धी सम्मेलनय् ब्बति कायेगु निति अमेरिकाय् वनिइगु जुगु दु।

जनसंख्या विकास सम्बन्धी ३० क्वःगु अन्तर्राष्ट्रिय सम्मेलनय् ब्बति कायेगु निति २७ अप्रिल (१६ वैशाख) य् मन्त्री यादव अमेरिका वनेत्यःगु दु धका मन्त्रालयया समन्वय महाशाखा प्रमुखं जानकारी बिःगु दु।

मन्त्री यादवया नेतृत्वय् स्वास्थ्य लिसे जनसंख्या मन्त्रालय समन्वय महाशाखा प्रमुख डा. चुमनलाल दास, जनसंख्या महाशाखा प्रमुख विनोदबहादुर कुँवर, मन्त्री यादवया स्वकीय सचिव भवनाथ खतिवडा व परराष्ट्र मन्त्रालयया सह–सचिवपि उखेपाखे वने त्यःगु खः।

राष्ट्रपति रामचन्द्र पौडेल व कतारया अमिर शेख तमिम बिन हमाद अल थानी राष्ट्रपति कार्यालय शीतल निवासय् नापलायेगु ज्या जुगु दु।

थौ निम्ह राष्ट्रप्रमुख दथुइ नापालायेगु ज्याझ्वलय् नेपाः व कतार दथुइ जुयाच्वंगु मैत्रीपूर्ण सम्बन्ध, आपसी हित व च्युता विविध विषय सहलहय् निगु देय् दथुइया सम्बन्धयात अझ मजबुत बालाक्क न्ह्याकेगु विषय विस्तृत खँल्हाबल्हा जुगु धका राष्ट्रपति कार्यालयं जानकारी बिःगु दु।

शीतल निवासया गण्डकी हलय् जुगु उगु ज्याझ्वलय् उपप्रधानमन्त्री नाप परराष्ट्रमन्त्री नारायणकाजी श्रेष्ठ, सवारी व्यवस्थापनया जिम्मेवारीइ दुम्ह ऊर्जा, जलस्रोत लिसे सिँचाइ मन्त्री शक्तिबहादुर बस्तेतनापं विशिष्ट पदाधिकारीतय्गु ब्बःति दुगु खः।

लुँ तोलां थौ २ हजार ७०० कुहावःगु दु। नेपाल सुनचाँदी व्यवसायी महासंघया कथं थौ लुँ तोलां २ हजार ७०० कुहावया १ लाख ३५ हजार ५ सय न कारोबार जुगु दु धका धाःगु दु।

अथेहे वहः तोलां न पीन्यातका कुहावगु दु। महासंघया कथ वहः तोलां पीन्यातका कुहावया १ हजार ६६० न कारोवार जुगु दु धका धाःगु दु।