सरकारं मिडिया काउन्सिल विधेयक राष्ट्रिय सभाय् दर्ता याःगु दु। थ्व स्वया न्ह्यः २०७५ सालय् राष्ट्रिय सभापाखे न्ह्याकूगु विधेयक प्रतिनिधि सभाय् सहलह जुगु इलय् कार्यकाल क्वचायेवं निष्क्रिय जुगु खः।

सरकारं हयेत्यःगु न्हुगु विधेयकय् पत्रकारतय्स आः मिडिया काउन्सिलपाखे परिचयपत्र कायेमाःगु व्यवस्था तःगु दु। आः सरकारं सूचना विभाग व प्रदेशस्थित सञ्चार रजिष्टारया कार्यालयपाखे थथे परिचयपत्र वितरण याना च्वंगु खः। विधेयकं थुगु अधिकार मिडिया काउन्सिलयात बिइगु प्रस्ताव याःगु दु।

२०७५ सालय् सरकारं हउगु मिडिया काउन्सिल विधेयक् वःगु इलय् राष्ट्रिय सभां पत्रकारतय्त लाइसेन्स कायेगु निति जाँच बिइमाःगु प्रावधान दु। सरकारं हःगु न्हुगु विधेयकय् जाँच बिइगु प्रावधान तयातःगु मदु। तर पत्रकारं प्रेस प्रतिनिधि परिचयपत्र कायेमाः धासा सञ्चार संस्थाया सिफारिसनाप तोके यानातःगु योग्यताया प्रमाणपत्रया प्रतिलिपि दुथ्याकेमाः याना तःगु दु।

सर्वोच्च अदालतं नक्कली भुटानी शरणार्थी प्रकरणया अभियुक्त पूर्वमन्त्री टोपबहादुर रायमाझी, पूर्वगृहसचिव टेकनारायण पाण्डेनापं न्ह्यय्म्हेसित कुनेत उच्च अदालतया निर्णय सदर याःगु खः।

न्यायाधीश कुमार रेग्मी व टेक प्रसाद ढुंगानाया मंकाः इजलासं अभियुक्त आङटावा शर्पायात ३० लाख धरौटीइ त्वःतुगु दु। अथेहे समशेर मियाँयात साधारण तारेखय् तःगु दु धका सर्वोच्चया सहप्रवक्ता गोविन्द घिमिरें जानकारी बिःगु दु।

गोविन्द कुमार चौधरीयात १० लाख धरौटीइ त्वःत्येत आदेश बिःगु दु। केशव प्रसाद दुलाल, सन्देश शर्मा, सागर राई, इन्द्रजीत राई, सानु भण्डारीपिन्त उच्च अदालतं कुना तयेगु निर्णयया सदर याःगु दु।

कक्षा १२ परीक्षा थौनिसे देयन्यकं सुरु जुगु दु। सुथय् ८ बजेनिसे ११ बजेतक न्ह्याइ। थौंनिसे न्ह्याउगु परीक्षा वैशाख २६ गते क्वचाइ। थुगु दँय् नियमितपाखे १ लाख ९६ हजार ९ सय १४ मिजंपि व १ लाख ९३ हजार ९ सय ३३ मिसापि याना ३ लाख ९० हजार ८ ४७ परीक्षार्थीतय्स ब्बति काउगु दु।

अथेहे ग्रेड वृद्धिपाखे १ लाख ६ सय ५० विद्यार्थीपि ब्बति काउगु दु। देयन्यक ५ हजार ५ सय ४२ विद्यालयया विद्यार्थी कक्षा १२ परीक्षाय् ब्बति काउगु खः। परीक्षाया लागि बोर्डं देयन्यक १ हजार ५ सय २५ परीक्षा व जापानय् छगु नाप १ हजार ५ सय २६ परीक्षा केन्द्रया निर्धारण यानातःगु दु। दकलय् अप्पो येँ १ सय ४४ व मनाङ÷मुस्ताङय् छगु छगु परीक्षा केन्द्र निर्धारण यानातःगु दु।

न्हापागु पटक बोर्डं थुगु दँनिसे स्वचालित (स्यान्डम) प्रक्रियापाखे येँ परीक्षा केन्द्र निर्धारण याःगु खः। परीक्षा सञ्चालनया लागि केन्द्राध्यक्ष, सहायक केन्द्राध्यक्ष, निरीक्षक, कर्मचारी, कार्यालय सहयोगी याना ३४ हजार १ सय ७१ जनशक्ति व १८ हजार ३ सय प्रहरी परिचालन याःगु दु।

सरकारं गुठीसम्बन्धी आःयागु संरचना व कानुनयात पुनरावलोकन याना संविधान कथं गुुठीसम्बन्धी ऐन हयेगु गृहकार्य यानाच्वंगु दु।

देयन्यक गुठीयात निर्देशित याइगु गुठी संस्थान ऐन २०३३ न थौकन्हयः माःगु व वयागु अपेक्षायात सम्बोधन याये मफगु धका सर्वसाधारण व सम्बद्ध पक्षं ताः ईनिसे असन्तुष्टि याना च्वंगुयात ध्यानय् तया गुठीसम्बन्धी न्हुगु ऐन हयेगु गृहकार्य न्ह्याके त्यनागु धका भूमि व्यवस्था, सहकारी लिसे गरिबी निवारणमन्त्री बलराम अधिकारीं धयादीगु दु।

मन्त्रालयं मन्त्रीस्तरीय निर्णयपाखे गुठीसम्बन्धी सरोकारवालानाप सुझाव कायेगु निति कानुनया मस्यौदा तयार यायेत संस्थानया केन्द्रीय प्रशासक किरण शाक्यया संयोजकत्वय् न्याम्हेसिगु कार्यदल गठन याःगु खः। भूमि व्यवस्था, सहकारी लिसे गरिबी निवारण मन्त्रालय काजीबहादुर विष्ट, नापी विभागया प्रमुख नापी अधिकृत मग्नु दत्त, दीपकराज पाठक, गुठी संस्थानया कानुन अधिकृत जनक पोखरेल दुजः दुगु कार्यदल गठन याःगु खः।

कार्यदलयात नेपाःया संविधान यागु धारा २९० कथं गुठीया मूलभूत मान्यतायात छु न असर मलाइगु कथथं गुठी सम्पत्तिया संरक्षण नाप उपयोग, गुठीया मौलिकताया संरक्षण यायेगु मौजुदा कानुनय् याये माःगु खाकानाप न्हुगु कानुनया मस्यौदा पेस यायेत जिम्मेवारी बिःगु खः।

कार्यदलयात बिगु कार्यक्षेत्र सतय् धयातःगु दु– ‘सर्वोच्च अदालतपाखे प्रतिपादित कानुनी सिद्धान्ततक आधारय् गुठीसम्बन्धी विद्यमान कानुनी व्यवस्थाय् ई कथं हिलेमाःगु खनेदुगुलि गुठीसम्बन्धी विद्यमान व्यवस्था, प्रथा, परम्परा व गुठी संस्कृतिया संरक्षण व प्रवद्र्धन यायेमाःगु आःया कानुनय् यायेमाःगु परिमार्जनया खाका नापं न्हुगु गुठी कानुनया मस्यौदा तयार यायेत मन्त्रालययात लच्छि दुने पेश यायेमाः।’ कार्यदलं आःयागु गुठीसम्बन्धी कानुनय् दुगु कानुनी, सांस्कृतिक लिसे परम्परागत व्यवस्था व गुठी व्यवस्थापन सम्बन्धय् अदालतपाखे जुगु आदेश/निर्णय व गुठी व्यवस्थापन यायेत थ्व स्वया न्ह्यः गठन जुगु आयोग, समिति नापंं कार्यदलया प्रतिवेदनय् दुगु परिभाषित व्यवस्थायात अध्ययन यासे केन्द्रबिन्दइ तयेमाः धका धयातःगु दु।

अथेहे स्वनिगःया देगः, गुम्बाया व्यवस्थापन सम्बन्धय् गुठीसम्बन्धी आःयागु व्यवस्था जुयाच्वंगु अध्ययन याना स्वनिगःया हकय् मःगु कानुनी व्यवस्था यायेत बिस्कं परिच्छेदया व्यवस्था यायेमाः धका धयातःगु दु। स्वनिगः पिनेया मल्लिका अर्जुन, उग्रतारा, स्वर्गद्वारी, हलेसी, मटिहानी, रामजानकी द्यःया थाय् व्यवस्थापन यायेत देगःया नामय् दुगु जग्गानापं चल अचल सम्पत्तिया व्यवस्थापन सम्बन्धी माःगु कानुनी व्यवस्था यायेत धयातःगु दु। अथेहे थीथी द्यः थाय् दुगु गुठीया अचल सम्पत्ति विशेष याना जग्गा न्हापानिसे च्वना च्वपि मोही किसानतय्गु मोहीसम्बन्धी समस्यायात माःगु कथं व्यवस्थापन यायेत माःगु कानुनी प्रबन्ध यायेगु विषययात केन्द्रबिन्दुइ तया मस्यौदा तयार यायेत धयातःगु दु।

भूमि व्यवस्था, सहकारी लिसे गरिबी निवारण मन्त्री बलराम अधिकारी कानुनसम्बन्धी न्हुगु कानुन मस्यौदा तयार यायेगु ज्यायात सरकारं तधःगु प्राथमिकताय् तयागु दु। ‘म्हिगः गुठी विधेयकय् जुगु कमि कमजोरी छु छु खः। थौ छु छु समस्या दु। प्रचलित कानुनी प्रावधानय् छु छु दु। उकियात ध्यानय् तया न्हुगु कथं कानुनया मस्यौदा दयकेत मन्त्रालय गम्भीर दु’ धका मन्त्री अधिकारीं धयादीगु खः।

कार्यदलया संयोजक नाप गुठी संस्थानया प्रशासक किरण शाक्यं २०७५ सालया गुठीसम्बन्धी विधेयकय् छु छु बुँदाय् सरोकारवालातय्गु असहमति दुगु खः, आः छु यायेमाःगु दु, निजी गुठीयात गयेयाना व्यवस्थित यायेगु विषय सरोकारवालातय् नाप च्वना कानुनया मस्यौदा तयार यायेगु प्रतिबद्धता प्वकादीगु खः। उगु सहलह जुगु मुज्याय् नेवाः तयेगु थीथी खलः पुचः नाप बिशिष्ट मनू तयेगु ब्बति दुगु खः।

बौद्ध धर्मया ख्यलय् दानया तःधंगु महत्व दयाच्वंगुयात विशेष प्राथमिकता बिया येँया शाक्य महाविहार संघया ग्वसालय् पंचबुद्धया प्रतिककथं झिगु बहाःया न्याम्ह श्रद्धेय स्थविर थाय्पा जूपिन्त येँया श्री गणेश व श्री भैरवया समुपस्थितिइ कोहिति बहाः (कीर्तिपुण्य महाविहार) य् पंचदान ज्याझ्वः क्वचाःगु दु।

उगु पन्चदान ज्याझ्वलय् माननीय शैलेन्द्र बज्राचार्य बागमति प्रदेशया संस्कृति लिसे सहकारी विकास मन्त्री नियुक्त जूगुलि संघपाखें भिन्तुना देछागु खः। मङ्गलवाः ल्हुति पुन्हि कुन्हु क्वःहिति बहालय् विराजमान जुया बिज्याम्ह क्वाःपाद्यः समक्ष पुजायासे पंचदान ज्याझ्वः क्वचाःगु दु। उगु ज्याझ्वलय् लायकूया श्री कुमारीयात दान प्रदानया झ्वलय् भाग तयाः वसपोलयात तकं सम्मान यायेगु ज्या याःगु खः।

श्री गणेश व श्री भैरवजुपिन्त सिन्हः तिका दान प्रदान यायगु ज्या न्ह्याकूगु खः। येँ देया शाक्यपिं वन्दे लुइगु (प्रवज्याभिषेक) बिइगु झिगू बहाःया न्याम्ह न्याम्ह स्थविर याना मुक्कं न्ययम्ह (५०) श्रद्धेय थाय्पा वा बहाःया प्रतिनिधिपिन्त बज्रयानी विधि विधानकथं पंज्ररां विइगु ज्या याःगु खः।

शाक्य महाविहार संघया नायः शुभकाजी शाक्य व मूछ्याञ्जे संघरत्न शाक्य लगायतया कार्य समितिया सक्रियताय् थुगु ज्याझ्वः सम्पन्न जूगु खः।