नेवाः पत्रकार राष्ट्रिय दबू यल कचाःया दुजः नापं नेपाल टेलिभिजनया पत्रकार ईश्वर महर्जनयात “ललितपुर महानगर गौरव पुरस्कार” पाखे हंगु दु।

यल महानगरपालिकाया १०५ क्वःगु स्थापना दिवसया लसताय् पत्रकार महर्जनयात छगु लाख नगद नाप हनापौं बिया ज्याझ्वःया मूपाहाँ प्रधानमन्त्री पुष्पकमल दाहाल प्रचण्डं हंगु खः।

यल महानगरपालिकाया थीथी गतिविधि बारे प्रशारण नापं सूचना सम्प्रेषण याःगुलि महर्जनयात हंगु खः। महर्जन वंगु २४ दँनिसे नेपाल टेलिभिजनय् ज्या यानादीसे यलया सम्वाददाता कथं ज्या यानाच्वनादीगु खः।

बुद्ध धर्मया गुरु खाङ्सेर रिन्पोछेजुं च्वयाबिज्याःगु सफू ‘बलियो भएर खुसीसाथ बाँचौं’या उलेज्या स्वास्थ्य मन्त्री मोहन बहादुर बस्नेतया पाखेंजूगु दु ।

ज्याझ्वलय् नवासें मन्त्री बस्नेतं संसारय् धन कमेयायेगु मखु, सन्तुष्ट जुयाः म्वायेगु तःधंगु खँ खः अले मानसिक स्वास्थ्यं शारीरिक स्वास्थ्ययात बः बिइ धयादीगु दु । उगु ज्याझ्वलय् लुम्बिनी विश्वविद्यालयया डीन डा. माणिक रत्न शाक्यं व श्रीलंका दुतावासया प्रतिनिधि मधुशां भिंतुना न्वचु बियादिल ।

अथे हे अनुवादक मिलन शाक्यं लसकुस न्वचु बियेगु झ्वलय् उगु सफूया दुने दूगु सन्देशया महत्वया नं चर्चा यानादिल । सफूया च्वमि खाङ्सेर रिम्पोछेजुं झीगु जीवनय् मेपिन्त करुणा तयाः सकसियां भिं जुइमा धकाः मनय् तयाः म्वायेगु हे बुद्धया लँय् वनेगु खः धका धयाबिज्यात ।

उगु सफू थाङ्कार देछ्येन् छ्योलिङ् गुम्बाया ग्वसालय् थुगु सफू पिदंगु खः ।जीवनय् सकारात्मक सोचया विकास यायेगु करुणा चित्तया अभ्यास यायेगु व चिन्ता रहित जुयाः म्वायेगु स्यनेगु थ्व सफूया मूल सन्देश खः धकाः वक्तापिन्सं धाःगु दु । मूल भोट भासं पिदंगु थूगु सफू अंग्रेजी चीनियाँ लगायत मेमेगु भासं नं पिदनेधुंकल ।

संघीयता, गणतन्त्र व धर्म निरपेक्षताया विरुद्ध थीथी कथंया गतिविधि जुयाच्वंगु इलय् थ्व हे खँयात ध्यानय् तयाः नेवाः व तामाङ खलः पुचःतय्सं असं दबुलिइ छगू खबरदारी सभा यागु दु।

सभा यायेगु न्ह्यः भूगोलपार्कंनिसें छगू ¥याली पिकासे असनय् थ्यंकाः सभाय् हिउगु खः । नेवाःतय्गु राष्ट्रिय संगठन नेवाः देय् दबू व थीथी नेवाः खलः पुचःलिसें ताम्सालिङ संघर्ष समितिया मंकाः ग्वसालय् उगु सभा याःगु खः । सभायात सम्वोधन यायेगु झ्वलय् वक्तातय्सं संघीय गणतन्त्र, संघीयता व धर्म निरपेक्षताविरुद्ध गतिविधि यानाच्वंपिं प्रतिगामी शक्तियात खबरदारी यायेगु ज्या जुगु खः ।

उगु ज्याझ्वःया सभाध्यक्षता नेवाः देय् दबूया केन्द्रीय नायः पवित्र बज्राचार्यं यानादीगुलि मूपाहां कथं नेपाली कांग्रेसया नेता लिसें पुलांम्ह रक्षामन्त्री भिमसेनदास प्रधान झाःगु खः । ज्याझ्वलय् थःगु नुगः खँ तयेगु झ्वलय् प्रगतिशील च्वमिं पहिचानवादी समुदायं न्ह्याकाच्वंगु आन्दोलनयात थःगु पूर्ण समर्थन दुगु खँ कनादिल । राज्यपाखें सदियौं न्ह्यवंनिसें यानातःगु उत्पीडिनया विरुद्ध थौं पहिचानवादीत हानं दना वःगु खँ वय्कलं कनादिल ।

आः वनेधुंकूगु राजतन्त्रया भूत हानं थनेगु कुतः जुयाच्वंसां थ्व ताःमलाइगु दावी वय्कलं यानादिल । ताम्सालिङ संघर्ष समितिया नायः लिसें तामाङ घेदुङया नं नायः मोहन गोलें पहिचानसहितया संघीयतायात क्वातुकेत अझ नं आन्दोलन न्ह्यानाच्वंगु दनि धासें प्रदेश १ य् कोशी प्रदेशया नां खारेज यानाः लिम्बुवान प्रदेश घोषणा यायेगु निंतिं जुयाच्वंगु आन्दोलनयात नेवाः व ताम्सालिङया भूमिपाखें ऐक्यबद्धता व समर्थन दुगु खँ कनादिल ।

वय्कलं प्रतिगामी शक्तिया विरुद्ध संघर्ष यायेगु व नेवाः तामाङ भूमिइ नेवाः व ताम्सालिङ प्रदेश घोषणा याकेगु नितिं निरन्तर आन्दोलन यायेगु प्रतिबद्धता पौ नं ब्वनाः न्यंकादीगु खः ।

किपूली दिपया लागा जुयाः मेगु वस्ती वनेत न्हुगु लँ दयेक्यवं बिरोध सुरु जुगु दु। किपू नगरपालिका वडा नंं. ७ स्थित पांगामि तय्गु भाजंगाः दिप संरक्षण यायेत किपूया स्थानीय जनता दना वःगु दु ।

उगु हे दिपया लागा जुयाः कार्की वस्ती वनेगु न्हूगु लँपु दयेका हयेवं स्थानीय मनूतय्सं उकिया विरोध याःगु खः । अन लँ दयेका हल धाःसा लिपा वनाः लँय् वये–वने याइपिंत मछिन धकाः दिपय् मनू उइगु ज्या हे बन्द याके फइगु सम्भावनायात ध्यानय् तयाः स्थानीय जनतां अन लँ पिकाये मजिउगु खँ धयाहःगु दु ।

थथे हे येँय् नं थीथी थासय् लँ खुले जुइवं पिनेयापिं मनूत वयाः च्वं वयेगु क्रम अप्वया वःगु व लिपा उमिसं स्थानीय जनताया परम्परागत दिपय् मनू उइ दइ मखु धकाः हस्तक्षेप याना हःगु खँयात मध्यनजर यासें किपुलिइ नं कन्हय् थ्वहे अवस्था वयेफुगु जूगुलिं आः हे सः तया हःगु खः ।

थुकिया नितिं पत्रकार नजरराम महर्जनया अध्यक्षताय् बिष्णुदेवी चिहान संरक्षण संघर्ष समिति गठन न जुगु दु । उगु संघर्ष समितिपाखें छगू ¥यालीयासे किपू नगरपालिकाया मेयर राजकुमार नकर्मीयात ज्ञापनपौ तक लःल्हाये धुकुगु दु। उगु ज्ञापनपौ लःल्हाना कासें मेयर नकर्मीं किपूमिया थ्व माग पूवंकेत थः तयार दु धका जानकारी बियादीगु खः ।

लिसें उगु दिप जुकाः दयेकेत्यंगु लँया निर्माण ज्या नं दिकेधुंकूगु खँ धाःगु दु । संघर्ष समितिया नायः महर्जनं सामाजिक सञ्जालय् सार्वजनिक यानादीगु कथं अन नक्साय् गनं हे किटान मजूगु थासय् लँ पिकायेगु कुतः जूगु खः ।

उगु थासय् वनेगु लागिं मेगु हे लँ दुसां वहे थासं लँ पिकायेत्यंगु खँय् थःपिनि आपत्ति दुगु खँ नं वय्कलं कनादिल ।भाजंगाःया उगु दिपय् मनू उइबलय् चिता दयेकाः मिँतया थकल धाःसा सीम्ह अथें उइ सिधइ धाइ ।

येँ महानगरपालिकां पसः पसःपतिकं सुर्तीजन्य पदार्थ जफत यायेगु सुरु याःगु दु। येँ सुर्तीजन्य पदार्थ मिइ मदुगु व मिउगु पसलय् अनुगमन यायेगु सुरु खः।

महानगरपालिकां सूर्तीजन्य पदार्थया भण्डारण, बिक्री वितरण व प्रयोग यायेगुलि पूर्ण प्रतिबन्ध तःगु खः। बिहीवाः सुथंनिसे थीथी थासय् महानगर प्रहरीं सुर्तीजन्य पदार्थ जफत यायेगु सुरु याःगु खः।

महानगर प्रहरीं अनुगमनया लागि झीम्ह झीम्हेसिगु टोली परिचालन याःगु दु। अथेह सादा पोशाकय् न प्रहरी परिचालन याःगु दु।