प्रधानमन्त्री नाप नेकपा (एमाले) या अध्यक्ष केपी शर्मा ओलीयात नेपाल भ्रमणय् वयाच्वम्ह चिनियाँ कम्युनिष्ट पार्टीया केन्द्रीय कमिटीया दुजः नाप सिङहाइ प्रान्तया सेक्रेटरी छेन् गांग नेतृत्वया प्रतिनिधिमण्डलं थौ नापलागु दु।

प्रधानमन्त्री निवास, बालुवाटारय् नापलायेगु झ्वलय् निगु देय् व निगु पार्टी दथुइ जुयाच्वंगु सम्बन्धयात अझ बालाकेगु विषय सहलह जूगु खः। प्रधानमन्त्री ओलीं राजनीतिक स्थिरताया निति निगु दल एमाले व नेपाली कांग्रेस दथुइ सहकार्य याना न्हुगु  सरकार गठन जूगु धका धयादीसे नेपाःया आर्थिक विकासय् चीनया मदिक्क ग्वहालि जुइ धका भलसा कयागु धका धयादीगु खः।

चिनियाँ नेता छेन् न नेपाःया राजनीतिक दलतयेस याःगु निर्णय थःपिनिगु सम्मान दु व भ्रमणया झ्वलय् वःगु खँ महासचिव सीयात जानकारी बिइगु जुइ धका धयादीगु खः।

भाषासेवी व नेपाल भाषा एकेडेमीया चान्सलर यज्ञरत्न धाख्वायात छगू लख तकाया हेमराज सिरपाः देछागु दु।

लोक साहित्य परिषदया ग्वसालय् जुगु उगु ज्याझ्वलय् बागमती प्रदेशया सामाजिक विकास मन्त्री हरिप्रभा खड्गीं धाख्वायात सिरपाः लःल्हानादिइगु खः ।उगु ज्याझ्वलय् मन्त्री खड्गीं धाख्वालं नेवाः भाय्, संस्कृति, कला व सम्पदा संरक्षणया ख्यःलय् ज्वः मदुगु योगदान यानादिइगु खँ न्ह्यथनादिल।

“गुबले तक्क लिपिया विकास याये फइमखु, उबलेतक्क भाषा संस्कृतिया विकास नं जुयेफइ मखु, नेवाः व तामाङ भाय्यात सरकारी कामकाजया भाय्या हैसियत ब्यू थें लिपिया प्रवद्र्धन नं याना यंकेगु जिमिगु प्राथमिकता खः।” भाषासेवी धाख्वालं सिरपाः फयेखनाः थः गौरवान्वित जूगु धाःसें सिरपाया ग्वीइद्वः तका लोक साहित्य परिषद्यात लः ल्हानादिल।

एकेडेमीया भाइस चान्सलर मल्ल के सुन्दरं पण्डित हेमराज शाक्यया लिपि संरक्षण व सम्बद्र्धनया ज्यां याना भाषाया ख्यलय् यक्वः हे उपलब्धि हासिल जुइफूगु धासें वय्क थे च्वःन्ह्याम्ह व्यक्तित्व नेवाःतय् गर्व खः धका धयादिल।

सिरपाःया दाता लक्ष्मीशोभा शाक्यं भाषा, साहित्य व संस्कृतिया संरक्षण यायेगु ताःतुना हेमराज सिरपाः नीस्वनागु कनादिल। हरेक निदँ निदँय् बियावयाच्वंगु थ्व सिरपाः न्हेय्न्याद्वः धेबा तना थुगु दँ निसें छगू लख थ्यंकूगु खः।

सहकारी ठगी प्रकरणय् ज्वनातःम्ह राष्ट्रिय स्वतन्त्र पार्टीया सभापति नाप पूर्वगृहमन्त्री रवि लामिछानेयात पोखरा थ्यकूगु दु।

म्हिगः बहनि ज्वना रवियात स्थलमार्ग जुया थौ सुथय् ३ बजे कास्की प्रहरी कार्यालय हःगु खः। रवि हये न्ह्यः जिल्ला प्रहरी कार्यालय कास्कीइ कार्यकर्तात मूनाच्वंगु खः। जिल्ला प्रहरी कार्यालय हये धुका प्रहरीं वयागु स्वास्थ्य परीक्षण याकेत पोखरा स्वास्थ्य विज्ञान प्रतिष्ठानय् यकूगु खः।

जिल्ला अदालत कास्कीं लामिछाने नाप १४ म्ह विरुद्ध पक्राउ पुर्जी जारी याःगु खः। रविविरुद्ध जिल्ला प्रहरी कार्यालय कास्कीं संगठित अपराध व सहकारी ठगीइ मुद्दा न्ह्याकिइगु जूगु दु।

प्रधानमन्त्री केपी शर्मा ओलीं नकतिनिया खुसिबाः, चलः व डुबानं प्रभावित जूपिंत राहत इनेगु व पुनःनिर्माणय् लगे जुइगुया निंति इनाप यानादीगु दु।

वंगु असोज १० निसें १३ गतेतक्क मदिक्क वा वयालिं वःगु खुसिबाः चलः व डुबानं उत्पन्न जूगु परिस्थितियात २०७२ सालया विनासकारी भुखाय् लिपा वःगु विपद् कथं थःम्हसे कयागु खँ कसें प्रधानमन्त्री ओली राहत इनेगु व पुनःनिर्माण न्ह्याःकेगु ज्याय् गम्भीरपूर्वक ज्या यायेत स्वंगु नं तहया सरकार तयेत इनाप यानादिगु दु।

प्रधानमन्त्री व मन्त्रिपरिषद्या ज्याःकू, सिंहदरबारय् थौं च्वंगु विपद् जोखिम न्यूनीकरण व व्यवस्थापन परिषद्या झिंप्यक्वःगु बैठकयात सम्बोधन यासें परिषद्या नं नायः प्रधानमन्त्री ओलीं विपद् प्रभाविततयेगु उद्धार, राहत व पुनः निर्माणया ज्याः गम्भीर ढंग न्ह्याःनाच्वंगु दु धयादिगु दु। “आःया परिस्थितिइ छु यायेमाः व छु याये फइ धइगुू खँय् स्वंगुलिं तहया सरकारपाखें थः वं थः समन्वय याना ज्याः न्ह्याःके माःगु दु,” वयकलं धयादिल – “गुकथं जनतायात फत्तियां फक्वः याकनं राहत व आवास उपलब्ध याये फइ धइगुपाखे झीगु ध्यान वनेमाः।

ग्वहालि यायेगु प्रवृत्ति जगेयाना मिले जुया विपत्तिया सामना यायेमाः।” प्रधानमन्त्री ओलीं मोहनि न्ह्यः जिक्वः कुतः याना अबरुद्ध जुयाच्वंगु सतक चाय्केगु ज्याः ताःलागुलिं भौतिक पूर्वाधार व यातायात व्यवस्था मन्त्रालय, सुरक्षा निकाय व स्वापू दूगु फुक्क पक्षयात सुभाय् नं बियादिल।

राष्ट्रिय स्वतन्त्र पार्टी (रास्वपा)या सभापति रवि लामिछानेयात प्रहरीं नियन्त्रणय् काःगु दु। वनस्थलीस्थित पार्टी केन्द्रीय कार्यालय नं हे लामिछानेयात थौं प्रहरीं नियन्त्रणय् काःगु पार्टीया कार्यबाहक प्रवक्ता मनिष झा नं कनादिगु दु।

सूर्यदर्शन सहकारीया ध्यबा अपचलनय् दुथ्याःगु द्वपनय् अनुसन्धान यायेत कास्की जिल्ला अदालतं प्रहरीयात अनुमति ब्यूगु खः। पूर्वउपप्रधान नाप गृहमन्त्री लामिछानेयात ज्वनेत पक्राउ पुर्जी ज्वना प्रहरीया पुचः पार्टी केन्द्रीय कार्यालय वनस्थलीइ थ्यंकः वंःगु खः।

सूर्यदर्शन सहकारीया संस्थापक गीतेन्द्र बाबु (जीबी) राई नाप मिलेजुया लामिछानें गोर्खा मिडिया नेटवर्कया ध्यबा हया अपचलन याःगु मुद्दाया अनुसन्धान जिप्रका कास्कीं न्ह्याःकाच्वंगु दु। प्रहरीया नियन्त्रणय् लाये न्ह्यः उपस्थित कार्यकर्ता व सञ्चारकःमितयेत बःचाहाकगु प्रतिक्रिया बिसें लामिछानें थःम्हेस्यां छुँ कथंया अपराध मयानागु व न्यायिक प्रक्रियायात ग्वहाली यायेगु धका धाःगु खः।

लामिछोन थःत ज्वंगु घटना देय्या भलसाय् प्रहारयागु दु धका धागु दु।