हेटौँडायात येँ नाप स्वाइगु हेटौँडा–कुलेखानी–फाखेल–सिस्नेरी–येँ सतकय् निखेरं यातायात सञ्चालनय् वःगु दु।

मकवानपुरया इन्द्रसरोवर गाउँपालिका–२ सिमखोलाया सतकय् ह्युमपाइप तया भिंकेगु ज्या धुंका उगु सतकया निखेरं यातायात सञ्चालनय् वःगु मकवानपुर जिल्ला प्रहरी कार्यालयया प्रवक्ता प्रहरी नायब उपरीक्षक श्यामु अर्यालं कनादिगु दु।

वंगु असोज १० निसें १२ गते वगु खुसिबाः व चलखं सतक स्यंगु खः। तत्काल भिंकेगु ज्या न्ह्याका असोज २० गतेनिसें यातायात सञ्चालनय् वःगु खःसां ह्युमपाइप तया कात्तिक २ गतेनिसें तिनि एकतर्फी लँ चाय्केफूगु खः।

नायब प्रहरी महानिरीक्षक किरण राणा प्रहरी अतिरिक्त महानिरीक्षक (एआइजी) पदय् बढुवाया निंति सिफारिश जूगु दु।

गृह मन्त्रालय बढुवा समितिया थौं च्वंगु बैठकं जनपद प्रहरी समूहपाखे प्वनाच्वंगु अतिरिक्त महानिरीक्षक पदय् राणायात बढुवाया निंति सिफारिश याःगु खः।

राणायात प्रहरी नियमावली, २०७१ या नियम २७ या उपनियम ४ कथं बढुवाया निंति सिफारिश यायेगु ज्या जूगु समितिया सदस्य सचिव नाप प्रहरी महानिरीक्षक बसन्त बहादुर कुँवरं कनादिगु दु।

बढुवा सिफारिश जुयादिइम्ह राणा थौंकन्हे प्रहरीया केन्द्रीय अनुसन्धान व्यूरो लाजिम्पाटय् ज्या याना दिइ।

थौ सोमवाः सेयर बजाः परिसूचक नेप्से ५७.९९ ल्याखं कुहावया २६३९ य् थ्यःगु दु। बजाः कुहावया कारोबार रकम न घटे जूगु दु।

म्हिगः ८ अर्ब १८ करोडया कारोबार जूगुलि थौ ५ अर्ब ९० करोड जक कारोवार जूगु दु। २३ गु कम्पनीया भाःथहावंगुलि २२१ गु कम्पनीया भाः कुहावःगु दु। फाइनान्स दकलय् अप्पो ३.३८ प्रतिशतं कुहावःगु दु।

बैंकिङ २.३०, विकास बैंक १.७८, होटल लिसे पर्यटन १.६६, हाइड्रोपावर २.०५, लगानी २.५१, जीवन बीमा २.१५, उत्पादन १.६५, माइक्रोफाइनान्स १.८९, निर्जीवन बीमा १.७६, मेमेगु २.३४ व व्यापार समूह ०.२८ प्रतिशतं घटे जूगु दु।

विन नेपाल लघुवित्तया भाः १० प्रतिशतं थहावःगु दु।अथेहे कर्पोरेट डेभलपमेन्ट बैंक ९.८, कालिका लघुवित्ते ५.५ पिपुल्स हाइड्रोपावर ४.८४, मानुषी लघुवित्त ३.९९ प्रतिशतं थहावःगु दु।

ङादी ग्रुप पावर ९.२, गुडविल फाइनान्स ५.६, छ्याङ्दी हाइड्रा ४.७, इस्टर्न हाइड्रोपावर ४.७, गोर्खाज फाइनान्स ४.६ प्रतिशतं कुहावःगु दु। कारोबार रकमया आधारय् हिमालयन रिइन्स्योरेन्स, ङादी ग्रुप, कुमारी बैंक, गुडविल फाइनान्स व नेपाल फाइनान्स न्ह्यने खने दु।

प्रधानमन्त्री केपी शर्मा ओलीं संस्कृतिदुने राजनीतिया मरि छुइगु प्रवृत्ति गलत जूगु खँ धयादीगु दु।

प्रधानमन्त्री निवास, बालुवाटारय् थौ सोमवाः नेपाल संवत न्हूदँ राष्ट्रिय समारोह समिति ११४५ समारोह समितिं लःल्हाःगु ध्यानाकर्षण पौ लःल्हानाकासें प्रधानमन्त्री ओलीं नेपाःया मौलिक संस्कृति व परम्परादुने राजनीति दुथ्याकाः स्यंकेगु कुतः बांमलाइगु खँ कनादिल ।

“राजनीति व अर्थतन्त्र स्यन धाःसा छुं दँ दुने ल्ह्वने फइ तर संस्कृतिइ ह्याकिं वन धाःसा उकियात ल्ह्वनेत दंदँ माली । थुखेपाखे सकलें सचेत जुइमाः।”, येँयाः थुज्वःगु पर्वय् जूगु गुलिखे भड्कावपूर्ण गतिविधिपाखे लक्षित यासें प्रधानमन्त्री ओलीं नेवाः संस्कृतिदुने आदिवासी, शास्त्रीय व अत्याधुनिक वाद्यवादन व विशेष धूनत दुगु व थुकिया संरक्षणय् जुयाच्वंगु कुतःया प्रशंसा यानादिल।

ध्यानाकर्षण पौ लःल्हायेगु झ्वलय् समितिया नायः लिसें पूर्वमन्त्री राजेन्द्र श्रेष्ठं नेपाल संवत्यात सरकारी ज्याखँय् छ्यलाबुलाय् हयेत २०८० कात्तिक २७ गतेया मन्त्रिपरिषदपाखें जूगु निर्णययात फुक्क तगिं व निकायय् कार्यान्वयन याय्त निर्देशित याय्त माग यानादिल। प्रधानमन्त्री निवास बालुवाटारय् प्रधानमन्त्री ओलीयात समारोह समितिया नायः श्रेष्ठं न्हूदँया लसताय् येँया बसन्तपुरय् कछलाथ्व पारु (कार्तिक १७ गते) शनिवाः जुइगु भिंतुना सभा ज्याझ्वलय् मूपाहाँ कथं झायेत इनाप यासें ब्वना पौ लःल्हायेगु ज्या जूगु खः।अथेहे, प्रधानमन्त्री ओलीयात नेपाल संवतयात कयाः न्हयगू बुँदे ध्यानाकर्षण पौ नं लःल्हाःगु दु।

लःल्हाःगु ध्यानाकर्षण पतिइ नेपाःया नोटय् नेपाल संवत तयेमाःगु, नेपाल संवत सरकारी दस्तावेजय् छ्यलेत याःगु निर्णय कार्यान्वयन यायेगु नितिं सरकारं परिपत्र जारी यायेमाःगु, राष्ट्रिय विभूति शंखधर साख्वाःया नामं राष्ट्रिय सिरपाः घोषणा यायेमाःगु लिसेंया खँ न्ह्यथनातःगु दु।

प्रधानमन्त्री नापलायेगु उगु ज्याझ्वलय् न्हूदँ समारोह समितिया संरक्षक हितकरवीर सिं कंसाकारं नेपाल सरकारं नेपालभाषां नेपाल टेलिभिजनय् समाचार प्रसारण व राससय् नेपालभाषां बुलेटिन प्रकाशन याःगुलिं नेपाल सरकारयात सुभाय् देछानादीगु खः।

थौ श्रेष्ठया नेतृत्वय् न्हूदँ समारोह समितिया संरक्षक नेवाः न्ह्यलुवाः मल्ल के सुन्दर, नेवाः देय् दबूया नायः पवित्र बज्राचार्य, पूर्वमन्त्री लिसें सांसद कृष्णगोपाल श्रेष्ठ, पूर्वराज्यमन्त्री दिलीप महर्जन, नेपाल संवत न्हूदँ राष्ट्रिय संरक्षण समितिया नायः प्रा.डा. नरेशमान बज्राचार्यलिसें थीथी व्यक्तिपिं उपस्थित जुयादीगु खः।अथेहे, राष्ट्रिय विभूति शंखधर प्रतिष्ठानया दुजःपिन्सं नं प्रधानमन्त्री  ओलीयात थौं सोमवाः हे नापलानादीगु दु।

सञ्चार व सूचना प्रविधि मन्त्री पृथ्वी सुब्बा गरुङं राज्ययात शक्तिशाली दयेकेगुलि भाषा व संस्कृतिं तःधंगु भूमिका म्हितिगु जुगुलिं थुकिया संरक्षण यायेमाः धका धयादीगु खः।

राष्ट्रिय समाचार समिति (रासस) पाखें थनिंनिसें न्ह्याःकूगु नेपाल भाषा व मैथिली भाषाया समाचार सेवा शुभारम्भ यासें मन्त्री गुरुङं सरकारं भाषा संरक्षण अभियान सरकार मातहतया सञ्चार माध्यमपाखें न्ह्याःकूगु प्रष्ट यानादिल। फुक्कं क्षेत्रया जनताया नितिं साझा व समान अधिकार बाँडफाँड यायेगु ज्यां राष्ट्रियता प्रवद्र्धन यायेफइ धासें वय्कलं धयादिल – “भ्वँतय् जक मखु जनताया ख्वाःपाः, भाषा व संस्कृतिइ राष्ट्रियता व समावेशी प्रजातन्त्र खने दयेमाः।”

सभ्य, समृद्ध व अखण्ड समाज निर्माण यायेगु अभियानय् थ्वज्यागु ज्या न्हापागु पलाः कथं कायेमाःगु बिचाः प्वंकुसे नेपाः सरकारया नं प्रवक्ता गुरुङं सरकारया सच्छि दिंया ज्याझ्वलय् लानाच्वंगु चांःन्हिं मदिक्क समाचार सेवा बियेगु, संग्रहालय पलिस्था यायेगु व निगू मां भासं समाचार सेवा न्ह्याकेगु जिम्मेवारीयात राससं ताःलाकूगु धासें च्वछाया दिल।

मन्त्रालयया सचिव राधिका अर्यालं नेवाः व मैथिली भासं समाचार पितबिइगु राससया ज्यां उगु समुदायं आत्मसम्मान व गौरब बढे जूगु अनुभूति याइगु भलसा प्वंकाः दिल। राससया नायः धर्मेन्द्र झा नं भाषा व मिडियायात छगू मेगुया नितिं पूरक खः धासें राष्ट्रया बृहत्तर हित स्वया ज्या याइपिं गब्ले बुइमखु धयादिल।

राससया महाप्रवन्धक सिद्धराज राईं नागरिकया सूचनाया हक स्थापित यायेगु ज्याय् राससं ताँपूया भूमिका म्हिताच्वंगु दु धयादिल । भाषा आयोगया दुजः सुरेश किरण मानन्धरं सरकारी सञ्चारमाध्यमपाखें बहुभाषाय् समाचार सम्पे्रषण जुइगु थी थी भाषाभाषी व जातीय समुदायया लागि गौरवया खँ खः धयादिल। मैथिली भाषाविज्ञ प्रा डा योगेन्द्र प्रसाद यादवं छुँ नं भाषायात म्वाकेगु खःसा उकिया छ्यलाबुला याये हे माः धका धयादिल।