बागमती प्रदेश लोकसेवा आयोगया अध्यक्षय् महेश्वर श्रेष्ठयात नियुक्त याःगु दु।

बागमती प्रदेश प्रमुख दीपकप्रसाद देवकोटां श्रेष्ठयात लोकसेवा आयोग ऐन २०७६ या दफा ३ उपदफा (१) कथं गठन जूगु सिफारिश समितिया सिफारिशय् दफा ४ या उपदफा (४) कथं नायः पदय् नियुक्त याःगु खः।

त्रिवेणी गाउँपालिका–१ नवलपरासीइ च्वंनादिइम्ह श्रेष्ठ लुम्बिनी प्रदेशया स्वास्थ्य तालिम केन्द्र बुटवलया निर्देशक जुया ज्यायाना च्वनादीम्ह खः।

राष्ट्रिय समाचार समिति (रासस) पाखें म्हिगः निसे नेपाल व मैथिली भाषाया समाचार सेवा शुभारम्भ जूगु दु । भद्रकाली प्लाजाय् च्वंगु राससया मू ज्याकुथिइ छगू ज्याझ्वःया दथुइ सञ्चार व सूचना प्रविधिमन्त्री पृथ्वी सुब्बा गुरुङं निगुलिं माँभाय् समाचार सेवाया उलेज्या यानादीगु खः।

राससयात समावेशी चरित्र कथं दयेका यंकेगु ताःतुना वंगु कौलाथ्व १३ निसें निगुलिं मां भाय्या समाचार सेवा परीक्षण कथं न्ह्याकावया च्वंगु खः। राससया कार्यकारी नायः धर्मेन्द्र झा नं संविधानया भावना कथं राससयात समावेशी दयेकेगु आज्जुयात नाला थप निगू मां भाय्या समाचार सेवा न्ह्याकूगु खः धका धयादिल।

“राज्यया लगानी दूगु राससपाखें सार्वजनिक च्यूताःया सूचं व जानकारीत आम नागरिकया निंति उमिगु हे भासं थुइका कायेगु अधिकार सुनिश्चित जुइमाः धइगु जिमिगु मनसुवा खः,” नायः झा नं धयादिल । राससं नेपाःया संविधान–२०७२ या मर्मकथं संघीयता व समावेशी अवधारणायात कय्च्यासें २०८० पुस २३ गतेनिसें अवधी भाय्या समाचार सेवा न्ह्याकूगु खः।

उगु सेवा नेपालगञ्ज उपमहानगरपालिकलिसेंया सहकार्यय् न्ह्यागु खः । उकथं हे सञ्चार व सूचना प्रविधि मन्त्रालयया ग्वाहालिइ राससं थप निगू माँ भाय्या सेवा नं न्ह्याकूगु खः । राससया सेवाग्राहीतय् मागया सम्बोधन, समाचार सेवाया विस्तार व विविधीकरणया लिसें अन्तर्राष्ट्रिय सञ्चार माध्यमया ज्वःलिंज्वः थःत थःनेगु कुतःलय् रासस वंगु भदौ १७ गतेनिसें चां न्हिं मदिक्क समाचार सेवा पित बिइधुंकूगु दु ।

राससं थःगु स्थापनाकाल थुखे बुखँ उत्पादन यायेत छ्यःगु ज्याभः व उपकरण संग्रह याना वंगु साउन ३२ गते रासस मिडिया संग्रहालय पलिस्था यायेधुंकुगु दु ।राससया महाप्रबन्धक सिद्धराज राई नं धयादिल – “देय्या नेपाली धुंका अप्वः जनतां ल्हाइगु मैथिली व नेपाल भाषा जूगुलिं संघीय राजधानीयात आधार मानेयाना निगुलिं मां भाय्या समाचार सेवा ह्याकागु खः ।” राससया वरिष्ठ कार्यकारी व्यवस्थापकया कथं निगुलि मां भाय्या समाचार सेवाया प्रारम्भ विविधताया दथुइ एकता मालेगुु व राससयात पूर्ण समावेशी दयेका यंकेगु छगू कुतः खः ।

सहकारी ठगी मुद्दाय् ज्वनातःम्ह पूर्वगृमन्त्री लिसे राष्ट्रिय स्वतन्त्र पार्टी सभापति रवि लामिछानेयात जिल्ला अदालत, कास्कीइ उपस्थिति याकूगु दु।

सूर्यदर्शन बचत तथा ऋण सहकारी संस्था लिमिटेड पोखराया सहकारी ठगी लिसे सङ्गठित अपराधसम्बन्धी मुद्दा सम्बन्धय् अनुसन्धान यायेगु निति लामिछानेयात अदालत उपस्थिति याकूगु खः।

रविया पक्षय् वरिष्ठ अधिवक्तापि सुशील पन्त, नारायण घिमिरे नाप यज्ञमणि न्यौपाने, हेमराज पोखरेल उपाध्याय, कमल पोखरेल, डा. नारायणदत्त कँडेल व लेखनाथ सापकोटां बहस याइगु जूगु दु।

जिल्ला प्रशासन कार्यालय कास्की न तोके यानातःगु निषेधित क्षेत्रय् रास्वपां प्रदर्शन याःगु दु। कास्की जिल्ला अदालत, सहिदचोक आसपास प्रशासनं निषेधित क्षेत्र तोके याना तःगु खः।

निषेधित क्षेत्रय् प्रदर्शन याना च्वनेवं रास्वपायात चिइकेत स्वयेवं प्रहरी व कार्यकर्ता दथुइ ल्वापू जुइगु स्थिति वःगु दु। रास्वपाया नेता कार्यकता तय्स रवियात ज्वंगुलि सहिदचोकय् नाराबाजी यानाच्वंगु दु।

नेपाल संवत न्हूदँ राष्ट्रिय समारोह समिति ११४५ या ग्वसालय् कंस मंगलवाः येँया नेपाः ब्यांक्वेटय् वृहत्त कौला ज्याझ्वः याइगु जूगु दु।

समारोह समितिया सचिवालयं ब्यूगु जानकारी कथं मंगलवाः सुथय् ७ः३० ता इलय् जुइगु उगु कौला ज्याझ्वलय् ११४५ समारोह समितिया नायः राजेन्द्र श्रेष्ठं सकलसित लसकुस याइगु ज्याझ्वः तयातःगु दु।

नेपाल संवत न्हूदँ राष्ट्रिय समारोह समिति ११४५ पाखें न्हूदँया लसताय् न्हूगु नारा सार्वजनिक याःगु दु। नेपाल संवत न्हूदँ राष्ट्रिय समारोह समिति ११४५ या नायः राजेन्द्र श्रेष्ठया नायःसुइ म्हिगः शनिवाः च्वंगु सचिवालय बैठकं थथे न्हूगु नारा तयार याःगु खः।

समारोह समितिं थुगु दँया नारा कथं “राष्ट्रिय एकताया संस्कार, नेपाल संवत् खः आधार” धकाः ब्यूगु दु।