येँयाः पुन्ही कुन्हु थौ रथ थनेपाखे सालिइगु जुगु दु। थौ रथ बसन्तपुरं रथ सालां प्याफल, यटखा, न्यत, टेगल, थाय्मदु, असं, जनबहाः हनुमानध्वाका जूया बसन्तपुरय् थ्यका क्वचाइ।

येँयाः कुन्हु कुमारी रथयात्रा न्ह्याःगु दु। म्हिगः येँया बसन्तपुरं क्वःने याः न्यायेकेगु कथं कुमारी रथयात्रा न्ह्याःगु खः। कुमारी, भैरव व गणेशया रथयात्रा नं न्ह्याःगु खः। उगु रथयात्राय् राष्ट्रपति रामचन्द्र पौडेल, प्रधानमन्त्री केपी शर्मा ओलीलिसें मन्त्रीपिं जात्रा स्वयेत वःगु खः।

येँ महानगरपालिकाया उपप्रमुख सुनिता डंगोलं राष्ट्रपति व प्रधानमन्त्री लिसें थीथी व्यक्तिपिन्त लसकुस याःगु खः ।क्वःने याः कथं येँया चिकंमू, ज्याबहाः लगं, ब्रम्हत्वाः जुयाः ह्यूमत, भिन्द्यःत्वाः जुयाः बसन्तपुर तक रथ सालेगु याइ।

धरहरा असोज ३ गतेनिसे अस्थायी कथं सञ्चालन जुइगु दु।बिहीवाः च्वंगु मन्त्रिपरिषद बैठकं संविधान दिवशया लसताय् थ्व हे असोज ३ गतेनिसे धरहरा अस्थायी कथं सञ्चालनय् हयेगु निर्णय यागु दु धका छम्ह मन्त्रीं धाःगु दु।

पिने स्वय् वलय् पुलागु हे डिजाइनय् ११ तला खने दु सा धरहराय् आःयागु संरचना २२ तलाया दु। थुकिया उचाइ जमिनपाखे ८३.५८ मिटर दु। १९९० सालय् धरहरा ११ तल्लायागु खः। वया लिपा निगु तल्ला जूया गूगु तल्ला जक जुगु खः।

आः निगु लिफ्ट जडान याःगु दु।

बागमती प्रदेशया राष्ट्रभाषा ऐनयात कार्यान्वयन यायेगु नितिं विज्ञ पुचः व प्रतिष्ठान याकनं हे गठन यायेगु जुइ धकाः बागमती प्रदेशया मुख्यमन्त्री बहादुर सिंह लामां धयादीगु दु।भाषा ऐन कथं तत्काल हे बागमती प्रदेशया संसदय् नेपालभाषा व तामाङ भाषा अनुवादकत निम्ह नियुक्ति यायेगु प्रक्रिया न्ह्यानाच्वंगु दु धयादिसें राष्ट्रभाषा ऐनयात पूर्ण रुपं कार्यान्वन यायेगु जुइ धकाः नं धयादीगु दु।

नेवाः देय् दबू स्वनिगः विशेष प्रदेशया नायः श्रीकृष्ण महर्जन, नेपाल तामाङ घेदुङया बागमती प्रदेशया नायः लिला कुमार घलान तामाङ व देय् दबू बागमती प्रदेशया नायः विष्णुगोपाल महर्जनं मंकाः कथं ऐन लागू यायेगु नितिं विज्ञ पुचः व प्रतिष्ठान गठन यायेत ध्यानाकार्षण पौ लःल्हानादीगु इलय् मुख्यमन्त्री लामां अथे धयादीगु खः।बागमती प्रदेशया राजधानी हेटौंडाय् मुख्यमन्त्री एवं मन्त्री परिषद ज्याकुथिइ हे वना बुधवार मुख्यमन्त्रीयात ध्यानाकर्षण पौ लःल्हाःगु खः।

ध्यानाकर्षण पतिइ २०८० साल कार्तिक २३ गते ऐन प्रकाशित जूगु झिला दये धुंकूगु अले उगु ऐन लागू जुल धकाः घोषणा याःगु प्यला दये धुंकूगु अवस्थाय् नं ऐनया दफा १३ कथं विज्ञ समुह व दफा १५ या व्यवस्था कथं राष्ट्रभाषा विकास प्रतिष्ठान गठन मजूगुलिं उगु प्रावधान कथं याकनं गठन यायेत माग यानातःगु खः।

नेवाः देय् दबूया स्वीक्वःगु बुसादँय् थीथी व्यक्तिपिंत थीथी सिरपाः व सम्मान लःल्हागु दु।

स्वीक्वःगु बुसादँया लसताय् भाषा, कला, साहित्य, लिपि संस्कृतिया इलय् ज्वःमदुगु योगदान बियादीपिं व्यक्ति व संघसंस्थायात छगू लख तका दांया थीथी सिरपाः लःल्हाःगु खःसा भाषा व कासा ख्यलय् अन्तर्राष्ट्रियस्तरय् योगदान बियादीपिंत हनेज्या याःगु खः।

देय् दबूया नायः पवित्र वज्राचार्यया सभाध्यक्षताय् जूगु ज्याझ्वलय् बागमति प्रदेशया कृषि तथा पशुपछि विकास मन्त्री प्रकाश श्रेष्ठ मूपाहां, बागमति प्रदेशया सामाजिक विकास मन्त्री हरिप्रभा खड्गी श्रेष्ठ विशेष पाहां व येँ महानगरपालिकाया उपप्रमुख सुनिता डंगोल पाहांकथं झायादीगु खः। देय् दबूया नायः वज्राचार्यं मूपाहां बागमति प्रदेशया मन्त्री श्रेष्ठयात नेवाः परम्पराकथं बेतालि चिकाः लसकुस यानादीगु खः।

ज्याझ्वलय् नेपाल संवतया तिथियात कोडिङ डिकोडिङया माध्यमं कम्प्युरट प्रणालीइ दुथ्याकेत मू भूमिका म्हितादीम्ह प्रा.डा.ई भगवानदास मानन्धरयात नारायणदेवी तीर्थ समाज सेवा सिरपाः लःल्हाःगु खः। अथे हे गिरिधरलाल नेपालभाषा सेवा सिरपाः नेपाल लिपिया प्रचारलिसें खोज अनुसन्धान व अन्वेषण याना वयाच्वनादीम्ह वरिष्ठ अन्वेषक काशिनाथ तमोटयात, नारायण देवी तीर्थ व्यवसायी प्रोत्साहन सिरपाः थसिया परम्परागत सुकू व्यवसायीपिन्त हनापौ नाप म्हतिं छगू छगू लख तका दांया लःल्हागु खः।

बागमति प्रदेशया सांसदलिसें पुलांम्ह मन्त्री शैलेन्द्रमान वज्राचार्य, पेरिसय् पारा ओलम्पिकय् ऐतिहासिक कास्य पदक त्याकादीम्ह पलेसा गोवद्र्धन श्रेष्ठ, अन्तर्राष्ट्रिय कराते कासाय् पदक त्याकादीम्ह केदारेश्वरमान स्थापित, गुगलय् नेपालभाषा अनुवाद थुथ्याकेत महत्वपूर्ण भूमिका म्हिता वयाच्वंगु वल्र्ड नेवाः अर्गनाइजेनसयात नं हनेज्या याःगु खः।

पुरस्कृत व्यक्तित्वपिं व सम्मानित व्यक्तित्वपिंत देय् दबूया नायः वज्राचार्यं बेतालिं चिकाः लुमन्ति चिं लःल्हानादीगु खःसा विशेष पाहां बागमति प्रदेशया सामाजिक विकास मन्त्री हरिप्रभा खड्गी श्रेष्ठ व देय् दबूया संरक्षक मल्ल के. सुन्दरं दोसल्ला न्ययेकादीगु खः। अथे हे मूपाहांपाखें हनापौ लःल्हाःगु खःसा पुरस्कृति व्यक्तित्वपिंत दाताया प्रतिनिधिपिंसं दां लःल्हानादीगु खः।

प्रधानमन्त्री केपी शर्मा ओलीं नेपाली कांग्रेस सभापति शेरबहादुर देउवायात बुदिंया भिंतुना देछानादीगु दु।

थौ बालुवाटारय् जूगु स्वंगू दलया नेता तयेगु दथुइ सहलह यायेगु बुदिंया भिंतुना बियादीगु खः।