बाग्मती प्रदेशय् नेपालभाषा लागू याःगुयात लसकुसयासें लसता प्वंकेगु ज्या नापं बाग्मती प्रदेशया सांसदपिन्त सुभाय् देछाय्गु ज्या म्हिगः सोमवाः येँया केल त्वालय् जूगु दु।

उगु ज्याझ्वःया मूपाहां नेवाः देय् दबूया केन्द्रीय नायः पवित्र बज्राचार्यं नेपाभाषाया प्यगः थापिं म्वानाच्वंगु खःसा थौं वय्कःपिं तसकं लयताइगु खः। नेपालभाषायात बाग्मती प्रदेशय् कामकाजि भाषा कथं लागू यायेगु नितिं विधेयक पारित याःगु तसकं लसताया खँ खः धका धयादीगु खः।

स्थनीय सरकारं भाषायात मान्यता बिइगु ज्या याःसां नं लागू याये फयाच्वंगु मदु धयादिसे मूपाहां बज्राचार्यं थुकिया कारण राज्य सत्तां दमनया कारणं अधिकार प्रयोग याये मफुगु अवस्था वल आः अधिकार छ्यलेगु नितिं नेवाःतसें थःगःगु छेँय् मस्तय्त नेवाः भाय् छ्यलेमाः धकाः धयादिल ।

अथे हे पाहां वाग्मती प्रदेशया सांसद वसन्त मानन्धरं बाग्मती प्रदेशपाखें आः तकया दुने ५० गू कानुन दयेके धुंकूगु खँ न्हयथसें थुगु कानुन आः तकया मध्ये विशेष कानुन खः धयादिसें संघीयतायात लागू यायेगु कथंया विशिष्ट कानुन खः धयादिल । वय्कलं व्यवहारय् लागू यायेगु सवलय् समस्यायात कया सचेत जुइमाःगु खँ न्ह्यथसें थुगु कानुन कार्यान्वयन याये मफत धाःसा दस्तावेजय् जक सिमित जुइफु धकाः धयादिल । अथे हे बाग्मती प्रदेशया मेम्ह सांसद शैलेन्द्रमान बज्राचार्यं आः भाषा ऐन कार्यान्वयन नितिं सकले छँप्प छधी जुइमाःगु धयादिल ।

भाषा विधेयकयात पारित यायेमाः धकाः हे थः भाषा विधेयक सहलह ब्याकीगु समितिइ हे थः च्वनागु खः धयादिसें सकल नेवाःत छप्पँ जुया न्ह्याः वनेमाः धकाः बः बियादिल ।

ज्याझ्वःया मूवक्ता देय् दबू स्वनिगः विशेष प्रदेशया नायः श्रीकृष्ण महर्जनं बाग्मती प्रदेशय् भाषा सम्वन्धि विधेयक प्रस्तूत जुयाच्वंगु इलय् येँय् च्वना व हे विधेयकयात कया भाषा बैज्ञानिक नापं कानुनविद्त लिसे सहलह ब्याका निश्चित ईया दुने संशोधन यायेमाःगु जुया चांचां प्रदेशया राजधानी हेटौंडाय् वना संशोधन यायेगु नितिं सांसदतलिसे सहलह ब्याकेगु ज्या जूगुलिं विधेयक तसकं बांलाक संशोधन जुया वःगु खः धयादिसें सांसदपिन्त सुभाय् देछायादिगु खः। वय्कलं भाषा विधेयकं नेवाः भाय्यात बाग्मती प्रदेशया कामकाजि भाषाया रुपय् मान्यता बिइगु जक मखु नेवाःतय्गु लिपियात नं विकास याना यंकेगु अले प्रदेशय् दुगु मेमेगु भाषायात नं विकास याना यंकेगु नितिं ज्या यायेगु ज्या जुइ धयादिल ।

अथे हे नेपाल संवतया आन्दोलनया भावना कथं आवंलि बाग्मती प्रदेशसभां नेपाल संवतयात तकं लागू याइ धयादिसें आःया अवस्थाय् नेपालय् भाषा नीति संघ सरकारयात दयेकेबिइगु, स्थानीय सरकारयात नं भाषाया कानुन दयेके बिइगु नितिं भूमिका म्हितेगु ई वल धयादिल । देय् दबू स्वनिगः विशेष प्रदेशया नायः महर्जनं संघ सरकारयात तकं आः सम्वत सम्वन्धि कानुन दयेके बिइगु नितिं सकल नेवाःत छप्पँ जुया वनेमाः धकाः बः बियादिल । येँ जिल्ला समितिया नायः धनबहादुर महर्जन तिमिलाया सभाध्यक्षताय् जुगु ज्याझ्वलय् नासः दबुलिइ मैनमत च्याका लसता प्वंकूगु खः ।

नेपाल संबत् आन्दोलनया छम्ह कार्यकर्ता, नेपाल संबत् न्हूदँ राष्ट्रिय समारोह समितिया न्हिल्याःपौ पिथना समितिया तःदँ न्ह्यःनिसें कजिया भाला कयाः ज्या याना च्वनादीम्ह भाषासेवी देवदास मानन्धर मत्यवं मदुगुलिं नेपाल संबत् आन्दोलनया सकल जःपिं लिसें नेपाल संबत् न्हूदँ राष्ट्रिय समारोह समिति मर्माहत जूगु दु धका धाःगु दु।

वय्कःया पुण्य आत्मा सुखावति भुवनस बास लायेमा धकाः कामना यासे व दुखं बज्रपात सहयाये मालाच्वंपिं छेँजःपिन्त संसारया अनित्यता लुमंका धैर्यधारण यायेगु शक्ति दयेमाः धकाः नं कामना याःगु दु। नेपाल संबतयात व्यवहारय् गुकथं छ्यलाबुलाय् हयेफइ धैगु खँय् शोध, अध्ययन, अनुसन्धान व अभियानय् थःगु जीवनपानादीम्ह छम्ह न्ह्यलुवाः चिन्तक, नेपालभाषां शिक्षाया अधिकार कायेत जूगु अभियानया छम्ह न्ह्यलुवा भाषासेवी, नेपाल लिपियात युनिकोड दयेकेगु ज्याय् न्ह्यलुवा, दाफा भजनलिसें नेवाः साँस्कृतिक जागरणया नितिं क्रियाशिल वय्कःया योगदान सदां लुमनाच्वनागु दु धका धाःगु दु।

नेपाल संबतयात व्यवहारिक कार्यान्वयनया ज्याय् अझं ल्यं दनिइगु, थ्व अभियानय् वय्कः न्ह्याब्लें झीत हपाः तिबः बिइत झीगु नुगलय् म्वानाच्वनी धैगु खँ कनाच्वना । लिसें नेपालभाषा व नेवाः आन्दोलनं वय्कः दिवंगत जुयादिइगुलिं अपुरणिय क्षति जूगुं महसुस यानाच्वंगु दु धका समाहरो समितिपाखे बिज्ञप्ती पिकागुलि धयातःगु दु। नेपालभाषा, कला, सँस्कृतिया बिकास यायेगु ज्याय् अतिकं नुगः क्वसाम्ह वय्कः न्हूगु पुस्तायात सदां हःपा व तिबः बियाः वयाच्वनादिइम्ह, मातृभाषा शिक्षाया नितिं वय्कःया कुतलय् गठन जूगु शिक्षा गुथिया अभिष्ट अभंm पूवंगु मदुनि।

बागमती प्रदेश सरकारं नेपालभाषायात कामकाजी भाषा कथं छ्यलाबुलाय् हयेगु ऐन पारित यायेधुंकुगु थुगु इलय् उगु ऐनया प्रावधानया व्यवहारिक कार्यान्वयनया ज्या ताःलाकेत वय्कः प्रेरणा जुयाः झी दत्थुइ म्वानाच्वनी धैगु मान्यता  समारोह समितिं कयागु दु धका उल्लेख यानातःगु दु। वय्कःया बिचाः व म्हगस पूवंकेत झी क्रियाशिल जुइगु संकल्प यायेगु हे मदुम्ह देवदास मानन्धरप्रति सच्चा श्रद्धाञ्जलि जुइ धैगु खँ काच्वना धका समारोह समितिया नायः प्रा.डा. नरेशमान बज्राचार्यं पिकागु बिज्ञप्ती  धयातगु दु।

न्हुदँ ने.सं. ११४४ व स्वन्तिया लसताय् नेवाः पत्रकार राष्ट्रिय दबू यल कचापाखे भिंतुना कालबिल व स्थानीय तहनाप नेवाः पत्रकार राष्ट्रिय दबूया भूमिका विषय सहलह ज्याझ्वः जूगु दु।

यल महानगरपालिकाया कार्यवाहक मेयर मन्जली शाक्य मूपाहाँ कथं झायादीगु उगु ज्याझ्वः जुगु खः।

पत्रकार दबू यल शाखाया नायः मन्जु बज्राचार्यया सभाध्यक्षताय् जुगु उगु ज्याझ्वलय् मूपाहाँ कार्यवाहक मेयर उपमेयर शाक्यं नेवाः पत्रकारिता ख्यःया विकास व थ्व ख्यःलिसे स्थानिय सरकारया स्वापू क्वातुकाः यंकेगु निंतिं थःम्हं ग्वाहालि यायेत तयार धकाः धयादीगु खः।

अथेतु, नेवाः पत्रकारिता ख्यःया निंतिं स्थानिय सरकारं छु यायेफइ धइगु लँ मालेत दुग्यंक सहलह याना न्ह्यावनेमाः धका धयादिगु खः। उगु ज्याझ्वलय् नेवाः पत्रकार राष्ट्रिय दबूया केन्द्रीय वरिष्ठ न्वकू सुनिल महर्जन, यल महानगरपालिकाया प्रवक्ता नाप वडा ९ या वडाअध्यक्ष राजु महर्जन, १६ वडा अध्यक्ष निर्मलरत्न शाक्य व वडा २६ वडा अध्यक्ष सुरेश महर्जन, ग्वसाः खलःया सल्लाहकार पत्रकार दबूया निवर्तमान नायः सुरजबीर बज्राचार्य, नेपालभाषा मंकाः खलः यलया नायः हिराकाजी महर्जनं स्थानिय सरकार व सन्चार जगतया विषयस थीथी खँ कनादीगु खः।

दाँभरीं कल्पना महर्जनं लसकुस यानादीगु उगु ज्याझ्वलय् नायः मन्जु बज्राचार्यं सुभाय् बियादीगु खः।

समाजवादी मोर्चा, कीर्तिपुर नगर समितिं विकासमुखी, जनमुखी, प्रभावकारीे कार्यसम्पादनया माग यासे किपू कीर्तिपुर नगरपालिकायात १९ बुँदै ज्ञापनपौं लःल्हागु दु।

किपू नगरपालिकाया प्रमुख राजकुमार नकर्मीयात सोमवाः छगु ज्याझ्वः दथुइ मोर्चाया अनुगमन समितिया संयोजक प्राडा शिवशरण महर्जनं उगु ज्ञापनपौ लःल्हाःगु खः। ज्ञापनपौ लःल्हाना कयादीसे किपू नगरप्रमुख नकर्मीं नगरपालिकाया कार्यक्षेत्रभित्र दुने दुगु समस्याय् याकन हे सम्बोधन यायेगु प्रतिबद्धता यानादीगु खः।

नगरया विकास, व्यवस्थित व समृद्धिया लक्ष्यया लागि थःगु अडान दु धका धयादीसे वयकलं बजेट विनियोजन मजुगुलि विकासया गतिविधि ठप्प जूगु धका धयादीगु खः। किपूलि स्नातकतक निशुल्क शिक्षाया लागि नगरपालिकां बालागु ज्या यानागु खँ कनादीसे वयकलं थःगु घोषणापत्र कथं अप्पो थे दक्को ज्या प्राविधिक शिक्षालय स्थापना याये मफुगु धका धयादीगु खः।

सङ्घीय सरकारं विकास निर्माणया ज्या यायेगु इलय् लँय् प्रदूषण जूगुलि याकन हे सम्बन्धित निकायया ध्यानाकर्षण याना समाधान यायेगु धका धयादीगु खः। सत्ता साझेदार नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी, नेपाल व नेत्र विक्रम चन्द नेतृत्वया नेपाल कम्युनिष्ट पार्टीया स्थानीय नेता तय्से ल्हाःचिं तयातःगु ज्ञापनपौ लःल्हाःगु खः।

प्रधानमन्त्री पुष्पकमल दाहाल प्रचण्डं नेपाःया मौलिक संवत नेपाल संवत हे जूगु विक्रम संवत आयातित संवत खः धका धयादीगु दु। वय्कलं नेपाल संवत नेपाः देय्या संवत जूगुलिं थःपिन्सं थुगु संवतयात नेपाल संवत राष्ट्रिय संवतया मान्यता बियाः घोषणा यानागु खँ कनादीगु दु।

नेपाल संवत न्हूदँ राष्ट्रिय समारोह समितिं थौं सोमवाः प्रधानमन्त्री प्रचण्डयात नापलानाः न्हूदँया लसताय् कछलाथ्व पारु कार्तिक २८ गते बसन्तपुरय् जुइगु भिंतुना सभा ज्याझ्वलय् मूपाहाँ कथं ब्वनापौ लःल्हायेगु ज्याझ्वलय् प्रधानमन्त्री प्रचण्डं उगु खँ कनादीगु खः । वय्कलं नेपाल संवतयात सम्मान यायेगु कथं सरकारं ज्याखँ न्ह्यःने यंकेगु विचाः नं तयादीगु खः।

समारोह समितिया नायः प्रा.डा. नरेशमान बज्राचार्यं नेपाल संवतया आन्दोलनपाखें याःगु आपालं माग थीथी प्रधानमन्त्री जूपिनिगु पालय् पूवंकेगु जुयाच्वंगु खँ कनादिसें न्हूदँ ११४४ निसें नेपाल सरकारया मन्त्रिपरिषदया बैठकया निर्णय पुस्तिकाय् (माइन्युटय्) नेपाल संवत नं च्वयाः थुगु संवतयात सम्मान यायेत इनाप यानादीगु खः।

अथेहे, तत्कालीन संस्कृतिमन्त्री जीवनराम श्रेष्ठं सरकारपाखें शंखधरया नामं सिरपाः बिइगु नितिं निर्णय याःगु शंखधर सिरपाः कार्यान्वयन यायेत इनाप यानादीगु खः। प्रधानमन्त्री प्रचण्डं समारोह समितिं याःगु थुगु इनापयात सहर्ष स्वीकार यासें न्हूदँया सभाय् सम्भवतः सरकारपाखें थ्व निगुलिं इनाप कार्यान्वयन यायेगु बचं बियादीगु दु । लिसें वय्कलं न्हूदँया भिंतुना सभाय् थःपिं वयेगु वचं बियादीगु खः ।

समारोह समितिया नायः प्रा.डा. बज्राचार्यया नेतृत्वय् प्रधानमन्त्री प्रचण्ड नापलायेत वंगु उगु पुचलय् पूर्व रक्षामन्त्री भीमसेनदास प्रधान, पूर्व स्थानीय विकास व प्रशासनमन्त्री राजेन्द्र श्रेष्ठ, पूर्व संस्कृतिमन्त्री जीवनराम श्रेष्ठ, पूर्व महान्यायाधिवक्ता मुक्ति प्रधानलिसें नेवाः देय् दबूया नायः पवित्र बज्राचार्य व समारोह समितिया सचिवालय दुजःपिं उपस्थित जूगु खः ।